Jajeroviavékena jahávo, ‘Jehová ára ningo hiʼag̃uimbaitéma’

‘Jajeroviavékena jahávo jakakuaapa peve.’ (HEB. 6:​1, ÑÑB.)

1, 2. Mbaʼérepa umi oikóva Jerusalén ha Judéape oreko tiémpo oho hag̃ua ‘okañy umi sérrore’?

 PETEĨ árape, Jesúspe heʼi hemimboʼekuéra: ‘Eréna oréve arakaʼépa oikóta koʼã mbaʼe ha mbaʼeichagua señálpa oĩta nde reju jey ha reime vove ha arakaʼépa opáta ko múndo kóva’. Jesús ombohovái hag̃ua omombeʼu peteĩ profesía oñekumpli ñepyrũ vaʼekue síglo primérope. Heʼi chupekuéra oikotaha peteĩ mbaʼe oñeimoʼãʼỹva, ha upévare oikuaataha hikuái hiʼag̃uimaha pe ára paha. Upéva oiko vove, ‘umi oĩva Judéape okañyvaʼerã sérro rehe’ (Mat. 24:​1-3, 15-22, ÑÑB). Ohechakuaánepa hikuái upe señál ha ojapónepa Jesús heʼi haguéicha chupekuéra?

² Oiméne treinta áño haguépe, pe áño 61-pe apóstol Pablo oñemoñeʼẽ mbarete kristianokuérape. Ohai peteĩ kárta umi evréo oikóvape Jerusalénpe ha ijerére. Maʼerãpa ojapo upéva? Ikatu hag̃uáicha umi evréo ojepyʼamongeta mbaʼe situasiónpepa oĩhína hikuái. Haʼekuéra ningo ni noimoʼãi cinco áñontema ofaltaha ojehecha hag̃ua pe señál, ha oñepyrũ hag̃ua ‘pe jehasa asy guasu’ (Mat. 24:21). Pe áño 66-pe, Cestio Galo ijehérsito reheve omongora Jerusalén. Péro oñentregapotaite jave umi oikóva upe távape, Cestio Galo osẽ ohopa hese ijehérsito reheve. Ha péicha umi oĩva pe távape oreko tiémpo osẽ hag̃ua upégui.

3. Mbaʼéichapa Pablo oñemoñeʼẽvaʼekue umi kristiánope ha mbaʼérepa?

³ Umi kristiáno ohechakuaa ha oikuaa porã vaʼerã mbaʼépa Ñandejára rembipota. Upéicharõmante ikatúta opilla mbaʼépa la oikovahína ha tekotevẽha osẽ upe oĩhágui. Péro oĩvaʼekue ijapytepekuéra nopenáiva ojeʼévare chupekuéra. Ijerovia kangy, oikotevẽ gueteri ku mitã tavýicha oñemboʼe chupekuéra heta mbaʼe Ñandejára heʼíva (jaleemína Hebreos 5:​11-13). Umi aretereíma oservíva Ñandejárape jepe oñepyrũ ‘oñemomombyry chugui’ (Heb. 3:12). Oĩvaʼekue avei umi ojepokuaáva ofalta rreunionhápe hiʼag̃ui ag̃uivémaramo jepe “pe ára” (Heb. 10:​24, 25). Upévare Pablo oñemoñeʼẽ chupekuéra kóicha: ‘Jajeroviavevaʼerã jahávo jakakuaapa peve. Ha jaheja ñande yképe, umi Cristo rehegua jaikuaavaʼekue iñepyrũrã’ (Heb. 6:​1, ÑÑB).

4. a) Mbaʼérepa tekotevẽte ñañatende porã? b) Mbaʼépa ñañehaʼãvaʼerã jajapo koʼág̃a?

⁴ Ko ñane tiémpope oñekumplipaitéta upe profesía Jesús heʼivaʼekue. “Hiʼag̃uíma Ñandejára ára guasu!”, pe oñehunditaha ára ko múndo Satanás poguýpe oĩva (Sof. 1:14). Upévare koʼýte koʼág̃a ñañatende porã vaʼerã ha jajeroviave Jehováre (1 Ped. 5:8). Ñañehaʼãpa jajapoñaína upéicha? Jajeroviavéramo jahávo, ñanemanduʼáta katuete mbaʼe tiémpopepa jaikoñaína.

Mbaʼépa heʼise jajeroviave jahávo jakakuaapa peve?

5, 6. a) Mbaʼépa heʼise jajeroviave jahávo jakakuaapa peve? b) Mbaʼe mbaʼépa jajapovaʼerã jajeroviave hag̃ua jahávo?

⁵ Apóstol Pablo omokyreʼỹ umi evréope ojeroviave hag̃ua ohóvo okakuaapa peve. Ha  omombeʼu avei chupekuéra mbaʼépa heʼise upéva (jaleemína Hebreos 5:14). Umi okakuaapámava ningo ndoʼusevéima kambýnte. Umíva hoʼumavaʼerã “tembiʼu pohýi”. Upéva heʼise umi okakuaapámava oikuaaha umi mbaʼe ndahasyivéva ha umi mbaʼe hypyʼũvéva omboʼéva la Biblia (1 Cor. 2:10). Avei oñehaʼã ojapo opa mbaʼe oaprendéva, ha ohechakuaa mbaʼépa Ñandejára rembipota. Upéicha rupi oikuaáma avei mbaʼépa oĩ porã ha mbaʼépa oĩ vai. Upévare odesidíta jave peteĩ mbaʼe ohecha mbaʼépa heʼi la Biblia ha ojapo upéicha.

⁶ Apóstol Pablo heʼi: “Jajapysaka porã vaʼerã umi mbaʼe ñahenduvaʼekue rehe ani hag̃ua japia tape porãgui” (Heb. 2:​1, ÑÑB). Ha upeichaite ningo, mbeguekatúpe ikatu japiáma pe tape porãgui. Péro ani hag̃ua oiko ñanderehe upéva, “jajapysaka porã vaʼerã” ha ñañatende ñahesaʼỹijo jave Ñandejára Ñeʼẽ. Ñañeporanduvaʼerã voi: “Che piko aikuaa umi mbaʼe ndahasyivévante omboʼéva la Biblia? Ajapo piko che rembiapo ajapovaʼerãgui reínte? Mbaʼépa ikatu ajapo ahayhu hag̃ua Jehovápe che pyʼaite guive ha aservi porãve chupe?”. Péicha jahechakuaa jajeroviave hag̃ua jahávo tekotevẽha jaikuaa porã Ñandejára Ñeʼẽ heʼíva ha ñaneñeʼẽrendu.

Jaikuaa porãkena Ñandejára Ñeʼẽ heʼíva

7. Mbaʼéichapa ñanepytyvõ jaikuaa porãramo Ñandejára Ñeʼẽ heʼíva?

⁷ Apóstol Pablo heʼi: “Umi oñemongarukáva kambýre mitã kambúicha, ndaikatúi ohechakuaa hekopeguáva” (Heb. 5:13). Jajeroviave hag̃ua jahávo jakakuaapa peve, tekotevẽ jaikuaa porã pe Ñandejára marandu. Ha upe marandu ningo jajuhu la Bíbliape. Upévare ñahesaʼỹijo porã vaʼerã la Biblia heʼíva. Ha ikatu hag̃uáicha ñantende porã jaiporuvaʼerã umi lívro ha rrevísta omoĩva ñandéve “pe tembiguái jeroviaha ha iñarandúva” (Mat. 24:​45-47). Upéicharõ ñanepytyvõta jaikuaa hag̃ua mbaʼéichapa Ñandejára opensa ha jahechakuaavéta mbaʼépa oĩ porã ha mbaʼépa oĩ vai. Jahechamína koʼág̃a mbaʼépa oikovaʼekue Rosa rehe. * Haʼe heʼi: “Ojeʼe ningo chéve alee meme hag̃ua la Biblia. Ha péva ningo tuicha chepytyvõva che rekovépe. Dos áñope ningo aleepami la Biblia, péro upépe raẽ añandu aikuaa porãha che Apoharépe. Aikuaa mbaʼéichapa Haʼe, mbaʼépa oguerohory, mbaʼeichaitépa ipoderóso ha iñarandu. Alee rupi la Biblia káda día agueropuʼaka heta mbaʼe vai”.

8. Mbaʼéichapa tuicha ñanepytyvõta jaleéramo Ñandejára Ñeʼẽ?

⁸ Jaleéramo káda día Ñandejára Ñeʼẽ, tuichaiterei ñanepytyvõta heʼíva pype (jaleemína Hebreos 4:12). Ñanderekoporãvéta ha koʼẽ koʼẽre Jehová ñandeguerohoryvéta. Upévare, ñañemotiempovaʼerã jalee hag̃ua la Biblia ha jajepyʼamongeta hese.

9, 10. Mbaʼépa tekotevẽ jajapo jaikuaa porãgui Ñandejára Ñeʼẽ heʼíva? Emoĩmi peteĩ ehémplo.

⁹ Péicha jahecha tekotevẽha jaikuaa porã la Biblia heʼíva, ndahaʼéi vai vaínte. Apóstol Pablo ningo ohaivaʼekue umi kristiáno ojoguávape  “mitãraʼýpe”, vai vaínte oikuaáva Ñandejára Ñeʼẽ heʼíva. Ndohechakuaái hikuái mbaʼeichaitépa ñanepytyvõ la Biblia, pórke ndojapói upépe heʼíva. Haʼekuéra ndoikuaái mbaʼépa ojapóta, ndoiporúi rupi Ñandejára Ñeʼẽ odesidi porã hag̃ua peteĩ mbaʼe.

¹⁰ Péro, tekotevẽháicha jaikuaa porã Ñandejára Ñeʼẽme heʼíva, tekotevẽ avei jajapo upépe heʼiháicha. Peteĩ ermána hérava Kyle ohasavaʼekue ohechauka mbaʼéichapa ikatu jajapo upéva. Kyle ojoavy peteĩ iñirũ itravahohapegua ndive. Péro upe rire haʼe osolusionase la provléma. Ha mbaʼépa ojapo? Haʼe heʼi: “Chemanduʼa Romanos 12:​18-pe heʼívare: ‘Ikatuha peve, peñehaʼãmbaite peiko pyʼaguapýpe opavave ndive’. Upévare haʼe pe che rapichápe añeʼẽseha hendive ropoi rire”. Upéi oñemongeta ha opyta porã jey hikuái oñondive. Ha upe iñirũ omombaʼeterei Kyle ojapo haguére upéicha. Kyle heʼi avei upéi: “Ahechakuaa jajapóramo la Biblia heʼíva, katuete ñasẽ porãha jajapóvape”.

Ñaneñeʼẽrendúkena

11. Mbaʼe ehémplopa ohechauka ijetuʼuha ñaneñeʼẽrendu ojere vaipa jave ñandéve?

¹¹ Ijetuʼu jepi jajapo hag̃ua Ñandejára Ñeʼẽ heʼíva, koʼýte ojere vaipa jave ñandéve. Pór ehémplo, Jehová omosãso riremi umi Israelguápe Egíptogui, oho hikuái peteĩ lugár ndaiporihápe y. Ha upévare haʼekuéra oñepyrũ ‘ojahéi Moisés’ rehe ha ‘ombopochyse Jehovápe’ (Éxo. 17:​1-4). Dos mése ramónte ningo ojapo opromete hague hikuái Jehovápe iñeʼẽrendutaha chupe opa mbaʼépe. Péro pyaʼete omboyke jeýma hikuái pe léi heʼíva ani hag̃ua oñemombaʼeguasu taʼanga (Éxo. 24:​3, 12-18; 32:​1, 2, 7-9). Ha mbaʼére piko ojapo hikuái upéicha? Oime piko Moisés hiʼaréma pe sérro Horébpe Jehová omeʼẽhápe chupe iléi? Ha upévare okyhyje hikuái ojehórõ g̃uarã chupekuéra? Yma ningo umi Amaleqgua ohomavaʼekue oñorairõ hendivekuéra, ha Moisés ohupi rupi ipo umi Israelgua ipuʼaka hesekuéra. Ha koʼág̃a katu Moisés ndaipóri hendivekuéra. Mbaʼe piko ojapóta hikuái ojeju jeýrõ chupekuéra! (Éxo. 17:​8-16.) Péro, ndahaʼéi voi upéva la provléma, umi Israelgua ningo naiñeʼẽrenduséi voínte (Hech. 7:​39-41). Upe rire naiñeʼẽrendúi jeýma hikuái Jehovápe, okyhyjégui ndoikeséirõ guare pe yvy oñeprometevaʼekuépe chupekuéra. Upévare apóstol Pablo heʼi ermanokuérape ani hag̃ua naiñeʼẽrendúi umi Israelgua ojapo haguéicha (Heb. 4:​3, 11).

12. Mbaʼéichapa Jesús oaprendevaʼekue iñeʼẽrendu hag̃ua? Ha maʼerãpa oipytyvõ chupe upéva?

¹² Ñañehaʼãmbaitevaʼerã ñaneñeʼẽrendu Jehovápe jajeroviave hag̃ua jahávo jakakuaapa peve. Péro heta vése jahasa asy vaʼerã ñaaprende hag̃ua mbaʼépa heʼise ñaneñeʼẽrendu. Jesús jepe oaprendevaʼekue upéicha (jaleemína Hebreos 5:​8, 9). Haʼe ningo yvágape iñeʼẽrenduvaʼekue Itúvape opa mbaʼépe. Péro oúrõ guare ko yvy ape ári, heta ohasa asy ojapo hag̃ua itúva rembipota ha péicha iñeʼẽrendu. Upéva oipytyvõ Jesúspe oiko hag̃ua chugui upe rire Rréi ha Saserdóte Guasu.

13. Mbaʼépa jajapovaʼerã jahechauka hag̃ua ñaneñeʼẽrenduha?

¹³ Mbaʼépa ikatu jaʼe ñandejehe? Ñaneñeʼẽrendútapa Jehovápe jahasa asyetereíramo jepe? (Jaleemína 1 Pedro 1:​6, 7.) Ñandejára ningo heʼi porã ñandéve mbaʼépa jajapovaʼerã. Umíva apytépe heʼi ani hag̃ua ñanderekovai,  ñanemonda ha ñandejurutieʼỹ. Avei heʼi jalee ha ñahesaʼỹijovaʼerãha la Biblia, japredika ha jahavaʼerãha rreunionhápe (Jos. 1:8; Mat. 28:​19, 20; Efe. 4:​25, 28, 29; 5:​3-5; Heb. 10:​24, 25). Jajapótapa koʼã mbaʼe Ñandejára heʼíva jajejopy vaíramo jepe? Ñaneñeʼẽrendúramo jahechaukañaína jajeroviaveha jahávo jakakuaapa peve.

Mbaʼérepa iporã jajeroviave jahávo?

14. Mbaʼépa ojapo peteĩ ermáno ohechakuaágui mbaʼépa oĩ porã?

¹⁴ Peteĩ kristiáno ohechakuaáva mbaʼépa Ñandejára rembipota ojehekýi heta mbaʼe vaígui. Ohechakuaa mbaʼépa oĩ porã ha mbaʼépa oĩ vai. Péro ko múndope ningo la hénte ‘notĩriete voi hekokyʼa hag̃ua’ (Efe. 4:​19, ÑÑB). Pór ehémplo, Jorge ningo peteĩ ermáno akóinte oleéva ñande lívro ha rrevistakuéra ha omombaʼeterei voi umíva. Haʼe ningo ombaʼapo peteĩ lugár kuña memete ombaʼapohápe. Haʼe heʼi: “Heta ningo oĩ ijapytepekuéra hekovaíva, ha notĩriete voi hikuái. Péro peteĩ opororrespeta ha oikuaase mbaʼépa omboʼe la Biblia. Upéicharõ jepe, peteĩ árape ropyta oreaño rombaʼapo peteĩ kotýpe, ha haʼe oñepyrũ chemoñeʼẽmba. Ñepyrũrã aimoʼã chembojarúnte, péro upéi cheañua ha cheretũma katu, ha ndaikatúi aipeʼa chupe chejehegui. Upépe chemanduʼa Ñamañahápe alee hague mbaʼéichapa peteĩ ermáno ombohovaivaʼekue peichagua situasión. Ha peteĩ Ñemañaha oñeʼẽvaʼekue avei José ha Potifar rembireko rehe. * Upémarõ amyaña pe kuñataĩme, ha upéva omondýi chupe ha osẽ ohopa hese upégui” (Gén. 39:​7-12). Jorge opyta ipyʼaguapy ndoikói haguére mbaʼeve ivaíva ha péicha osegi hekopotĩ (1 Tim. 1:5).

15. Mbaʼérepa jajeroviavéramo jahayhúta Jehovápe ñande pyʼaite guive?

¹⁵ Jajeroviavéramo jahávo jahayhúta Jehovápe ñande pyʼaite guive. Ha upéva ñanepytyvõta ‘ani hag̃ua japia Ñandejára Ñeʼẽ ñanemboʼévagui’ (jaleemína Hebreos 13:9). Ñañehaʼãvo ñaime porãve Ñandejára renondépe, ñapensáta umi mbaʼe iñimportantevévare (Fili. 1:​9, 10). Upéicha avei ñamombaʼevéta Jehovápe ha jaagradeséta chupe opa mbaʼe omeʼẽvare ñandéve (Rom. 3:24). Ha umi kristiáno ‘ojepyʼamongetáva’ ha ohechakuaáva mbaʼépa oĩ porã ha mbaʼépa oĩ vai, oagradese Jehovápe ha iñamigoite hikuái (1 Cor. 14:20).

16. Mbaʼépa ojapo peteĩ ermána ohayhu hag̃ua Jehovápe ipyʼaite guive?

¹⁶ Peteĩ ermána hérava Luisa ojevautisa rire heʼi ojapoha opa mbaʼe Jehovápe g̃uarã, oipotágui ermanokuéra oñeʼẽ porã hesénte. Haʼe omombeʼu: “Upérõ ningo ndajapói mbaʼeve ivaíva, péro ndaservíri avei Jehovápe che pyʼaite guive. Upe rire ahechakuaa akambiavaʼerãha aservi porãséramo chupe. Ha tuicha voi akambia, pórke aserviséma Jehovápe che ñeʼã mbytete guive”. Péicha ojapo haguére, Luisa ohayhu Jehovápe ipyʼaite guive.  Ha upéva oipytyvõ chupe ogueropuʼaka hag̃ua peteĩ mbaʼasy vai ojagarrárõ guare chupe (Sant. 5:8). Upéi Luisa heʼi jey: “Heta ahasa asy, péro añandu Jehová oĩha che ykerete”.

Ñaneñeʼẽrendúkena ñande pyʼaite guive

17. Mbaʼérepa tekotevẽvaʼekue iñeʼẽrendu umi kristiáno ypykue?

¹⁷ Umi kristiáno oikóva Jerusalén ha Judéape ojesalva ojapógui apóstol Pablo heʼivaʼekue chupekuéra. Umi iñeʼẽrendúva oñatende ha ohechakuaa pe señál ohaʼarõvaʼekue ‘oho hag̃ua okañy umi sérrore’. Umi kristiáno ningo ohechakuaa upéva pe Roma ehérsito omongorárõ guare Jerusalén, ‘upe oporomongyʼa ha oporombyaíva oĩrõ guare pe lugár marangatúpe’ (Mat. 24:​15, 16, BNP). Imanduʼa hikuʼái pe profesía Jesús heʼivaʼekuére, ha osẽ Jerusaléngui oñehundi mboyve. Ha peteĩ istoriadór hérava Eusebio heʼi umi Jerusalengua oho hague oiko Pélape oĩva montáña de Galaádpe. Péicha umi kristiáno ojesalva ha ndohasái umi mbaʼe vaiete ohasavaʼekue Jerusalén.

18, 19. a) Mbaʼérepa tekotevẽ ñaneñeʼẽrendu ko ñane tiémpope? b) Mbaʼépa oñemombeʼúta pe artíkulo oúvape?

¹⁸ Umi ojeroviavéva ohóvo ningo iñeʼẽrendu. Ha Jesús heʼi haguéicha, ko ñane tiémpope oiko vove pe “jehasa asy guasu” umi iñeʼẽrendúvante ojesalváta (Mat. 24:21). Upévare, jajapótapa “pe tembiguái” heʼíva ñandéve jajapo hag̃ua koʼág̃a? (Luc. 12:42.) Jajapókena la heʼíva ha ñaneñeʼẽrendu ñane ñeʼã mbytete guive (Rom. 6:17).

¹⁹ Jajeroviave hag̃ua jahávo, tekotevẽ ñañehaʼã jahechakuaa mbaʼépa iporã ha mbaʼépa ivai. Ha upearã ñahesaʼỹijo porã vaʼerã Ñandejára Ñeʼẽ ha jajapo heʼiháicha pype. Koʼýte ningo umi mitãrusu ha mitãkuñanguérape ijetuʼu ojeroviave hag̃ua ohóvo okakuaapa peve. Pe artíkulo oúvape oñemombeʼúta chupekuéra mbaʼépa ikatu ojapo ohupyty hag̃ua upéva.

[Nóta]

Mbaʼépa ñaaprendéraʼe?

• Mbaʼépa heʼise jajeroviave jahávo jakakuaapa peve ha mbaʼépa jajapovaʼerã upearã?

• Mbaʼérepa jaikuaa porã vaʼerã la Biblia heʼíva?

• Mbaʼéicha javépa ñaaprende ñaneñeʼẽrendu hag̃ua?

• Mbaʼéichapa ñanepytyvõ jajeroviavévo jahávo?

[Porandu ñahesaʼỹijóva]

[Nóta oĩva taʼanga ndive páhina 10]

Jajapóramo la Biblia heʼíva ñanepytyvõta ñasolusiona hag̃ua ñane provléma

[Nóta oĩva taʼanga ndive páhina 12]

Umi ojapóva Jesús heʼivaʼekue ojesalva