U kaʼansajoʼob Jesús

«U xuul yóokʼol kaab»

¿Baʼax u kʼáat u yaʼal le tʼaan «u xuul yóokʼol kaab[oʼ]»?

Utéenjeakileʼ u disipuloʼob Jesuseʼ tu kʼáatoʼobtiʼ «baʼax chíikulal bin u yeʼes [u] taalbal yéetel u xuul yóokʼol kaab» (Mateo 24:3). Le ka tu núukaj Jesús le baʼax kʼáataʼabtiʼoʼ maʼ tu tsʼáaj naʼatbil wa letiʼe yóokʼol kaab kun xuʼulsbiloʼ. Letiʼeʼ tsʼokaʼaniliʼ u yáax meyajtiʼ le tʼaan «u baʼaloʼobil le yóokʼol kaab», utiaʼal u tʼaan tiʼ tuláakal le gobiernoʼob, le religionoʼob yéetel le sen ayikʼalil yaan teʼ yóokʼol kaab nuʼuktaʼan tumen Satanasoʼ (Mateo 13:22, 40, 49). Bey túunoʼ le ka tu yaʼalaj: «Letiʼ túun ken taalak u xuul[oʼ]», táan kaʼach u tʼaan tiʼ tuláakal le baʼaxoʼob yaan yáanal u páajtalil Satanasoʼ (Mateo 24:14).

¿Bix kun úuchul?

Utiaʼal Jesuseʼ u xuʼulsaʼal tiʼ tuláakal le baʼaloʼob kʼaastak ku beetaʼal way yóokʼol kaabaʼ, baʼaloʼob jach jeʼel u kiʼimakkúuntik u yóol uláakʼ máakoʼobeʼ, le oʼolaleʼ tu yaʼalaj: «U maʼalob péektsil le [reino] bíin tseʼektaʼak tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob; letiʼ túun ken taalak u xuul». Jesuseʼ tu yaʼalaj xan bix kun úuchul: «Bíin yanak táaj yaʼab mukʼyaj jeʼel bix mix juntéen yanak káajik yóokʼol kaab, mix bíin yanak uláakʼ ku tsʼoʼokol le jeʼeloʼ. Wa Jajal Dios maʼ tu kóomkintik le kʼiinoʼoboʼ, mix máak bíin toʼokok» (Mateo 24:14, 21, 22).

¿Yaan wa máax ken u salvartuba?

Yaan u xuʼulsaʼal tiʼ le máaxoʼob maʼ u yaabiltmoʼob Jéeoba yéetel Jesús, mix tech u beetkoʼob le baʼax ku yaʼalik le Bibliaoʼ. Cristoeʼ tu yaʼalaj: «Jeʼel bix úuchik tu kʼiiniloʼob Noeeʼ, bey xan bíin úuchuk le ken taalak u Paal Máak. Tiʼ le kʼiinoʼoboʼ, maʼiliʼ taalak le búulkabaloʼ [...] maʼ tu naʼatajoʼob mix baʼaliʼ tak le  kʼiin ka taal le búulkabaloʼ ka láaj bisaʼaboʼob» (Mateo 24:36-39). Jesuseʼ tu yaʼaleʼ yaʼab máaxoʼob ku binoʼob tu bejil le xuʼulsajiloʼ, baʼaleʼ tu yaʼalaj xaneʼ yaan upʼéel «nuʼutʼ [...] bej ku bin tiʼ kuxtal» (Mateo 7:13, 14).

¿Baʼax kʼiin ken úuchuk?

Le ka kʼáataʼabtiʼ baʼax kun eʼesik u taalbal «yéetel ken xuʼuluk yóokʼol kaab[eʼ]», Jesuseʼ tu yaʼalaj: «Tumen jumpʼéel kaajeʼ yaan u bin baʼateʼel tiʼ uláakʼ kaaj, yéetel jumpʼéel luʼumeʼ yaan u baʼateʼel tiʼ uláakʼ luʼum; yéetel yaan u yantal wiʼijil, kʼojaʼanil yéetel kíilbal luʼum [...]. Tu yoʼolal le yaʼab kʼaasil kun antaloʼ, yaʼab kun u jáaws u yaabiltikubaʼobiʼ» (Mateo 24:3-12). Le baʼaloʼob kʼaastak ku yilaʼal bejlaʼa teʼ noticiaʼoboʼ ku yeʼeskoʼobeʼ jach taʼaytak u tsʼáaik Dios le gobierno ken u taas kiʼimak óolal tiʼ tuláakal máakoʼ. Jesuseʼ tu yaʼalaj: «Ken a wileʼex táan u yúuchul le baʼaloʼobaʼ, ojéelteʼex u [reino] Jajal Dioseʼ naatsʼ yanil» (Lucas 21:31).

¿Baʼax unaj k-beetik utiaʼal k-salvartikba?

Dioseʼ «tu tsʼáaj u juntúuliliʼ Paal, utiaʼal tuláakal le máax ku yoksik u yóol [wa ku tsʼáaik u fe] tiʼeʼ maʼ u saʼatal, baʼaleʼ ka yanak kuxtal minaʼan u xuul tiʼ» (Juan 3:16). Utiaʼal u tsʼáaik máak u fe tiʼ Dios yéetel tiʼ u Hijoeʼ unaj u kʼaj óoltik maʼalob. Le oʼolaleʼ Jesuseʼ tu yaʼalaj: «Le kuxtal minaʼan u xuuloʼ letiʼ lelaʼ: ka u kʼaj óoltoʼob teech chéen juntúuliliʼ Jajal Dios, yéetel ka u kʼaj óoltoʼob Jesucristo le máax ta túuxtajoʼ» (Juan 17:3).

Tuláakal le baʼaxoʼob tsʼoʼok k-ilkaʼ ku yeʼesiktoʼoneʼ maʼ unaj k-chaʼik tiʼ le talamiloʼob yéetel le chiʼichnakiloʼob u beetik u xuʼulul k-kaambal tiʼ Dios yéetel k-eʼesik yaabilmaj. Jesuseʼ tu yaʼalaj: «Kanáantabaʼex, maʼ a chaʼik u chichtal a puksiʼikʼaleʼex tu yoʼolal [...] u baʼaluba le kuxtalaʼ, utiaʼal maʼ u taasik jakʼ óolal tiʼ teʼex le kʼiinoʼ bey jumpʼéel léech ku kʼaʼalaleʼ, tumen bey bíin taalak le kʼiinoʼ tu yóokʼol tuláakal u kajnáaliloʼob yóokʼol kaab». Wa k-beetik le baʼax ku yaʼalik le tekstoaʼ yaan u béeytal «[k-tokikba] tiʼ tuláakal [le] baʼal kun úuchulaʼ» (Lucas 21:34-36).

[U tsolajil le oochel teʼ táan juʼun 17]

Utiaʼal a wojéeltik u maasileʼ ilawil u nueve xookil le libro ¿Baʼax jach tu jaajil ku kaʼansik le Bibliaoʼ?,* ku kʼaabaʼtik «¿Tiʼ yanoʼon wa tu tsʼook kʼiinoʼobeʼ?».

[U tsolajil le oochel teʼ táan juʼun 17]

* Beetaʼan tumen u j-jaajkunajoʼob Jéeoba.