Atamela ho Molimo

Ha Jehova a ne a Itlhalosa

Exoda 34:6, 7

U NE u ka hlalosa Molimo joang—botho ba hae esita le litsela tsa hae? Ak’u ipotse hore na ho ka ba joang ha u ka fumana monyetla oa ho botsa Molimo hore na o joang ebe u mamela ha a hlalosa litšobotsi tsa hae. Moprofeta Moshe o ile a ba boemong bo tšoanang le boo hantle. Ka lehlohonolo o ile a bululeloa hore a ngole se ileng sa etsahala.

Moshe ha a le Thabeng ea Sinai o ile a kōpa Jehova ka tieo a re: “Ka kōpo, etsa hore ke bone khanya ea hao.” (Exoda 33:18) Ka letsatsi le hlahlamang, moprofeta enoa o ile a fuoa tokelo ea ho bona khanya ea Molimo ha e tšoelima. * Moshe ha aa ka a hlalosa ka ho qaqileng seo a ileng a se bona ponong eo e hlollang. Ho e-na le hoo, o ile a tlaleha taba ea bohlokoa le ho feta, e leng seo Molimo a ileng a se bua. A re ke re hlahlobeng seo Jehova a ileng a se bua, joalokaha se tlalehiloe ho Exoda 34:6, 7.

Ntlha ea pele eo Jehova a itsebahatsang ka eona ke hore ke “Molimo ea mohau le ea mosa.” (Temana ea 6) Ho latela setsebi se seng, lentsoe la Seheberu le fetoletsoeng e le “mohau” le bolela ‘qenehelo e bonolo ea Molimo, e tšoanang le eo ntate a e bontšang ho bana ba hae.’ Lentsoe le fetoletsoeng e le “mosa” le amana le leetsi le “bontšang khato eo motho a e nkang ka pelo eohle haeba a e-na le ntho e itseng ’me a e fa motho ea e hlokang.” Ka ho hlakileng, Jehova o batla hore re tsebe hore o hlokomela barapeli ba hae joalokaha motsoali a hlokomela bana ba hae ka lerato le mofuthu a bile a ameha ka botebo ka seo ba se hlokang.—Pesaleme ea 103:8, 13.

Ntlha e latelang ke hore Jehova o re o ‘lieha ho halefa.’ (Temana ea 6) Ha a potlakele ho halefela bahlanka ba hae ba lefatšeng. Ho e-na le hoo, ha a ba felle pelo ebile o mamella liphoso tsa bona ‘me o ba fa nako ea hore ba fetole mekhoa ea bona ea boetsalibe.—2 Petrose 3:9.

Molimo o eketsa ka hore o ‘tletse mosa o lerato le ’nete.’ (Temana ea 6) Mosa o lerato kapa lerato le tšepahalang ke tšobotsi ea bohlokoa eo ka eona Jehova a thehang maqhama a tiileng le a sa feleng le batho ba hae. (Deuteronoma 7:9) Ho phaella moo, Jehova ke mohloli oa ’nete. A ke ke a thetsa ’me a ke ke a thetsoa. Kaha ke “Molimo oa ’nete,” re ka tšepa sohle seo a se buang ho akarelletsa le litšepiso tsa hae tsa nako e tlang.—Pesaleme ea 31:5.

’Nete e ’ngoe eo Jehova a batlang hore re e tsebe ka eena ke hore o tšoarela “phoso le tlōlo le sebe.” (Temana ea 7) O “itokiselitse ho tšoarela” bafosi ba bakileng. (Pesaleme ea 86:5) Leha ho le joalo, Jehova ha a lumelle bobe. O bolela ka ho hlaka hore “ho hang a ke ke a lokolla kotlong.” (Temana ea 7) Molimo ea halalelang ea bileng a nang le toka a ke ke a tlohela bafosi ba ka boomo a sa ba fe kotlo. Haufinyane ba tla lokela ho kotula litholoana tsa boetsalibe ba bona.

Ho hlalosa ha Jehova litšobotsi tsa hae ke bopaki bo hlakileng ba hore o batla hore re mo tsebe ’me re tloaelane le botho ba hae le litsela tsa hae. Na see ha se u susumelletse hore u ithute ho eketsehileng ka litšobotsi tse hlollang tsa Molimo?

[Mongolo o botlaaseng ba leqephe]