Pakigsuod sa Diyos

Sa Dihang Gipadayag ni Jehova ang Iyang mga Hiyas

Exodo 34:6, 7

UNSAON nimo paghubit ang Diyos—ang iyang mga hiyas ug mga paagi? Handurawa nga makapangutana ka sa Diyos bahin sa iyang kaugalingon ug dayon mamati ka samtang naghubit siya sa iyang mga hiyas. Mao kanay nasinatian sa manalagnang si Moises. Kita mapasalamaton nga siya giinspirar sa pagsulat kon unsay nahitabo.

Sa Bukid sa Sinai, si Moises mihangyo kang Jehova: “Pakit-a ako, palihog, sa imong himaya.” (Exodo 33:18) Pagkaugma, ang manalagna nakapribilehiyo sa pagkakita sa himaya sa Diyos. a Si Moises wala maghatag ug detalye kon unsay iyang nakita sa talagsaong panan-awon. Hinunoa, iyang gisulat ang mas hinungdanong butang—kon unsay giingon sa Diyos. Atong susihon kon unsay giingon ni Jehova, nga makita diha sa Exodo 34:6, 7.

Ang unang butang nga gisulti ni Jehova bahin sa iyang kaugalingon mao nga siya “usa ka Diyos nga maluluy-on ug mapuangoron.” (Bersikulo 6) Sumala sa usa ka eskolar sa Bibliya, ang Hebreohanong pulong nga gihubad ug “maluluy-on” nagpaila nga ang Diyos adunay “malumong pagbati, sama nianang sa usa ka amahan ngadto sa iyang mga anak.” Ang pulong nga gihubad ug “mapuangoron” nalangkit sa usa ka berbo nga “naghubit sa usa ka tawo nga kinasingkasing nga natukmod sa pagtabang sa usa nga nanginahanglan.” Klaro nga gusto ni Jehova nga atong mahibaloan nga siya nag-atiman sa iyang mga magsisimba sama sa pag-atiman sa mga ginikanan sa ilang mga anak—nga may halalom nga gugma ug kahingawa sa ilang mga panginahanglan.—Salmo 103:8, 13.

Sunod, si Jehova nag-ingon nga siya “mahinay sa kasuko.” (Bersikulo 6) Siya dili daling masuko sa iyang mga alagad dinhi sa yuta. Hinunoa, siya mapailobon kanila ug sa ilang mga kahuyangan samtang naghatag kanilag higayon nga mag-usab sa ilang makasasalang mga buhat.—2 Pedro 3:9.

Ang Diyos nagpadayon sa pag-ingon nga siya “dagaya sa mahigugmaong-kalulot ug kamatuoran.” (Bersikulo 6) Ang mahigugmaong-kalulot, o maunongong gugma, maoy bililhong hiyas nga pinaagi niana mapatungha ni Jehova ang usa ka lig-on ug dumalayong bugkos tali kaniya ug sa iyang katawhan. (Deuteronomio 7:9) Si Jehova mao usab ang tuboran sa kamatuoran. Siya dili manglimbong ni malimbongan. Sanglit siya ang “Diyos sa kamatuoran,” kita makatuo gayod sa tanan niyang gisulti, lakip na sa iyang mga saad alang sa umaabot.—Salmo 31:5.

Ang laing hinungdanong kamatuoran nga gusto ni Jehova nga atong mahibaloan bahin sa iyang kaugalingon mao nga siya nagapasaylo sa “kasaypanan ug kalapasan ug sala.” (Bersikulo 7) Siya “andam sa pagpasaylo” sa mahinulsolong mga makasasala. (Salmo 86:5) Sa samang higayon, si Jehova dili mokonsentir sa pagkadaotan. Siya nagpatin-aw nga siya “dili gayod magpahigawas gikan sa silot.” (Bersikulo 7) Ang balaan ug matarong nga Diyos magasilot gayod niadtong tinuyo nga nagapakasala. Sa madugay o sa madali ilang anihon ang sangpotanan sa ilang sala.

Ang paghubit ni Jehova sa iyang mga hiyas klarong nagpaila nga gusto niyang makaila kita kaniya ug masinati sa iyang mga hiyas ug mga paagi. Dili ka ba matukmod sa pagkat-on ug dugang bahin sa iyang matahom nga mga hiyas?

[Footnote]