«¡Nopolix te smucʼul cʼahcʼalel yuʼun Jehová!»: Tulanuk te schʼuunel koʼtantik

«Behbehucotic me ta mucʼubel bahel» (HEB. 6:1).

1, 2. ¿Bin-utʼil juʼ anik bael ta witstikil te jchʼuunjeletik ta Jerusalén sok ta Judea?

 TA JUN BUELTA, te jnopojeletik jich la sjojkʼoybeyik te Jesús: «[¿]Bin señahil yuʼun te ya xtalat soc yuʼun te slajibal cʼahcʼal?». Te Jesús la yal jun albilkʼop te kʼot ta pasel ta sbabial buelta ta sbabial siglo. La yal te ay bin chajpnax ya xkʼot ta pasel te ya yakʼ ta ilel te nopolix-a te slajibal kʼajkʼale. Te kʼalal ya xkʼot yorail, ya skʼan ya x-anik bael ta witstikil «te machʼatic ayic ta Judea» (Mat. 24:1-3, 15-22). ¿Yabal staik ta ilel te señailetik-abi te jnopojeletik yuʼun te Jesús sok yabal schʼuunik spasel te bin albotike?

² Jteb ma sta 30 jaʼbil ta patil, ta jaʼbil 61 te kʼalal talemix-a te Cristo, te jpuk-kʼop Pablo la stsʼibaybey carta te jchʼuunjeletik ta Jerusalén soknix te yantik congregacionetik te nopol ayike. ¿Bin swentail? Swenta ya snopik bin-utʼil ay te schʼuunel yoʼtanike. Te Pablo sok te jchʼuunjeletik ma snaʼojik-a te jaʼxanix joʼeb jaʼbil ya skʼan xtal te tulan wokolil (Mat. 24:21). Ta jaʼbil 66, te soldadoetik yuʼun Roma te jaʼ jwolwanej yuʼunik te Cestio Galo, la sjoytayik te Jerusalén. Pero te kʼalal nopol ya yuʼuntayikix-a te Jerusalén, te Cestio Galo la yal te ya sujtik baele, jich juʼ anik lokʼel te machʼatik joytaybilik-ae.

3. ¿Bin consejo la yakʼ te Pablo ta stojol te jchʼuunjeletik, sok bin yuʼun te jich la yale?

³ Te jchʼuunjeletik ya skʼan ya stsajtay yilik ta lek sok ya skʼan ay spʼijilik yuʼun ya xkʼot ta yoʼtanik te bin yak ta kʼoel ta pasel sok te ya xlokʼik baele. Pero, ay bayalik te ma la spasik tulan yuʼun ya xkʼot ta yoʼtanik, jich kʼoemik-a te bitʼil alaletik te ya skʼanik leche (kʼopona Hebreos 5:11-13). Jaʼnix jich te machʼatik bayalix jaʼbil yochelik ta jchʼuunjel jajchik ta namajel ta stojol te Diose (Heb. 3:12). Manchukme nopolix-a te tulan wokolil, ay machʼatik kʼayemik te ya xchʼayik te tsoblejetik (Heb. 10:24, 25). Jaʼ yuʼun, te Pablo la yakʼ te consejo ini: «Acʼa hiluc cuʼuntic te bintic shahchibal ay ta nopbeyel scʼoblal Cristo, behbehucotic me ta mucʼubel bahel» (Heb. 6:1).

4. ¿Bin ya skoltayotik yuʼun spisil-ora wikʼil jsitik, sok bin yuʼun mukʼ skʼoplal te jich ya jpastike?

⁴ Ta ora ini nopolix ya xkʼot ta pasel yan buelta te albilkʼop la yal te Jesús. «¡Nopolix te smucʼul cʼahcʼalel yuʼun Jehová!» te banti ya yichʼ lajinel te balumilal yuʼun Satanás (Sof. 1:14). Jaʼ yuʼun, ya skʼan te wikʼiluk jsitik sok te ya jtulantestikxan te schʼuunel koʼtantike (1 Ped. 5:8). ¿Jichbal yakotik ta spasel? Teme yakotik ta stulantesel te schʼuunel koʼtantike, jaʼ ya skoltayotik yuʼun ma xchʼay ta koʼtantik te ayotik ta kuxinel ta slajibal kʼajkʼal.

¿Bin smakojbey skʼoplal te tulanuk te schʼuunel koʼtantike?

5, 6. 1) ¿Bin ya spas te machʼa tulanix te schʼuunel yoʼtane? 2) ¿Bin cheb ya skʼan ya jpastik teme ya jkʼantik te ya xtulanub te schʼuunel koʼtantike?

⁵ Te jpuk-kʼop Pablo la stijbey yoʼtan te jchʼuunjeletik te akʼa stulantesikxan te schʼuunel yoʼtanike, pero jaʼnix jich la yal bin smakojbey skʼoplal te talelil ini (kʼopona Hebreos 5:14). Te machʼatik tulanix te schʼuunel yoʼtanik ma jaʼuknax ya yuchʼik leche; ya skʼan ya sweʼik «tulan weʼelil». Jaʼ yuʼun, ma jaʼuknax snopojik te bin kʼunik ta nopele, jaʼnix jich, te bin tulanik ta nopel (1 Cor. 2:10). Te bitʼil ya spas ta skuxlejalik te bin ya snopike pʼijuben ta lek te snopojibal yuʼunik, jaʼ yuʼun, ya snaʼik stsajtayel te bin lek sok te bin ma leke. Te kʼalal ay bin ya staik ta nopele spasel, nail ya sleik ta Biblia yuʼun jaʼ ya spas ta skuxlejalik.

⁶ Te Pablo jich la stsʼibay: «Ya me scʼan te spisil coʼtantic ya quichʼtic ta cuenta te bintic caʼiyejtic, te manchuc ya xhowiyotic bahel» (Heb. 2:1). Melelnix-a, ya xjuʼ te kʼunkʼun ya xpejkʼaj bael te schʼuunel koʼtantike. Swenta ma jichuk ya xkʼot ta jtojoltik, ya skʼan te «spisil coʼtantic ya quichʼic ta cuenta» te bintik ya jnoptik ta Bibliae. Jojkʼoybey jbatik: «¿Jaʼnaxbal jnopoj te bintik kʼunik ta nopel ta Bibliae? ¿Spisilbal koʼtan ya jkʼopon te Bibliae, o jaʼnax ya jpas yuʼun te jich kʼayemonixe? ¿Bin ya xjuʼ ya jpas yuʼun ya xtulanubxan te schʼuunel koʼtane?». Swenta ya xtulanubxan te schʼuunel koʼtantik ay cheb te bin ya skʼan ya jpastike: jaʼ te ya skʼan ya jnoptik ta skʼubulil te sKʼop Dios sok te ya jchʼuuntik spasel te bin ya jnoptike.

Jnoptik ta skʼubulil te sKʼop Dios

7. ¿Bin-utʼil ya skoltayotik snopel ta lek te sKʼop Diose?

⁷ Te Pablo jich la stsʼibay: «Spisil te machʼatic cuxulic to ta chuʼul ma snaʼbeyic scuentahil te nohptesel yuʼun te bin lec ta pasel, como alal to» (Heb. 5:13). Swenta ya xtulanubxan te schʼuunel koʼtantik ya skʼan ya jnaʼtik ta lek te bin ya yalbotik te Diose. Te bin ya yalbotik ya jtatik ta Biblia, jaʼ yuʼun, ya skʼan ya jnoptik ta lek soknix te junetik yakʼoj te «aʼbat te jun yoʼtan soc pʼij» (Mat. 24:45-47). Jich pajal ya xkʼot jpensartik bitʼil te Diose sok jich ya xpʼijubxan-a te snopojibal kuʼuntike. Kiltik te bin kʼax ta stojol te Rosa. * Jich ya yal te hermana ini: «Te bin skoltayejon ta jkuxlejale jaʼ te ya jkʼopon spisil-ora te Bibliae. Ayniwan cheb jaʼbil laj jkʼoponbel spajkal te Bibliae, pero jich la kaʼiy te yuʼun-nix la jnaʼbey sba ta smelelil-a te Jpaswanej kuʼune: te bin yilel stalel, te bin ya smulan sok te bin ma smulane, te bayal yuʼel sok te kʼax bayal spʼijile. Te skʼoponel te Biblia ta jujun kʼajkʼal jaʼ la skoltayon te kʼalal kʼaxon ta wokole».

8. ¿Bin-utʼil ya x-aʼtej ta koʼtantik te sKʼop Diose?

⁸ Teme ya jkʼopontik ta jujun kʼajkʼal te sKʼop Diose, te bin ya yale ya x-aʼtej ta koʼtantik (kʼopona Hebreos 4:12). Ya sjeltay bael te jtaleltik sok jujun kʼajkʼal lekxan ya yilotik te Jehová. ¿Yabal skʼan te ya alokʼesxan tiempo yuʼun ya akʼopon te Biblia sok ya anopilan ta awoʼtan?

9, 10. ¿Bin-utʼil ya xchiknaj ta ilel te jnopojtik ta lek te sKʼop Diose? Ala jun ejemplo.

⁹ Jamal chikan ta ilel te ma jaʼuknax ya skʼan ya jkʼopontik te Bibliae; ya skʼan te ya xkʼubotik ta snopel. Te machʼatik «alal to» te la yalbey skʼoplal te Pabloe yaniwan snaʼik-a te bin ya yal te sKʼop Diose. Jaʼnax yuʼun te ma mukʼ skʼoplal ya yilik, melel ma spas ta skuxlejalik te bin ya snopik tey-ae. Maʼyuk spʼijilik, melel ma jaʼuk ya stʼunik te consejoetik te ay ta Biblia te kʼalal ay bin ya snop ya spas ta skuxlejalike.

¹⁰ Jich te bin-utʼil la kiltikixe, ma xjuʼ ya kaltik te jnopojtik ta lek te sKʼop Dios teme ma jpas ta jkuxlejaltik te bin ya jnoptike. Jich ya yakʼ ta ilel te bin kʼax ta stojol jtul hermana te Kyle sbiile. Te hermana ini la sten sba ta kʼop sok jtul sjoy ta aʼtel. Pero, la skʼan la schajpan te kʼope. ¿Bin la spas? Jich ya yal: «Te texto te oranax tal ta koʼtan jaʼ te Romanos 12:18, te jich ya yal: ‹Ta ban cʼalal ya xhuʼ awuʼunic, lamaluc me awoʼtanic soc spisil ants-winiquetic›. Jich yuʼun la kalbey te joy ta aʼtel te ya jkʼan te ya xkʼopojon sok te kʼalal ya xlokʼotik ta aʼtel». Kʼax lek te bin-utʼil kʼopojike, te sjoy ta aʼtel chajp la yil-a te bin la spas te Kyle. Jich ya yal ta slajibal te hermanae: «La jta ta ilel teme ya jpas ta jkuxlejaltik te bin ya yal te Bibliae, lek ya xkʼot ta lokʼel te bin ya jpastike».

Jchʼuuntik spasel te bin ya jnoptike

11. ¿Bin ejemplo ya yakʼ ta ilel te jaʼniwan wokol ya kaʼiytik schʼuunel mantal te kʼalal ya jsitintaytik jun wokolil?

¹¹ Jaʼniwan wokol ya kaʼiytik schʼuunel te sKʼop Dios te kʼalal ya jsitintaytik wokolil. Jnop kaʼiytik te bin kʼax ta stojol te israeletike. Te kʼalal lokʼesotik talel ta mosoil ta Egipto yuʼun te Jehová, «hahch stijic ta cʼop te Moisés» sok la yilbeyik yoʼtan te Jehová. ¿Bin yuʼun te jich la spasike? Jaʼ ta skaj te maʼyuk jaʼe (Éx. 17:1-4). Tey-abi la yichʼik ta mukʼ lokʼombaetik manchukme aytonax cheb u te la schap skʼopik sok te Jehová sok la yalbeyik ta jamal te ya schʼuunbeyik te smantale (Éx. 24:3, 12-18; 32:1, 2, 7-9). ¿Bin yuʼun la skʼaxuntayik te kʼope? ¿Jaʼbal ta skaj te jalaj ta wits Horeb te Moisés sok xiwik te ya yichʼik ochintayele? Melel ay ochintaybilikix yuʼun-a te amalequitaetik sok jaʼ koltayotik yuʼun te Moisés te kʼalal la stoy moel te skʼabe. Pero, ma tey ayix-a te Moisese. ¿Bin ya spasik teme ya schaʼyichʼik ochintayele? (Éx. 17:8-16). Ma jnaʼtik te bin yuʼun te jich la spasike, te bin ya jnaʼtik jaʼ te «ma ba la scʼan la schʼuhunic» kʼop (Hech. 7:39-41). Ta patil, la skʼaxuntaybeyik skʼop te Jehová te kʼalal maba la skʼan ochik ta Kʼinal te albil skʼoplal ya yichʼik ta skaj te xiwike. Jaʼ yuʼun, te Pablo jamal la yalbey te jchʼuunjeletik te manchuk ya skʼaytes sbaik ta skʼaxuntayel mantal jich bitʼil la spasik te israeletike (Heb. 4:3, 11).

12. ¿Bin-utʼil la snop schʼuunel mantal te Jesús, sok bin-utʼil chajpanot yuʼun?

¹² Yuʼun ya xtulanub te schʼuunel koʼtantik, ya skʼan ya jpastik tulan ta schʼuunbeyel smantal te Jehová. Pero, ayniwan jaʼto ya jnoptik schʼuunel mantal te kʼalal ayotik ta wokol jich bitʼil te Jesuse (kʼopona Hebreos 5:8, 9). Te kʼalal ay ta chʼulchan-a te Jesuse, spisil-ora la schʼuunbey skʼop te sTate. Pero te kʼalal xtaluk ta Balumilal, aynix wokol la yaʼiy schʼuunel mantal ta skaj te wokolil kʼax ta stojole. Te bitʼil la schʼuun mantal manchukme ay ta wokol-a jaʼ chajpanot yuʼun ya x-akʼbot yaʼtel yuʼun Dios ta Ajwalil sok ta Mukʼul Sacerdote.

13. ¿Bin-utʼil ya kakʼtik ta ilel te ya jchʼuunbeytik smantal te Jehová?

¹³ ¿Jaxan te joʼotike? ¿Yabal jchʼuunbeytik smantal te Jehová manchukme ya xkʼaxotik ta tulan wokolil? (Kʼopona 1 Pedro 1:6, 7). Te consejoetik ya jtatik ta Biblia jamal ay, chikan teme jaʼ ta swenta taleliletik, te bin-utʼil ya xkʼopojotik, ta swenta snopel sok skʼoponel te Biblia, te tsoblejetik o te scholel skʼop Dios (Jos. 1:8; Mat. 28:19, 20; Efes. 4:25, 28, 29; 5:3-5; Heb. 10:24, 25). ¿Yabal jchʼuuntik spisil ini manchukme ya jtatik wokoliletik? Teme yake, jich ya kakʼtik ta ilel te yak ta mukʼubel te schʼuunel koʼtantike.

¿Bin lekilal ya jtatik teme tulan te schʼuunel koʼtantike?

14. ¿Bin-utʼil koltayot jtul hermano ta swenta te tulan te schʼuunel yoʼtane?

¹⁴ Te j-abat yuʼun Dios te pʼijuben ta lek te snopojibal yuʼun ya stsajtay yil te bin lek sok te bin ma lek ta balumilal ini te maʼyuk «sqʼuexlalic» (Efes. 4:19). Jich bitʼil te Jorge, te jaʼ jtul hermano te spisil-ora ya skʼopon te junetik lokʼem ta Biblia, la sta jun aʼtelil te banti jaʼ bayalxan antsetik ya x-aʼtejik tey-a. Jich ya yal: «Spisil te joʼtak ta aʼtel ya spasik mulwej sok maba mukenuk ya spasik; pero ay jtul te leknax stalel yilel sok te ya smulan snopel yilel te Bibliae. Pero, ta jun buelta te kʼalal ayotik ta aʼtel-a jtukel jilotik, sok la yalbon teme ya jkʼan ya xwayon soke. La jkuy te yaknax ta lote, pero la kil te kʼunkʼun ya xnoptsaj tal ta jtojol, sok ma jnaʼ-a te bin-utʼil ya jkome. Ta oranax jul ta koʼtan jun experiencia te la jkʼopon ta J-ilkʼinal ta toyol te jaʼnix jich kʼax ta stojol jtul hermano ta yaʼtel. Ta revista-abi la yalbey skʼoplal kʼalal te José la spʼaj te yinam Potifar. * Jaʼ yuʼun la jpit lokʼel ta jtojol, jich lokʼ bael» (Gén. 39:7-12). Te Jorge leknax la yaʼiy sba yuʼun te ma yal ta mulil sok te maʼyuk bin kʼopoj yoʼtan yuʼune (1 Tim. 1:5).

15. ¿Bin-utʼil ya skoltayotik teme tulan te schʼuunel koʼtantike?

¹⁵ Yanxan lekilal te ya jtatik te kʼalal tulan te schʼuunel koʼtantike jaʼ te ma orauk ya kichʼtik loʼlayel (kʼopona Hebreos 13:9). Te kʼalal ya jpastik tulan ta stulantesel te schʼuunel koʼtantik, jaʼ ya xbajt ta koʼtantik spasel te bin mukʼxan skʼoplale (Filip. 1:9, 10). Jichme kʼux ta koʼtantikxan te Jehová sok ya kalbeytik wokol yuʼun spisil te bin yakʼojbotike (Rom. 3:24). Te j-abatetik yuʼun Dios te mukʼikix ta swenta spensarik ya yalbeyik wokol te Jehová sok lekxan ya yamigoin sbaik sok (1 Cor. 14:20).

16. ¿Bin-utʼil la sta yip yoʼtan jtul hermana?

¹⁶ Jtul hermana te Luisa sbiil ya yal te ta nail talel ya xlokʼ ta scholel skʼop Dios swentanax lek skʼoplal ya x-ilot yuʼun te hermanoetike. Jich ya yal: «Maʼyuk bin chopol yakon ta spasel-a, pero maba sok spisil koʼtan yakon ta abatinel ta stojol-a te Jehová. Ta patil kʼot ta koʼtan te ya skʼan ya jeltay te jtalel teme ya jkʼan te spisil koʼtan ya x-abatinon ta stojol te Jehová; te bin la jpase jaʼ te ma jaʼuknax ya x-abatinon ta stojol te Jehová yuʼun-nax lek jkʼoplal ta stojol te yantike». Ta swenta te la spas tulan te Luisa, la sta yip yoʼtan sok jaʼ koltayot yuʼun te kʼalal tsakot ta tulan chamel (Sant. 5:8). Jich ya yalxan: «Bayal kʼax jwokol, pero nopol la kaʼiy jba ta stojol te Jehová».

Jun koʼtantik akʼa jchʼuuntik mantal

17. ¿Bin yuʼun tulan skʼoplal te la schʼuunik mantal te jchʼuunjeletik ta sbabial sigloe?

¹⁷ Te consejo la yakʼ te Pablo ta swenta te akʼa stulantesikxan te schʼuunel yoʼtanik koltayotik te jchʼuunjeletik ta Jerusalén sok ta Judea swenta ma lajik. Te machʼatik la schʼuunik te consejo la yakʼ te Pablo pʼijubxan te snopojibal yuʼunik, sok jich kʼot ta yoʼtanik te seña la yakʼ ta ilel te ya skʼan ya x-anik «bahel ta witsiltic». Te kʼalal la yilik «ta chʼul awilal te bin ilobtic sba te ya xjinawan», te jaʼik te soldadoetik yuʼun Roma te la sjoytayik te Jerusalén yuʼun ya yochintayik, kʼot ta yoʼtanik te jaʼ yorail ya skʼan ya xlokʼik ta anel (Mat. 24:15, 16). Jul ta yoʼtanik te albilkʼop la yal te Jesús, jaʼ yuʼun, lokʼik ta anel te kʼalal mato yichʼ lajinel-a te Jerusalén, bajtik ta nainel ta witstikil yuʼun Galaad ta Pela (o Pella) jich bitʼil la yal te historiador eclesiástico Eusebio. Jich maba lajik te machʼatik lokʼik bael ta anel te kʼalal la yichʼ lajinel te Jerusalén.

18, 19. 1) ¿Bin yuʼun mukʼ skʼoplal te ya jchʼuuntik mantal ta kʼajkʼal ini? 2) ¿Bin ya xbajt jnoptik ta yan artículo?

¹⁸ Te machʼatik tulan schʼuunel yoʼtanik ya schʼuunik mantal, jich ya xkolik te kʼalal ya xkʼot ta pasel yan buelta te bin la yal te Jesús, jaʼ te ya xtal «tulan wocol [...] te mayuc hich cʼohem ta pasel ta shachel to tal bahlumilal cʼalal ora» (Mat. 24:21). ¿Yabal jchʼuuntik ta ora te mantal ya yakʼbotik te Cuerpo Gobernante? (Luc. 12:42). ¡Kʼax mukʼ skʼoplal te jun koʼtantik ya jchʼuuntik mantal! (Rom. 6:17).

¹⁹ Yuʼun ya xtulanub te schʼuunel koʼtantik ya skʼan ya jpʼijubtestik te snopojibal kuʼuntik te kʼalal ya jnoptik ta lek te sKʼop Dios sok ya jchʼuuntik mantal. Te jchʼieletik jaʼniwan wokolxan ya yaʼiyik stulanteselxan te schʼuunel yoʼtanik. Ta yan artículo ya xbajt jnoptik bin ya xjuʼ ya spasik.

[Notaetik]

¿Bin la anop?

•¿Bin smakojbey skʼoplal te tulanuk te schʼuunel koʼtantik sok bin-utʼil ya jtuuntestik?

• ¿Bin yuʼun ya skʼan ya jnoptik ta lek te Biblia teme ya jkʼantik te tulanuk te schʼuunel koʼtantike?

• ¿Bin-utʼil ya jnoptik schʼuunel mantal?

• ¿Bin lekilal ya jtatik teme tulan te schʼuunel koʼtantike?

[Jojkʼoyeletik te ya yichʼ nopel]

[Foto]

Te kʼalal ya jpas ta jkuxlejaltik te bin ya yal te Biblia ya skoltayotik ta sitintayel te wokoliletik

[Foto]

Maba lajik te machʼatik la schʼuunik spasel te bin la yal te Jesús