Inersimassummut ingerlagasuarit — ‘qanillivoq Jehovap ullussarsua’

“Inersimassummut ingerlagasuarniarta.” — HEBRÆERIT 6:1, NV.

1, 2. Ukiuni hundredelinni siullerni kristumiut Jerusalemimiittut Judæamiittullu ‘qaqqanut qimaanissamut’ qanoq ilillutik periarfissaqalerpat?

JIISUSI nunarsuarmiikkallarmat ajoqersugaasa ornippaat imalu aperalugu: “[Suna] najuunnissannut pissutsillu aaqqissuussaanerata naggataatungaanut nalunaaqqutaassava?” (NV) Jiisusip taakku apeqqutaannut akissutitut siulittuutaa ukiuni hundredelinni siullerni eqquuteqqaarpoq. Jiisusip pisussaq immikkut ittoq naggatissap nalliutingajalerneranut nalunaaqutaasussaq oqaluttuaraa. Tamanna pippat “Judæamiittut qaqqanut qimaassapput”. (Matthæusi 24:1-3, 15-22) Jiisusip ajoqersugaasa nalunaaqut takussavaat unnersuussutaalu maleruarlugit?

² Ukiut 30-ngajaat tamatuma kingorna, ukiumi 61-imi, apustilip Paulusip hebræerit kristumiuusut Jerusalemimi eqqaanilu najugallit sakkortuumik pimoorusassamillu allaffigai. Paulusip uppeqataasalu naluaat ‘naalliunnartoqangaarnerata’ aallartinneranut nalunaaqut ukiut tallimaannaat qaangiuppata takussaalissasoq. (Matthæusi 24:21) Ukiumi 66-imi Romamiut sakkutuui Cestius Gallusimit siulersorneqarlutik iluatsingajattumik Jerusalemimik saassussipput. Tunuariataarpulli, tiguagaasullu qimaallutik isumannaatsumukarnissamut periarfissaqarlualerput.

3. Paulusip hebræerit kristumiut qanoq kajumissaarpai, aamma sooq?

³ Kristumiut pisut tamakku qanoq paasisariaqarnerannik paasinnissinnaajumallutik naliliisinnaassuseqartariaqarlutillu anersaakkut paasisimasaqartariaqarput, qimaasinnaaniassagamik. Ilaalli ‘tusaaniarnermut eqeersimaarunnaarsimapput’. Anersaakkut naalungiarsuttut ‘immummik’ pisariaqartitsisutut ipput. (Atuaruk Hebræerit 5:11-13). Allaat ukiorpassuarni sallusuissutip aqqutaatigut saqisimasut ‘Guutimik uumasumik tunussinerat’ malunnarsisimavoq. (Hebræerit 3:12) Ilaasa ullup ajunaarfiusussap ‘qanilliartorfiani’ kristumiut ataatsimiinnerinut najuuttannginneq ‘ileqqoraat’. (Hebræerit 10:24, 25) Taamaattumik Paulusip pisariaqartumik ima kajumissaarpai: “Kristusi pillugu ilinniaqqaagassat imminiiginnarlugit inersimasunik ajoqersuinermut ingerlaqqittariaqarpugut [inersimassummut ingerlagasuarniarta, NV].” — Hebræerit 6:1.

4. Sooq anersaakkut eqqumaniarnissaq pingaaruteqarpa, anersaakkullu eqqumanissamut suna iluaqutigisinnaavarput?

⁴ Jiisusip siulittuutaasa inaarutaasumik eqquuffissaanni inuuvugut. ‘Jehovap ullussarsua’ — ulloq Saatanip aaqqissuussaaneranik suujunnaarsitsiffiusussaq —  “qanillivoq”. (Sefania 1:14) Taamaattumik anersaakkut eqqumaniarlutalu mianersornissarput aatsaat taama pingaaruteqartigaaq. (1 Petrusi 5:8) Eqqumaniarlutalu mianersorpugut? Kristumiutut inersimalluartuuneq piffissap qanoq ilinerani inuunitsinnik eqqumaffiginnittuarnissamut iluaqutigissavarput.

Kristumiutut inersimalluarneq qanoq paasisariaqartoq

5, 6. (a) Anersaakkut inersimalluarneq qanoq paasisariaqarpa? (b) Inersimassummut ingerlagasuassagutta sutigut marlutsigut iliuuseqartariaqarpugut?

⁵ Paulusip ukiuni hundredelinni siullerni hebræerit kristumiut inersimassummut ingerlagasuarnissamut kajumissaaginnanngilai, aammali oqaluttuuppai anersaakkut inersimassuseq qanoq paasisariaqarnersoq. (Atuaruk Hebræerit 5:14). ‘Inersimasunngorluarsimasut’ ‘immuk’ naammagiinnanngilaat.  ‘Tamuasarissanik’ nererusupput. Taamaattumik sallusuissummi ‘ilinniaqqaagassat’ sallusuissutillu ‘itissusii’ nalunngilaat. (1 Korinthimiut 2:10) Aammattaaq piginnaassusertik, imaluunniit paasinnissinnaassusertik, sungiusartarpaat atortuinnarneratigut, tassa ilisimasatik naapertorlugit iliuuseqarnermikkut, tamannalu eqqortumik eqqunngitsumillu immikkoortitsinissamut iluaqutigisarpaat. Taamaattumik aalajangigassaqaraangamik najoqqutassiat Biibilimiittut suut atorluarsinnaanersut, taakkualu qanoq atortariaqarnerat, takusinnaasarpaat.

⁶ Paulusi ima allappoq: “Uatsinnut tusarliunneqartut sianigilluaqqissaarniartariaqarpavut sarfaanneqartutut qimakkiartoqqunatigit.” (Hebræerit 2:1) Nammineq maluginagu sallusuissummit qimagukkiartortoqarsinnaavoq. Taamatut pisoqartikkumanagu anersaakkut sallusuissutit ilinniakkavut “sianigilluaqqissaarniartariaqarpavut”. Taamaattumik tamatta immikkut imminut ima aperisariaqarpugut: ‘Ilinniaqqaagassaannaat suli sammisarpakka? Imaassinnaava iliuuserisartakkakka ileqquliutiinnarsimagikka uummammit pisumik iliuuserinagit? Qanoq ilillunga anersaakkut siumukavissinnaavunga?’ Inersimassummut ingerlagasuassagutta minnerpaamik marlutsigut iliuuseqartariaqarpugut. Guutip oqaasia ilisimallualertariaqarparput. Aamma naalanneq ilinniartariaqarparput.

Oqaaseq ilisimallualeruk

7. Guutip oqaasianik ilisimannillualerneq qanoq iluaqutigisinnaavarput?

⁷ Paulusi ima allappoq: “[Immummik] inuussuteqartoq kinaluunniit iluarnermut atasunik misilittagaqarsimanngilaq, naalungiaavormi.” (Hebræerit 5:13) Inersimallualerumalluta Guutip oqaasia, uagutsinnut tusarliussaa, ilisimallualertariaqarparput. Tusarliussaq tamanna oqaasiani Biibilimiimmat, taanna Biibililersaarutillu ‘inussiamit aalajaallunilu silatuumeersut’ (NV) eqiasuilluta atuartariaqarpavut. (Matthæusi 24:45-47) Taamatut Guutip eqqarsaataanik pigiliussineq paasinnissinnaassutsitsinnik sungiusaanissamut iluaqutigisarparput. Assersuutigalugu qatanngut arnaq kristumiu, Orchid, * ima oqarpoq: “Aalajangersimasumik Biibilimik atuartarnissamik kajumissaarut inuuninnut sunniuteqarnerpaasimavoq. Ukiut marluk missiliorlugit ingerlaneranni Biibili tamakkerlugu atuarpara, kisianni soorlu aatsaat Pinngortitsisiga ilisarisimalerlugu. Taassuma susimanera, sunik nuannarisaqarnera sunillu nuannarisaqannginnera, qanoq pissaaneqartiginera qanorlu ilisimassuseqartiginera pillugit ilinniarpunga. Ullut tamaasa Biibilimik atuartarneq inuuninni artornartorsiorfiginerpaasama nalaanni nappatigaara.”

8. Guutip oqaasia qanoq ililluni uagutsinnut sunniuteqarsinnaava?

⁸ Guutip oqaasia aalajangersimasumik atuartarutsigu, tusarliussaq tamatumaniittoq uagutsinnut ‘sunniuteqarsinnaassaaq’. (Atuaruk Hebræerit 4:12). Taamatut atuartarnerput ilorlikkut pissutsitsinnut sunniuteqarsinnaavoq, aamma Jehovamit iluarisaanerulissutigisinnaavarput. Biibilimik atuartarnivit atuakkannillu eqqarsaatiginneqqissaartarnivit piffissaqarfiginerunissaat pisariaqartippiuk?

9, 10. Guutip oqaasianik ilisimannilluarneq qanoq paasisariaqarpa? Assersuuteqarit.

⁹ Biibilimik ilisimannillualernerup assigiinnanngilaa tamatumani qanoq allassimasoqarneranik ilisimanninneq. Paulusip nalaani anersaakkut  naalungiarsuit Guutip oqaasianik isumassarsiarititaasumik ilisimasaqalaarunarput. Ilisimasatilli inuunerminni atunngilaat; iluaqutaanersut paasiniarlugu misilinngilaat. Aalajangigassaqaleraangamik Guutip oqaasianit siulersortinneq ajoramik Guutip oqaasia ilisimalluanngilaat.

¹⁰ Guutip oqaasianik ilisimannilluarneq tassaavoq tamatumani allassimasunik ilisimanninneq taakkualu naapertorlugit iliuuseqarneq. Kyle, qatanngut arnaq kristumiu, misigisaqarsimavoq qanoq ililluni allassimasut naapertorlugit iliuuseqartoqarsinnaaneranik ersersitsisumik. Suleqatinilu isumaqatigiinngissimapput. Ajornartorsiut tamanna aaqqinniarlugu qanoq iliorpa? Ima oqaluttuarpoq: “Romamiut 12:18 ingerlaannaq eqqaavara, tassani allassimagami: ‘Ilissi aalajangiisuusinnaagussi — inuit tamaasa eqqisseqatiginiarsigit.’ Taamaattumik suleqatiga isumaqatigiissuteqarfigaara sulereerutta naapinnissatsinnik.” Naapinnerat iluatsilluarpoq, Kylellu iliuuseqarnera suleqataata killinneqaatigaa. Kyle ima oqarpoq: “Paasivara najoqqutassianik Biibilimiittunik maleruaaneq ajunngitsumik kinguneqartuaannartoq.”

Naalanneq ilinniaruk

11. Sumit erserpa ajornartorsiortilluni naalannissaq unamminiarnarsinnaasoq?

¹¹ Biibilimit ilikkakkanik maleruaanissaq ajornakusoorsinnaavoq, ingammik ajornartorsiortilluni. Assersuutigalugu Jehovap Israelikkunnik Egyptenimi inussiaataanermit aniguisitsinerata kinguninngua Israelikkut “naammagittaalliulerput” ‘Jehovalu misilinniartualerlugu’. Sooq taamaaliorpat? Imissaaleqigamik. (2 Mosesi 17:1-4) Jehovamik angerfigeqatiginninnerminnit ‘Jehovallu peqqussutaanik tamanik’ maleruaajumallutik akuersinerminnit qaammatit marlungajaat qaangiuttut taassuma guutipilussiorneq pillugu inatsisaa unioqqutippaat. (2 Mosesi 24:3, 12-18; 32:1, 2, 7-9) Taamaaliorpat Mosesip qaqqami Horebimi malittarisassanik tuniorarneqarnermini sivisuumik peqannginera pissutigalugu annilaangalersimagamik? Isumaqarsimasinnaappat Amalekikkunnit saassuteqqinneqarumaarlutik, aamma Mosesimit, siusinnerusukkut Amalekikkunnik ajugaaffiginninnissamut Jehovamit atorneqartumit, najorneqaratik susinnaanatik? (2 Mosesi 17:8-16) Taamaalluarsinnaavoq, sunaluunniilli pissutaagaluarpat Israelikkut ‘naalakkumanngillat’. (Apustilit Suliaat 7:39-41) Paulusip kristumiut kajumissaarpai Israelikkut taamani nunamut neriorsuutigisamut isernissaminnut annilaangallutik ‘naalasseriinnerisa assinginik’ naalasseriinnginnissartik ‘ilungersuutigeqqullugu’. — Hebræerit 4:3, 11.

12. Jiisusip naalanneq qanoq ilinniarpaa, qanorlu kinguneqarpa?

¹² Inersimassummut ingerlagasuassagutta Jehovamut naalanniarluta sapinngisarput tamaat iliuuseqartariaqarpugut. Soorlu Jiisusip Kristusip maligassiaanit ersertoq, naalanneq naalliuutinit ilinniarneqarajuppoq. (Atuaruk Hebræerit 5:8, 9). Jiisusi nunarsuarmukannginnermini Ataataminut naalattuuvoq, nunarsuarmili Ataatami piumasaatut iliornerata kingunerai timikkut eqqarsartaatsikkullu annikilliorneq. Annikilliornerpaaffimmini naalannermigut ‘angusassani anguaa’, imaluunniit naammalluinnartunngortinneqarpoq, Guutip imminut inissisimaffigititaanut nutaamut, tassa Kunngisut Palasiunertullu inissisimaffimminut, tunngatillugu.

13. Naalanneq ilikkarsimaneripput qanoq paasineqarsinnaava?

¹³ Uagummi? Assulluunniit ajornartorsioraluarutta Jehovamut naalannissarput aalajangiusimavarput? (Atuaruk 1 Petrusi 1:6, 7). Guuti ileqqussat, unneqqarinneq, oqqamik eqqortumik atuineq, nammineq Biibilimik atuarneq, Biibilimik atuaqqissaarneq, ataatsimiinnernut  najuuttarneq oqaluusseqataasarnerlu pillugit paatsuugassaanngitsunik siunnersuuteqarpoq. (Josva 1:8; Matthæusi 28:19, 20; Efesosimiut 4:25, 28, 29; 5:3-5; Hebræerit 10:24, 25) Jehova tamakkununnga tunngatillugu naalattarparput, aamma akerlilersorneqaraangatta? Naalannerput inersimanerulersimanitsinnut ersiutaavoq.

Sooq kristumiutut inersimalluarneq iluaqutaasoq

14. Inersimalluarnerup qanoq illersuutaasinnaaneranik assersuuteqarit.

¹⁴ Silarsuarmi ileqqussatigut ‘sianigisaaruffiusumi’ (1936) eqqortumik eqqunngitsumillu immikkoortitsinissamut ilinniartinneqarsimasumik paasinnissinnaassuseqarneq kristumiunut illersuutaangaartarpoq. (Efesosimiut 4:19) Qatanngut angut Jamesimik atilik, Biibililersaarutinik aalajangersimasumik atuartartoq taakkuninngalu assut pingaartitsisoq, suliffittaarpoq arnaannarnik suleqateqalerluni. James ima oqaluttuarpoq: “Taakkua ilarpassui erseqqissumik ileqqussatigut sianissuseqanngillat, ataaserli isumatorpasippoq sallusuissummillu soqutiginnilluni. Ullut ilaanni inimi kisimiitsilluta qaninnialerpaanga. Isumaqaraluarpunga asuleertoq, qaninniarunnaarsinnissaali sapernarteqaara. Eqqaariataarparali qatanngutip angutip suliffimmini tamatumunnga assingusumik usserneqarsimasup misigisaa Vagttårnet-imi allaatigineqartoq. Allaaserisami Josefimik Potifarillu nulianik oqaluttuaq assersuutigineqarpoq. * Arnaq ajappallara, taannalu inimit arpalluni anivoq.” (1 Mosesi 39:7-12) Jamesip pisoqarnerusimannginnera ilerasuuteqannginninilu nuannaarutigaa. — 1 Timotheusi 1:5.

15. Inersimalluarnerput uummatitsinnut assersuutaasumut qanoq nakussatsissutaasinnaava?

¹⁵ Aamma inersimalluarneq iluaqutaavoq, inersimalluarnermi uummatitsinnik assersuutaasumik nakussatsitsisarami aamma ‘ajoqersuutinit allanertanit nalinginnarnit tammartitaanaveersaassutigisaratsigu’. (Atuaruk Hebræerit 13:9). Anersaakkut ineriartornissarput sulissutigigaangatsigu ‘pingaaruteqarnerusut’ (NV) pingaarnerutittarpavut. (Filippimiut 1:9, 10) Taamaalilluta Guutimut qujamasunnerujartuinnartarpugut uagut iluaqutissatsinnut iliuuserisimasai pillugit. (Romamiut 3:24) Kristumiut ‘silatussutsimi inersimasuusut’ taamatut qujamasungaassapput Jehovamullu qanittumik attaveqarnertik nuannaarutigisinnaassallugu. — 1 Korinthimiut 14:20.

16. Qatanngutip arnap uummatiminik nakussatsitsinissamut suna iluaqutigaa?

¹⁶ Louise oqaluttuarpoq kuisereernermi kingorna piffissap ilaani allanit malugineqarnissani pingaarnerpaatillugu. Ima oqarpoq: “Eqqunngitsuliunngikkaluarpunga, Jehovamulli kiffartornissamut piumassuseqartorujussuunngilanga. Paasilerpara allannguisariaqarlunga Jehova sapinngisara tamaat tunillugu misigissaguma. Annerpaamik allannguiffigisariaqagara tassaavoq uummatikkut iluunngarlunga taassumunnga kiffartornissara.” Taamaaliornermigut Louisep uummatini nakussatsippaa, tamatumalu pingaaruteqarluinnarnera paasinarsivoq perulunnartumik nappaateqalermat. (Jaaku 5:8) Louise ima oqarpoq: “Akiuussuataarpunga, aammali Jehovamut qanittuararsuarmik attaveqalerpunga.”

 ‘Uummatissigut naalattuugitsi’

17. Ukiuni hundredelinni siullerni naalannissaq sooq immikkut pingaaruteqarpa?

¹⁷ Paulusip ukiuni hundredelinni siullerni kristumiunut Jerusalemimiittunut Judæamiittunullu ‘inersimassummut ingerlagasuarnissamik’ siunnersuutaa, taakkua inuuinnarnissaannut aalajangiisuuvoq. Siunnersuummik malinnittut anersaakkut immikkoortitsisinnaassuseqarput Jiisusip ‘qaqqanut qimaasariaqarnerminnik’ nalunaaqutigititaanik takunninnissaminnut. “Maajunnartoq Aseruisoq . . . illernartumiittoq” — tassa Romamiut Jerusalemimik ungusillutillu tiguaasut — takugamikku paasivaat qimaanissamut piffissanngortoq. (Matthæusi 24:15, 16) Kristumiut Jiisusip mianersoqqussutaa siulittuutaasoq malillugu illoqarfimmit Jerusalemimit qimaapput, illoqarfiup taassuma aserorneqannginnerani, ilagiillu oqaluttuarisaanerannik ilisimatooq Eusebios naapertorlugu taakku illoqarfimmi Pellami Gileadip qaqqalittaaniittumi najugassipput. Taamaalillutik ajunaarnersuaq oqaluttuarisaanermi Jerusalemimut pisimasut ajornerpaartaat ingalappaat.

18, 19. (a) Ullumikkut naalannissaq sooq pingaaruteqarpa? (b) Allaaserisami tulliuttumi suna sammissavarput?

¹⁸ Aamma naalanneq inersimassummut ingerlagasuarnermit aallaaveqartoq inuuinnarnissamut pingaaruteqarluinnassaaq ‘naalliunnartoqangaarnissaq’ asseqanngitsoq pillugu Jiisusip siulittuutaa pingaarnerusumik eqquuppat. (Matthæusi 24:21) ‘Pilittaasup ilumoortup’ uagutsinnut unnersuussutigiumaagai pisariaqavissut tamaasa naalassavavut? (Lukasi 12:42) ‘Uummatitsigut naalannissamik’ ilinniarnissarput pingaaruteqarluinnarpoq! — Romamiut 6:17.

¹⁹ Inersimallualerumagaanni paasinnissinnaassuseq sungiusartariaqarpoq. Tamanna sungiusarneqartarpoq Guutip oqaasia ilisimallualerniarlugu iliuuseqarnikkut aamma naalannermik ilinniarnikkut. Tamannali inuusuttunut immikkut unamminiarnartuuvoq. Unamminiarnartoq tamanna qanoq iliuuseqarfigisarneraat allaaserisami tulliuttumi sammissavarput.

[Quppernerup ataani ilanngussat]

Suna ilikkarpiuk?

• Anersaakkut inersimalluarneq qanoq paasisariaqarpa, qanorlu anersaakkut inersimalluartoqalersinnaava?

• Guutip oqaasianik ilisimannilluarneq inersimassummullu ingerlagasuarneq imminnut qanoq attuumassuteqarpat?

• Naalanneq qanoq ilinniarneqartarpa?

• Inersimalluarneq uagutsinnut qanoq iluaqutaava?

[Atuaqqissaarnermi apeqqutit]

[Qupp. 14-mi assiliartaq]

Biibilimi siunnersuutinik malinninneq inersimalluartutut ajornartorsiutinik aaqqiinissamut iluaqutigaarput

[Qupp. 16, 17-mi assiliartaq]

Kristumiut siulliit Jiisusip unnersuussutaanik malinninnerat inuuinnarnissaannut aalajangiisuuvoq