‘Jehova Ni Ropui Tak Chu A Hnaih’ Tawh Avangin Puitlin Lam Pan Rawh
‘Jehova Ni Ropui Tak Chu A Hnaih’ Tawh Avangin Puitlin Lam Pan Rawh
“Puitlin lam i pan ang u.”—HEB. 6:1, 2.
1, 2. Jerusalem leh Judai rama awm kum zabi khatnaa Kristiante khân “tlangahte tlân bo” theihna hun remchâng eng nge an neih?
ISUA leia a awm lai khân, a zirtîrte’n a hnênah: “I lo kal lehna leh khawvêl tâwpna chhinchhiahna chu engnge ni ang?” tiin an zâwt a. Chu an zawhna chhân nâna hrilh lâwk thu a sawi chuan kum zabi khatnaah khân thlen famkimna hmasa zâwk a nei a. Chu a hrilh lâwk thuah chuan Isua chuan tâwpna a hnaih tawhzia târ langtu tûr thilthleng dangdai tak chungchâng a sawi a ni. Chu thilthleng chu an hmuhin, “Judai rama awmte chu tlangahte [an] tlân bo” tûr a ni. (Mt. 24:1-3, 15-22) Isua zirtîrte chuan chhinchhiahna chu an hriain, a kaihhruaina pêk angin thil an ti ang em?
2 Kum sawmthum vêl hnu, C.E. 61-ah chuan tirhkoh Paula chuan Jerusalem leh a chhehvêla awm Hebrai Kristiante hnênah thuchah khauh tak leh pawimawh tak a ziak a. Paula leh a unaute chuan “hrehawm nasa tak” inṭanna tûr chuan kum nga chauh a duh tih rêng an hre lo. (Mt. 24:21) C.E. 66-ah Cestius Gallus-a chuan Rom sipaite chu kaihruaiin Jerusalem chu a bei hlawhtling ṭêp a. Mahse, rin lo taka inhnûk dâwk thutin, Kristiante tân hmun hima tlân chhuah theihna hun remchâng a pe a ni.
3. Paula chuan Hebrai Kristiante hnênah eng fuihna nge a pêk a, engvângin nge?
3 Chûng Kristiante chuan thilthlengte chu Isua thusawi thlen famkimna a ni tih hria a, an tlân chhiat a ngai a ni. Mahse, ṭhenkhat chu an “bêng a lo chhêt” a. Thlarau lama nausên “hnute” ring ang mai an ni. (Hebrai 5:11-13 chhiar rawh.) Kum tam tak chhûng thutaka lo awm tawh ṭhenkhatte pawhin “Pathian nung chu [an] bânsan” ṭan a. (Heb. 3:12) Ṭhenkhat chuan he ni ṭha lo ‘a hnaih telh telh’ lai hian Kristian inkhâwm pelh chu “tih dân,” a nih loh leh tih ṭhanah an nei a ni. (Heb. 10:24, 25) Paula chuan fuihna inâwm tak chu pein: “Krista thu bul hril tawh lovin puitlin lam i pan ang u,” tiin a sawi.—Heb. 6:1, 2.
4. Engvângin nge thlarau lama harhvân reng chu a pawimawh a, engin nge chutianga awm reng tûrin min ṭanpui ang?
4 Isua hrilh lâwkna thlen famkimna hnuhnûng ber hunah kan awm a. Setana inawpna khawvêl rawn titâwptu tûr—“LALPA ni ropui tak chu a hnai” tawh hle a. (Zep. 1:14) Tûn hma zawng aiin, thlarau lamah kan harhvâng reng tûr a ni. (1 Pet. 5:8) Chutiang chuan kan harhvâng tak zet em? Kristian puitlinna chuan kan hun hmâwr tawhzia hre reng tûrin min ṭanpui ang.
Kristian Puitlinna Chu Eng Nge Ni?
5, 6. (a) Thlarau lama puitlinnaah chuan eng nge tel? (b) Puitlin lam pan tûrin eng kawng hniha thawh rim nge ngai?
5 Paula chuan kum zabi khatnaa Hebrai Kristiante chu puitlin lam pan zêl tûra a fuih mai bâkah, thlarau lama puitlinnain a huam telte pawh a hrilh bawk a ni. (Hebrai 5:14 chhiar rawh.) “Puitlingte” chuan “hnute” ringawt rin chu an duh tâwk lo va, “chaw rum” an ei a ni. Chuvâng chuan, thutak “A Aw B” mai bâkah “thu ril” pawh an hria a. (1 Kor. 2:10) Chu bâkah, chhia leh ṭha fiah tûra ṭanpuitu—an thil hriatte nunpuina hmangin—an hriat theihnate chu an sawizawi a ni. Chu an hriatna sawizawi tawh chuan thutlûkna an siam hunah Bible thu bulte nêna a inkûngkaih dân hmu thiam tûr leh a nunpui dân tûr a hriat thiamtîr a ni.
6 “Benga kan hriatte kha ṭhahnemngai takin kan pawisa lehzual tûr a ni, chutilochuan kan tawlh bo hlauh dah ang e,” tiin Paula chuan a ziak a. (Heb. 2:1) Kan inhriat chhuah hma hauhvin rinna aṭangin kan lo tawlh bo reng thei a ni. Bible kan zir chhûnga ‘ṭhahnemngai taka pawisak lehzualna’ hmangin chutianga tawlh bona chu kan pumpelh thei a ni. Chuvângin, heti hian mahni kan inzâwt ṭheuh thei a ni: ‘Pathian thu A Aw B te chu ka la ngaihtuah cheu vem? Thutaka rilru zawng zawng pe lovin, a hming ve mai maia ti ka ni em? Engtin nge thlarau lamah hma ka sâwn tak zet theih ang? Puitlin lam pan tûr chuan a lo berah kawng hniha kan thawh rim a ngai a. Pathian Thu chu kan hre chiang tûr a ni a. Tin, thuâwih kan zir tûr a ni bawk.
Pathian Thu Hre Chiang Rawh
7. Engtin nge Pathian Thu hriat chian lehzualna chu kan hlâwkpui theih ang?
7 “Hnute ring apiang chuan felna thu-ah hian hriatna an nei si lo, nausên an nih avângin,” tiin Paula chuan a ziak a. (Heb. 5:13) Kristian puitling ni tûr chuan, kan hnêna a thuchah chu kan hre chiang hle tûr a ni. Chu a thuchah chu a Thu, Bible-a a chuan avângin, Bible leh “bawi rinawm, fing tak” chhuah thu leh hla zirlai ṭha tak kan ni tûr a ni. (Mt. 24:45-47) He mi kawnga Pathian ngaihtuahna hriatna chuan kan hriat theihna sâwizawi tûrin min ṭanpui ang. Kristian pakhat Orchid-i entîrna hi han ngaihtuah teh. * Ani chuan: “Ka nun nghawng nasa ber fuihna ka dawn chu Bible chhiar ziah tûra fuihna hi a ni. Bible chhiar chhuah nân chuan kum hnih lai ka hmang a; mahse, min Siamtu ka hriat chianna hmasak ber ṭum niin ka hria. A kawngte, a duhzâwng leh duh lohzâwng te, a thiltih theihzia te, leh a finziate chu ka zir a. Ni tina Bible chhiarna chuan ka nuna hun khirh lai berte pawh pal tlang thei tûrin min tichak a ni,” a ti.
8. Engtin nge Pathian thu chuan kan chungah hna a thawh theih?
8 Pathian Thu nî tina chhiarna chuan, a thute chu kan chungah hna a thawhtîr, a nih loh leh ‘thil a tih theihtîr’ a ni. (Hebrai 4:12 chhiar rawh.) Chutianga chhiarna chuan kan chhûngril nihna a chher ṭha theiin, Pathian Jehova min tihlâwmtîr lehzual thei a ni. Bible chhiar tûr leh a thute chhût ngun tûrin hun tam zâwk i induan a ngai em?
9, 10. Pathian Thu hriat chiannaah eng nge tel? Entîrna pe rawh.
9 Bible hriat chiannaah chuan a thute hriatna mai aia tam a tel a. Paula hun laia Pathian Lehkha Thu lama nausênte pawh kha Pathian thâwk khum Thu hre lo hulhual an ni chuang lo. Mahse, a ṭhatna tem tûrin an thil hriatte chu a takin an nunpui lo va. Pathian thu chu an nuna thu tlûkna fing siam tûra inkaihhruaitîrin an hre chiang thei a; mahse, chutiang chuan an ti lo.
10 Pathian Thu hre chiang tih awmzia chu a thu hria a, a taka nunpui bawk hi a ni. Kristian unaunu Kyle-i thiltawn chuan chutianga tih theih a nih dân chu a târ lang a ni. Kyle-i chu a hnathawhpui pakhat nên an inhnial chiam mai a. Buaina ching fel tûrin eng nge a tih tâk? Ani chuan: “Ka rilruah Rom 12:18 thu: ‘Nangmahni lam tal, mi zawng zawng nên inremin awm rawh u,’ tih chu a lo lang nghâl a. Hna thawh bâna amah nêna inhmu tûr chuan ruahmanna ka siam ta nghâl a,” tiin a sawi a ni. Chu an inhmuhna chu a hlawhtling hle a, chutianga Kyle-i hma lâkna chuan a thawhpuinu rilru chu a khawih hle a ni. “Bible thu bulte kan nunpui phawt chuan, kan kal sual thei ngai lo tih ka hmu chhuak a ni,” tiin Kyle-i chuan a sawi.
Thu Awih Zir Rawh
11. Dinhmun khirh tak hnuaiah chuan thu âwih a harsa tih engin nge târ lang?
11 A bîk takin, dinhmun khirh kan hmachhawn hunah Pathian Lehkha Thua kan thil zirte nunpui chu a harsa hle thei a. Entîr nân, Pathian Jehova’n Israel fate Aigupta sal tânna aṭanga a hruai chhuah hnu lawk khân, anni chuan ‘Mosia chu an beiin,’ ‘LALPA an fiah’ a ni. Engvângin nge? Tui in tûr an tlâkchham vâng a ni. (Ex. 17:1-4) Pathian nêna thutlung an siam a, ‘LALPA sawi zawng zawngte ti tûra’ thu an tiam hnu thla hnih pawh a liam hmain, milem biain a dân an bawhchhia a ni. (Ex. 24:3, 12-18; 32:1, 2, 7-9) Chu chu Mosia’n Horeb Tlânga thupêk a dawn laia a thang bosan rei lutuk avânga an hlauh vâng a ni thei ang em? Amalek-hovin rawn bei leh ta se, a bân phar avânga hnehna lo chanpuitu Mosia tel lo chuan an tlâwm mai ang tih an hlauh vâng a ni thei ang em? (Ex. 17:8-16) Chu chu thil ni thei a ni; a enga pawh chu ni se, Israelte chuan “thu an zâwm duh lo” a ni. (Tirh. 7:39-41) Paula chuan Kristiante chu Israelte’n Ram Tiama luh an hlauh avânga an lantîr thu “âwih loh entîrna anga awma an tlûk loh nân,” ‘ṭhahnem ngai’ tûrin a fuih a ni.—Heb. 4:3, 11.
12. Engtin nge Isua chuan thuawih a zir a, chu chu eng nge a hlâwkna?
12 Puitlin lam pan zel tûr chuan ṭhahnem ngai taka Jehova thu kan awih a ngai a. Isua Krista’n a lo entîr tawh angin, thu âwihna chu thil tawrh aṭanga zir chhuah a ni fo. (Hebrai 5:8, 9 chhiar rawh.) Leia a lo kal hma khân, Isua chuan a Pa thu a âwih a. Amaherawhchu, leia a awm laia a Pa duhzâwng tihnaah chuan tisa leh rilru lama hrehawm tawrhna a tel a ni. Harsatna nasa tak hnuaia thu âwihna hmangin, Pathianin atâna nihna thar a ruat, Lal leh Puithiam Lalber atân Isua chu ‘tihṭhatfamkimin a awm’ a ni.
13. Thu âwih kan zir leh zir loh engin nge târ lang?
13 A nih leh keini ve thung hi le? Buaina lungngaihthlâk tak kan tawn hunah pawh Jehova thu âwih chu kan tum tlat em? (1 Petera 1:6, 7 chhiar rawh.) Nungchang lam te, rinawmna te, ṭha taka lei hman te, mahnia Bible chhiar leh zir te, Kristian inkhâwmnaa tel te, leh thu hrilhnaa tel te chungchânga Pathian fuihna chu a chiang hle. (Jos. 1:8; Mt. 28:19, 20; Eph. 4:25, 28, 29; 5:3-5; Heb. 10:24, 25) Harsatna hnuaiah pawh hêng thilahte hian Pathian Jehova thu kan awih em? Kan thu âwihna chu puitlin lam kan pan zel tih târ langtu a ni.
Kristian Puitlinna —Engvângin Nge A Hlâwk?
14. Puitlin lam pan zêlnain mi a vênhim theih dân entîrna pe rawh.
14 ‘Inhriat chhuah theihna rêng rêng nei tawh lo’ he khawvêlah hian, a chhia leh a ṭha fiah thei khawpa sâwizawi hriat theihna neih chu Kristiante tân chuan invênhimna a ni tak meuh a ni. (Eph. 4:19) Entîr nân, Bible thu leh hla chhuah chhiar ziah a, hlut êm êmtu unaupa James-a chuan hmeichhia hlîrin hna an thawhna hmunah hna a hmu a. Ani chuan: “Hmeichhe tam takte chu nungchang ṭha lo tak tak an nih laiin, an zînga pakhat chu nungchang ṭha tak niin a lang a, Bible thutak ngaihsakna pawh a lantîr bawk a. Mahse, hnathawhna pindana kan pahnih chauhva kan awm chuan mi rawn pan ta mai a. A tifiam emaw ka ti a, lo nawr kian chu harsa ka ti hle bawk a ni. Chutah chiah mai chuan unaupa pakhat a hnathawhna hmuna chutiang bawk thlêmna tâwk ve chungchâng Vênnainsâng-a thiltawn chu ka hre chhuak ta phut a. Chu thuziak chuan Josefa leh Potiphara nupui entîrna chu a hmang a. * Chu ve leh ani chu ka nam kiang ta nghâl a, ani pawh chuan min chhuahsan ve ta a ni. (Gen. 39:7-12) Thil pawi thui zâwk thleng lo va, a chhia leh ṭha hriatna thiang a vawn chhun zawm theih avângin James-a chu a hlâwm hle.—1 Tim. 1:5.
15. Engtin nge puitlin lam panna chuan kan thinlung chu a tihngheh theih?
15 Puitlinna chuan kan thinlung a tihngheh a, ‘zirtîrna tinrêng leh zirtîr mak tak len bona’ laka min vênhim avângin a hlâwk bawk a ni. (Hebrai 13:9 chhiar rawh.) Thlarau lama hmasâwn tûra ṭan kan lâk hian, “thil ṭha bîk,” a nih loh leh thil pawimawh bîkte chu kan ngaihtuah reng a. (Phil. 1:9-11) Chuvângin, Pathian chungah leh kan ṭhatna tûra ruahmanna a siam zawng zawng chungah kan lâwmna a zual ṭhîn a ni. (Rom 3:24) ‘Rilru lama puitling’ Kristiante chuan chutianga lâwmna leh Pathian Jehova nêna inlaichînna hnai chu an nei a ni.—1 Kor. 14:20.
16. Engin nge unaunu pakhat chu ‘thinlung nghet’ nei tûra ṭanpui?
16 Unaunu Louise-i chuan a baptisma chan hnu hun engemaw chen chu mi dangte’n amah an thlîr dân lam a ngaih pawimawh ber thu a sawi a. Ani chuan: “Thil engmah ka tisual lo naa, thinlung taka Jehova rawngbâwl châkna ka nei êm êm lo va. Pathian Jehova tâna ka tih theih tâwk ti nia inhre tûr chuan, insiam ṭhat ka ngai tih ka hre chhuak a ni. Ka insiam ṭhatna nasa ber chu ka thinlung zawng zawnga amah chibai ka bûk ta hi a ni,” a ti. Chutianga ṭan a lâkna chuan Louise-i chu ‘thinlung nghet’ a neihtîr a; hrisêl lohna nasa takin a tlâkbuak tâk hnuah pawh chu chuan nasa takin a ṭanpui a ni. (Jak. 5:8) Louise-i chuan, “Natna chu tuar nasa hle mah ila, Pathian Jehova ka hnaih tak zet a ni,” a ti.
‘Rilru Tak Zetin Thu Awih Rawh’
17. Engvângin nge kum zabi khatnaah khân thu âwihna a pawimawh bîk?
17 ‘Puitlin lam pan’ tûra Paula fuihna chu kum zabi khatnaa Jerusalem leh Judia rama chêng Kristiante tân chuan nun chhanhimtu a ni nameuh mai. Chu fuihna zâwmtute chuan “tlangahte tlân bo” tûra Isua chhinchhiahna pêk hre thiam thei tûrin thlarau lama hriatthiamna an nei a ni. Anni chuan “tiṭiautu tenawm . . . hmun thianghlima dinga” an hmuh hun—Rom sipaite’n Jerusalem an hual a, an luh chhilh hun—chu tlân bo hun a ni tih an hria a ni. (Mt. 24:15, 16) Kristiante chuan Isua hrilh lâwk thu zâwmin Jerusalem khawpui chu an tlân chhiatsan a, Kohhran chanchin chhui mi Eusebius-a sawi dân chuan chûng mite chu Gilead tlâng ram khaw pakhat Pella an tihah chuan an tlânchhia a. Jerusalem chunga thleng chhiatna râpthlâk ber berte zînga pakhat chu an pumpelh a ni.
18, 19. (a) Kan hunah hian engvângin nge thu âwih hi thil pawimawh tak a nih? (b) A dawta thuziakah eng nge kan ngaihtuah ang?
18 Chutiang bawkin, Isua sawi lâwk tehkhin theih rual loh “hrehawm nasa tak” thlen famkimna ropui ber kan hmachhawn hunah pawh, puitlinna avânga kan neih thu âwihna chuan min chhanhim ang. (Mt. 24:21) “Sum enkawltu rinawm” hnên aṭanga kaihhruaina hmanhmawhthlâk kan la dawn tûr engpawh chu zâwm nghâlin, thu âwihna kan lantîr ang em? (Lk. 12:42) ‘Rilru tak zeta thu âwih’ kan zir chu a va pawimawh tak êm!—Rom 6:17, 18.
19 Puitlin lam pan tûr chuan kan hriat theihna kan sâwizawi a ngai a. Chu chu Pathian Thu hre chiang lehzual tûra ṭan lâkna leh thu âwih zirna hmangin kan ti a ni. Kristian puitlinna lam pan chu a bîk takin ṭhalaite tân a harsa a. A dawta thuziak chuan chûng harsatnate hlawhtling taka pal tlang theih dân a târ lang ang. (w09 5/15)
[Footnote-te]
^ par. 7 Hming ṭhenkhatte chu thlâk a ni.
^ par. 14 October 1, 1999 chhuak, Vênnainsâng (English), “Thil Sual Do Thei Tûra Thuam Chak,” tih thupui hmanga thuziak chu en rawh.
Eng Nge Kan Zir?
• Thlarau lama puitlinna chu eng nge ni a, chu chu engtin nge kan neih?
• Puitlin lam kan pannaah Pathian Thu hriat chiannain engtin nge min ṭanpui?
• Engtin nge thu âwih kan zir?
• Eng kawngtein nge puitlinna chu kan hlâwkpui?
[Zirlai Atâna Zawhnate]
[Phêk 14-naa milem]
Bible fuihna thu nunpuina chuan buainate puitling taka chingfel tûrin min ṭanpui
[Phêk 16, 17-naa milem]
Isua vaukhânna thu zawm chu Kristian hmasate tân nun chhanhimna a ni