Mga Manulonda—“Mga Espiritu Alang sa Publikong Pag-alagad”

“Dili ba silang tanan mga espiritu alang sa publikong pag-alagad, nga gipadala aron mag-alagad niadtong magapanunod sa kaluwasan?”—HEB. 1:14.

1. Unsang paghupay ang atong mabatonan gikan sa Mateo 18:10 ug Hebreohanon 1:14?

SI Jesu-Kristo nagpasidaan kang bisan kinsa nga mahimong makapandol sa iyang mga sumusunod: “Tinoa nga dili ninyo tamayon ang usa niining mga gagmay; kay sultihan ko kamo nga ang ilang mga manulonda sa langit kanunayng makakita sa nawong sa akong Amahan nga anaa sa langit.” (Mat. 18:10) Gihisgotan ni apostol Pablo ang matarong nga mga manulonda sa dihang siya misulat: “Dili ba silang tanan mga espiritu alang sa publikong pag-alagad, nga gipadala aron mag-alagad niadtong magapanunod sa kaluwasan?” (Heb. 1:14) Ang maong mga pulong makapahupay nga pasalig nga gamiton sa Diyos kining langitnong mga linalang sa pagtabang sa mga tawo. Unsay gisulti sa Bibliya bahin sa mga manulonda? Sa unsang paagi sila nagtabang kanato? Unsay atong makat-onan gikan sa ilang mga panig-ingnan?

2, 3. Unsay pipila ka katungdanan sa langitnon nga espiritung mga linalang?

² Adunay minilyong matinumanong mga manulonda sa langit. Silang tanan maoy “gamhanan sa kusog, nga nagatuman sa iyang pulong.” (Sal. 103:20; basaha ang Pinadayag 5:11.) Kining espiritung mga anak sa Diyos adunay personalidad, mga hiyas nga sama sa iya sa Diyos, ug kagawasan sa pagpili. Sila naorganisar pag-ayo ug may hataas nga mga katungdanan diha sa kahikayan sa Diyos, ang arkanghel mao si Miguel (ngalan ni Jesus sa langit). (Dan. 10:13; Jud. 9) Kining maong “panganay sa tanang kalalangan” mao “ang Pulong” o Tigpamaba sa Diyos ug gigamit ni Jehova sa pagbuhat sa tanan nga ubang butang.—Col. 1:15-17; Juan 1:1-3.

³ Ubos sa arkanghel mao ang mga serapin, kinsa nagpahayag sa pagkabalaan ni Jehova ug nagtabang sa paghupot sa iyang katawhan nga hinlo sa espirituwal nga paagi. Anaa usab ang mga kerubin, kinsa nag-alagad ingong mga tigtuboy sa iyang pagkahalangdon. (Gen. 3:24; Isa. 6:1-3, 6, 7) Ang ubang mga manulonda, o mga mensahero, adunay lainlaing buluhaton nga nagtuman sa kabubut-on sa Diyos.—Heb. 12:22, 23.

4. Unsay gibati sa mga manulonda sa pagtukod sa yuta, ug unsa untay natagamtam sa mga tawo kon gigamit nila sa hustong paagi ang ilang kagawasan sa pagpili?

⁴ Ang tanang manulonda nagmaya tungod sa ‘pagtukod sa kalibotan’ ug nagkalipay sa ilang buluhaton samtang kining talagsaong planeta inanay nga gihimong puy-anan sa tawo. (Job 38:4, 7)  Gilalang ni Jehova ang tawo nga “ubos ug diyutay kay sa mga manulonda” apan diha sa Iyang “larawan,” busa ang mga tawo makapasundayag sa hamiling mga hiyas sa Maglalalang. (Heb. 2:7; Gen. 1:26) Kon gigamit ni Adan ug Eva sa hustong paagi ang kagawasan sa pagpili nga gihatag kanila, sila ug ang ilang mga kaliwat malipayon unta nga nagpuyo sa paraisong puy-anan ingong bahin sa intelihenteng mga linalang ni Jehova sa tibuok uniberso.

5, 6. Unsang pagrebelde ang nahitabo sa langit, ug unsay gihimo sa Diyos?

⁵ Ang balaang mga manulonda nalisang gayod sa dihang nakita nila ang pagsugod sa pagrebelde sulod sa panimalay sa Diyos. Ang usa kanila wala na matagbaw sa pagdayeg kang Jehova apan nagtinguha nga siya pagasimbahon. Gihimo niya ang iyang kaugalingon nga Satanas (nga nagkahulogang “Magsusupak”) pinaagi sa pagkuwestiyon sa katungod ni Jehova sa pagkamagmamando ug iyang gisugdan ang ambisyosong pagpaningkamot nga matukod ang kaindig nga pagmando. Pinaagi sa unang nahitala nga bakak, malinglahong gihaylo ni Satanas ang unang magtiayon nga moduyog kaniya sa pagrebelde batok sa ilang mahigugmaong Maglalalang.—Gen. 3:4, 5; Juan 8:44.

⁶ Gihukman dayon ni Jehova si Satanas pinaagi sa pagpahayag sa unang tagna diha sa Bibliya: “Ibutang ko ang panag-away tali kanimo ug sa babaye ug tali sa imong binhi ug sa iyang binhi. Siya magsamad kanimo sa ulo ug ikaw magsamad kaniya sa tikod.” (Gen. 3:15) Magpadayon ang panag-away tali kang Satanas ug sa “babaye” sa Diyos. Oo, giisip ni Jehova ang langitnong organisasyon sa matinumanong espiritung mga linalang ingong minahal nga asawa nga nabugkos kaniya ingong Bana. Kining tagnaa maoy tino nga pasikaranan sa paglaom, bisag ang detalyadong mga impormasyon nagpabiling “sagradong tinago” nga inanayng gipadayag. Ang katuyoan sa Diyos mao nga ang usa gikan sa langitnong bahin sa iyang organisasyon magdugmok sa tanang rebelde ug pinaagi kaniya “ang mga butang sa mga langit ug ang mga butang sa yuta” magkahiusa.—Efe. 1:8-10.

7. Unsay gihimo sa pipila ka manulonda sa adlaw ni Noe, ug unsay ilang gidangatan?

⁷ Sa adlaw ni Noe, gibiyaan sa daghang manulonda ang ilang “nahiangay nga puloy-anang dapit” ug nagsul-ob ug unodnong lawas dinhi sa yuta aron tagbawon ang ilang pangibog. (Jud. 6; Gen. 6:1-4) Gitambog ni Jehova ang maong mga rebelde sa bagang kangitngit, ug sila miduyog kang Satanas ingon nga “daotang mga puwersa nga espirituhanon” ug mapintasong mga kaaway sa mga alagad sa Diyos.—Efe. 6:11-13; 2 Ped. 2:4.

Sa Unsang Paagi ang mga Manulonda Nagtabang Kanato?

8, 9. Sa unsang paagi gigamit ni Jehova ang mga manulonda sa pagtabang sa mga tawo?

⁸ Si Abraham, Jacob, Moises, Josue, Isaias, Daniel, Jesus, Pedro, Juan, ug Pablo maoy pipila niadtong gitabangan sa mga manulonda. Ang matarong nga mga manulonda nagpatuman sa mga hukom sa Diyos ug nagpahayag ug mga tagna ug mga instruksiyon, apil na ang Moisesnong Balaod. (2 Hari 19:35; Dan. 10:5, 11, 14; Buh. 7:53; Pin. 1:1) Sanglit nakabaton na kita karon sa kompletong Pulong sa Diyos, mahimong dili na kinahanglan nga ang mga manulonda magpahayag ug mga mensahe gikan sa Diyos. (2 Tim. 3:16, 17) Apan, bisag dili nato sila makita, ang mga manulonda puliki kaayo nga nagtuman sa kabubut-on sa Diyos ug nagpaluyo sa iyang mga alagad.

⁹ Ang Bibliya nagpasalig kanato: “Ang manulonda ni Jehova nagkampo libot niadtong nangahadlok kaniya, ug siya nagluwas kanila.” (Sal. 34:7; 91:11) Sanglit gikuwestiyon man ni Satanas kon mahuptan ba sa tawo ang iyang integridad sa Diyos ilawom sa mga pagsulay, si Jehova nagtugot kang Satanas sa pagpahamtang kanato sa tanang matang sa pagsulay. (Luc. 21:16-19) Apan ang Diyos nahibalo kon asa kutob nga kita makapabiling matinumanon sa dihang makasinatig pagsulay. (Basaha ang 1 Corinto 10:13.) Ang mga manulonda andam kanunay sa pagpangilabot sumala sa kabubut-on sa Diyos. Ilang giluwas si Sadrak, Mesak, Abednego, Daniel, ug Pedro apan wala nila pugngi ang mga kaaway sa pagpatay kang Esteban ug Santiago. (Dan. 3:17, 18, 28; 6:22; Buh. 7:59, 60; 12:1-3, 7, 11) Ang mga kahimtang ug mga sirkumstansiya magkalahi. Sa samang paagi, bisan pag gipamatay ang pipila sa atong mga igsoon sa mga kampo konsentrasyon sa Nazi, gitabangan ni Jehova ang kadaghanan kanila nga makalahutay.

10. Gawas pa sa tabang sa mga manulonda, unsay laing paagi nga kita matabangan?

 ¹⁰ Ang Kasulatan wala magtudlo nga adunay manulonda nga nagbantay sa matag tawo. Hinunoa, kita makasalig nga “bisan unsay atong pangayoon sumala sa iyang kabubut-on, [ang Diyos] magpatalinghog kanato.” (1 Juan 5:14) Siyempre, makapadala si Jehova ug manulonda sa pagtabang kanato, apan Siya mahimong motabang kanato sa laing paagi. Tingali ang atong mga isigka-Kristohanon matukmod sa pagtabang ug paghupay kanato. Lagmit hatagan kita sa Diyos ug kaalam ug kalig-on nga gikinahanglan aron makalahutay kita sa “tunok sa unod” nga nagsakit kanato sama rag dunay “manulonda ni Satanas” nga nagsagpa kanato.—2 Cor. 12:7-10; 1 Tes. 5:14.

Sundoga si Jesus

11. Sa unsang paagi ang mga manulonda gigamit sa pagtabang kang Jesus, ug unsay iyang nalampos sa iyang pagpabiling matinumanon sa Diyos?

¹¹ Matikdi kon sa unsang paagi gigamit ni Jehova ang mga manulonda sa kahimtang ni Jesus. Ilang gipahibalo ang iyang pagkahimugso ug pagkabanhaw ug sila mialagad kaniya sa dinhi pa siya sa yuta. Mahimo untang pugngan sa mga manulonda ang pagdakop ug pagpatay kaniya. Hinunoa, usa ka manulonda ang gipadala aron sa pagpalig-on kaniya. (Mat. 28:5, 6; Luc. 2:8-11; 22:43) Sumala sa katuyoan ni Jehova, si Jesus namatay isip halad ug naghatag ug pamatuod nga ang hingpit nga tawo makahupot sa iyang integridad ngadto sa Diyos bisan pa sa malisod nga kahimtang. Busa gibanhaw ni Jehova si Jesus ingong usa ka espiritu nga dili mamatay, nga naghatag kaniya sa “tanang awtoridad” ug nagsugo sa mga manulonda sa pagpasakop kaniya. (Mat. 28:18; Buh. 2:32; 1 Ped. 3:22) Busa si Jesus nahimong pangunang bahin sa “binhi” sa “babaye” sa Diyos.—Gen. 3:15; Gal. 3:16.

12. Sa unsang paagi nato masundog ang pagkatimbang ni Jesus?

¹² Si Jesus nahibalo nga sala ang pagsulay kang Jehova pinaagi sa pagdahom nga ang mga manulonda moluwas kaniya bisan sa tinuyong pagpameligro sa iyang kinabuhi. (Basaha ang Mateo 4:5-7.) Busa atong sundogon ang panig-ingnan ni Jesus pinaagi sa pagbaton ug “maayong panghunahuna,” nga maglikay sa way-hinungdang pagpameligro sa kinabuhi, apan andam mosakripisyo niana panahon sa paglutos.—Tito 2:12.

Kon Unsay Atong Makat-onan Gikan sa Matinumanong mga Manulonda

13. Unsay atong makat-onan gikan sa panig-ingnan sa matinumanong mga manulonda nga gihisgotan sa 2 Pedro 2:9-11?

¹³ Sa dihang gibadlong ni apostol Pedro kadtong mga “nagasulti nga mapasipalahon” sa dinihogang mga alagad ni Jehova, iyang gihisgotan ang maayong panig-ingnan sa matinumanong mga manulonda. Bisan pag ang mga manulonda gamhanan, sila mapainubsanon ug wala mag-akusar sa mga dinihogan “tungod sa pagtahod kang Jehova.” (Basaha ang 2 Pedro 2:9-11.) Angay usab nga maglikay kita sa pagkahinawayon, motahod sa mga nagadumala sa kongregasyon, ug itugyan ang tanan ngadto sa Supremong Maghuhukom, si Jehova.—Roma 12:18, 19; Heb. 13:17.

14. Sa unsang paagi ang mga manulonda naghatag ug panig-ingnan sa mapaubsanong pag-alagad?

¹⁴ Ang mga manulonda ni Jehova maayong panig-ingnan sa mapaubsanong pag-alagad. Wala isulti sa ubang mga manulonda ang ilang ngalan  ngadto sa mga tawo. (Gen. 32:29; Maghu. 13:17, 18) Bisag milyonmilyon ang espirituhanong mga linalang sa langit, ang ngalan lang ni Miguel ug Gabriel ang gipadayag diha sa Bibliya. Kini nagsilbing panalipod aron dili nato simbahon ang mga manulonda. (Luc. 1:26; Pin. 12:7) Sa dihang si apostol Juan mihapa sa pagsimba sa usa ka manulonda, siya gibadlong: “Pagbantay! Ayaw kanag buhata! Ako usa lamang ka isigkaulipon nimo ug sa imong mga igsoon.” (Pin. 22:8, 9) Sa Diyos lang kita angayng mosimba ug moampo.—Basaha ang Mateo 4:8-10.

15. Sa unsang paagi ang mga manulonda naghatag ug panig-ingnan sa pagkamapailobon?

¹⁵ Ang mga manulonda maayo usab nga panig-ingnan sa pagkamapailobon. Bisag gusto kaayo silang mahibalo sa sagradong mga tinago sa Diyos, ang pipila niini wala isulti kanila. “Niini mismong mga butanga nga ang mga manulonda nangandoy sa pagsud-ong,” miingon ang Bibliya. (1 Ped. 1:12) Nan, unsay ilang gihimo? Sila mapailobong naghulat sa gitakdang panahon nga ‘ipahibalo sa Diyos ang iyang nagkadaiya uyamot nga kaalam pinaagi sa kongregasyon.’—Efe. 3:10, 11.

16. Unsay epekto sa atong paggawi ngadto sa mga manulonda?

¹⁶ Ang mga Kristohanon nga nagasagubang ug mga pagsulay maoy ‘talan-awon sa mga manulonda.’ (1 Cor. 4:9) Ang mga manulonda mangayaon gayod nga magtan-aw kanato nga magmatinumanon ug malipay usab sila nga makita ang usa ka makasasala nga maghinulsol. (Luc. 15:10) Ang diyosnong paggawi sa Kristohanong kababayen-an makita sa mga manulonda. Gipakita diha sa Bibliya nga “ang babaye angay magbaton ug timaan sa awtoridad diha sa iyang ulo tungod sa mga manulonda.” (1 Cor. 11:3, 10) Oo, malipay ang mga manulonda nga makita ang Kristohanong kababayen-an ug ang uban pang mga alagad sa Diyos nga nagsunod sa teokratikanhong kahikayan ug sa pagkaulo. Ang maong pagpasakop maoy usa ka maayong pahinumdom alang niining langitnong mga anak sa Diyos.

Ang mga Manulonda Madasigong Nagpaluyo sa Buluhatong Pagsangyaw

17, 18. Sa unsang paagi ang mga manulonda nagpaluyo sa buluhatong pagsangyaw?

¹⁷ Dunay papel ang mga manulonda sa ubang talagsaong mga butang nga mahitabo sa “adlaw sa Ginoo.” Lakip niini ang pagkatukod sa Gingharian niadtong 1914 ug ang pagtambog ni ‘Miguel ug sa iyang mga manulonda’ kang Satanas ug sa iyang mga demonyo. (Pin. 1:10; 11:15; 12:5-9) Nakita  ni apostol Juan ang usa ka “manulonda nga naglupad sa kinatung-an sa langit, ug siya adunay walay kataposang maayong balita nga ipahayag ingong makapalipay nga balita ngadto sa nanagpuyo sa yuta.” Ang manulonda mipahayag: “Kahadloki ninyo ang Diyos ug ihatag kaniya ang himaya, kay ang takna sa iyang paghukom miabot na, ug busa simbaha ninyo ang Usa nga maoy naghimo sa langit ug sa yuta ug sa dagat ug sa mga tuboran sa mga tubig.” (Pin. 14:6, 7) Busa ang mga alagad ni Jehova makasalig nga ang mga manulonda magpaluyo sa ilang pagsangyaw sa maayong balita sa Gingharian bisan pa sa mapintas nga pagsupak sa Yawa.—Pin. 12:13, 17.

¹⁸ Karon, ang mga manulonda dili na makigsulti aron sa pagtultol kanato ngadto sa matinud-anog-kasingkasing nga mga tawo, ingon sa nahitabo kang Felipe kinsa gitultolan sa manulonda ngadto sa Etiopianhong eunuko. (Buh. 8:26-29) Apan adunay daghang kasinatian sa atong modernong panahon diin ang mga manulonda nagpaluyo sa atong buluhatong pagsangyaw ug nagtabang kanato nga makaplagan kadtong mga “hustong nakiling alang sa kinabuhing walay kataposan.” * (Buh. 13:48) Hinungdanon gayod nga kita regular nga makigbahin sa ministeryo aron mahimo usab nato ang atong bahin sa pagpangita niadtong buot ‘mosimba sa Amahan sa espiritu ug kamatuoran’!—Juan 4:23, 24.

19, 20. Unsay papel sa mga manulonda sa mga panghitabo “sa kataposan sa sistema sa mga butang”?

¹⁹ Sa dihang naghisgot bahin sa atong panahon, si Jesus miingon nga “sa kataposan sa sistema sa mga butang” ang mga manulonda “magalain sa mga daotan gikan sa mga matarong.” (Mat. 13:37-43, 49) Ang mga manulonda dunay papel sa kataposang pagtigom ug pagtimbre sa mga dinihogan. (Basaha ang Mateo 24:31; Pin. 7:1-3) Dugang pa, ang mga manulonda magauban kang Jesus sa dihang siya “magalain sa mga karnero gikan sa mga kanding.”—Mat. 25:31-33, 46.

²⁰ ‘Inigpadayag na ni Ginoong Jesus gikan sa langit uban sa iyang gamhanang mga manulonda’ ang tanan nga ‘wala makaila sa Diyos ug wala magsunod sa maayong balita bahin sa atong Ginoong Jesus’ pagalaglagon. (2 Tes. 1:6-10) Sa dihang nakita ni Juan ang samang panan-awon, siya naghubit kang Jesus ug sa mga manulonda nga nag-asdang sakay sa puting mga kabayo aron sa pagpakiggubat diha sa pagkamatarong.—Pin. 19:11-14.

21. Unsay himoon sa manulonda nga “may dalang yawi sa kahiladman ug usa ka dakong kadena” batok kang Satanas ug sa iyang mga demonyo?

²¹ Nakita usab ni Juan ang “usa ka manulonda nga mikunsad gikan sa langit nga may dalang yawi sa kahiladman ug usa ka dakong kadena.” Kini walay lain kondili si Miguel arkanghel, nga magagapos ug magtambog sa Yawa—lakip na sa mga demonyo—ngadto sa kahiladman. Sila pagabuhian sa mubong panahon sa ulahing bahin sa Usa ka Libo ka Tuig nga Pagmando ni Kristo sa dihang ang katawhan makasinatig kataposang pagsulay. Human niini, si Satanas ug ang tanang rebelde pagalaglagon. (Pin. 20:1-3, 7-10; 1 Juan 3:8) Wala na unya ang tanang rebelde batok sa Diyos.

22. Unsay papel sa mga manulonda sa umaabot nga mga panghitabo, ug unsay epekto niana kanato?

²² Ang kaluwasan gikan sa daotang sistema ni Satanas haduol na gayod. Ang mga manulonda adunay papel niining hinungdanong mga panghitabo nga magbindikar sa pagkasoberano ni Jehova ug bug-os nga magtuman sa iyang katuyoan sa yuta ug sa katawhan. Ang matarong nga mga manulonda mao gayoy mga “espiritu alang sa publikong pag-alagad, nga gipadala aron mag-alagad niadtong magapanunod sa kaluwasan.” Busa angay kitang magmapasalamaton kang Jehova kay iyang gigamit ang mga manulonda aron sa pagtabang kanato sa pagbuhat sa iyang kabubut-on ug sa pagbaton ug kinabuhing dayon.

[Footnote]

Unsay Imong Tubag?

• Sa unsang paagi naorganisar ang langitnon nga espiritung mga linalang?

• Unsay gihimo sa pipila ka manulonda sa adlaw ni Noe?

• Sa unsang paagi gigamit sa Diyos ang mga manulonda sa pagtabang kanato?

• Unsay papel sa matarong nga mga manulonda sa atong panahon?

[Mga Pangutana sa Pagtuon]

[Hulagway sa panid 21]

Ang mga manulonda malipayong nagbuhat sa kabubut-on sa Diyos

[Hulagway sa panid 23]

Sama sa nahitabo kang Daniel, ang mga manulonda andam kanunayng motabang sumala sa kabubut-on sa Diyos

[Mga hulagway sa panid 24]

Magmaisogon, kay ang mga manulonda nagpaluyo sa pagsangyaw sa Gingharian!

[Credit Line]

Globe: NASA photo