“Bo le blak a rengum ra di urerel a ikal tekoi, ma ngelsecheklem bo le bleketakl ra rokuil chad.”​—1 TIMOTEUS 4:15.

1. A Dios ngngera soal el kirir a remekekerei el chad?

 “MOLDEU er a rengum er a klengeasek er kau, kaul kekerel chad. Bo lungil a rengum er chelechal dirk mngeasek.” (Olisechakl 11:9) Aikang a lulluches a King el Salomon er a Israel er a irechar. Ngike el mle uchul a omelechesel aika el klumech, el Jehovah el Dios, a ulterekokl el kmal soal kemiu a rengeasek a bo ledeu a rengmiu. E a lmuut el ngar er a bab er tiang, a Jehovah a soal a obo moldeu a rengmiu el engelakl er a taem er a klengeasek er kemiu. Engdi aikeikid el taem a sebechel el mo mekngit el oeak a cheleuid el leriruul a chad el mlo uchul a klengiterreng el sebechel el mo tomellii a deuil a rengul er a ngar er a medal el klebesei. Ngmo lmuut er a blak a rengul el Job me nguluuchel er a rengul er a bo el chebangel a telemellel a ‘kngtil er a lengeasek.’ (Job 13:26) Ngar er a uchelel a klengeasek er a chad me aike el sesei el rak er a uriul er ngii, e a ngeasek el Kristiano a blechoel el kirel el mo meruul a oberaod el omelilt. A mekngit el omelilt a sebechel el mo uchul a telemellel a uldesuel e mekdubech a mondai el mo mengesang er a klengar er ngii el rokir.​—Olisechakl 11:10.

2. A loltirakl er a ngera el omellach er a Biblia, e ngsebechel a ngeasek el oibngii er a cheleuid el omelilt?

 ² A rengeasek a kirir el mo ungil el melilt a tekoi el bo loruul. Ka molebedebek er a ulekrael er a apostol el Paulus el mo er a rechad er a Korinth. Ngmilluches el kmo: “Cho molebedebek e lako mua rengalek; . . . e bo mkloul chad er chomelebedebek.” (1 Korinth 14:20) A loltirakl er a omellach el mo omekeroul er a duch el mo omdasu e omes a urrebetelel a tekoi el ua remeklou el chad a sebechel el ngosuir a ngeasek el oibngii er a cheleuid el omelilt.

3. Ngera sebechem el meruul er ngii me bo el sebechel el mukeroul a uldesuem el mo mesisiich?

³ A lsekum e kau a ngeasek, e bo modengei el kmo a lemukeroul a uldesuem el mo mesisiich e ngousbech er a klou el omelasem. A Paulus a dilu er a Timoteus el kmo: “Lak le klengeasek er kau a uchul me bora kemril a mederir ar chad, e chomelekingem ma blekerdelem, ma bltikerreng, ma kloumerang, ma kllikiid er kau bai bo le kerebai rar uumerang. . . . A rengum bo le chau chomengiuel a chedaol Llechukl el mora kldibel, ma chomengelechel ma chosisechakl el morar chad. . . . Bo le blak a rengum ra di urerel a ikal tekoi, ma ngelsecheklem bo le bleketakl ra rokuil chad.” (1 Timoteus 4:12-15) Me a rengeasek el Kristiano a kirir el olengeriakl e remuul a ngelsecheklir el mo bleketakl er a osengir a rebebil.

Ngerang a Ngelsecheklem?

4. Ngera uldimukl er a dolengeriakl er a klereng?

⁴ A dolengesechekl e kede “olengeriakl me a lechub e kede melodech el mo ungil.” A Paulus a milengelechel er a Timoteus me lolemolem el blak a rengul me bo el sebechel el ngosechekl er a rolel a cheldecheduch me a blekerdelel me a bltikerreng er ngii me a klaumerang er ngii me a klikiid el blekerdelel el mo lmuut er a teletelel a otutel a ngerechelel er a omesiungel. Ngmle kirel el melasem el mo er sel tkul er a bab el sebechel el rullii a blekerdelel a klengar er ngii el mo ungil el kerebai. Me seikid e ngmle kirel a Timoteus el melemolem el olengeriakl er a klereng.

5, 6. (a) Oingerang e a ngelsecheklel a Timoteus a ulemuchel el mo bleketakl er a osengir a rechad? (b) Me a lolasem el meruul a ngelsecheklir, e te mekerang a rengeasek er a chelecha el sils e oukerebai er a Timoteus?

⁵ A Paulus er sera loluches aika el omellach el bekord el ngar er a delongelel a 61 me a 64 C.E., e a Timoteus a mla mo ta er a klou a duch er ngii el chuodel er a ongdibel. Ngdimlak el dirk lulemuchel el olengeriakl er a klereng er ngii. Ngar er a 49 me a lechub e ng 50 C.E., er a taem el Timoteus a bekord el 20 a rekil, e ngmle “ungil a chisel rar udam ra Listra ma Ikonium” el tir a ulemes er a ngelsecheklel a klereng er ngii. (Rellir 16:1-5) Seikid el taem, e a Paulus a ngiluu a Timoteus el obengkel er a omerolel er a klemissionary. A uriul er a lomes er a ngelsecheklel a Timoteus el sesei el buil, e a Paulus a uldurekllii el mo er a Thesalonika el mo melisiich e olterekokl er a klaumerang er a Rekristiano el ngar er isei el mats. (Monguiu er a 1 Thesalonika 3:1-3, 6.) Me ngkmal bleketakl el kmo a Timoteus a mlo omuchel el olecholt er a ngelsecheklel er a mederir a rechad er a taem er a ledirk ngeasek.

⁶ Me kemiu a rengeasek el ngar er a chelsel a ongdibel, moureor el omekeroul a blekeradel er a klereng el omousbech er a chelechang, me bo el sebechel a ngelsechekliu er a blekerdelel a klengar er a Rekristiano me a duch er kemiu el olisechakl a klemerang er a Biblia bo lebleketakl el meues er a rebebil. A Jesus a di mle 12 a rekil, “e a llemesel a rengul . . . a merrael el mo klou.” (Lukas 2:52) Me ka mei me bo dorriter el kmo ngmekerang e sebechem el rullii a ngelsecheklem el mo bleketakl er a chelsel a edei el tekoi el duubech er a klengar er kau: (1) sel bo mchebangel a meringel el taem, (2) sel mongetmokl el kirel a chebechiil, me a (3) sel molasem el mo ‘ungil mesiou.’​—1 Timoteus 4:6.

Mosiuekl a Meringel el Taem el “Ulserechakl” a Rengmiu

7. Ngera sebechel a meringel el taem el rullii el mo er a remekekerei el chad?

⁷ A 17 a rekil el Kristiano el ngklel a Carol a kmo: “A lebebil er a taem, e ngkmal mesaul a renguk me a bedengek me a uldesuek, me ngdimlak el soak el mekiis a letutau.” a Ngera uchul me ngkora kmal mle meringel a klengar er ngii? Sera leteruich a rekil a Carol, e a telungalek er ngii a milterakl el oeak a dertel a chebechiil me a Carol a mlo kiei el obengkel a delal, el ngii a dimlak el kengei a blekeradel er a kldung el lolekoi a Biblia. Me ngdi ua Carol, e kau me ke locha chelebangel a bebil el meringel el blekeradel el kmal diak a techall el sebechel el mesmechokl el mo ungil.

8. Ngera el meringel el blekeradel a mle kirel el outekangel a Timoteus?

 ⁸ A Timoteus er a loruul a ngelsecheklel er a klereng e ngmle kirel el outekangel a meringel el blekeradel. El di ua tiang, ngchilarm a ‘mekudem el chelitechetul a bedengel’ el mondai er a chi er ngii a uchul. (1 Timoteus 5:23) Me a Paulus er a lodureklii el mo er a Korinth el mo mesmechokl a bebil er a mondai el lulekdubech a rechad el ulemtok er a klisichel a klechapostol er ngii, e ngmillekoi er a rechad er a ongdibel me bo loureor el obengkel a Timoteus me bo el sebechel el mo “diak le bekikl” el teloi er tir. (1 Korinth 4:17; 16:10, 11) Ngika el Timoteus a locha mle telkib el sekemerur el chad.

9. Ngerang a ulserechakl el reng, e ngera klekakerous er ngii me a dakt el reng?

⁹ A bo lolengeseu er a Timoteus, e a Paulus a ulemklatk er ngii er a uriul el kmo: “Ele le bilskid a Dios a diak le reng ra dakd, e ngbai reng ra klisiich, ma bltikerreng, ma ulserechakl.” (2 Timoteus 1:7) A “ulserechakl” a uldimukl er a lsebeched el ungil el omdasu e domes a urrebetellel a omesodel a tekoi. Nguldimukl er sel sebeched el omes a mera el blekerdelel a tekoi el ngar er ngii, el diak el oeak sel di soal a osenged. A rebebil er a rengeasek a olecholt er a dakt el reng e melasem el chemiis a meringel el blekeradel el oeak a imis el cheliuaiu me a lechub a osengel a TV me a usbechel a mekngit el kar me a imis el omelim, e mo chad er a omilil, me a lechub e te kiei el ngar er a deleboes. A Rekristiano a longelechel er tir el mo ‘mengoit a ikel tekoi el diak le ko Dios ma ngibes er tial belulechad, me le ngar er tial belulechad el ulserechakl a rengrir, e le melemalt, e loluu ra Dios.’​—Titus 2:12.

10, 11. Ngmekerang a ulserechakl el reng a lengosukid el mo omekeroul a klisiched er a klereng?

¹⁰ A Biblia a mengelechel er a ‘rebuik me dilerrek el . . . lulserechakl a rengrir ra bek el tekoi.’ (Titus 2:6) A omoltirakl er tia el omellach e ngbelkul a kmo sel bo mchebangel a mondai e ke ngar er a nglunguuch e ultuil er a klisiich el omeskau a Dios. (Monguiu er a 1 Petrus 4:7.) Me seikid e ke mekurullii a ulterekokl el reng er a chelsel a rengum el kirel sel “klisiich el mlara Dios el mei.”​—1 Petrus 4:11.

¹¹ A ulserechakl el reng me a nglunguuch a tekoi el ngilsuir a Carol. Ngdilu el kmo: “Ak bo kulterekokl el dechor el omtok er a mekngit el blekerdelel a klengar er a delak a ta er a kot el meringel el tekoi el kuruul er ngii er a klengar er ngak. Engdi a nglunguuch a kmal ngilsukak. Ak medengei el kmo a Jehovah a obengkek me ngdikea kmedakt.” Mletkii tia el kmo, a meringel el blekeradel a sebechel el michau e smisichau. (Psalm 105:17-19; Klengiterreng 3:27) Me a ngii di el ngerang el bo mchelebangel, e a Dios a kmal diak el bo lechitau. Ngulterekokl el kmal mo “ngosukau.”​—Isaia 41:10.

Mongetmokl el kirel a Ungil el Chebechiil

12. Ngera uchul me a Kristiano el melatk el mo bechiil a kirel el mo oltirakl er a omellach el debetik er ngii er a Osisechakl 20:25?

¹² A rebebil er a remekekerei el chad a orreched el mo bechiil e le te oumerang el kmo ngsemecheklel a klengar el diak a deurreng er ngii me a klsabisi me a seselkerreng me a mondai er a delengcheklir. Engdi a chebechiil a kmal klou el tekoi. A rebebil er a rechad er a taem er a Biblia a mle mereched el meruul a chedaol el telbilir e dimlak el kerekikl el merriter el kmo ngera mle uldimukl er a tekoi el kirir el meruul. (Monguiu er a Osisechakl 20:25.) A lebebil er a taem, e a remekekerei el chad a diak el bo lungil el melebedebek aike el tekoi el kirel el mo  ketmekill er a chelsel a chebechiil. E a uriul, e te mo melechesuar el kmo nglmuut el betok el tekoi a mle kirir el meruul er aike el lullatk er a kot el uchul.

13. Ngera el ker a kirir el melatk tirke el omdasu el mo bechiil, e ngera el ngeso a ngar er ngii el kirir?

¹³ Me a uchei er a obo mongetut er a chad, e di el kau el oker er a kau el kmo: ‘Ngera uchul me ngsoak el mo bechiil? Ngera el tekoi a kullatk el kirel? Ngikang mera el ungil el chad el kirek? Ngera sebechek el nguu el mo soiseb er tia el chebechiil?’ A “blak a rengul e mellomes a rengul mesiou” a mla otobed a kmal betok el komakai el suobel el sebechel el ngosukau el mo ungil el merriter er kau. b (Matteus 24:45-47) Me momes er ngii el suobel el ua lulekrael el lomeskau a Jehovah. Bo mkerekikl el omes a tekoi el lolekoi e moltirakl. Lak bechikau me bo mua ‘mekebelung el . . . uos ma lechub a mule.’ (Psalm 32:8, 9) Bo mua remeklou el chad er a klemedengei er kau el kirel aike el tekoi el lousbech a chebechiil. A lsekum e ke metik er kau el kmo ke kltmokl el melemolem el mengetut er a chad, e kele mobes el kmo a “kllikiid er kau . . . bo le kerebai” el kirir a rebebil.​—1 Timoteus 4:12.

14. Ngmekerang a ngelsecheklem er a klereng a lengosukau a obo bechiil?

¹⁴ A bo demeklou el chad er a klereng e ngsebechel el mo uchul a klungiolel a chebechiil er a uriul. A mla mukeroul el Kristiano a melasem el mo er sel tkul er a bab el sebechel el “mora telkelel a cherrengelel a iul a Kristus.” (Efesus 4:11-14) Ngmeringel el oureor el mo omekeroul aike el blekerdelel a Kristus. Ngua Kerebai el kired, e a “Kristus me ngdirrek el dimlak di loldeu ra rengul e le merekong.” (Rom 15:3) A teru el obekel, sel lolemolem el osiik a diak el di el klungiolir e lemerekong e ngbai klungiolel a tang me a tang, e a klengar er a telungalek er tir a mo uchul a omerrotel er a budech me a ulekerreu. (1 Korinth 10:24) A bechiil el sechal a mo olecholt er a diak longreos el bltikerreng me a bechiil el redil a mo blak a rengul el olengesenges er a bechil, el di ua Jesus el olengesenges er a Bedul.​—1 Korinth 11:3; Efesus 5:25.

‘Mcherrengelii Chomesiungem’

15, 16. Ke mekerang e meketeklii a ngelsecheklem el ngar er a omesiungem?

¹⁵ A Paulus a milluches el kirel sel klou a ultutelel el ngerachel el mloterekokl er a Timoteus el kmo: “Ak ngar medal a Dios me ngikel Kristus Jesus . . . momerk a tikingel a Dios . . . e di le blak a rengum er ngii.” Ngdilechelii el kmo: “Moruul a urerel chomerk ra evangkelio, el churrengelii chomesiungem.” (2 Timoteus 4:1, 2, 5) Me a bo el cherrengelii tia el ngerachel, e a Timoteus a mle kirel el “mukeroul ra tekoi ra kloumerang.”​—Monguiu er a 1 Timoteus 4:6.

¹⁶ Ke mekerang e sebechem el “mukeroul ra tekoi ra kloumerang”? A Paulus a milluches el kmo:  “A rengum bo le chau chomengiuel a chedaol Llechukl el mora kldibel, ma chomengelechel ma chosisechakl el morar chad el mor sel kichika er tilechang. Bo le blak a rengum ra di urerel a ikal tekoi.” (1 Timoteus 4:13, 15) A lolengeriakl a chad e ngkirel el blak a rengul el di ngii el mesuub. Ngua ngerang a blekerdelem el kirel a omesuub? Kau ngblak a rengum el kirel aike el “dmolech [el tekoi] ra Dios”? (1 Korinth 2:10) Me a lechub e ngdi telkib el taem a omongoit el kirel? A obo mungil el melebedebek aike el mosuub e ngsebechel el smisichii a rengum.​—Monguiu er a Osisechakl 2:1-5.

17, 18. (a) Ngera el blekeradel a kirem el melasem el mo omekeroul? (b) A omomekeroul a osisiu el uldasu el ua Timoteus e ngmekerang a lengesukau er a omesiungem?

¹⁷ A ta el ngeasek el pioneer el ngklel a Michelle a dilu el kmo: “A lsekum e ngsoak el mera el mo ungil er a omesiungek, e ngkirel el ngar er ngii a ungil el blsechel a omesubek el di ngak el tang e blechoel el ngar er a miting. Tiang a mo uchul e ngsebechek el melemolem el mukeroul er a klereng.” Sel omosiou el ua pioneer e ngulterekokl el sebechel el ngosukau el mo olengeriakl er a duch er kau er a usbechem er a Biblia er a omesiungem e mo olengesechekl er a tekoi er a klereng. Bo el blak a rengum el mo ungil el menguiu e moltobed a ungil el nger er kau sel omngar er a miting er a Rekristiano. Me ngua mla mukeroul er a klereng el ngeasek, e ngkirem el mo mengetmokl a ungil el cheldecheduch er a Skuul el kirel a Berkel a Klumech, el oltirakl aike el mloterekokl el suobel.

¹⁸ A ‘omoruul a urerel chomerk ra evangkelio’ e ngbelkul a kmo ke rullii a omesiungem el mengal el mo ungil e olengeseu er a rebebil el mo suobel. Tiang a belkul a kmo ngkirem el omekeroul er a kldachelbim el “olisechakl.” (2 Timoteus 4:2) Me a omoruul a temem el mo oureor el obengterir tirke el meduch el meruul er tia el ureor, e ngsebechem el suub a rolel a osisecheklir, el di ua Timoteus el milsuub er a loureor el obengkel a Paulus. (1 Korinth 4:17) Me a lolekoi el kirir tirke el lengilsuterir, e a Paulus a dilu el kmo ngdimlak el di lochotii a ungil el chais el mo er tir e lemerekong, e ngdirrek el uldersii a ‘klengar er ngii’ el kirir, me a lechub e nguluusbech er a klengar er ngii el mo olengeseu er tir e le te kmal mlo betik er a rengul. (1 Thesalonika 2:8) Me a obo moltirakl er a kerebil a Paulus er a chelsel a omesiungem, e ngbelkul a kmo ngkirem el mo oba osisiu el uldasu el ua Timoteus, el ngii a mera el ulemekerreu er a rebebil e ‘milsiou [el kirel a ngelsecheklel a] evangkelio.’ (Monguiu er a Filipi 2:19-23.) Kau ke olecholt a choua isei el reng er a omelenget er a chelsel a omesiungem?

A Ngelsecheklem a Sebechel el Mo Uchul a Mera el Deurreng

19, 20. Ngera uchul me a dolengeriakl er a klereng e ngmo uchul a deurreng?

¹⁹ A dolengeriakl er a klereng e kede ousbech er a klou el telekangel. Engdi sel moba kllourreng e momekeroul er a duch er kau el olisechakl, e ngmo er ngii a techellem el “meruul rar betok el chad el mo meteet” er a klereng me te mo uchul a ‘deuil a rengum e krone ra chetengem.’ (2 Korinth 6:10; 1 Thesalonika 2:19) A Fred, el mesiou el pioneer, a melekoi el kmo: “A domekesiu er a uchei, e chelechang e ngkmal klou el taem a kungoit er ngii el olengeseu er a rebebil. Ngmera el tekoi el kuk klou el deurreng a denguu sel dorous er a bai dolai.”

²⁰ A lolekoi el kirel a deurreng el lulechesuar er a okurulel er a klereng, e a ngeasek el pioneer el ngklel a Daphne a dilu el kmo: “Ngmlo er ngii a kmes el deluill er ngak me a Jehovah me ak mera el mlo omdasu er ngii el mera el Chad. Sel sekum e ke oldeu er a rengul a Jehovah el mo er sel kot el tkul er a bab el sebechem, e ngmera el mo ungil a rengum!” Me alta e a ngelsecheklem er a klereng a diak el blechoel el medangch er a rechad, engdi a Jehovah a blechoel el sebechel el mes e dmeu a rengul el kirel. (Hebru 4:13) Ngulterekokl, e kemiu el ngeasek el Kristiano a sebechiu el mengebkall e oldanges er a Demad el ngar er a eanged. Molemolem el oldeu er a rengul sel lemera el blak a rengmiu el olecholt er a ngelsechekliu.​—Osisechakl 27:11.

[Aike el footnote]

Ngera Ke Siluub?

• Ngera uldimukl er a dolengeriakl er a klereng?

• Ke mekerang e rullii a ngelsecheklem el mo bleketakl er a osengir a rechad . . .

sel omchebangel a meringel el blekeradel?

sel mongetmokl el kirel a chebechiil?

er a chelsel a omesiungem?

[Aike el Ker er a Suobel]

[Siasing er a 15 el llel]

A nglunguuch a sebechel el ngosukau el mo outekangel a meringel el blekeradel

[Siasing er a 16 el llel]

Te mekerang a remekekerei el publisher e lomekeroul a duch er tir er a rolel a osisechakl?