Qchʼiysam qokslabʼil tuʼnju chʼix tul tqʼij Jehová

«Qqʼoʼnk tilil tuʼn tokxix qnabʼl ik tzaʼn jun tij xjal» (HEB. 6:1).

1, 2. ¿Alkye ambʼil xi qʼoʼn kye okslal te Jerusalén ex te Judea tuʼn kyxi oq twi witz?

 TOJ jun maj e ok laqʼeʼ qe t-xnaqʼtzbʼen Jesús ttxlaj ex xi kyqanin jlu te: «¿Jtoj bʼan tjapun tkyaqil jlu ex alkye señ tzul chʼixtoq tula ex chʼixtoq tjapun bʼaj tqʼijlalil?». Xi ttzaqʼweʼn Jesús tukʼil jun profecía aju japun twiʼ tnejel maj toj tnejel syent abʼqʼi. Yolin tiʼj jun tiʼ chʼinxtoq tbʼaj. Xi tqʼamaʼn junjun tiʼchaq tuʼn tbʼaj aju tzultoq tyekʼin qa chʼixtoq tul xitbʼil. Ajtoq tbʼaj jlu, aqeju «xjal ateʼ tuj txʼotxʼ Judea» iltoq tiʼj tuʼn kyxi oq twi witz (Mat. 24:1-3, 15-22). ¿Okpe kʼelel kynikʼ tdiscípulo Jesús kyiʼj señ lu ex kxelpe kynimen tkyaqilju kxel tqʼamaʼn kye?

² Toj abʼqʼi 61 tej otoq tzikʼ junlo 30 abʼqʼi, xi ttzʼibʼin apóstol Pablo jun carta kye okslal te Jerusalén ex qeju ateʼ tiʼjele tnam. ¿Tiquʼn xi ttzʼibʼin carta lu? Tuʼntzun tel kynikʼ tiʼj toj alkye ambʼil in che anqʼin. Mintiʼ kubʼ t-ximen Pablo ex qe okslal qa oʼkxtoq jweʼ abʼqʼi atxtoq tuʼn kyjapun kywi señ lu ex tuʼn t-xi tzyet «kʼixbʼisabʼl maʼxix» (Mat. 24:21). Toj abʼqʼi 66 ok kytxolbʼan kyibʼ soldad te Roma tiʼj tnam Jerusalén, ex a Cestio Galo nejenel kye soldad. Noqtzun tuʼnj, tej chʼixtoq tkubʼ xiten tnam, xi tqʼoʼn Cestio Galo ordén kye tsoldad tuʼn tel kypan kyibʼ tiʼj tnam ex xi tqʼoʼn jlu ambʼil kye xjal at toj tnam tuʼn kyetz oq.

3. ¿Alkye consej xi tqʼoʼn Pablo kye okslal aj Hebreo ex tiquʼn bʼant jlu tuʼn?

³ Nimtoq toklen tuʼn kyten okslal kyuw toj kyokslabʼil. ¿Tiquʼn? Tuʼnju kʼoniltoq kyiʼj tuʼn tel kynikʼ tiʼj tiʼ kyxilen qe tiʼchaq ex qa iltoq tiʼj tuʼn kyel oq. Noqtzun tuʼnj, ateʼ junjun mintiʼ el kynikʼ tiʼj jlu. Naʼmxtoq kychʼiy toj kyokslabʼil ex otoq che ok «ik tzaʼn tal neʼ kukx» in xi kychʼuʼ (kjawil uʼjit Hebreos 5:11-13). Axpe ikx, aqeju otoq tzikʼ nim ambʼil ateʼ toj axix tok, xi tzyet tuʼn tel kypan kyibʼ tiʼj Dios (Heb. 3:12). Maske chʼixtoq tul laqʼeʼ xitbʼil, ateʼ junjun otoq che naqʼet tuʼn miʼn kyxiʼ kyoj chmabʼil (Heb. 10:24, 25). Tuʼntzunju, xi tqʼamaʼn Pablo consej lu kye: «Kyjaʼtzun tten, qqʼoʼnk tilil tuʼn tokxix qnabʼl ik tzaʼn jun tij xjal, ex mya noq oʼkx tuʼn qyolin tiʼj tuj tnejel xnaqʼtzbʼil tiʼj Crist» (Heb. 6:1).

4. ¿Tiquʼn nim toklen tuʼn tok tilil quʼn ex tiʼ jaku tzʼonin qiʼj?

⁴ In qo anqʼin toj jun ambʼil jatumel in che japun kywi profecía kyaj tqʼamaʼn Jesús. «Niqaʼ taʼ tuʼn tul kanun ju nintz tqʼijlalil jwisi tuʼn Qman», jatumel kbʼel xitin tkyaqilju tokx tjaqʼ tkawbʼil Satanás (Sof. 1:14). Tuʼntzunju, nim toklen tuʼn tok qxqʼuqin qibʼ ex tuʼn tbʼaj qkyuwsan qibʼ toj qokslabʼil (1 Ped. 5:8). ¿In bʼantpe jlu quʼn? Qa ma qo chʼiy toj qokslabʼil, kʼonil qiʼj tuʼn ttzaj qnaʼn toj alkye ambʼil in qo anqʼin.

¿Tiʼ t-xilen aju tuʼn qchʼiy toj qokslabʼil?

5, 6. a) ¿Tiʼ t-xilen tuʼn qchʼiy toj qokslabʼil? b) ¿Alkye kabʼe tiʼ il tiʼj tuʼn tbʼant quʼn tuʼntzun qchʼiy toj qokslabʼil?

⁵ Onin Pablo kyiʼj okslal aj Hebreo tuʼn kychʼiy toj kyokslabʼil, pero ax ikx xi tqʼamaʼn kye tiʼ t-xilen jlu (kjawil uʼjit Hebreos 5:14). Aʼyeju okslal ma che chʼiy toj kyokslabʼil, nya oʼkx in che xnaqʼtzan kyiʼj xnaqʼtzbʼil nim toklen tkuʼx toj Tyol Dios, sino ax ikx kyiʼj nya xnaqʼtzbʼil kwest tuʼn tel qnikʼ tiʼj (1 Cor. 2:10). Ax ikx, in kubʼ kyqʼoʼn toj xnaqʼtzbʼil aju in nel kynikʼ tiʼj, tuʼntzunju, xnaqʼtzaʼn maj taʼ kynabʼil ex in nel kynikʼ tiʼj alkyeju bʼaʼn ex alkyeju nya bʼaʼn. Iktzun tten, aj tkubʼ kyximen tuʼn tbʼant jun tiʼ kyuʼn, in che ximen kyiʼj nabʼil ateʼkux toj Tyol Dios tuʼn tel kynikʼ tiʼj alkyeju mas bʼaʼn.

⁶ Kubʼ ttzʼibʼin Pablo jlu: «Kyjaʼtzun il tiʼj tuʼn t-xi qbʼiʼnxix aju yol ma qbʼi, tuʼntzun miʼn qel txalpuj tiʼj» (Heb. 2:1). Chebʼe chebʼe jaku qo el txalpaj ex bʼalo mlay tzʼel qnikʼ tiʼj. Tuʼn miʼn tbʼaj jlu qiʼj, nim toklen «tuʼn t-xi qbʼiʼnxix aju yol ma qbʼi» aj qxnaqʼtzan kyiʼj xnaqʼtzbʼil nim kyoklen toj Tyol Dios. Qo ximen kyiʼj xjel lu: «¿Oʼkxpe ojtzqiʼn qe xnaqʼtzbʼil nim kyoklen ateʼkux toj Tyol Dios wuʼne? ¿Oʼkxpe in xi nbʼinchaʼne qe tiʼchaq tuʼnju ma chin naqʼete kyiʼj? ¿Tiʼ jaku bʼant wuʼne tuʼn tkuʼpin axix tok toj wanmiye ex tuʼn nchʼiye toj wokslabʼile?». Tuʼn qchʼiy toj qokslabʼil, nim toklen tuʼn tbʼant kabʼe tiʼ quʼn. Tnejel, nim toklen tuʼn tok qojtzqiʼnxix Tyol Dios ex tkabʼin, nim toklen tuʼn qnimen te Jehová.

Nim toklen tuʼn tok qojtzqiʼnxix Tyol Dios

7. ¿Tiʼ tbʼanel jaku tzaj qe qa ma tzʼok qojtzqiʼnxix Tyol Dios?

⁷ Kubʼ ttzʼibʼin Pablo jlu: «Porke alkye kukx tchʼuʼn, mlay tzʼel tnikʼ tiʼj ju yol tzʼaqlxix, tuʼnju neʼx taʼ» (Heb. 5:13). Tuʼn qchʼiy toj qokslabʼil, tbʼanel tuʼn tok qojtzqiʼnxix aju tqanil o tzaj tqʼoʼn Dios qe. Ex tuʼnju atz in kanet tqanil lu quʼn toj Tyol Dios, nim toklen tuʼn qxnaqʼtzan tiʼj junx kyukʼil qe uʼj in tzaj tqʼoʼn «majen in bʼant taqʼun [...] ex at tnabʼl» (Mat. 24:45-47). Iktzun tten, kʼelel qnikʼ tiʼj alkye t-ximbʼetz Dios ex kʼelel qnikʼ tiʼj alkye bʼaʼn ex alkye nya bʼaʼn. Qo xnaqʼtzan tiʼjju bʼaj tiʼj Rosa. * In tzaj tqʼamaʼn ermana jlu: «Jun tiʼ o tzʼonin wiʼje toj wanqʼibʼile, aju tuʼn wuʼjine tiʼj Tyol Dios tkyaqil qʼij. Xi tiʼn junlo kabʼe abʼqʼi tuʼn tkubʼ wuʼjine tkyaqil Tyol Dios. Pero onin wiʼje tuʼn tok wojtzqiʼne aju Bʼinchal tkyaqil, tzeʼn in xi tbʼinchaʼn kyiʼj qe tiʼchaq, aju tipumal, aju tnabʼil, aju tbʼanel toj twitz ex aju in nel tikʼun. Ax ikx o tzʼonin wiʼje tuʼn wexe kywitz nya bʼaʼn o che tzaj toj wanqʼibʼile».

8. ¿Tzeʼn jaku tzʼonin Tyol Dios qiʼj?

⁸ Nim jaku tzʼonin tqanil tkuʼx toj Tyol Dios qiʼj qa ma jaw quʼjin tkyaqil qʼij (kjawil uʼjit Hebreos 4:12). Ax ikx, kʼonil qiʼj tuʼn tbʼaj qchʼexpuʼn qmod ex tuʼn qok te mas tbʼanel xjal toj twitz Jehová. ¿In kubʼpe t-ximana qa il tiʼj tuʼn tel tpaʼna mas ambʼil tuʼn tuʼjina ex tuʼn t-ximana tiʼj Biblia?

9, 10. ¿Tiʼ t-xilen aju tuʼn tel qnikʼ tiʼj Tyol Dios? Qʼamantza jun techel.

⁹ Ik tzeʼn ma tzʼel qnikʼ tiʼj, nim toklen tuʼn tok tilil quʼn tuʼn tok qojtzqiʼnxix Tyol Dios. ¿Tiquʼn? Tuʼnju tej tyolin Pablo kyiʼj okslal naʼmxtoq kychʼiy toj kyokslabʼil, bʼalo attoq chʼin kyojtzqibʼil tiʼj Tyol Dios. Pero tuʼnju mintiʼ kubʼ kybʼinchaʼn aju el kynikʼ tiʼj, mintiʼ e chʼiy toj kyokslabʼil. Ax ikx, mintiʼ ok kynabʼil tuʼnju mintiʼ ajbʼen qe consej toj Tyol Dios kyuʼn tej tkubʼ kyximen tuʼn tbʼant jun tiʼ kyuʼn.

¹⁰ Tuʼntzunju, qa mintiʼ in kubʼ qanqʼin qe xnaqʼtzbʼil ateʼkux toj Tyol Dios, mlay txi qqʼamaʼn qa ojtzqiʼnxix Tyol Dios quʼn. Qo xnaqʼtzan tiʼjju bʼaj tiʼj ermana Kyle. Jaw qʼojin ermana tukʼil jun tukʼil toj aqʼuntl, pero tajtoq tuʼn t-xi tbʼinchaʼn tiʼj jlu. ¿Tiʼ bʼant tuʼn? Ax ermana in tzaj qʼamante jlu: «Tzaj nnaʼne texto te Romanos 12:18, jatumel in tzaj tqʼamaʼn jlu: ‹Qa jaku bʼant kyuʼne, tzʼok tililx kyuʼne tuʼn kytene bʼaʼn kyukʼil kykyaqil xjal›. Tuʼntzunju, xi nqʼamaʼne te wukʼile tuʼn nyoline tukʼil ajtoq qexe toj aqʼuntl». Tbʼanel ela tej tyolin ermana Kyle tukʼil xuʼj lu ex jaw labʼin xuʼj tiʼj jlu. Tqʼamatl ermana jlu: «El nnikʼe tiʼj qa ma che ajbʼen consej toj Tyol Dios quʼn, tbʼanel in che ela qe tiʼchaq».

Bʼaʼn tuʼn qnimen te Jehová

11. ¿Alkye techel in tzaj tyekʼin qa kwest tuʼn t-xi qbʼiʼn tyol Jehová aj qok weʼ twitz nya bʼaʼn?

¹¹ Kwestlo tuʼn t-xi qbʼiʼn qe consej in tzaj tqʼamaʼn Tyol Dios aj qok weʼ kywitz nya bʼaʼn. Qo ximen tiʼjju bʼaj kyiʼj aj Israel. Tej tzmatoq in che etz tiʼn Jehová qe aj Israel toj Egipto, «e jawtzun ilin xjal tiʼj Moisés» ex ok kyqʼoʼn «Qman tuj malbʼil». ¿Tiquʼn bʼant jlu kyuʼn? Tuʼnju mintiʼtoq aʼ (Éxo. 17:1-4). Yajxitl, kyaj bʼant tiʼj jun kyyol tukʼil Jehová ex xi kytziyen tuʼn kynimen te. Pero tej tikʼ kabʼe xjaw, mintiʼ xi kybʼiʼn ley tzaj tqʼoʼn Jehová tuʼn miʼn kykʼulin kywitz tilbʼilal moqa sant (Éxo. 24:3, 12-18; 32:1, 2, 7-9). ¿Tiquʼn mintiʼ e nimen te Jehová? ¿Bʼantpe jlu kyuʼn tuʼnju otoq tzikʼ nim ambʼil tuʼn Moisés twi witz Horeb ex kubʼ kyximen qa che okel tzoqpaj aj qʼoj kyiʼj? Bʼaʼn tuʼn ttzaj qnaʼn qa otoq che ok tzoqpaj jun maj amalequitas kyiʼj aj Israel ex otoq tzʼonin Moisés tuʼn kykambʼan kyiʼj. Pero mi aʼltoq Moisés kyukʼil toj ambʼil aju. ¿Tiʼtoq kbʼantel kyuʼn qa ma che ok tzoqpaj aj qʼoj kyiʼj? (Éxo. 17:8-16). Noq tiʼxku bʼaj, mintiʼ e nimen aj Israel te Jehová (Hech. 7:39-41). Ax ikx, mintiʼ e nimen te Jehová tej kytzaj xobʼ tuʼn kyokx toj Txʼotxʼ Tziyen maj. Tuʼntzunju, xi tnaʼn Pablo kye okslal aj Hebreo tuʼn miʼn tel kykanoʼn kyiʼj aj Israel (Heb. 4:3, 11).

12. ¿Tiʼ onin tiʼj Jesús tuʼn tnimen ex tzeʼn onin jlu tiʼj?

¹² Tuʼn qchʼiy toj qokslabʼil, bʼaʼn tuʼn tok tilil quʼn tuʼn qnimen te Jehová. Pero bʼaʼn tuʼn ttzaj qnaʼn qa tuʼn qnimen te Jehová, at maj jaku qo ikʼ toj kʼixkʼoj ik tzeʼn bʼaj tiʼj Jesús (kjawil uʼjit Hebreos 5:8, 9). Tej tten Jesús toj kyaʼj, nimen te Jehová. Pero tej tul tzalu twitz Txʼotxʼ, nya fácil ela te tuʼn tbʼant tajbʼil Jehová tuʼn. Ok weʼ twitz nya bʼaʼn ex ikʼx nim kʼixkʼoj tuʼn. Pero tuʼnju nimen Jesús toj tkyaqil ambʼil, onin tiʼj tuʼn tbʼaj tbʼinchaʼn tten tuʼn t-xi tkʼamoʼn oklenj xi tqʼoʼn Jehová te: tuʼn tok te aj Kawil ex te Tnejel Pal.

13. ¿Tzeʼn kbʼel qyekʼin qa in qo nimen te Jehová?

¹³ Yajtzun qe, ¿okpe qo nimel te Jehová axpe ikx aj qok weʼ twitz nya bʼaʼn? (Kjawil uʼjit 1 Pedro 1:6, 7). Klarxix qe consej in tzaj tqʼoʼn Jehová qe, ik tzeʼn aju at toklen tukʼil qmod tuʼn tten, tzeʼn tuʼn qyolin, tuʼn quʼjin ex tuʼn qxnaqʼtzan tiʼj Biblia, tuʼn qxiʼ kyoj chmabʼil ex tuʼn qex pakbʼal (Jos. 1:8; Mat. 28:19, 20; Efes. 4:25, 28, 29; 5:3-5; Heb. 10:24, 25). Qa ma txi qbʼiʼn tkyaqil consej in tzaj tqʼoʼn Jehová, kbʼel qyekʼin qa in qo chʼiy toj qokslabʼil.

¿Tiʼ tbʼanel jaku tzaj qe qa ma qo chʼiy toj qokslabʼil?

14. Tuʼnju otoq chʼiy jun erman toj tokslabʼil, ¿tzeʼn onin jlu tiʼj?

¹⁴ Qa xnaqʼtzaʼn maj taʼ tnabʼil jun okslal, jaku tzʼonin tiʼj tuʼn tel tnikʼ tiʼj alkyeju bʼaʼn ex alkyeju nya bʼaʼn (Efes. 4:19). Qo yolin tiʼj jun ermano Jorge tbʼi. Tgan tuʼn tuʼjin kyiʼj uʼj in che etz tuʼn ttnam Jehová ex in nok tqʼoʼn kyoklen. Tzaj tkʼamoʼn jun aqʼuntl jatumel mas xuʼj in che aqʼunan. Tqʼama jlu: «Chʼixme kykyaqil xuʼj lu kygan tuʼn kyyaẍin ex mintiʼ in tzaj kychʼixwi tiʼj. Pero attoq jun xuʼj kubʼ tyekʼin tbʼanel tmod ex tajtoq tuʼn tel tnikʼ tiʼj Tyol Dios. Noqtzun tuʼnj, jun maj o kyaj tene qjunalxe toj jun sala. Chebʼe chebʼe ok laqʼeʼ ntxlaje ex kubʼ nximane qa noq in yaqin, pero mas ok laqʼeʼ ntxlaje. Toj ambʼil aju, tzaj nnaʼne jun experiencia toj uʼj Xqʼuqil tiʼjju bʼaj tiʼj jun erman tej tok tweʼ twitz jun nya bʼaʼn ik tzeʼn jlu. Toj xnaqʼtzbʼil lu, yolin tiʼjju bʼaj tiʼj José tukʼil t-xuʼjil Potifar. * Tuʼntzunju, xi nqʼamaʼne te tuʼn tel laqʼeʼ wiʼje ex ikʼ bʼet» (Gén. 39:7-12). Tzalaj Jorge tuʼnju mintiʼ kubʼ tzʼaq toj il ex ten tbʼanel t-ximbʼetz twitz Jehová (1 Tim. 1:5).

15. ¿Tzeʼn in nok qxqʼuqin qanmi aj qchʼiy toj qokslabʼil?

¹⁵ Ax ikx in tzaj juntl tbʼanel qe aj qchʼiy toj qokslabʼil, in nonin qiʼj tuʼn tok qxqʼuqin qanmi tiʼj «junxilchaq xnaqʼtzbʼil mya bʼaʼn» (kjawil uʼjit Hebreos 13:9). Qa ma tzʼok tilil quʼn tuʼn qchʼiy toj qokslabʼil, kʼokel qqʼoʼn qwiʼ kyiʼj tiʼchaq mas nim toklen (Fili. 1:9, 10). Kʼonil jlu qiʼj tuʼn tok qqʼoʼn mas toklen Jehová ex tuʼn t-xi qqʼoʼn chjonte te tiʼj tkyaqilju o tzaj tqʼoʼn qe (Rom. 3:24). Ax ikx in tzaj tqʼoʼn jlu ambʼil qe tuʼn tten jun tbʼanel qamiwbʼil tukʼil Jehová (1 Cor. 14:20).

16. ¿Tiʼ onin tiʼj jun ermana tuʼn tajbʼen te Jehová tuʼn tkyaqil tkʼuʼj?

¹⁶ In tzaj tqʼamaʼn jun ermana Luisa tbʼi qa in najbʼentoq te Jehová noq tuʼn kyyolin txqantl erman bʼaʼn tiʼj. In tzaj tqʼamaʼn jlu: «Mintiʼ jun nya bʼaʼn kubʼ nbʼinchaʼne, pero ax ikx mintiʼ ten ngane tuʼn wajbʼene te Jehová. Tej tbʼet ambʼil, el nnikʼe tiʼj qa tuʼn wajbʼene te Jehová ex tuʼn t-xi nqʼoʼne aju mas tbʼanel te, iltoq tiʼj tuʼn kybʼant chʼixpubʼil wuʼne. Tuʼntzunju, ok tilil wuʼne tuʼn wajbʼene te Jehová tuʼn tkyaqil nkʼuʼje». Tuʼnju ok tkʼujlaʼn ermana Luisa tajbʼebʼil te Jehová, onin tiʼj tuʼn kukx tajbʼen te tej ttzaj jun yabʼil tiʼj (Sant. 5:8). Tqʼamatl jlu: «Tzaj nim nya bʼaʼn wiʼje, pero kubʼ nnaʼne qa kukx in tene ttxlaj Jehová».

Qo nimen te Jehová tuʼn tkyaqil qanmi

17. ¿Tiquʼn nimtoq toklen tuʼn kynimen okslal te tnejel syent abʼqʼi?

¹⁷ Aju consej xi tqʼoʼn Pablo kye okslal te Jerusalén ex te Judea tuʼn kychʼiy toj kyokslabʼil, onin kyiʼj tuʼn kyklet. Aqeju okslal ok tilil kyuʼn tuʼn kychʼiy toj kyokslabʼil, el kynikʼ tiʼj toj alkye ambʼil tuʼn kyxi oq twi witz. Tej tok kykeʼyin «tilbʼilal ikʼbʼilxix ax tuj tja Dios», toj juntl yol, aqeju soldad te Roma otoq tzʼok kytxolbʼan kyibʼ tiʼj tnam Jerusalén, el kynikʼ tiʼj qa atzun ambʼil lu tuʼn kyex oq (Mat. 24:15, 16). Tzaj kynaʼn aju xi tqʼamaʼn Jesús kye, tuʼn kyex oq naʼmxtoq tkubʼ xiten tnam. Ik tzeʼn tqʼama pal ex historiador Eusebio tbʼi, i ex oq okslal toj tnam Pela, atz twi witz te Galaad. Iktzun tten, e tzaqpaj okslal tiʼj tkyaqilju nya bʼaʼn ok bʼinchaʼn tiʼj tnam Jerusalén.

18, 19. a) ¿Tiquʼn nim toklen tuʼn qnimen toj ambʼil jaʼlo? b) ¿Tiʼ qo xnaqʼtzal tiʼj toj juntl xnaqʼtzbʼil?

¹⁸ Aqeju okslal o che chʼiy toj kyokslabʼil, bʼaʼn che nimen. Kʼonil jlu kyiʼj tuʼn kyklet aj tjapun twi profecía kyaj tqʼamaʼn Jesús tuʼn tul «jun kʼixbʼisabʼl maʼxix» (Mat. 24:21). ¿Okpe kxel qbʼiʼn tqanil tzul tqʼamaʼn «mayordom in japunxix taqʼun»? (Luc. 12:42). Nim toklen tuʼn qnimen tuʼn tkyaqil qkʼuʼj (Rom. 6:17).

¹⁹ Tuʼn qchʼiy toj qokslabʼil, nim toklen tuʼn tbʼaj qxnaqʼtzan qnabʼil. Ex in bʼant jlu aj qxnaqʼtzanxix tiʼj Biblia ex tuʼn t-xi qbʼiʼn Jehová. Kwestlo jaku tzʼela kye kuʼxun tuʼn kychʼiy toj kyokslabʼil. Toj juntl xnaqʼtzbʼil, tzul chikʼbʼaʼn tzeʼn jaku bʼant kyuʼn.

[Qe tqanil]

¿Tiʼ ma tzʼel tnikʼa tiʼj?

• ¿Tiʼ t-xilen tuʼn qchʼiy toj qokslabʼil ex tzeʼn jaku bʼant jlu quʼn?

• ¿Tiquʼn nim toklen tuʼn tok qojtzqiʼnxix Tyol Dios tuʼntzun qchʼiy toj qokslabʼil?

• ¿Tiʼ kʼonil qiʼj tuʼn qnimen te Jehová?

• ¿Tiʼ tbʼanel jaku tzaj qe qa ma qo chʼiy toj qokslabʼil?

[Aʼyeju xjel tiʼj xnaq’tzbʼil]

[Tilb’ilal]

Qa ma chex qbʼiʼn qe consej in tzaj tqʼoʼn Biblia, kʼonil qiʼj tuʼn qex kywitz nya bʼaʼn.

[Tilb’ilal]

Aʼyeju xi kybʼiʼn consej xi tqʼama Jesús, onin kyiʼj tuʼn kyklet.