Kolesa Ufulielo we—“Tangwa lia Yehova Linakundama”
Kolesa Ufulielo we—“Tangwa lia Yehova Linakundama”
“Tusenu tachi hanga tununge ni kujama.”—HEPRE. 6:1.
1, 2. Uhashi uka Akwa-Kristu a ku sekulu yitangu a mu Yerusaleme ni mu Yunda apwile nawo?
MUZE Yesu apwile hano hashi, tumbaji twenyi yamuhula ngwenyi: “Chilayi chika muchikasolola kwiza che, ni kumanunuka cha miaka yino?” Umanunuko utangu wa uprofeto uno walingiwile ku sekulu yitangu. Iye kahanjikile ha chimwe chuma chize kanda yichilingiwa kama, chize te muchisolola songo lia yuma yeswe. Muze mamona ngwo chuma chacho chinalingiwa, ‘waze te apwile mu Yundeya, te katamba kuchinyina ku milundu.’(Mat 24:1-3, 15-22) Shina tumbaji kahashile kumona chilayi chacho ni kulinga yuma kulita ni usongwelo wa yesu?
2 Ha kupalika cha miaka 30, ha 61 M.J, postolu Paulu kasonekene umwe lusango kuli Akwa-Kristu A-Hepreu waze atwamine mu Yerusaleme ni waze atwamine hakamwihi ni Yerusaleme. Paulo ni Akwa-Kristu ni akwo kakanyingikine chilayi chacho chize te muchilingiwa ha kupalika cha miaka yitano. (Mat 24:21) Ha miaka 66 M.J, Céstio Galo katwalile maswalale jenyi hanga apupe Yerusaleme. Alioze susumuku yakatukako, chino chahanyine uhashi kuli waze apwile mu ponde hanga akatuke ku Yerusaleme.
3. Yika Paulu akolwezele Akwa-Kristu A-Hepreu kulinga, mumu liaka?
3 Akwa-Kristu wano kafupiwile malinjekela hanga anyinyingike kanawa yuma ya ku ufulielo ni umanunuko wa uprofeto mba ahase kuchina. Alioze, amwe ‘kapwile yileya ha kwivwa.’ Kapwile ngwe ana-kemba waze te anafupu “yamwa.” (Tanga A-Hepreu 5:11-13.) Chipwe waze endele mu jila ya umwenemwene ha miaka yinji no yalisolola ngwe ‘kanakatuka kuli Zambi ya mwono.’ (A-Hepreu 3:12) Amwe yapwa ni chako cha ‘kulitwamina kulikungulula’ ha mashimbu waze te mahasa ‘kumona lie tangwa lia Zambi linakundama.’ (Hep 10:24, 25) Paulo yaatoweza ni zango ngwenyi: “Kashika, amu hitwahichika longeso litangu lia Kristu, tusenu tachi hanga tununge ni kujama”—Hep 6:1.
4. Mumu liaka chili chilemu kulaula ku spiritu, chikwo nawa, yika muyitukwasa kuchilinga?
4 Tuli ha matangwa waze uprofeto wa Yesu unamanunuka. “Tangwa linene lia Yehova linakundama”—tangwa lize mulikasa songo ku chifuchi chino cha Satana, “linakundama”. (Zef 1:14) Mashimbu wano, e twatamba kukolesa ufulielo wetu ni kulaula. (1 Pe 5:8) Shina chenacho tunalingi? Kujama ku ufulielo muchitukwasa kulihulikila ha yilayi ya matangwa jetu.
Yika Chinalumbunuka Kujama ku Ufulielo?
5, 6. (a) Kujama ku ufulielo yika chinachingiko? (b) Kujama ku ufulielo chakufupiwa tachi, mu majila aka?
5 Paulu kakakolwezele wika Akwa-Kristu A-Hepreu kujama ku ufulielo, yalweza nawa chize te atamba kuchilinga. (Tanga A-Hepreu 5:14) “Waze hakola” keshi kuwahilila wika ni “yamwa.” Ayo kakuzanga kulia “kulia cha tachi.” Ha chino kakuhasa kunyingika “yuma yeswe chipwe yuma yikalu ya mana ja Zambi.” (1 A-Korindu 2:10) Chikwo nawa, mumu lia fumbo lize akutambula—ha kukaula yize ananyingika—chakwakwasa kusa chinyingi hakachi ka chipema ni chipi. Chipwe muze mafupa kukwata chimwe chiyulo, fumbo lino muliakwasa kupukuna ha shimbi jize jinataleho ni chize mahasa kujikaula.
6 Paulu kasonekene ngwenyi: “Kashika chatutamba kupanjika kuhiana chikolo ku yuma yize hitwevwa, kuchina hanji mutusesumukako.” (Hep 2:1) Mutuhasa kutanguka ku ufulielo chakuhona kunyingika. Mutuhasa kwehuka kutanguka ku ufulielo ha “kupanjika kuhiana chikolo ku yuma yize hitwevwa” ha mashimbu waze tunali cha kulia cha ku spiritu. Ha chino, hita umwe wa kuli yetu katamba kulihula ngwenyi: Shina ngunawahilila wika ni yamwa? Shina nakufupa yuma ya ku spiritu ni mbunge yami yeswe? Kuchi munguhasa kujama ku ufulielo? Mba tujame ku ufulielo, tunafupiwa kusa tachi ha yuma yino yali: Twatamba kunyingika kanawa liji lia Zambi ni kukaula yize twakulilongesa.
Nyingika Kanawa Liji Lia Zambi
7. Kuchi kunyingika kanawa Liji lia Zambi muchihasa kutuyukisa?
7 Paulu kasonekene nawa ngwenyi: “Mumu mweswe matambula yamwa, kalongolokele mu liji lia ululi; se iye uchili mwana-kemba. ”(Hep 5:13) Mba tujame ku ufulielo, twatamba kunyingika kanawa liji lia Zambi ni sango jamo hali yetu. Amu sango jacho jili mu Mbimbiliya, twatamba kupwa alongi apema a Mbimbiliya ni a mikanda ya “ndungo washishika, wakanyama.” (Mat 24:45-47) Ha chino, mutapu wa kunyonga cha Zambi muutukwasa kufumba manyonga jetu. Tutalenu chilweza cha Orchid, umwe Mukwa-Kristu. a Iye kambile ngwenyi: “Utowezo uze wakukwata chinji ku mwono wami, uli wa kutanga Mbimbiliya matangwa eswe. Nambachile miaka yali mba nguhwise kutanga Mbimbiliya ya muwundu. Ha chisuho chitangu muze natangile Mbimbiliya, nalivwile ngwami nawana Sakatanga. Nalilongesele majila jenyi, nalilongesele yize yakumuvwisa kuwaha ni yize yakumuvwisa chinyengo, unene wa ndundo jenyi, ni usuhwe wa mana jenyi. Kutanga Mbimbiliya matangwa eswe, chakungukwasa muze nakupalika mu yipikalo.”
8. Ndundo jika, Liji lia Zambi likwete hali yetu?
8 Kutanga chisoneko yimwe ya mu Mbimbiliya, chakukwasa hanga sango jamo ‘jipwe ni ndundo’ ku mwono wetu. (Tanga Hep 4:12.) Kutanga Mbimbiliya muchitukwasa kwalumuna chize twapwa mu chima ni kuzanga chinji Yehova. Shina unafupiwa kululieka mashimbu hanga utange ni kupukuna ha yize Mbimbiliya yakwamba?
9, 10. Yika chinalumbunuka kunyingika kanawa Liji lia Zami? Lumbununa.
9 Kunyingika kanawa Mbimbiliya, kuchasulile wika ha kuyitanga. Mumu lia kuhona kukaula yize akulilongesa ni kuhona kunyingika ulemu wa yisoneko, atu amwe a ku mashimbu a Paulu yapwa ana akemba a ku spiritu, chikwo nawa, kakanyingikine kanawa yisoneko mba yakwase kukwata yiyulo ya mana ku mwono wo.
10 Kunyingika kanawa liji lia Zambi chinalumbunuka kusa mu yitanga yize yakwamba. Chilweza cha Kyle umwe Mukwa-Kristu, chinasolola chize mutuhasa kuchilinga. Umwe mukwa milimo ni mukwo yazwela nenyi. Yika yamukwashile mba apwe ni sambukila? Iye yamba ngwenyi: newulukile chisoneko cha A-Roma 12:18 chize chakwamba ngwo: “Nyi kachi muchihasa kupwa nikulita ni tachi jenu, pwenu ni sambukila kuli atu eswe.” Chocho, yingulitesa kuhanjika nenyi, muze te mutuhwisa mulimo. Kahashile kulivwashana, chikwo nawa, mukwa milimo ni mukwo yakomoka chinji ha yitanga ya Kyle. Kyle kambile ngwenyi: “Nalilongesele ngwami, kutushi kutokesa nichimwe muze twakukaula yiyulo ya mu Mbimbiliya.”
Lilongese kwononoka
11. Yika yakusolola ngwo, kwononoka ha mashimbu akalu muchihasa kupwa cheseko?
11 Kukaula yize twakulilongesa mu Mbimbiliya, muchihasa kukaliwa chipi-chipi ha mashimbu akalu. Ngwe chilweza, muze Yehova atuswile A-Izalele mu undungo ku Engitu, ha mashimbu akehe wika ayo ‘kalitachikile ni Mose,’ kanji-kanji nawa, ayo kapwile ni ‘kweseka Yehova.’ Mumu liaka? Mumu kahonene meya a kunwa. (Kut 17:1-4) Ha kupalika cha tukweji ali, muze halinga usendo ni Zambi wa kukaula ‘Maliji eswe a Yehova,’ ayo yehuka shimbi jenyi ha kuwayila tuzambi. (Kut 24:3, 12-18; 32:1, 2, 7-9) Shina ayo kevwile woma muze Mose ambachile mashimbu anji ku Mulundu wa Horepe kuze te anamwehe shimbi? Shina ayo kanyongene ngwo, A-Amaleke masa no jita ni kwakumba, mumu Mose yoze te waakwashile kukumba jita yitangu muze te azundwile kwoko lienyi keshiko? (Kut 17:8-16) Muchihasa kupwa. Chipwe chocho, A-Izalele “katayijile kumwononokena.” (Yilinga 7:39-41) Paulu katowezele Akwa-Kristu ‘ase tachi’ hanga “ahone kuholokela mu cheseko chizechene cha uhulia” chize A-Izalele asolwele muze te anevu woma wa kunjila mu chifuchi cha chilakenyo.—Hep 4:3, 11
12. Mu mutapu uka, Yesu alilongesele kwononoka, chikwo nawa, yika ayukile?
12 Mba tusolole ngwetu twajama ku ufulielo, twatamba kwononokena Yehova. Ngwe chize Yesu atuhanyine chilweza, yetu twakulilongesa kwononoka muze twakupalika mu kapinda. (Tanga A-Hepreu 5:8, 9.) Shimbu kanda achiza hano hashi, Yesu kapwile ni kwononokena tato. Alioze kulinga upale wa Zambi hashi chamunehenene lamba. Mumu lia kwononoka chipwe muze te anapalika mu yihungumiona, Yesu “walilongesele kwononoka” hanga atambule chiteli chaha kuli Zambi chakupwa mwanangana ni Sasendote wa Lutwe.
13. Yika yakusolola ngwo yetu twalilongesa kwononoka hanji ka?
13 Shina mutununga ni kwononoka Yehova chipwe ngwe mutumona lamba? (Tanga 1 Petulu 1:6, 7.) Yiyulo ya Zambi hakutwala ku kukaula shimbi jenyi jingunu, kusolola umwenemwene, kuhanjika kanawa, kutanga Mbimbiliya ni longeso lia wika, kukunguluka ni kwambujola yili zwalala. (Yos 1:8; Mat 28:19, 20; Efw 4:25, 28, 29; 5:3-5; Hep 10:24, 25) Shina twakwononokena Yehova ha yuma yino, chipwe muze mutupalika mu kapinda? Muze twakwononoka ha yuma yino, twakusolola ngwetu tunajama ku ufulielo.
Mumu Liaka Kukola ku Ufulielo—Chili Chilemu?
14. Lumbunununa chize kujama ku ufulielo muchihasa kukufunga.
14 Kupwa ni fumbo lize mulitukwasa kusa chinyingi hakachi ka chipi ni chipema, muchitukwasa kulifunga mu chifuchi chino muze atu jamo “hanatokesa mana eswe.” (Efw 4:19) Ngwe chilweza, James, umwe ndumbu yoze watangile ni kulemesa mikanda ya Mbimbiliya, yaputuka kukalakala ku mulimo kuze akwa milimo ni akwo apwile wika mapwo. James kambile ngwenyi: “Chipwe ngwe anji a kuli ayo kasolwele yitanga yipi, umwe kasolokele ngwe kali ni yitanga yipema, chikwo nawa, yasolola zango lia kulilongesa Mbimbiliya. Tangwa limwe, muze twapwile ukawetu mu chipatulo chimwe chinene cha milimo, iye yazanga kulisumbakenya ni yami. Ku uputukilo namwene ngwe iye kanahehe wika. Hazehene, yingwiwuluka lusango umwe wa mu kaposhi wa umwe ndumbu yoze wapalikile mu cheseko chino muze apwile ku mulimo. Mu kaposhi kanakatongolaho chilweza cha Yosefwe ni pwo lia Potifwa. b Chocho kawashi-washi yingulisosolola nenyi, iye yakatuka ni kuya kafujifuji.” (Upu 39:7-12) James yawahilila mumu lia kupwa ni mbunge yitoma muze alitunyine kulinga chuma chipi.—1Ti 1:5.
15. Kuchi kujama ku ufulielo chakukolesa mbunge yetu?
15 Kujama ku ufulielo chakutukwasa kukolesa mbunge yetu ni kwehuka “longeso lieka ni lieka, lize kulialumbunukine.” (Tanga A-Hepreu 13:9) Muze twakujama ku ufulielo, manyonga jetu kakulihulikila “ha yuma yahiana ulemu.” (Fwp 1:9, 10) Ha kulinga chino, twakukolesa zango lietu hali Zambi ni ha yuma yize akutulingila. (Ro 3:24) Mukwa-Kristu mweswe muze ‘akupwa mukulwana mu kunyonga chenyi’ kakusolola usakwililo wenyi ni kuyuka ha usepa wenyi ni Yehova.—1Ko 14:20.
16. Yika yakwashile umwe pangi, kutakamisa mbunge yenyi?
16 Louise umwe pangi, yatayiza ngwenyi muze amupapachishile, iye yalihulumba ha chize akwo te akumumona. Iye kambile ngwenyi: “Yami chakapwile ni kulinga yuma yipi, alioze mbunge yami kuyakapwile ni zango lia kulingila Yehova. Nanyingikine ngwami, te ngunafupiwa kwalumuna yimwe mba ngulivwe ngwe ngunase tachi hanga ngulingile Yehova. Kumulingila ni mbunge yeswe chapwile chikalu kuli yami.” Mumu lia kulikolweza chinji, Louise yahasa ‘kutakamisa mbunge yenyi,’ chocho yakumba yipikalo yize apalikile mumu lia musongo umwe. (Tia 5:8) Louise yamba nawa ngwenyi: “Nasele tachi jinji, alioze nahashile kukundama kuli Yehova.”
Ononoka ni Mbunge ye Yeswe
17. Mumu liaka kwononoka chapwile ni ulemu unji ku sekulu yitangu?
17 Chiyulo cha Paulu cha kujama ku ufulielo, chakwashile Akwa-Kristu a ku sekulu yitangu waze atwamine mu Yerusaleme ni mu Yundeya kulamwina mwono wo. Waze akawile chiyulo chenyi kahashile kunyingika chilayi chize Yesu ambile hakutwala ku ‘kuchina ku milundu.’ Muze ayo amwene “chuma cha chizelwokeso chize chakuneha kwenyeka . . . chinamana muma musandu,” chekwamba maswalale ja A-Roma muze ajingilikile ni kupupa yipanga mu Yerusaleme, ayo kahashile kumona ngwo katamba kuchina. (Mat 24:15, 16) Mumu lia chiyulo chize Yesu aahanyine, Akwa-Kristu yakakutuka mu Yerusaleme shimbu kanda achiyinongesa. Kulita ni Eusébio, umwe mukwa-kuhengwola sango ja shakulu, ayo kayile mu mbonge ya Pela. Ha chino yahasa kulamwina mwono wo ha unongeso uze walingiwile mu Yerusaleme.
18, 19. (a) Mumu liaka kwononoka chili chilemu chinji musono? (b) Yika mutushimutwina ha mutwe muhataho?
18 Kwononoka ha chiyulo cha kujama ku ufulielo, muchitukwasa kulamwina mwono wetu ha umanunuko wa uprofeto wa Yesu hakutwala ku “luyinda munene.” (Mat 24:21) Shina mutukaula usongwelo wa kulinga yuma kawashi-washi uze mukatuka kuli “kafunga washishika, wakanyama”? (Luka 12:42) Chili chilemu kulilongesa kwononoka ni mbunge yeswe!—Ro 6:17.
19 Mba tujame ku ufulielo, twatamba kufumba kanawa mana jetu. Twakulinga chino ha kusa tachi hanga tunyingike kanawa Liji lia Zambi ni kulilongesa kumwononokena. Chakupwa chikalu kuli akweze kujama ku ufulielo. Ha longeso mulikaulaho, mutushimutwina chize ayo mahasa kuchilinga.
[Maliji mushi lia lifwo]
a Majina amwe kapwa kwalumuna.
b Tala mutwe wa kulilongesa “Fortalecidos para rejeitar a transgressão” ha kaposhi wa 1 wa outubro wa 1999.
Yika Walilongesa?
• Yika chinalumbunuka kujama ku ufulielo, chikwo nawa, kuchi mutuhasa kuchilinga?
• Kuchi kunyingika kanawa Liji lia Zambi, muchihasa kutukwasa kujama ku ufulielo?
• Kuchi mutuhasa kulilongesa kwononoka?
• Kuchi kujama ku ufulielo chakutuyukisa?
[Yihula Yalongeso]
[Chizulie ha lifwo 10]
Kukaula shimbi ja mu Mbimbiliya, chakutukwasa kuzachisa mana muze tuli mu kapinda
[Chizulie ha lifwo 12, 13]
Kukaula yiyulo ya Yesu, chapwile chilemu kuli akwa-kristu a ku sekulu yitangu