Re Ithuta’ng ho Jesu

Mabapi le “Bofelo”?

Ho tla fela eng?

Barutuoa ba Jesu ba ile ba mo botsa: “Pontšo e tla ba efe ea ho ba teng ha hao le ea qetello ea tsamaiso ea lintho?” (Matheu 24:3) Ha a arabela potso eo, Jesu ha aa ka a re lefatše ka bolona le tla fela. Pejana ha a bua ka mekhatlo eohle eo e seng ea bolumeli le ea bolumeli e laoloang ke Satane o ile a sebelisa polelo “tsamaiso ea lintho.” (Matheu 13:22, 40, 49) Ke eona tsamaiso eo a neng a bua ka eona ha a re: “Bofelo bo tla tla.”—Matheu 24:14.

Jesu o ile a hlalosa bofelo joang?

Bofelo ba tsamaiso ena e sa lokang ke “litaba tse molemo.” Jesu o ile a re: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.” Jesu o ile a hlalosa bofelo ba tsamaiso ea hona joale tjena: “Ho tla ba le matšoenyeho a maholo ao a kang ’ona a e-s’o ka a e-ba teng ho tloha tšimolohong ea lefatše ho fihlela joale, che, leha e le hore a tla ba teng hape. Ha e le hantle, hoja matsatsi ao a se ke a khutsufatsoa, ha ho nama e neng e tla pholoha.”—Matheu 24:14, 21, 22.

Ho tla timetsoa bo-mang?

Ho tla timetsoa feela batho ba sa rateng Jehova le Jesu le ba sa ba sebeletseng. Batho bao ha ba mamele Molimo. Jesu o ile a re: “Etsoe feela kamoo matsatsi a Noe a neng a le kateng, ho ba teng ha Mor’a motho ho tla ba joalo. Etsoe [joaloka] matsatsing ao pele ho moroallo, . . .[ha baa ka] ba elelloa ho fihlela moroallo o tla ’me o ba hohola bohle.” (Matheu 24:36-39) Jesu o ile a re ba bangata ba tsamaea tseleng e isang timetsong. Leha ho le  joalo, o ile a tiisa hore ho na le tsela e ‘patisaneng e isang bophelong.’—Matheu 7:13, 14.

Tsamaiso ee ea lintho e tla fela neng?

Ha a botsoa ka pontšo ea ho ba teng ha hae le ea “qetello ea tsamaiso ea lintho,” Jesu o ile a araba ka ho re: “Etsoe sechaba se tla tsohela sechaba matla le ’muso o tla tsohela ’muso matla, ’me ho tla ba le likhaello tsa lijo le litšisinyeho tsa lefatše . . . ’me ka lebaka la ho eketseha ha tlōlo ea molao lerato la ba bangata le tla fola.” (Matheu 24:3-12) Kahoo litaba tsohle tse bohloko tse etsahalang kajeno li na le molaetsa o khothatsang—li bontša hore haufinyane ’Muso oa Molimo o tla tlisetsa batho ba mamelang khotso. Jesu o ile a re: “Ha le bona lintho tsena li etsahala, le tsebe hore ’muso oa Molimo o haufi.”—Luka 21:31.

U lokela ho etsa eng?

Jesu o boletse hore Molimo o ile a “fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.” (Johanne 3:16) E le hore u bontše tumelo ho Molimo le mora oa hae, u tšoanela ho ba tseba hantle. Ka lebaka leo Jesu o ile a re: “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete, le ka eo u mo romileng, Jesu Kreste.”—Johanne 17:3.

Ela hloko hore u se ke ua lumella matšoenyeho le mathata ho u thibela ho ithuta ka Molimo le ho bontša lerato la hao ho eena. Jesu o ile a re: “Ikeleng hloko hore le ka mohla lipelo tsa lōna li se ke tsa imeloa ke . . . matšoenyeho a bophelo, ’me ka tšohanyetso letsatsi leo la e-ba holim’a lōna hang-hang joaloka leraba. Etsoe le tla tla.” Haeba u ela hloko keletso ea Jesu u tla “phonyoha lintho tsena tsohle tse reretsoeng hore li etsahale.”—Luka 21:34-36.

Hore u fumane boitsebiso bo eketsehileng, bala khaolo ea 9 bukeng ea Ha e le Hantle ke Eng Seo Bibele e se Rutang?, * sehloohong se reng “Na re Phela ‘Matsatsing a ho Qetela’?”

[Mongolo o botlaaseng ba leqephe]