Yonguwan, meki sma si taki unu e go na fesi

„Prakseri bun fu den sani disi; denki soso dati wawan, so taki ala sma kan si taki yu e go na fesi.”​—1 TIM. 4:15.

1. San Gado wani gi yongusma?

„YONKUMAN, prisiri na ini yu yongu yari, èn du san e gi yu ati prisiri na ini den dei fu yu yongu yari” (Preik. 11:9). Na dati a koni Kownu Salomo fu owruten Israel ben skrifi. Yehovah Gado, a Sma di meki Salomo skrifi a boskopu disi, trutru wani taki unu leki yonguwan musu de koloku, èn a wani taki un musu de koloku srefi te unu tron bigisma kaba. Ma nofo tron, yonguwan e meki bigi fowtu di kan meki en muilek gi den fu abi wan koloku libi. Srefi a reti-ati man Yob ben e sari taki a ben ’musu ondrofeni den takru bakapisi fu den fowtu di a ben meki di a ben yongu’ (Yob 13:26). Nofo tron, wan yongu Kresten di kon bigi kaba, musu teki prenspari bosroiti, èn a musu du dati tu na ini den yari baka dati. Te a yonguwan disi no e teki koni bosroiti, dan a kan kisi problema di sa meki a sari srefisrefi, èn a kan ondrofeni den takru bakapisi fu dati en heri libi langa.​—Preik. 11:10.

2. Sortu Bijbel rai kan yepi yonguwan fu no meki seryusu fowtu?

² Ma yonguwan musu leri fu si sani krin fu  man teki bun bosroiti. Luku a rai di na apostel Paulus ben gi den Korentesma. A ben skrifi: „Un no musu denki leki pikin-nengre, . . . ma un musu denki leki bigisma” (1 Kor. 14:20). Te yonguwan e leri fu denki soleki fa lepi sma e denki, dan dati sa yepi den fu no meki seryusu fowtu.

3. San yu kan du fu denki leki wan lepi sma?

³ Efu yu na wan yonguwan, dan hori na prakseri taki yu sa musu meki muiti fu denki leki wan lepi sma. Paulus ben taigi Timoteyus: „No meki nowan sma si yu leki wan soso sani fu di yu yongu. Ma yu musu tron wan eksempre gi den getrow sma nanga a fasi fa yu e taki, nanga a fasi fa yu e tyari yusrefi, nanga a lobi fu yu, nanga a bribi fu yu, èn nanga a krin libi fu yu. Tan meki muiti fu leisi moro bun gi sma, fu frumane sma, èn fu gi leri. . . . Prakseri bun fu den sani disi; denki soso dati wawan, so taki ala sma kan si taki yu e go na fesi” (1 Tim. 4:12-15). Kresten yonguwan musu meki muiti fu go na fesi, èn ala sma musu man si dati.

San a wani taki fu go na fesi?

4. San a wani taki fu go na fesi na ini a tru anbegi?

⁴ Wan sma di e go na fesi, e „tyari kenki kon, noso a e tron wan moro bun sma”. Paulus ben gi Timoteyus a rai fu tan meki muiti fu go na fesi na ini a fasi fa a ben e taki, a fasi fa a ben e tyari ensrefi, a fasi fa a ben e sori lobi gi trawan, a fasi fa a ben e sori bribi, a fasi fa a ben e libi, èn na ini a fasi fa a ben e du a diniwroko fu en. Timoteyus ben musu meki muiti fu de wan eksempre gi trawan. Dati meki a ben musu tan du muiti fu go na fesi na ini a tru anbegi.

5, 6. (a) O ten sma bigin si taki Timoteyus ben e go na fesi? (b) Fa yonguwan kan go na fesi neleki Timoteyus?

⁵ Di Paulus skrifi a rai disi na ini a pisi ten fu a yari 61 te go miti a yari 64, dan Timoteyus ben de wan owruman kaba di ben abi nofo ondrofeni. A no ben de so taki na bigin a ben e bigin fu go na fesi na ini a tru anbegi. Na ini a yari 49 noso a yari 50, di Timoteyus ben abi sowan 20 yari, dan „den brada na Listra nanga Ikonium ben e taki soso bun sani fu en”, fu di den ben si fa a ben e go na fesi (Tori. 16:1-5). Na a ten dati, Paulus ben tyari Timoteyus go nanga en fu go du zendelingwroko. Di den ben wroko makandra wan tu mun, dan Paulus si taki Timoteyus go na fesi moro fara. Fu dati ede, a seni Timoteyus go na Tesalonika fu go trowstu den Kresten na ini a foto dati èn fu tranga a bribi fu den. (Leisi 1 Tesalonikasma 3:1-3, 6.) A de krin taki di Timoteyus ben de wan yonkuman, sma ben kan si kaba taki a ben e go na fesi.

⁶ Yonguwan na ini a gemeente, un musu du muiti nownow kaba fu kon abi den fasi di un musu abi leki Kresten. Na so sma o man si krin taki unu e go na fesi leki Kresten èn na ini a fasi fa unu e gi sma leri fu Bijbel. Sensi di Yesus ben abi 12 yari, a ben e „tan kon moro koni” (Luk. 2:52). Sobun, meki wi luku now fa yu kan meki sma si taki yu e go na fesi te a abi fu du nanga den dri sani disi: (1) te yu e kisi fu du nanga problema, (2) te yu e sreka yusrefi gi a trowlibi, èn (3) te yu e meki muiti fu tron „wan bun dinari”.​—1 Tim. 4:6.

„De nanga krin frustan” te yu e kisi fu du nanga problema

7. Te yonguwan e kisi fu du nanga muilek situwâsi, dan sortu krakti dati abi na den tapu?

⁷ Carmen, wan Kresten sisa di abi 17 yari, ben taki: „Son leisi mi no ben wani opo te mamanten, fu di mi ben e firi brokosaka, èn fu di mi ben weri srefisrefi.” * Fu san ede a ben e firi so brokosaka? Di Carmen ben abi 10 yari, dan en papa nanga mama broko trow, èn a ben musu go libi nanga en mama. Ma en mama bigin libi na wan fasi di no e kruderi nanga Bijbel. Kande yu de na ini wan muilek situwâsi tu neleki Carmen, èn kande a no sori leki a situwâsi dati o kenki.

8. Sortu problema Timoteyus ben abi?

⁸ Di Timoteyus ben e meki muiti fu go na fesi na ini na anbegi, dan a ben e kisi fu du tu nanga problema. Fu eksempre, a ben e ’siki furu’ fu di a ben abi problema nanga en bere (1 Tim. 5:23). Paulus ben seni en go na Korente  fu go lusu wan tu problema di wan tu gensman fu na apostel ben tyari kon. Fu dati ede, Paulus gi a gemeente a rai fu wroko makandra nanga Timoteyus. Na so Timoteyus ’no ben o frede’ te a ben de na den mindri (1 Kor. 4:17; 16:10, 11). Soleki fa a sori, dan Timoteyus ben e syensyen.

9. San a wani taki fu de nanga krin frustan? Fa dati de heri tra fasi leki te wan sma e frede gi sani?

⁹ Fu di Paulus ben wani yepi Timoteyus, meki bakaten a memre en na a sani disi: „Gado no meki wi de fredeman, ma a meki taki wi abi krakti, taki wi kan sori lobi, èn taki wi de nanga krin frustan” (2 Tim. 1:7). Wan sma di de nanga „krin frustan”, man si sani na a yoisti fasi. A sma disi man si sani soleki fa den de trutru. A no e si den soleki fa ensrefi wani si sani. Son yonguwan di no e meki muiti fu tron lepi Kresten e frede gi den problema di e miti den, èn den no wani poti prakseri na den problema disi. Dati meki nofo tron den yonguwan disi e sribi furu, den e luku telefisi omeni yuru langa, den e gebroiki drugs, den e dringi tumusi furu sopi, den e go na fesa doronomo, noso den e du hurudu. Kresten e kisi a rai fu no „abi noti fu du nanga ogridu èn nanga den lostu fu grontapu”. Den kisi a rai tu fu „libi nanga wan krin frustan èn na wan regtfardiki fasi èn sosrefi na wan fasi di e sori taki wi e dini Gado getrow na ini a grontapu sistema disi”.​—Tit. 2:12.

10, 11. Te wi de nanga krin frustan, dan fa dati e gi wi krakti?

¹⁰ Bijbel e gi yonkuman a rai „fu de nanga krin frustan” (Tit. 2:6). Te yu e gi yesi na a rai disi, dan yu sa begi Gado fu yepi yu te yu e kisi fu du nanga problema, èn yu sa abi a frutrow taki a sa gi yu a krakti fu horidoro. (Leisi 1 Petrus 4:7.) Na so yu sa abi ala frutrow na ini „a krakti di Gado e gi”.​—1 Petr. 4:11.

¹¹ Carol ben de nanga en krin frustan èn a begi Gado. Na dati yepi en. Carol e taki: „Wan fu den moro muilek sani di mi ben musu du, na taki mi ben musu kakafutu gi a mama fu mi di e libi wan yayo libi. Ma mi begi Gado, èn dati yepi mi trutru. Mi sabi taki Yehovah de nanga mi, èn dati meki mi no frede moro.” Hori na prakseri taki te yu e kisi fu du nanga problema, dan dati kan yepi yu fu tron wan moro bun sma, èn a kan gi yu krakti (Ps. 105:17-19; Krag. 3:27). Awansi sortu problema e miti yu, Gado noiti no sa drai baka gi yu. A sa „yepi yu trutru”.​—Yes. 41:10.

Te yu e sreka yusrefi gi a trowlibi

12. Fu san ede wan Kresten di wani trow musu hori ensrefi na a gronprakseri di skrifi na Odo 20:25?

¹² Son yongu Kresten hasti densrefi fu trow, fu di den ben e denki taki dati ben o meki den de koloku. Den ben e denki tu taki den no ben o firi moro leki den de den wawan, den no ben o fuga moro, èn taki den no ben o kisi fu du moro nanga den problema di den ben abi di den ben e tan ete nanga den papa nanga mama. Ma a de wan seryusu sani te tu sma e pramisi makandra fu tan hori densrefi na den frantwortu fu a trowlibi. Son sma na ini Bijbel ten ben e hasti densrefi fu pramisi Gado wan  sani, sondro fu prakseri bun san dati ben wani taki. (Leisi Odo 20:25.) Son leisi, yongusma no e denki bun sortu frantwortu den e teki na den tapu te den e trow. Bakaten, den e kon si taki a trowlibi de heri tra fasi leki san den ben denki.

13. Sortu sani den wan di e prakseri fu hori nanga wan sma, musu aksi densrefi? Sortu bun rai den e kisi?

¹³ Sobun, bifo yu e prakseri fu hori nanga wan sma, dan aksi yusrefi: ’Fu san ede mi wani trow? San mi e fruwakti fu a trowlibi? A sma disi na a yoisti trowpatna gi mi? Mi trutru o man tyari den frantwortu fu a trowlibi?’ „A getrow èn koni srafu” tyari artikel kon na doro di e taki finifini fu a tori disi, èn dati sa yepi yu fu kon frustan sani moro bun (Mat. 24:45-47). * Yu musu si den artikel dati leki rai di Yehovah e gi yu. Poti bun prakseri na den sani di skrifi na ini den artikel disi, èn du san yu leri. Noiti yu musu gi pasi taki yu e kon de „leki wan asi, noso wan buriki di no abi frustan” (Ps. 32:8, 9). Tron wan sma di e frustan heri bun san na den frantwortu fu a trowlibi. Efu yu feni taki yu lepi nofo fu hori nanga wan sma, dan hori na prakseri ala ten taki yu musu de „wan eksempre . . . nanga a krin libi fu yu.”​—1 Tim. 4:12.

14. Te yu e du muiti fu kon abi den fasi fu Krestes, dan fa dati kan yepi yu na ini a trowlibi fu yu?

¹⁴ Lepi Kresten sa abi bun bakapisi tu baka te den trow. Wan Kresten di lepi e pruberi fu „tron wan sma di gro kon bigi èn di kon lepi leki Krestes” (Ef. 4:11-14). A sma disi e du ala muiti fu kon abi den fasi fu Krestes. Leki na Eksempre fu wi, „Krestes no ben plisi ensrefi” (Rom. 15:3). Te ala tu trowpatna e tan suku a bun fu makandra na presi fu den eigi bun, dan den sa libi bun nanga makandra èn den sa de koloku (1 Kor. 10:24). Wan masra sa sori lobi gi en wefi sondro fu denki ensrefi nomo, èn wan wefi sa abi a fasti bosroiti fu saka ensrefi na en masra ondro, neleki fa Yesus e saka ensrefi na Gado ondro.​—1 Kor. 11:3; Ef. 5:25.

„Du a diniwroko fu yu dorodoro”

15, 16. Fa yu kan sori taki yu e go na fesi na ini a diniwroko?

¹⁵ Fu di Paulus ben wani poti prakseri na a prenspari frantwortu di Timoteyus ben kisi, meki a skrifi: „Na fesi Gado èn na fesi Krestes Yesus, . . . mi e taki nanga yu na wan seryusu fasi; . . . preiki a wortu, du disi fayafaya.” A ben taki moro fara: „Du a wroko fu wan sma di musu preiki a bun nyunsu, du a diniwroko fu yu dorodoro” (2 Tim. 4:1, 2, 5). Fu man gi yesi na a komando disi, Timoteyus ben musu tron wan sma di „teki den wortu fu a bribi”.​—Leisi 1 Timoteyus 4:6.

 ¹⁶ Fa yu kan tron wan sma di „teki den wortu fu a bribi”? Paulus ben skrifi: „Tan meki muiti fu leisi moro bun gi sma, fu frumane sma, èn fu gi leri, teleki mi kon. Prakseri bun fu den sani disi; denki soso dati wawan” (1 Tim. 4:13, 15). Wan sma musu studeri Bijbel fayafaya fu man go na fesi. Den wortu „denki soso dati” e sori taki wan sma musu poti ala en prakseri na a sani di a e du. Fa yu e studeri? Yu e poti ala yu prakseri na „den dipi sani fu Gado”? (1 Kor. 2:10) Noso yu e poti pikinso prakseri nomo na den sani dati? Te yu e denki dipi fu den sani di yu e studeri, dan den sani dati sa naki yu ati.​—Leisi Odo 2:1-5.

17, 18. (a) Sortu sani yu musu pruberi fu du? (b) Te yu kon abi a srefi denki leki Timoteyus, dan fa dati sa yepi yu na ini a diniwroko?

¹⁷ Wan yongu pionier di nen Michelle ben taki: „Fu di mi wani abi bun bakapisi trutru na ini a diniwroko, meki mi poti fasti ten fu studeri Gado Wortu, èn mi e go na den konmakandra doronomo. Disi e meki taki mi e tan go na fesi na ini a tru anbegi.” Te yu e dini leki pionier, dan dati sa yepi yu trutru fu gebroiki Bijbel moro bun na ini a diniwroko, èn a sa yepi yu tu fu go na fesi na ini a tru anbegi. Du muiti fu leisi bun èn fu gi bun piki na den Kresten konmakandra. Efu yu wani sori taki yu e go na fesi na ini a tru anbegi, dan yu musu hori lezing tapu a Theokrasia Diniwroko-skoro, èn yu musu du dati na so wan fasi taki sma e leri wan sani. Boiti dati, yu musu hori yusrefi na den sani di skrifi na tapu a toewijzing papira.

¹⁸ Wan sma di ’e du a wroko fu wan preikiman’ e du muiti fu du a diniwroko fu en moro bun, èn a e yepi sma fu kisi frulusu. A sma dati sa musu kon abi „a koni fu gi sma leri” (2 Tim. 4:2). Te yu e seti sani fu wroko makandra nanga tra preikiman di abi ondrofeni na ini a wroko, dan yu sa kisi wini fu a fasi fa den e gi sma leri, neleki fa Timoteyus ben kisi wini di a ben e wroko makandra nanga Paulus (1 Kor. 4:17). Paulus ben taki dati di a ben yepi sma, dan a no fruteri den nomo fu a bun nyunsu, ma a gi den sosrefi ’en eigi libi’. Iya, a ben gebroiki en eigi libi fu yepi den, fu di a ben kon lobi den (1 Tes. 2:8). Efu yu wani du a diniwroko fu yu neleki Paulus, dan yu musu abi a srefi denki leki Timoteyus. A yonkuman disi trutru ben e broko en ede nanga trawan, èn ’a ben e wroko tranga so taki a bun nyunsu ben kan go na fesi’. (Leisi Filipisma 2:19-23.) Yu e du ala san yu man tu fu yepi sma di yu e miti na ini a diniwroko fu yu?

Yu sa de koloku trutru te yu e go na fesi

19, 20. Fu san ede a e gi prisiri te wi e go na fesi na ini a tru anbegi?

¹⁹ Efu yu wani go na fesi na ini a tru anbegi, dan yu sa musu meki muiti. Te yu e tan du muiti fu tron wan moro bun leriman, dan te fu kaba yu sa kisi a grani fu „meki furu sma kon gudu”, fu di yu yepi den kon sabi den tru tori fu Bijbel. Den sma disi sa „gi yu howpu, noso prisiri” (2 Kor. 6:10; 1 Tes. 2:19). Fred, wan furuten preikiman, e taki: „Now, mi e gebroiki moro ten leki fosi, fu yepi trawan. Èn a tru taki wan sma de moro koloku te a e gi sani leki te a e kisi sani.”

²⁰ Wan yongu pionier sisa di nen Daphne ben taki fa a e prisiri èn fa a de koloku fu di a go na fesi na ini a tru anbegi. A ben taki: „Mi kon abi wan moro bun matifasi nanga Yehovah di mi bigin leri sabi en leki wan Sma. Te yu e du ala san yu man fu plisi Yehovah, dan yu e firi bun srefisrefi, iya, yu e firi prisiri trutru!” Aladi sma no e si ala ten taki yu e tron wan moro lepi Kresten, Yehovah e si dati ala ten, èn a breiti te dati e pasa (Hebr. 4:13). Iya, unu leki yongu Kresten kan gi glori nanga grani na wi hemel Tata. Tan du ala muiti fu meki sma si taki yu e go na fesi, èn na so yu sa meki na ati fu en prisiri.​—Odo 27:11.

[Futuwortu]

San yu leri?

• San a wani taki fu go na fesi na ini a tru anbegi?

• Fa yu kan sori taki yu e go na fesi . . .

te yu e kisi fu du nanga problema?

te yu e sreka yusrefi gi a trowlibi?

te yu e teki prati na a diniwroko?

[Aksi fu a tori disi]

[Prenki na tapu bladzijde 15]

Te wi e begi Gado, dan dati kan yepi wi te wi e kisi fu du nanga problema

[Prenki na tapu bladzijde 16]

Fa yongu preikiman kan tron bun leriman?