Mag-uswag ha Pagkahamtong—“An Daku nga Adlaw ni Jehova Hirani Na”
Mag-uswag ha Pagkahamtong—“An Daku nga Adlaw ni Jehova Hirani Na”
“Mag-uswag kita ngadto ha pagkahamtong.”—HEB. 6:1, NW.
1, 2. An mga Kristiano ha Jerusalem ngan Judea ha siyahan nga siglo nagkaada higayon nga ‘makapalagiw ngadto ha kabukiran’ tungod han ano?
HAN nakanhi hi Jesus ha tuna, gindaop hiya han iya mga disipulo ngan nagpakiana: “Ano an tigaman han imo pagkanhi, ngan han kataposan han kalibotan?” Nahitabo ha siyahan nga siglo an primero nga katumanan han tagna ni Jesus sugad nga baton han ira pakiana. Gin-unabi niya an talagsahon nga hitabo nga magtitigaman nga hirani na gud an kataposan. Kon makita na ito, “an mga aadto ha Judea [kinahanglan] manmalagiw ngadto ha mga kabukiran.” (Mat. 24:1-3, 15-22) Makikilala ba han mga disipulo ni Jesus an tigaman ngan susundon an iya instruksyon?
2 Han 61 K.P., paglabay hin haros trenta ka tuig, hi apostol Pablo nagsurat hin prangka nga mensahe ha pagtadong ha Hebreohanon nga mga Kristiano nga naukoy ha Jerusalem ngan ha palibot hito. Diri maaram hi Pablo ngan an iya mga igkasi-tumuroo nga mga lima na la ka tuig makikita na an tigaman han siyahan nga bahin han “daku nga kagol-anan.” (Mat. 24:21) Han 66 K.P., hirani na masakop an Jerusalem han gin-atake ito han Romano nga kasundalohan ha pagpanguna ni Cestius Gallus. Kondi, tigda nga inatras hira salit nakahigayon an mga Kristiano ha pagpalagiw.
3. Ano an iginsagdon ni Pablo ha Hebreohanon nga mga Kristiano, ngan kay ano?
3 Kinahanglan may-ada hilarom nga pagsabot ha espirituwal ito nga mga Kristiano basi makilala nira an kahulogan han panhitabo ngan makapalagiw. Kondi, an iba ‘nabungol ha pamati.’ Ha espirituwal, pariho hira hin minasus-an nga nagkikinahanglan hin “gatas.” (Basaha an Hebreo 5:11-13.) Bisan an iba hadton naglakat ha dalan han kamatuoran hin damu ka tuig na, naobserbahan nga ‘nabulag ha buhi nga Dios.’ (Heb. 3:12) ‘Nabatasan’ na han iba nga diri tumambong ha Kristiano nga mga katirok bisan kon an peligroso nga “adlaw nagtitikahirani na.” (Heb. 10:24, 25) Salit, napapanahon gud an iginsagdon ni Pablo: “Yana nga binayaan na naton an basihan nga doktrina mahitungod han Kristo, mag-uswag kita ngadto ha pagkahamtong.”—Heb. 6:1, NW.
4. Kay ano nga importante an pagin alerto pirme ha espirituwal, ngan ano an mabulig ha aton nga buhaton ito?
4 Nagkikinabuhi kita ha panahon han ultimo nga katumanan han tagna ni Jesus. “An daku nga adlaw ni Jehova”—an adlaw ha kabungkag han bug-os nga sistema ni Satanas—“hirani na.” (Sep. 1:14) Kinahanglan nga mas magpabilin kita nga alerto ha espirituwal yana. (1 Ped. 5:8) Ito gud ba an aton ginbubuhat? An pagin hamtong ha espirituwal mabulig ha aton nga magin alerto pirme kon hain na kita ha agos han panahon.
Kon Ano an Pagin Hamtong Sugad nga Kristiano
5, 6. (a) Ano an ginkikinahanglan basi magin hamtong ha espirituwal? (b) Ano an duha nga bahin nga sadang pangalimbasogan basi mag-uswag ngadto ha pagkahamtong?
5 Diri la kay gindasig ni Pablo an Hebreohanon nga mga Kristiano ha siyahan nga siglo nga mag-uswag ha pagkahamtong kondi ginsumatan liwat hira kon ano an nahiuupod hito. (Basaha an Hebreo 5:14. *) An “hamtong nga mga tawo” diri kontento han “gatas” la. Nakaon hira han “matig-a nga pagkaon.” Salit, maaram hira han “siyahan nga pag-aradman” ngan “higlarom nga mga bagay” han kamatuoran. (1 Kor. 2:10) Dugang pa, an ira abilidad ha pagsabot nababansay pinaagi ha paggamit—pinaagi ha pag-aplikar han ira hinbabaroan—nga nabulig ha ira nga makilala an husto ngan sayop. Kon nagdidesisyon hira, ini nga pagbansay nabulig ha ira nga masabtan kon ano an angayan nga mga prinsipyo ha Kasuratan ngan kon paonan-o ito iaaplikar.
6 Hi Pablo nagsurat: “Kinahanglan maghatag kita hin labaw ha kasagaran nga atensyon ha mga butang nga aton hinbatian, basi diri gud kita ig-anod pahirayo.” (Heb. 2:1, NW) An kaanod pahirayo ha pagtoo mahimo mahitabo antes naton masantop ito. Malilikyan naton ito pinaagi ha paghatag “hin labaw ha kasagaran nga atensyon” kon nag-aaram kita han Biblia. Salit, an tagsa ha aton kinahanglan magpakiana: ‘Simple nga katutdoan la ba gihapon an akon gin-aadman? An akon ba pag-aram rutina la o diri-kinasingkasing nga gintatagad an kamatuoran? Paonan-o ako mag-uuswag ha espirituwal?’ Basi mag-uswag kita ngadto ha pagkahamtong, kinahanglan pangalimbasogan naton an bisan duha la nga bahin. Kinahanglan magin batid gud kita ha Pulong han Dios. Ngan kinahanglan mahibaro kita ha pagsunod.
Magin Batid Gud han Pulong han Dios
7. Paonan-o kita magpapahimulos ha pagin mas batid ha Pulong han Dios?
7 “An nainom pa hin gatas waray kabatiran ha pulong han katadongan; kay batan-on pa hiya,” nagsurat hi Pablo. (Heb. 5:13) Basi magin hamtong, kinahanglan magin batid gud kita ha pulong han Dios, an iya mensahe ha aton. Tungod kay mababasa ini ha Biblia, kinahanglan pag-adman naton ito hin maopay ngan an mga publikasyon han “matinumanon ngan maaramon nga uripon.” (Mat. 24:45-47; NW) Kon sugad hito an aton pag-aram, mahibabaro kita han panhunahuna han Dios ngan mababansay an aton abilidad ha pagsabot. Tagda an maopay nga ginbuhat ni Orchid. * Siring niya: “An diri ko gud hingangalimtan nga pahinumdom amo an regular nga pagbasa han Biblia. Natapos ko basahon an bug-os nga Biblia ha sulod hin mga duha ka tuig, kondi baga hin dida ko pa la nakilala an Maglalarang. Hinbaroan ko an iya mga paagi, karuyag ngan diri-karuyag, pagin gamhanan, ngan an kahilarom han iya kinaadman. Pinaagi han adlaw-adlaw nga pagbasa han Biblia nailob ko an pinakamakuri nga mga kahimtang ha akon kinabuhi.”
8. Ano an nahihimo han Pulong han Dios ha aton?
8 Kon regular nga ginbabasa naton an Pulong han Dios, an mensahe hito madulot hin hilarom ha aton kasingkasing. (Basaha an Hebreo 4:12.) Ha pagbuhat hito, mamumolde an aton personalidad ngan mas malilipay hi Jehova ha aton. Kinahanglan ba nga mas hilawig nga oras an imo gamiton ha pagbasa han Biblia ngan pamalandong hito?
9, 10. Ano an kinahanglan buhaton basi magin batid ha Pulong han Dios? Isaysay.
9 An pagin batid ha Biblia diri kay paghibaro la han ginsisiring hito. An diri hamtong nga mga Kristiano ha panahon ni Pablo posible nga may-ada hinbabaroan ha Pulong han Dios. Kondi, waray nira iaplikar an ira hinbaroan salit waray nira makita an maopay nga resulta hito. Waray hira magkababatid han mensahe tungod kay waray hira magpagiya hito ha paghimo hin maaramon nga desisyon.
10 Basi magin batid ha Pulong han Dios, kinahanglan hibaroan naton an ginsisiring hito ngan buhaton ito. Ipinapakita han eksperyensya ni Kyle kon paonan-o bubuhaton ito. Hiya ngan an iya katrabaho waray magkasinabot. Ano an iya ginbuhat basi masulbad ito? Hiya nagsiring: “Nahinumdoman ko dayon an Roma 12:18, nga nasiring: ‘Sugad han nahitutungod ha iyo, makigmurayaw kamo ha ngatanan nga mga tawo.’ Salit naghangyo ako ha iya nga mag-istorya kami katapos han trabaho.” Maopay gud an resulta hito, ngan gindayaw hi Kyle han iya katrabaho tungod han iya ginbuhat. “Hinbaroan ko nga diri gud kita magsasayop kon iaplikar naton an mga prinsipyo ha Biblia,” siring niya.
Mahibaro ha Pagsugot
11. Ano nga mga ehemplo an nagpapakita nga diri masayon an pagsugot kon may-ada problema?
11 Posible nga diri masayon an pag-aplikar han aton hinbabaroan ha Kasuratan, labi na kon may-ada problema. Pananglitan, waray pag-iha katapos talwason ni Jehova an mga Israelita ha pagkauripon ha Ehipto, hira “nakig-away kan Moises” ngan padayon nga ginsarihan hi Jehova. Kay ano? Tungod kay waray tubig nga maiinom. (Eks. 17:1-4) Waray pa magduha ka bulan katapos nira magsaad ngan umuyon nga buhaton “an ngatanan nga pulong nga iginyakan ni Jehova,” ira na gintalapas an iya balaud pinaagi ha pagbuhat hin idolatriya. (Eks. 24:3, 12-18; 32:1, 2, 7-9) Tungod ba kay nahadlok hira nga maiha na nga waray pa babalik hi Moises han ginpasagka hiya ha Bukid han Horeb? Naghunahuna ba hira nga bangin atakehon na liwat hira han mga Amalekanhon ngan waray hira mahihimo kon waray hi Moises, nga gin-gamit ni Jehova ha pagtalwas ha ira tikang ha mga Amalekanhon hadto? (Eks. 17:8-16) Posible ito, kondi anoman an hinungdan, an mga Israelita ‘diri buot magtuman.’ (Buh. 7:39-41) Ginsagda ni Pablo an mga Kristiano nga “manalinguha” gud basi diri ‘mahulog tikang ha amo man nga diri pagkamasinugtanon’ nga ginbuhat han mga Israelita han nahadlok hira ha pagsulod ha Tuna nga Iginsaad.—Heb. 4:3, 11.
12. Paonan-o nahibaro hi Jesus ha pagsugot, ngan ano an kapulsanan hito?
12 Basi mag-uswag ha pagkahamtong kinahanglan mangalimbasog gud kita nga sugton hi Jehova. Sugad han ginbuhat ni Jesu-Kristo, an pagsugot agsob nga nahibabaroan pinaagi ha mga butang nga gin-aantos. (Basaha an Hebreo 5:8, 9.) Antes pa kumanhi ha tuna, masinugtanon na hiya ha iya Amay. Kondi, han nakanhi na hiya ha tuna, nag-antos hiya hin kasakit ha pisikal ngan hunahuna tungod ha pagbuhat han kaburut-on han iya Amay. Pinaagi ha pagsugot bisan ha duro nga kasakitan, hi Jesus nagin takos para ha bag-o nga katungdanan nga nahunahuna han Dios para ha iya—an pagin Hadi ngan Hitaas nga Saserdote.
13. Ano an nagpapakita nga nahibabaro kita ha pagsugot?
13 Kumusta man kita? Determinado ba kita nga sugton hi Jehova bisan kon may-ada kita magkuri nga problema? (Basaha an 1 Pedro 1:6, 7.) Matin-aw an sagdon han Dios mahitungod ha moral, pagkatangkod, husto nga paggamit han dila, pagbasa ngan pag-aram han Kasuratan, pagtambong ha mga katirok, ngan pagsangyaw. (Jos. 1:8; Mat. 28:19, 20; Efe. 4:25, 28, 29; 5:3-5; Heb. 10:24, 25) Ginsusunod ba naton ito nga mga sagdon ni Jehova bisan kon nakakaeksperyensya kita hin kasakitan? Kon amo, nagpapakita ito nga nag-uuswag kita ngadto ha pagkahamtong.
Pagin Hamtong Sugad nga Kristiano—Kay Ano nga Mapulsanon?
14. Isaysay kon paonan-o nagpapanalipod an pag-uswag ngadto ha pagkahamtong.
14 Nagpapanalipod gud ha Kristiano an pagkaada abilidad ha pagsabot nga nabansay hin maopay ha pagkilala han husto ngan sayop ha kalibotan nga ‘nawad-an hin pag-abat’ kon ano an matadong. (Efe. 4:19) Pananglitan, hi James, nga regular nga nagbabasa ngan nagpapabili gud han mga publikasyon nga basado ha Kasuratan, nagkarawat hin trabaho nga puro kababayin-an an iya katrabaho. “Bisan kon damu ha ira an nagbabalewaray ha moral, usa an baga hin buotan ngan interesado ha kamatuoran han Biblia,” siring ni James. “Kondi, han kami la nga duha ha opisina, nagsari hiya ha pagharok ngan paghangkop ha akon. Kahuna ko nga nagtitiaw la hiya kondi nakurian gud ako ha pagpugong ha iya. Hito nga takna nahinumdoman ko an eksperyensya ha Barantayan mahitungod han bugto nga inatubang hin pariho nga pagsulay ha iya trabaho. Ginhisgotan han artikulo hi Jose ngan an asawa ni Potipar. * Iginduso ko dayon ito nga babaye, ngan dinalagan hiya tipagawas.” (Gen. 39:7-12) Mapasalamaton hi James nga waray na iba nga nahitabo ngan natipigan niya an limpyo nga konsensya.—1 Tim. 1:5.
15. Paonan-o an pag-uswag ha pagkahamtong nagpaparig-on han aton simboliko nga kasingkasing?
15 Mapulsanon liwat an pagin hamtong tungod kay nagpaparig-on ito han aton simboliko nga kasingkasing ngan nabulig ha aton nga diri ‘madara han magkadirodilain ngan bag-o nga pagturon-an.’ (Basaha an Hebreo 13:9.) Kon nangangalimbasog kita nga mag-uswag ha espirituwal, an aton hunahuna nakasentro ha “mas importante nga mga butang.” (Fil. 1:9, 10; NW) Hito nga paagi, nagigin mas mapasalamaton kita ha Dios ngan ha ngatanan nga iya igintatagana para ha aton kaopayan. (Roma 3:24) Napapatubo han Kristiano nga hamtong ha abilidad ha pagsabot an sugad nga pagkamapasalamaton ngan nagigin duok kan Jehova.—1 Kor. 14:20.
16. Ano an nakabulig ha usa nga Kristiano nga makultibar an ‘marig-on nga kasingkasing’?
16 Hi Louise nagsiring nga ha pipira ka panahon katapos han iya bawtismo, an siyahan nga gintagad niya amo an impresyon han iba mahitungod ha iya. “Waray ako ginbuhat nga sayop, kondi diri kinasingkasing an akon pag-alagad kan Jehova. Nasantop ko nga kinahanglan magbag-o ako kon karuyag ko abaton nga iginhahatag ko an ngatanan kan Jehova. An gidadakui nga pagbag-o amo an akon bug-os-kasingkasing nga pagsingba ha iya,” siring niya. Pinaagi hito nga pangalimbasog, nakultibar ni Louise an ‘marig-on nga kasingkasing,’ ngan nakabulig gud ito ha iya han nagkasakit hiya hin grabe. (Jak. 5:8) Hiya nagsiring, “Nakurian gud ako, kondi nagin duok ako kan Jehova.”
‘Magin Masinugtanon Tikang ha Kasingkasing’
17. Kay ano nga an pagsugot importante gud han siyahan nga siglo?
17 An sagdon ni Pablo nga ‘mag-uswag ngadto ha pagkahamtong’ nagtalwas ha mga Kristiano ha siyahan nga siglo nga naukoy ha Jerusalem ngan Judea. Adton nagsunod hito may-ada maopay nga pagsabot ha espirituwal nga ginkinahanglan ha pagkilala ha tigaman nga iginhatag ni Jesus basi hira “manmalagiw ngadto ha mga kabukiran.” Kon makita na nira an “mangil-ad nga [butang nga hinungdan han] pagkabungkag, . . . nga natukdaw ha baraan nga lugar,” nga amo an Romano nga kasundalohan nga nakapalibot ngan tisulod ha Jerusalem, maaram hira nga panahon na ito ha pagpalagiw. (Mat. 24:15, 16) Ha pagsunod han pahamangno ni Jesus, an mga Kristiano binaya ha syudad han Jerusalem antes mabungkag ito ngan, sumala ha historyador nga hi Eusebius, nag-ukoy hira ha syudad han Pella ha bungturon nga rehiyon han Gilead. Salit nalikyan nira an pinakamakangingirhat nga kalamidad ha Jerusalem sumala ha kasaysayan.
18, 19. (a) Kay ano nga an pagsugot importante gud ha aton panahon? (b) Ano an paghihisgotan ha masunod nga artikulo?
18 An pagsugot nga resulta han pag-uswag ha pagkahamtong magtatalwas liwat ha aton kon mahitabo na an daku nga katumanan han tagna ni Jesus nga “maabot an daku nga kagol-anan” nga waray gud kapariho. (Mat. 24:21) Magigin masinugtanon ba kita ha anoman nga apurado nga instruksyon ha aton ha tidaraon tikang ha ‘matinumanon nga tinaporan’? (Luk. 12:42) Importante gud nga ‘magin matinumanon [“masinugtanon,” NW] kita tikang ha kasingkasing’!—Roma 6:17.
19 Kinahanglan bansayon naton an aton abilidad ha pagsabot basi magin hamtong kita. Ginbubuhat naton ini pinaagi ha pangalimbasog nga magin mas batid ha Pulong han Dios ngan ha paghibaro ha pagsugot. An pagin hamtong sugad nga Kristiano diri masayon para ha mga batan-on. Paghihisgotan ha masunod nga artikulo kon paonan-o ito malalamposan.
[Mga footnote]
^ par. 5 Ginbag-o an iba nga ngaran.
^ par. 7 Kitaa an artikulo nga “Naparig-on ha Pagdumiri han Maraot nga Buhat,” ha Oktubre 1, 1999 nga An Barantayan.
^ par. 14 Hebreo 5:14, (NW): “Kondi an matig-a nga pagkaon kanan hamtong nga mga tawo, nga pinaagi ha paggamit han ira abilidad ha pagsabot nabansay ha pagkilala han husto ngan sayop.”
Ano an Imo Hinbaroan?
• Ano an pagin hamtong ha espirituwal, ngan paonan-o naton makakab-ot ito?
• Ano an naibubulig han pagin batid ha Pulong han Dios ha aton pag-uswag ha pagkahamtong?
• Paonan-o kita nahibabaro ha pagsugot?
• Ha ano nga paagi mapulsanon ha aton an pagkahamtong?
[Mga Pakiana]
[Retrato ha pahina 10]
An pag-aplikar han sagdon han Biblia nabulig ha aton nga malamposan an mga problema ha husto nga paagi
[Retrato ha pahina 12, 13]
Tungod han pagsunod ha sagdon ni Jesus, natalwas an siyahan nga mga Kristiano