‘Rawngbawltu Thlarau’—Vantirhkohte Chu
‘Rawngbawltu Thlarau’—Vantirhkohte Chu
“Anni zawng zawng chu rawngbâwlna thlaraute, chhandamna rochungtu tûrte tân rawngbâwl tûra tirh chhuah an ni lo vem ni?”—HEB. 1:14.
1. Matthaia 18:10 leh Hebrai 1:14 thu aṭangin eng thlamuanna nge kan hmuh theih?
ISUA KRISTA chuan a zirtîrte titlu thei tupawh chu heti hian a vaukhân a: “Hêng mi tête zînga pakhat pawh hi hmusit lo tûrin fîmkhur rawh u; an vântirhkohten vânah ka Pa vâna mi hmêl chu an hmu fo ṭhîn tih, ka hrilh che u hi,” tiin. (Mt. 18:10) Vântirhkoh rinawmte chungchângah, tirhkoh Paula chuan: “Anni zawng zawng chu rawngbâwlna thlaraute, chhandamna rochungtu tûrte tân rawngbâwl tûra tirh chhuah an ni lo vem ni?,” tiin a ziak a ni. (Heb. 1:14) Chûng thute chu Pathianin mihringte ṭanpui tûrin vântirhkohte a hmang tih finfiahna thlamuanthlâk tak a ni. Bible-in vântirhkohte chungchâng eng nge min hrilh? Anni chuan engtin nge min ṭanpui? An hnên aṭangin nge nge kan zir theih?
2, 3. Vân lam thlarau thil siamte chanvo ṭhenkhat chu engte nge?
2 Vânah vântirhkoh rinawm maktaduai têl an awm a. An zain “[Pathian] thu zâwm ṭhîn, chaknaa ropuite” an ni. (Sâm 103:20; Thu Puan 5:11 chhiar rawh.) Chûng Pathian thlarau fate chuan rilru put hmang te, Pathian neih ang mizia te, leh zalên taka duh thlan theihna te an nei a. Anni chu fel taka ruahman an niin, Pathian ruahmanaah dinhmun sâng tak an chelh ṭheuh va, Mikaela (Isua vân lam hming) chu vântirhkoh chungnung ber a ni. (Dan. 10:13; Jud. 9) “Thil siam zawng zawnga piang hmasa ber” chu Pathian “Thu,” a nih loh leh Pathian aia Thusawitu a ni a, thil dang zawng zawng siamnaah Pathian Jehova’n a hmang a ni.—Kol. 1:15-17; Joh. 1:1-3.
3 Chu vântirhkoh chungnung ber hnuaiah chuan, Jehova thianghlimna puang chhuak a, a tehnate mila nung tûra a mite ṭanpuitu seraf-te an awm a. Pathian ropuina chawisânga a rawng bâwltu Cherub-te an awm bawk a. (Gen. 3:24; Is. 6:1-3, 6, 7) Vântirhkoh dang, a nih loh leh thuchah kengtute chuan kawng chi hrang hrangin Pathian duhzâwng an hlen chhuak bawk a ni.—Heb. 12:22, 23.
4. (a) Leilung nghahchhan phûm a nih lai khân engtin nge vântirhkohte’n an chhân lêt? (b) Zalên taka duh thlan theihna chu ṭha taka hman ni ta se mihringte tân eng awmzia nge a neih ang?
4 Vântirhkoh zawng zawng chu ‘leilung nghahchhan phûm’ a nih lai khân an hlim a, he leilung mawi danglam tak hi mihringte awmna tûra siam a nih lai khân an chanvote chu hlim takin an thawk a ni. (Job. 38:4, 7) Jehova chuan mihring chu “vântirhkohte aia hnuaiin,” mahse Ama “anpuiin” a siam a; chuvângin, mihringte chuan Siamtu mize ropui takte chu an lantîr thei a ni. (Heb. 2:7; Gen. 1:26) Zalên taka duh thlan theihna thilpêk chu ṭha takin hmang ta sela chuan Adama leh Evi, leh an thlahte chuan Jehova chhûngkua lei leh vâna finna nei thil siamte zînga mi anga nun chên thei tûr an ni.
5, 6. Vânah eng helna nge chhuak a, engtin nge Pathianin a chhân lêt?
5 Pathian chhûngkaw zîng aṭanga helna inṭan an hmuh chuan vântirhkoh thianghlimte chuan mak an ti ngei ang. An zînga pakhat chuan hlim taka Pathian Jehova chawimawi chu duh tâwk tawh lovin, mite’n amah chibai an bûk chu a duh ta zâwk a. Jehova’n rorêl tûra dikna a neih chu chovin leh a rorêlna khing tûra pâwl din tumin, Setana (a awmzia chu “Dodâltu”) a innihtîr a ni. Setana chuan dâwt thu hmangin, mihring nupa tuak hmasa ber chu hmangaihna nei tak an Siamtu laka helnaah a lam ṭang tûrin vervêk takin a bum a ni.—Gen. 3:4, 5; Joh. 8:44.
6 Jehova chuan Bible-a hrilh lâwkna hmasa ber: “Nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang: chu mi chuan i lû a la tithitling ang a, nangin a ke artui i la tithitling ang,” tih chu sawiin Setana chunga rorêlna chu a puang chhuak nghâl a ni. (Gen. 3:15) Setana leh chu Pathian “hmeichhia” inkâra indona chu awm chhunzawm reng tûr a ni. Ni e, Jehova chuan a vân lam inawpna pâwl, vântirhkoh rinawmte chu amah Pasal anga neitu nupui duhawm tak angin a thlîr a ni. Chu hrilh lâwkna chu zawi zawia laih lan zêl tûr “thurûk” mah ni se, chu chuan beiseina nghahchhan nghet tak chu a siam a. A inawpna pâwl vân lam pêng aṭanga mi pakhatin hel hmang zawng zawng a rawn tihchimih leh, chu miah chuan “vâna thil awmte, lei chunga thil awmte pawh” fâwk khâwm chu Pathian thil tum a ni.—Eph. 1:8-10.
7. Nova hun lai khân vântirhkoh ṭhenkhat chuan eng nge an tih a, chu chuan an tân eng nge a rah chhuah?
7 Nova hun lai khân, vântirhkoh tam tak chuan “an awmna pângngai” kalsanin, leia nuam an chen theih nân mihring taksa ang an rawn pu a. (Jud. 6; Gen. 6:1-4) Jehova chuan chûng hel hmangte chu thim hnuaiah a phuar a, chutiang chuan “thlarau sualho” leh Pathian chhiahhlawhte tâna hmêlma hlauhawm tak nihna kawngah Setana chu an zâwm ta a ni.—Eph. 6:11-13; 2 Pet. 2:4.
Engtin Nge Vântirhkohte’n Min Ṭanpui?
8, 9. Engtin nge Pathian Jehova’n mihringte ṭanpui tûra vântirhkohte a hman?
8 Abrahama te, Jakoba te, Mosia te, Josua te, Isaia te, Daniela te, Isua te, Petera te, Johana te, leh Paula te chu vântirhkohte’n rawng an bâwlsakte zînga mi an ni a. Vântirhkoh rinawmte chuan Pathian rorêlna chu an hlen chhuak a, Mosia Dân pawh tiamin hrilh lâwknate leh kaihhruainate pawh anmahni kal tlang bawka pek a ni. (2 Lal. 19:35; Dan. 10:5, 11, 14; Tirh. 7:53; Thup. 1:1) Tûnah chuan Pathian Lehkhabu chu a puma kan neih tawh avângin, vântirhkohte’n Pathian thuchah min hrilh a ngai tawh lo pawh a ni thei. (2 Tim. 3:16, 17) Mahse, hmuh theih lohvin, vântirhkohte chuan Pathian duhzâwng an ti a, a chhiahhlawhte ṭanpuiin an buai hle a ni.
9 Bible chuan: “Amah ṭihtute chu, an vêlah LALPA vântirhkoh chuan a awm chilh a, a chhanhim ṭhîn,” tiin min hrilh a. (Sâm 34:7; 91:11) Rinawmna thu buai avângin, Jehova chuan Setana chu kan chunga fiahna chi tinrêng thlentîr a phal a ni. (Lk. 21:16-19) Amaherawhchu, Pathian chuan a chunga kan rinawmna fiah nân hrehawm kan tawrh theih chen tûr chu a hria a ni. (1 Korinth 10:13 chhiar rawh.) Vântirhkohte chu Pathian duhzâwng nêna inmila thil ti tûrin an inring reng a. Anni chuan Sadrak, Mesak, Abednego, Daniela, leh Petera te chu an chhan chhuak a; mahse, Stephana leh Jakoba te chu an chhan chhuak lo va, hmêlma kutah an boral a ni. (Dan. 3:17, 18, 28; 6:22; Tirh. 7:59, 60; 12:1-3, 7, 11) Chûng dinhmun leh buainate chu a inang lo. Chutiang bawkin, Nazi concentration camp-a kan unau ṭhenkhatte chu tihhlum an nih laiin, a tam zâwk chu Pathian Jehova’n a chhan chhuak a ni.
10. Vântirhkoh ṭanpuina bâkah, eng ṭanpuina nge kan dawn theih?
10 Bible chuan mi tinin vênghimtu vântirhkoh an nei ṭheuh tih a zirtîr lo. “Engpawh a duhzâwng anga kan dîl chuan anin [Pathianin] min ngaihthlâksak” ṭhîn tih ring tlat chungin kan ṭawngṭai a ni. (1 Joh. 5:14) Jehova chuan min ṭanpui tûrin vântirhkoh chu a tîr thei ngei mai; mahse, ṭanpuina chu kawng dang daih pawhin kan dawng thei a ni. Kan Kristian unaute chu ṭanpuina leh thlamuanna min pe tûra chêttîrin an awm thei a. Pathian chuan “Setana tirhkoh” kut thak hnawihna ang hrima min tihrehawmtu ‘tisaa hlîng’ tuar chhuak tûra kan mamawh finna leh chhelna min pe thei a ni.—2 Kor. 12:7-10; 1 Thes. 5:14.
Isua Entawn Rawh
11. Engtin nge Isua ṭanpui tûrin vântirhkohte chu hman an nih a, Pathian laka rinawmna vawn rengna hmangin Isua’n eng a hlen chhuah?
11 Jehova’n Isua ṭanpui tûra vântirhkohte a hman dân lo ngaihtuah ta ila. Anni chuan Isua pian thu leh a thawhleh thu an puan bâkah, leia a awm lai khân an ṭanpui bawk a ni. Vântirhkohte chuan mana râwng taka tihhlum a nihna ata pawh an dang thei reng a. Mahse, chutianga ti lovin, amah tichak tûrin vântirhkoh pakhat chu tirh a ni ta zâwk a ni. (Mt. 28:5, 6; Lk. 2:8-11; 22:43) Pathian Jehova thiltum nêna inmilin, Isua chuan inthawi nân a nun a pe a, chu chuan fiahna nasa ber hnuaiah pawh mi ṭha famkim chuan Pathian lakah rinawmna a vawng thei tih a finfiah bawk a ni. Chuvângin, Jehova chuan Isua chu thih theih lohna vân lam nunah a kaitho va, “thuneihna zawng zawng” peiin, vântirhkohte chu ama thu thuin a awmtîr a ni. (Mt. 28:18; Tirh. 2:32; 1 Pet. 3:22) Chutiang chuan, Isua chuan Pathian ‘hmeichhe’ “thlah” bul ber a nihzia a târ lang a ni.—Gen. 3:15; Gal. 3:16.
12. Eng kawngin nge Isua rilru fel tak put chu kan entawn theih?
12 Isua chuan vântirhkohte vênhimna beisei chunga âtthlâk taka thiltihna hmanga Pathian fiah chu a dik lo tih a hria a ni. (Matthaia 4:5-7 chhiar rawh.) Chuvângin, ṭûl lo taka kan nun hlauhthâwnawma dah lo va, tihduhdahna erawh huaisen taka hmachhawn siin, rilru “fel tak” puin Isua i entawn ang u.—Tit. 2:12, 13.
Vântirhkoh Rinawmte Hnên Aṭanga Kan Zir Theih Chu
13. Petera thawn hnih 2:9-11-a târ lan vântirhkoh rinawmte entawn tûr siam aṭang hian eng nge kan zir theih?
13 Jehova chhiahhlawh hriak thih ‘sawichhetute’ a zilhnaah tirhkoh Petera chuan vântirhkoh rinawmte entawn tûr siam ṭha tak chu a sawi lang a. Chûng vântirhkohte chuan thiltihtheihna nasa tak nei mah se, “Lalpa hmaah chuan” an chung thu rêlsakin an sawichhe duh lo a ni. (2 Petera 2:9-11 chhiar rawh.) Keini pawhin kohhrana hruaitute zahna lantîrin, mi chungthu lo rêlsak mai lo ila, rorêlna chu Rorêltu Lû Ber Jehova kutah i nghat ve ang u.—Rom 12:18, 19; Heb. 13:17.
14. Vântirhkohte chuan rawngbâwlna kawnga inngaihtlâwmna chungchângah eng entawn tûr nge an siam?
14 Jehova vântirhkohte chuan rawngbâwlna kawnga inngaihtlâwmna chungchângah entawn tûr ṭha tak min pe a ni. Vântirhkoh ṭhenkhat phei chuan an hming pawh an zêp tlat a. (Gen. 32:29; Ro. 13:17, 18) Vânah khian thlarau thil siam maktaduai têl awm mah se, Bible chuan Mikaela leh Gabriela hming chauh a târ lang a ni. Chu chu vântirhkohte ṭûl lo taka kan chawimawi loh nân min vêngtuah a ṭang thei a. (Lk. 1:26; Thup. 12:7) Tirhkoh Johana’n vântirhkoh pakhat hmaa kûna chibai bûk a tum khân: “Heti chuan ti suh khai; kei chu nangmah leh i unau[te] . . . bâwihpui ka ni alâwm,” tia hrilh a ni. (Thup. 22:8, 9) Kan ṭawngṭaina pawh tiamin, kan chibai bûkna chu Pathian hnênah chauh a kal tûr a ni.—Matthaia 4:8-10 chhiar rawh.
15. Engtin nge dawhtheihna chungchângah vântirhkohte’n kan tân entawn tûr an siam?
15 Vântirhkohte chuan dawhtheihna chungchângah pawh entawn tûr an siam bawk a. Pathian thurûkte chu hriat châk hle mah se, hrilh hriat kilhkêlh an ni lo. “Chûng thil chu vântirhkohten bih an duh ṭhîn a ni,” tiin Bible chuan a sawi. (1 Pet. 1:12) Chuti chu eng nge an tih tâk? Anni chuan Pathianin “finna tinrêng kohhranho avângin hriattîrin a awm thei ang” a tih hun a thlen hma chu dawhthei takin an nghâk a ni.—Eph. 3:10, 11.
16. Engtin nge kan nungchang chuan vântirhkohte a nghawng?
16 Fiahna tuar Kristiante chu ‘vântirhkohte ennawma siamin’ an awm a. (1 Kor. 4:9) Vântirhkohte chuan ngun takin min thlîr reng a, kan rinawmna thiltihte an hmuhin an lungawiin, sual sim chungah phei chuan an lâwm lehzual a ni. (Lk. 15:10) Anni chuan Pathian ngaihsak Kristian hmeichhiate nungchang pawh chu an hmu a. Bible chuan “vântirhkohte avângin hmeichhiain mipa thuneih chhinchhiahna a khum tûr a ni,” tih a târ lang a ni. (1 Kor. 11:3, 10) Ni e, vântirhkohte chuan Kristian hmeichhiate leh lei lama Pathian chhiahhlawh dang zawng zawngte’n theocratic ruahmanna an zui a, lû nihna an pawm hmuh chu nuam an ti a. Chu thu âwihna chu chûng Pathian vân lam fate tân chuan hriattîrna ṭha tak a ni.
Vântirhkohte Chuan Thu Hrilhna Phûr Takin An Ṭanpui
17, 18. Kan thu hrilhnaah vântirhkohte’n min ṭanpui tih engtin nge kan sawi theih?
17 “Lalpa nî” chhûnga thilthleng chhinchhiah tlâk tak ṭhenkhatah vântirhkohte chu an tel ve a. Chûng thilthlengah chuan kum 1914-a Lalram pianna leh ‘Mikaela leh a vântirhkohte’n vân aṭanga Setana leh a ramhuaihote an paihthlâk pawh a tel a ni. (Thup. 1:10; 11:15; 12:5-9) Tirhkoh Johana chuan “leia awmte . . . hnêna tlângaupui tûra chatuana chanchin ṭha nei vântirhkoh . . . vanlaizâwla thlâwk” a hmu a. Chu vântirhkoh chuan: “A rorêl hun chu a lo thlen tâk avângin Pathian chu hlau ula, chawimawi rawh u; vân te, lei te, tuifinriat te, tuihna te siamtu chu chibai bûk rawh u,” tiin a puang chhuak a ni. (Thup. 14:6, 7) Chuvângin, Jehova chhiahhlawhte chuan Diabola dodâlna nasa tak kâra Lalram din tawh thu chanchin ṭha an hrilhnaah vântirhkohte’n an ṭanpui ngei tih an ring tlat thei a ni.—Thup. 12:13, 17.
18 Vântirhkohvin Philipa biaa Ethiopia mi tilreh hnêna a hruai ang khân, tûn laiah chuan min biain mi rilru ṭhate hnênah min hruai tawh lo va. (Tirh. 8:26-29) Amaherawhchu, tûn laia thiltawn tam tak chuan kan Lalram rawngbâwlnaah vântirhkohte’n min ṭanpuiin, “chatuana nun duhna rilru dik tak neite” min kawhhmuh tih a târ lang a ni. * (Tirh. 13:48, NW) ‘Thlarau leh tih tak zeta Pa chibai bûk’ duhtute zawnnaa kan tih tûr tia rawngbâwlnaa tel ziah chu a va pawimawh tak êm!—Joh. 4:23, 24.
19, 20. “Khawvêl tâwp” chhinchhiahna thil thlengahte hian engtin nge vântirhkohte an tel ve?
19 Kan tûn lai hun chungchângah, Isua chuan “khawvêl tâwp hunah chuan” vântirhkohte’n “mi fel zînga ta mi sualte chu an hlîr ang” tih a sawi a. (Mt. 13:37-43, 49) Anni chuan hriak thihte lâkkhâwmna hnuhnûng berah leh chhinchhiahnaah chanvo an nei bawk. (Matthaia 24:31 chhiar rawh; Thup. 7:1-3) Chu bâkah, ‘kêl zîng ata berâmte a hlîrnaah’ Isua an pui bawk.—Mt. 25:31-33, 46.
20 “A vântirhkoh chak takte nên . . . vân aṭanga [Lalpa Isua] inlâr hunah” “Pathian hre lo mi leh kan Lalpa Isua chanchin ṭha âwih lo mite” zawng zawng chu tihboral an ni ang. (2 Thes. 1:6-10) Johana pawhin, inlârnaa chu thilthleng vêk a hmuh khân, Isua leh vântirhkohte chu sakawr vâr chunga chuanga indona fel hlen chhuak tûra an kal chhuah thu a sawi a ni.—Thup. 19:11-14.
21. ‘Vântirhkoh leilâwt chabi leh khaidiat lian pui keng’ chuan Setana leh a ramhuaiho chungah eng nge a tih ang?
21 Johana chuan “vântirhkoh leilâwt chabi leh khaidiat lian pui kengin vân ata lo chhuk” a hmu bawk a. Chu chu tu dang ni lovin, Diabola phuara leilâwta paihtu tûr, vântirhkoh chungnung ber Mikaela ngei mai chu a ni a; Diabola rual chuan a ramhuaihote pawh paih tel an nih a rinawm. Chûng phuara awmte chu mi ṭha famkimte’n fiahna hnuhnûng ber an tawn hun tûr Krista Kum Sâng Rorêlna tâwpah rei lo tê chhuah leh an ni ang a. Chu mi hnuah chuan Setana leh hel hmang a hote zawng zawng chu tihboral vek an ni ang. (Thup. 20:1-3, 7-10; 1 Joh. 3:8) Chutih hunah chuan Pathian laka helna zawng zawng chu tihbo hlen a ni tawh ang.
22. Eng thil lo thleng mai tûrah nge vântirhkohte an tel ve a, chu an chanvo chu engtin nge kan ngaih ang?
22 Setana khawvêl suaksual tak ata chhan chhuahna ropui tak chu a lo thleng ṭêp tawh a. Vântirhkohte chuan thilthleng pawimawh tak tak, Jehova lal chungnunna thiam chantîrnaah te leh he lei leh mihringte tâna a thiltum tihthlen famkimnaah te chuan chanvo pawimawh tak an nei ang. Vântirhkoh rinawmte chu “rawngbâwlna thlaraute, chhandamna rochungtu tûrte tân rawngbâwl tûra tirh chhuah an ni.” Pathianin vântirhkohte chu a duhzâwng tia chatuana nun chang thei tûra min ṭanpui nân a hmang a. Chutianga vântirhkohte a hman avângin Pathian Jehova hnênah lâwmthu i sawi ang u. (w09 5/15)
[Footnote]
^ par. 18 Jehovah’s Witnesses—Proclaimers of God’s Kingdom tih bu phêk 549-551-na en rawh.
Engtin Nge Kan Chhân Ang?
• Vâna thlarau thil siamte chu eng anga ruahman nge an nih?
• Nova hun lai khân vântirhkoh ṭhenkhatin eng nge an tih?
• Engtin nge Pathianin a chhiahhlawhte ṭanpui nân vântirhkohte a lo hman ṭhin?
• Kan hunah hian vântirhkoh rinawmte’n eng chanvo nge an neih?
[Zirlai Atâna Zawhnate]
[Phêk 23-naa milem]
Vântirhkohte chuan Pathian duhzâwng hlen chhuah chu nuam an ti
[Phêk 25-naa milem]
Daniela chunga thilthleng angin, vântirhkohte chu Pathian duhzâwng nêna inmila thil ti tûrin an inring reng
[Phêk 26-naa milemte]
Vântirhkohte’n Lalram rawngbâwlna chu an thlâwp tlat avângin, i zâm lo vang u!
[Milem Hawhtîrtu]
Globe: NASA photo