Sikayoran Kalangweran​—Ipanengneng Yon Onaaligwas Kayo

“Seetan mo so sarayan bengatla, sikara labat so arapen mo; pian say ibobonam nipatnag komon ed saray ganagana.”​—1 TIM. 4:15.

1. Antoy labay na Dios parad saray kalangweran?

“OKALANGWERAN, paliket moy inkasika legan ya ugaw ka ni! Paliketen ka komon na pusom diad saray agew na inkatobonbalom.” (Ecl. 11:9, Tanakh​—The Holy Scriptures) Ontan so insulat nen Solomon, sakey a makabat ya ari na Israel nensaman. Seguradon labay nen Jehova a Dios, say Lapuan na satan a mensahe, a sikayoran kalangweran et magmaliw a maliket. Nagkalalo ni, labay nen Jehova a mansiansiay liket yo anggad itatken yo. Balet, diad panaoy inkatobonbalo, mabetbet a makakagawa na seryoson lingo iray kalangweran a nayarin mangapekta’d maliket ya arapen da. Anggan si matoor a Job et nanermenan to ray “karelmengan na kalangweran [to].” (Job 13:26) Sano say sakey a Kristiano et katayatdang ni odino tobonbalo la, maslak a kaukolan toy manggawa na seryoson desisyon. No lingoy desisyon to, nayarin sikatoy nasakitan a maong tan pansengegay problema a mangapekta’d interon bilay to.​—Ecl. 11:10.

2. Anton bilin ed Biblia so niyaplika na saray kalangweran pian napaliisay seryoso iran lingo?

 ² Kaukolan a paaligwasen na saray kalangweran so pakatebek da. Imanoen pa so insimbawa nen apostol Pablo ed saray taga Corinto. Oniay insulat to: ‘Agkayo manugaw-ugawan ed isip. Matatken kayo komon ed isip.’ (1 Cor. 14:20) No dengelen na saray kalangweran iyan bilin a paaligwasen so abilidad dan ontebek tan mankatunongan a singa matatken lan too, natulongan iran napaliisan so pakagaway seryoso iran lingo.

3. Antoy nagawaan mo pian ontatken ka’d espiritual?

³ No sakey kan kalangweran, tandaan mon kaukolay pansagpot pian ontatken ka’d espiritual. Oniay inkuan nen Pablo ed si Timoteo: “Anggapo komon so manmudmora ed kaugawan mo; noag ingen, sika komon so uliran ed saray manisia, dia ed salita, dia ed panagbilay, dia ed aro, dia ed pananisia, dia ed kasimpitan. . . . Manseet ka ed panagbasa, ed panagkalar, ed panangibangat. . . . Seetan mo so sarayan bengatla, sikara labat so arapen mo; pian say ibobonam nipatnag komon ed saray ganagana.” (1 Tim. 4:12-15) Kaukolan ya onaligwas iray Kristianon kalangweran tan ipatnag da itan ya ‘ibobona’ ed arum.

‘Ibobona’​—Anto Itan?

4. Antoy nalalanor ed iyaligwas ed espiritual?

⁴ Say ‘ibobona’ et kabaliksan toy “iyaligwas, panguman pian ombulaslas.” Pinaseseg nen Pablo si Timoteo ya itultuloy toy mansagpot pian sikatoy onaligwas ed panagsalita, panagbilay, aro, pananisia, tan kasimpitan, ontan met ed paraan na panumpal to’d ministeryo to. Nepeg ton panggunaetan a pagmaliwen a napanuliranan so panagbilay to. Kaukolan sirin ya itultuloy a paaligwasen nen Timoteo so espiritualidad to.

5, 6. (a) Kapigan ginmapon naimano so inyaligwas nen Timoteo? (b) No nipaakar ed iyaaligwas, panon a naalig natan na saray kalangweran si Timoteo?

⁵ Sanen insulat nen Pablo iyan simbawa diad baetan na 61 tan 64 C.E., eksperiensyado lan elder si Timoteo. Sirin et nibagan mabiskeg lay espiritualidad to. Diad tuay tua, nen 49 odino 50 C.E., sanen manga 20 años ni labat nen Timoteo, “sikatoy walaan na maong a dengel . . . ed saray agagi a wala ed Listra tan Iconio,” ya akaobserba ed imbulaslas to’d espiritual. (Gawa 16:1-5) Diad saman et sikatoy intagar nen Pablo ed panmimisionero to. Kayari pigaran bulan a naimatonan so lalon imbulaslas nen Timoteo, sikatoy imbaki nen Pablo ed Tesalonica pian ligliwaen tan pasesegen iray Kristiano ed satan a syudad. (Basaen so 1 Tesalonica 3:1-3, 6.) Malinew a nen tobonbalo ni si Timoteo et sankaimano lay iyaaligwas to.

⁶ Sikayoran kalangweran diad kongregasyon, pankimeyan yo la natan a bayuboan iray maong a kalidad, pian diad ontan et sankaimano so iyaaligwas yo bilang Kristiano tan say abilidad yon manbangat na katuaay Biblia. Sanen 12 años ni labat nen Jesus, ‘balbaleg lay kakabatan to.’ (Luc. 2:52) Aralen tayo pa sirin no panon yon nipanengneng so iyaaligwas yo diad taloran aspekto na bilay yo: (1) sano naproproblema, (2) sano nononoten yo lay mangasawa o miasawa, tan (3) diad pansasagpot yon magmaliw a “maabig a ministro.”​—1 Tim. 4:6.

Usarey “Limpion Kanonotan” Sano Walaray Problema

7. Antoy nayarin epekto na saray problema ed saray kalangweran?

⁷ Oniay inkuan na 17 años ya agin manngaran na Carol: “No maminsan, naiirapan lay emosyon ko tan naknaksawan lay laman tan isip ko, anggad punton kasabi kabuasan et ngalngali agko la labay so ombangon.” * Akin et ontan lay pakaproproblema nen Carol? Sanen sikatoy mantaon ni labat na samplora, nandiborsyo’y atateng to, tan kaukolan toy miayam ed nanay to ya angipulisay la ed saray moral ya estandarte na Biblia. Nayarin wala met iray seryoson problemam a singa si Carol, tan singa anggapo lay nagawaan mo’d situasyon mo.

8. Antoray mairap a probleman naeksperiensya nen Timoteo?

⁸ Legan a papaaligwasen nen Timoteo so espiritualidad  to, walaray naeksperiensya to met a mairap a problema. Singa bilang, ‘mabetbet so pansasakit to’ lapud liliknaen to’d lusok. (1 Tim. 5:23) Sanen si Pablo et imbaki toy Timoteo ed Corinto pian asikasoey problema nipaakar ed pangikuestion na arum ya agagi ed inka-apostol to, binilin toy kongregasyon a mikoopera ira ed si Timoteo pian ‘agnatatakot’ ed sikara. (1 Cor. 4:17; 16:10, 11) Mapatnag sirin a mabaing odino agmasmasel si Timoteo.

9. Anto so “limpion kanonotan,” tan antoy pidumaan na satan ed “espiritu na inkamatakot”?

⁹ Pian natulongan si Timoteo, oniay impanonot nen Pablo: “Aliwan say espiritu na inkamatakot so inter na Dios ed sikatayo, noagta say pakayari tan aro tan limpion kanonotan.” (2 Tim. 1:7, NW) Say “limpion kanonotan” et kabaliksan toy pakawalaan na dugan pakatebek tan panagkatunongan. Kalaktip ed satan so pananos anggano say situasyon mo et aliwan unong ed iilaloan mo. Walaray kalangweran ya angipanengneng na “espiritu na inkamatakot,” tan inisip dan natakasan day problema ra diad alablabas ya iyugip, pambantay na TV, pandruga, pambuanges, mabetbet a pam-party, odino pagmaliw ya imoral. Nasisimbawa iray Kristiano ya ‘ibeneg so ag-inkamaridios tan saray ib-ibeg a mangaraldalin, a manbilay ed sayan panaon a sidarangka tan situtunong.’​—Tito 2:12.

10, 11. Panon a makatulong ed sikatayo so limpion kanonotan pian makpel tayon arapen iray problema?

¹⁰ Bibilinen na Biblia ‘iray balolaki a mankalakal ira.’ (Tito 2:6) Say pangunor ed sayan bilin et kabaliksan toy pampikasim tan panmatalek mo’d biskeg ya iiter na Dios sano walaray problemam. (Basaen so 1 Pedro 4:7.) Diad ontan et nabayuboan moy impapuson kompiyansa ed “pakayari ya iter na Dios.”​—1 Ped. 4:11.

¹¹ Akatulong ed si Carol so limpion kanonotan tan panagpikasi. Oniay inkuan to: “Say sakey ed saray sankairapan a dinalan ko et say pansiansian malinis ed moral, anggaman imoral so panagbilay nen nanay ko. Akatulong ed siak na baleg so panagpikasi. Amtak a wadtan a lanang si Jehova, kanian agak la natatakot.” Tandaan, no natalonaan mo iray problema, nabayuboan moy marakep iran kalidad tan lalo kan magmaliw a makpel. (Sal. 105:17-19; Tag. 3:27) Lawas mon nonoten ya antokaman so problemam, agkan balot ikaindan na Dios. Seguradon ‘tulongan to ka.’​—Isa. 41:10.

Sano Nononoten Yo Lay Mangasawa o Miasawa

12. Akin et maabig no iyaplika na saray mannononot ya onloob ed panamaley so prinsipyon walad Uliran 20:25?

¹² Walaray arum a tobonbalo ni labat et angasawa odino akiasawa la ran tampol. Abaloan dan satan so solusyon ed problema ra’d abung, paneermen da, tan isasawa ra’d bilay. Balet, say pisipanan ed panangasawa et seryoson bengatla. Ibabaga na Biblia a nensaman et walaray bengat-bengat a nanggaway sagrado odino masanton sipan, ya agda ni inupapet no antoray pansumpalan na satan. (Basaen so Uliran 20:25.) No maminsan, agnononoten a maong  na saray tobonbalo so kabelat na responsabilidad a nalalanor ed panangasawa. Namoria da labat ya aliwan basta-basta manaya so nilooban da kayari na kasal.

13. Antoray nepeg ya itepet na saramay mannononot lan miinaroan, tan iner so napangalaan da na makatulong iran simbawa?

¹³ Kanian antis kan miinaroan, tepetan mo ni inkasika: ‘Akin et labay koy mangasawa o miasawa? Antoray iilaloan kon nagawa ed panamaley mi? Kasin sayay nagugustoan ko et sikatoy matukoy a magmaliw a kaparehak? No mangasawa o miasawa ak, akaparaan ak la kasi ed saray magmaliw a responsabilidad ko?’ Pian nausisam a maong irayan pamaakaran, natulongan ka na saray detalyadon artikulo ya impalapag na “matoor tan makabat ya aripen.” * (Mat. 24:45-47) Ipasen mon simbawan nanlapud Jehova iratan ya artikulo. Aral mon maong tan iyaplikam iratan. Komon ta onkiwas kan sikakabat ya ‘aliwan singa kabayon anggapoy pakatalos.’ (Sal. 32:8, 9) Kaukolan a natatalosan mon maong iray responsabilidad ed panangasawa. No ipasen mon akaparaan ka lan miinaroan, tandaan mon kaukolan a lawas kan magmaliw ya ‘uliran ed kasimpitan.’​—1 Tim. 4:12.

14. No mangasawa o miasawa ka, panon kan natulongan na pangalig ed personalidad nen Kristo?

¹⁴ Pian ontalona anggad kayari ni kasal, kaukolan a say sakey et matatken ed espiritual. Say ontan a Kristiano et pampepelengan ton nadampot so “sukat na kinaatagey na inkapno [odino, inkanagnap] nen Kristo.” (Efe. 4:11-14) Pansagpotan ton aligen so personalidad nen Kristo, ya Ehemplo tayo. ‘Si Kristo et agto pinaliket so inkasikaton dili.’ (Roma 15:3) No balang sakey ed sanasawa et iyuna ray pankaabigan na kapareha ra, mas mareen tan maligen so panamaley da. (1 Cor. 10:24) Say asawan laki et ipanengneng toy masakripisyon aro, tan say asawan bii et determinadon manpasakop ed masiken to, no panon a si Jesus et mapasakop ed Ulo to.​—1 Cor. 11:3; Efe. 5:25.

“Sumpal Mo so Ministeryom”

15, 16. Antoy gawaen mo pian nipanengneng moy iyaaligwas mo ed ministeryom?

¹⁵ Oniay insulat nen Pablo pian idanet so kaimportantian na asainmin nen Timoteo: “Ibilin ko ed sika ed malet ed arap na Dios, tan si Kristo Jesus, . . . Ipulong mo so salita; manseet ka.” Inyarum to ni: ‘Gawam so gawa na ebanghelisador, sumpal mo so ministeryom.’ (2 Tim. 4:1, 2, 5) Pian nasumpal nen Timoteo iyan bilin, kaukolan toy “naiwi [“nasustini,” NW] ed saray salita na pananisia.”​—Basaen so 1 Timoteo 4:6.

¹⁶ Panon mo met a nagawaan itan? Oniay insulat nen Pablo: “Manseet ka ed panagbasa, ed panagkalar, ed panangibangat. Seetan mo so sarayan  bengatla, sikara labat so arapen mo.” (1 Tim. 4:13, 15) Pian onaligwas ka, kaukolan mon pankulian so panaral. Say balikas a “sikara labat so arapen mo” et ipapasabi toy ideyan akasentroy imanom ed sakey a kimey. Komustay panagaral mo? Kasin akasentroy imanom ed ‘saray aralem a bengatla na Dios’? (1 Cor 2:10) Odino, paspasaray labat? Say pandalepdep ed saray nanaaralan mo so mamakiwas ed sikan onaligwas ed espiritual.​—Basaen so Uliran 2:1-5.

17, 18. (a) Antoran abilidad so nepeg mon pampelengan a bayuboan? (b) Panon a makatulong ed ministeryom so pangalig ed awawey nen Timoteo?

¹⁷ Oniay inkuan na sakey a kalangweran a payunir a manngaran na Michelle: “Akatulong ed siak so regular a panagaral tan pipiaral pian talagan magmaliw ak ya epektibo ed ministeryo. Say resulta et lawas ak ya ombubulaslas ed espiritual.” Seguradon say panagpayunir et makatulong pian napaaligwas moy espiritualidad mo tan say abilidad mon mangusar ed Biblia diad ministeryo. Pampelengan mon paaligwasen so panagbasam tan kalidad na saray komentom ed aral. Bilang maespiritual a kalangweran, seguradon labay mon iparaan a maong iray asainmin mo ed Eskuelaan Parad Teokratikon Ministeryo, tan usaren no antoy ingganan reperensya.

¹⁸ ‘Say panggawa ed kimey na ebanghelisador’ et kabaliksan toy pagmaliwen mon mas epektibo so ministeryom tan panulong ed arum a makaliktar. Kakaukolanen na saya a bayuboan moy “dunong ed panagbangat.” (2 Tim. 4:2, NW) No masakbay mo lan iyuksoy so piulop ed saramay eksperiensyado ed sayan kimey, makaaral ka ed paraan na panagbangat da, no panon ya akaaral si Timoteo ed impiulop to’d si Pablo. (1 Cor. 4:17) Sanen sinalambit nen Pablo iramay atulongan to, inkuan ton agto labat innabang so maong a balita ed sikara, noagta inter toy ‘dilin kamarerwa’ to. (1 Tes. 2:8) Say labay ton ibaga et inusar toy mismon bilay to pian natulongan ira, lapud inad-aro to ra. Pian naalig mo so alimbawa nen Pablo ed ministeryo, kaukolan a say awawey mo et mipara’d si Timoteo, a maar-aro met ed arum tan “nanlingkor ed kikayat na ebanghelyo.” (Basaen so Filipos 2:19-23.) Masakripisyo ka met kasi ed ministeryom?

Panlapuay Peteg ya Inkapnek so Iyaaligwas

19, 20. Akin a say iyaaligwas ed espiritual et panlapuay gayaga?

¹⁹ Nibagan kaukolan sirin so pansagpot pian onaligwas ed espiritual. No maan-anos mon papaaligwasen so abilidad mon manbangat, nasabi panaon et nawalaan kay pribilehyon ‘payamanen so dakel’ a totoo ed espiritual, tan sikara so panlapuay ‘gayagam odino balanget a kirayewan mo.’ (2 Cor. 6:10; 1 Tes. 2:19) Oniay inkuan nen Fred, a walad sigpot–panaon a ministeryo: “Natan ko labat nalilikna a talagan nauusar koy panaon ko diad panulong ed arum. Talagan tua a mas maliket so mangiter nen say mangawat.”

²⁰ Oniay impaneskribe na sakey a tobonbalon payunir a manngaran na Daphne nipaakar ed gayaga tan inkapnek ya alikna to lapud iyaaligwas na espiritualidad to: “Mas inmapit ak ed si Jehova tan sikatoy lalok a naapresya. No gawaen moy anggaay nayarian mon paliketen si Jehova, balibali liknaan​—talagan makapnek!” Anggaman no maminsan et agnaimano na arum so iyaaligwas mo ed espiritual, lawas nanenengneng tan papablien itan nen Jehova. (Heb. 4:13) Sikayoran tobonbalon Kristiano, andi-duaruwan sarag yon igloria tan idayew so Ama tayo ed tawen. Itultuloy yon paliketen so puso to legan yon impapuson ipapanengneng so iyaaligwas yo.​—Uli. 27:11.

[Saray paimano ed Leksab]

Antoy Naaralan Mo?

• Antoy nalalanor ed iyaligwas ed espiritual?

• Panon mon nipanengneng so iyaaligwas mo . . .

• sano walaray problema?

• sano nononoten mo lay mangasawa o miasawa?

• diad ministeryom?

[Tepetepet Parad Panagaral]

[Litrato ed pahina 15]

Makatulong so panagpikasi pian natalonaan moy problema

[Litrato ed pahina 16]

Panon a magmaliw ya epektibo ed panagbangat iray kalangweran?