Angelkunaqa ‘servikoq espiritukunam’ kayan

“¿Manaku llapan kayan sirwikoq espiritukuna, kachamushqa llapan salbasyon eredaqkunata sirwiyänanpaq?” (HEB. 1:14, QKW).

1. ¿Imanirtaq alläpa kushitsimantsik Mateo 18:10 y Hebreus 1:14 nishqan textokuna?

HUK kutim Jesucristu qateqninkunapaq parlar kënö nerqan: “Ama pitapis que wamrano umildicunata despresyayanquitsu. Noqam niyaq: Pecunata cuidaq anjelcunam sielucho Dios Yayäpa qaqllanta riquecayan” (Mat. 18:10). Y apóstol Pablunam fiel angelkunapaq kënö qellqarqan: “¿Manaku llapan kayan sirwikoq espiritukuna, kachamushqa llapan salbasyon eredaqkunata sirwiyänanpaq?” (Heb. 1:14, QKW). Kë textokunam rikätsimantsik Jehová Dios angelninkunawan yanapamanqantsikta, tsëta musyëqa alläpam kushitsimantsik. ¿Imatataq más Biblia yachatsikun angelkunapita? ¿Imanötaq yanapamantsik? ¿Imatataq pëkunapita yachakushwan?

2, 3. ¿Ima cargokunayoqtaq kayan angelkuna?

² Jehová Diospaqa ciëlochö angelninkuna alläpa atskam kayan mana yupëtapis puëdepaq, “poderyoq, y llapan mandakushqankunata ruraq” (Sal. 103:20; lei Apocalipsis 5:11). Pëkunapis hukläya gustoyoqmi kayan, imatapis librem akrakïta puëdeyan, y Teytan imanöpis kanqantam pëkunapis rikätsikuyan. Y precisaq cargoyoqmi kayan. Puntataqa këkan arcángel Miguel nishqanmi, ciëlochö këkarmi Jesus kë shutita chaskin (Dan. 10:13; Jud. 9). Pëmi “llapan kamashqakunapa punta kaqnin” y “Palabran” o Jehoväpita parlaq, Pëwanmi Jehová imëka cösaskunata rurarqan (Col. 1:15-17; Juan 1:1-3, QKW).

³ Arcangelpa mandonchönam këkäyan serafin nishqan angelkuna, y pëkunaqa yanapakuyan Jehoväpa shutin y markan santo y limpio kanampaqmi. Tsëpitanam querubin nishqan angelkuna, pëkunaqa rikätsikuyan y defendiyan Jehovälla mandakoq kanqantam (Isa. 6:1-3, 6, 7; Gén. 3:24). Wakin kaq angelkunanam yanapakuyan imëkachöpis Jehoväpa munënin rurakänampaq (Heb. 12:22, 23).

4. a) ¿Kushikuyarqantsuraq angelkuna Jehová patsata rurariptin? b) Adanwan Eva imatapis akrakuyänampaq libre këninkunawan alli kaqta akrayaptenqa ¿imanöraq kawakuyanman karqan?

⁴ Kë angelkunaqa alläpam kushikuyarqan Patsa rurakaptin, y nuna taranampaq Diosnintsik  patsätsiptinmi pëkunapis kushishqa yanapakuyarqan (Job 38:4, 7). Jehová Diosqa “anjelcunapitapis mas menusman[mi] nunacunata” churarerqan, pero kikintanö rurashqa kaptinmi nunakunaqa Diosnintsik imanö kanqantapis rikätsikïta puëdeyan (Heb. 2:7; Gén. 1:26). Adanwan Eva imatapis akrakuyänampaq libre kayanqampita alli kaqta akrashqa karnenqa, llapan kastankunawanmi junto y kushishqa kawakuyanman karqan huk shumaq patsachö, y angelkunawampis huk familianöllam kayanman karqan.

5, 6. ¿Imanötaq huk ángel ciëlochö tikrakurerqan, y imatataq Dios rurarqan?

⁵ Diospa angelninkunaqa alläpachi llakikuyarqan, kastankunapita huk ángel mana alli tikrakuriptin. Huk angelmi Diosta adorëta munarqannatsu y kikinta adorayänantam munarqan. Këmi, Jehová gobernanqampaq mana allita parlarqan y kikinmi Diospa contranchö gobernante tikrarerqan munëninta rurakunampaq. Tsënöpam tikrarerqan Satanasman, kë shutiqa “chikikoq” ninanmi. Pëmi ulikïta o llullakïta qallarqan, y tsëwanmi ishkitserqan Adantawan Ëvata, kuyakoq Diosnintsikpa contran churakäyänampaq (Gén. 3:4, 5; Juan 8:44).

⁶ Tsënö kanqanrëkurmi Jehová juzgarqan Satanasta, kënömi nerqan: “Warmitawan qamtam chikinatsikushqëki, qampa mirënikita pëpa mirënintawan. Pëmi tsamllashunki [jarushunki] peqachö y qamnam atakanchö kaninki” (Gén. 3:15). Këmi punta kaq profecía karqan, këchö nenqannömi chikinakuyänan karqan Satanaswan warmi o Diospa warmin. Kë warmiqa Jehoväpa markanmi, ciëlochö llapan espïritunö kawaq kaqkuna, kë llapankunam Jehoväpaqqa alläpa kuyë warmin cuenta. Kë profecïaqa manam rastsu musyakärinan karqan, sinöqa ichikllapa ichikllapam musyakänan karqan y tsëmi rikätsikunan karqan Diosnintsik llapan änikonqankuna shamoq tiempochö cumplikänampaq kaqta. Diosnintsikmi disponerqan ciëlochö familiampita huk espíritu, Satanastawan yanapaqninkunata ushakäratsinampaq, tsëpaqqa puntata qorinan o ëllunan karqan “que patsacho caqcunata y sielucho caqcunata[m]” (Efe. 1:8-10).

7. ¿Imatataq rurayarqan wakin angelkuna Noëpa tiemponchö y Jehová imatataq rurarqan pëkunawan?

⁷ Noëpa tiemponchömi atskaq angelkuna nunaman tikrarkur kë Patsaman shayämorqan mana alli munëninkunata rurar kushikuyänanrëkur (Jud. 6; Gén. 6:1-4). Jehovämi castigarqan kë mana alli ruraq angelkunata y imëpis manana atsikyäkoqna tsakaqman, ampiman o tutapëmanmi qaykurerqan. Tsënöpam “mana ricanqantsic puedeq” mana alli espiritukunaman tikrariyarqan, tsëmi apóstol Pablupis nerqan Diosnintsikpa sirveqninkunapa pasëpa chikeqninkuna kayanqanta (Efe. 6:11-13; 2 Ped. 2:4).

¿Imanötaq angelkuna yanapamantsik?

8, 9. ¿Imanötaq Jehová angelninkunawan yanapashqa sirveqninkunata?

⁸ Angelkunaqa yanapayarqanmi Jehová Diosta sirveq nunakunata, wakin yanapakï chaskeqkunaqa  kayarqan: Abrahan, Jacob, Moises, Josué, Isaías, Daniel, Pedru, Juan, Pablu, y kikin Jesuspis. Kë angelkunaqa willakuyarqanmi Diospa castïgonta, shamoq tiempochö pasakunampaq kaqta, y Jehová Diospa leyninkunatapis (2 Rey. 19:35; Dan. 10:5, 11, 14; Hech. 7:53; Apo. 1:1). Kanan tiempontsikchöqa Bibliata complëtotanam katsintsik, tsëmi precisaqnönatsu angelkunaraq Diospa willakïninta willakuyänan (2 Tim. 3:16, 17). Tsënö kaptimpis, mana rikëkashqapis pëkunaqa alläpa ocupädom këkäyan Jehová Diospa munëninta rurarnin y sirveqninkunatapis yanaparnin.

⁹ Bibliam kënö nin: “Jehoväpa angelnenqa llapan mantsakoqkunata hiruruparmi libran” (Sal. 34:7; 91:11). Shonqunkunapita patsë Jehová Diosta sirveq nunakunapaqmi, Satanasqa mana allita parlashqa, pruëbakunapa pasarnenqa mananam serviyäshunkinatsu nirnin, tsëmi Dios permitin Satanás pruëbaman tukïnöpa churamänata (Luc. 21:16-19). Tsënö kaptimpis fiel kanqantsikta rikätsikurishqaqa, Jehoväpaqqa manam precïsonatsu pruëbakunapa pasanantsik (lei 1 Corintios 10:13). Pero angelkunaqa listom këkäyan yanapamänantsikpaq Jehová disponenqan hora. Musyarinapaq, Sadrac, Mesac, Abednego, Daniel y Pedru nishqan fiel nunakunatam librayarqan. Pero manam tsapäyarqantsu Estëbantawan Santiagota chikeqninkuna wanutsiyaptin (Dan. 3:17, 18, 28; 6:22; Hech. 7:59, 60; 12:1-3, 7, 11). ¿Imanirtaq tsapäyarqantsu? Imarëkur wanutsiyanqampis hukläyam karqan. Tsënöllam hina campos de concentración nazi nishqampitapis Jehová Dios atskaq cristiänokunata kawëkaqta horqamorqan, pero wakin kaqkunataqa chikeqninkuna wanutsiyarqanmi.

10. Angelninkunawan yanapamanqantsikpitapis, ¿imakunawantaq hina Jehová más yanapamashwan?

¹⁰ ¿Cada nunapaqtsuraq cuidamänantsikpaq huk ángel kan? Bibliaqa manam tsëtatsu yachatsikun. Pero nimantsikmi llapan shonquntsikwan Jehoväman markäkur o yärakur ‘pe munashqanno imatapis mañacushqaqa’ wiyamänata (1 Juan 5:14). Awmi, Jehová munarqa yanapamänapaq huk angelta kacharamunmanmi, pero hukmampapis yanapamënintsikta puëdenmi. Këman yarpärishun, huk cristiano mayintsiktapis animarinmanmi yanaparamänapaq. O manaqa yachënintsik y kallpantsikmi qoykamashwan ‘imeca etsächo casha nanatsicoqno’ problëmantsik kaptimpis alleq tsarakunapaq y alli pensëkur imatapis ruranapaq (2 Cor. 12:7-10; 1 Tes. 5:14).

Jesus ruranqannö rurashun

11. a) ¿Imanötaq angelkuna Jesusta yanapayarqan? b) ¿Imatataq rikätsikorqan Jesus wanonqanyaq fiel karnin?

¹¹ Rikärishun Jehoväpa angelninkuna kë Patsaman Jesus shamuptin tukïnöpa yanapayanqanta. Pëkunaqa willakuyarqanmi Jesuspa yurikïninta, y kawarimïnintapis. Wanutsiyänampaq manaraq tsariyaptinmi huk ángel ëwar alleq tsarakunampaq animarqan. Pero tsënö kaptimpis pëkunaqa manam tsapäyarqantsu chikeqninkuna tsariyaptin ni wanutsiyaptimpis (Mat. 28:5, 6; Luc. 2:8-11; 22:43). ¿Imanir? Diosnintsik ruramunampaq kaq cumplikänampaqqa, Jesusqa wanunanraqmi karqan, tsënöpam rikätsikorqan huk perfecto nunaqa  wanonqanyaq pruëbata pasëkarpis Diosnintsikman fiel kanqanta. Tsënöpam Jehová kawaritsimorqan y qorqan manana ushakäkoq kawënin, hina ‘mandacoq’ kanampaqmi churarerqan, y angelkunapis mandädonchö kayänampaqmi patsätserqan (Mat. 28:18; Hech. 2:32; 1 Ped. 3:22). Tsënöpam musyakärerqan ‘warmipa’ más precisaq kaq ‘mirëninqa’ Jesus kanqan (Gén. 3:15; Gál. 3:16).

12. ¿Imanötaq qatishwan Jesus ruranqanta?

¹² Jesusqa musyarqanmi Jehoväta pruëbaman mana churananta, tsëmi, angelninkunawanmi salvamanqa nishpa kawëninta peligroman churarqantsu (lei Mateo 4:5-7). Noqantsikpis Jesus ruranqantam qatita tïrashwan “alli tantiyecur imatapis ruranapaq”. Chikimaqnintsikkuna wanutsimënintsikta munar qatikachämashqapis, mëläya Jehoväman markäkïkarnimpis o yärakïkarnimpis manam kawënintsiktaqa peligroman churanantsiktsu (Titu 2:12).

Fiel angelkunapita yachakonqantsik

13. ¿Imatataq 2 Pedru 2:9-11 nishqan angelkunapita yachatsimantsik, y imanötaq rurayanqanta qatishwan?

¹³ Jehoväpa akrashqankunapaq mana allita parlayaptinmi apóstol Pedru, tsë nunakunata qayaparnin angelkunapa ejemplonta rikätserqan. Poderyoq karpis kë angelkunaqa manam pitapis acusayantsu ni juzgayantsu Jehová Diosta respetarnin (lei 2 Pedru 2:9-11, QKW). Noqantsikpis angelkuna rurayanqanta qatishun, ama pitapis juzgashuntsu, respetashun congregacionta dirigiyänampaq churashqa cristiänokunata, y imëkatapis Jehoväpa makinchö haqirishun, pëmi más Hatun kaq Juezqa (Rom. 12:18, 19; Heb. 13:17).

14. ¿Imakunachötaq angelkunaqa humilde këninta rikätsikuyan, y imatataq tsëpita yachakuntsik?

¹⁴ Rikärishun angelkuna imanö huk rurëkunachöpis alläpa humilde kayanqanta. Musyarinapaq, wakin angelkunaqa shutinta tapuyaptimpis manam willakïta munayarqantsu (Gén. 32:29; Jue. 13:17, 18). Ciëlochö mana yupëtapis puëdepaq angelkuna kaptimpis, Bibliaqa willamantsik ishkë angelkunapa shutinllatam: Miguel y Gabriel. Këmi rikätsimantsik angelkunataqa mana adorana kanqanta, sinöqa Jehovällata (Luc. 1:26; Apo. 12:7). Apóstol Juan huk ángel  nöpanman adoranampaq qonqurikïkuptinmi, kë ángel nerqan: “Ama noqataqa adoramëtsu, Porqui noqapis qamno y creyicoq mayiquicunanollam y Diospa profetancunanollam Diospa sirweqninmi cä” (Apo. 22:8, 9). Këmi rikätsimantsik Diosnintsikllata adorana kanqanta, y pëllaman mañakuna kanqanta (lei Mateo 4:8-10).

15. ¿Imanötaq angelkuna rikätsikuyan alläpa pacienciayoq kayanqanta?

¹⁵ Angelkunapis pacienciayoqmi kayan. Diosnintsik imatapis ruranampaq kaqtaqa musyëtam munayan. Tsëmi Bibliapis pëkunapaq kënö nin: “Que willaquipaqmi asta anjelcunapis shumaq cäyita munecayan” (1 Ped. 1:12). Tsënö kaptimpis wakin willakïkunataqa manam musyayanraqtsu. ¿Rasku musyarita munayan? Manam, pacienciawanmi shuyäyan kikin Jehová congregacionninwan imëpis “yachaq” këninta musyatsikunqanyaq (Efe. 3:10, 11).

16. ¿Imanöpis portakonqantsikta angelkuna rikëkäyämuntsuraq?

¹⁶ Bibliaqa rikätsikunmi, cristiänokuna imëka pruëbakunapa pasashqaqa angelkuna pasëpa rikarämanqantsikta (1 Cor. 4:9). Pëkunaqa imanö portakonqantsiktapis rikäyämunmi, y pruëbakunapa pasar alli tsarakushqaqa pasëpam kushikuyan. Hina hutsata ruraq nuna arrepentikuptimpis alläpam kushikuyan (Luc. 15:10). Y cristianakuna rurayanqanta y portakïninkunatapis pëkunaqa rikarëkäyämunmi. Bibliam kënö nimantsik: “Llapan panicuna peqancunata shucupacuyätsun qowancunapa mandaduncunacho cayanqanta nunacuna musyayänanpaq. Tseno rurayätsun anjelcunarecur” (1 Cor. 11:3, 10). Awmi, angelkunaqa alläpam kushikuyan warmikuna y ollqukuna Jehoväpa markanchö dirigeq cristiänokunata respetayaptin y wiyakuyaptin. Tsënö kanqantsikpitaqa angelkunapis alläpam yachakuyan.

Angelkunaqa yanapakuyanmi Jehová Diospa mensäjenta willakurnin

17, 18. ¿Imanötaq musyantsik angelkuna Jehoväpita yachatsikonqantsikchö yanapakuyanqanta?

¹⁷ Angelkunaqa alläpa preciso rurëtam rurayashqa “Señorpa junaqninchow”. Tsë hunaqchömi, 1914 watachö, Jehová Jesucristuta Rey kanampaq churarerqan, y tsë hunaqllachömi ‘Miguel anjelnincunawan’ Satanasta y demonionkunata kë patsaman qarqayämorqan (Apo. 1:10, QKW; 11:15; 12:5-9). Apóstol Juanmi kënö qellqarqan: “riquecorqä juc anjelta sielupa chopincho bolaquicaqta. Tse anjelmi que patsacho täraq nunacunata willapänanpaq apecamorqan mana nunca ushacaq alli willaquita”. Tsë angelmi kënö nerqan: “Puedeq Diosta adorecuyë y alabecuyë, porqui chäramushqanam llapan nunacunata cuentata mañanan öra. Pemi camashqa sieluta, que patsata, lamarta, mayucunata y pucyucunatapis” (Apo. 14:6, 7). Rasumpëpam, Diabluqa imëkanöpa tïran Diosnintsikpita yachatsikonqantsikta michämënintsikta, Pero noqantsikqa segurom këkantsik Jehová Dios angelninkunawan yanapamänantsikta, imëyaqpis Pëpita yachatsikïkänapaq (Apo. 12:13, 17).

¹⁸ Tiempontsikchöqa angelkunaqa manam parlapämarnintsiktsu alli shonquyoq nunakunaman pushamantsik, Felïpeta etíope nunaman pushanqannö (Hech. 8:26-29). Atska willakïkunam kan mana rikëkashqapis angelkunaqa “wiñe cawe munaq” nunakunata tarinantsikpaq yanapakuyanqan (Hech. 13:48). * Tsënö kaptimpis llapantsikmi sinchikunantsik Jehová Diospita yachatsikunapaq y Jehová Diosta “rasonpa” adorë munaqkunata tarinapaq (Juan 4:23, 24).

19, 20. ¿Imakunachötaq angelkuna yanapakuyan “juisiu junaq” tiempochö?

¹⁹ Tiempontsikpaq parlarmi Jesus nerqan,  ‘juisiu junaqchoqa’ “angelcunam jutsa sapacunata alli ruraq nunacunapita acranqa” (Mat. 13:37-43, 49). Angelkunam yanapakuyan kë ushanan tiempochö ciëlopa ewaqpaq kaqkunata qorir o ëllur y señalarnin (lei Mateo 24:31; Apo. 7:1-3). Hinamampis, angelkunaqa Jesuswanmi këkäyanqa “üshacunata chiwacunapita” rakiptin (Mat. 25:31-33, 46).

²⁰ “Jesucristu puedeq anjelnincunawan sielupita que patsaman imeca nina rupecaqchono cutimuptinmi” ushakäriyanqa ‘Teyta Diosta mana respetaqcuna, y Teyta Jesucristupa alli willaquininta mana cäsucoqcuna’ (2 Tes. 1:6-10). Apóstol Juanpis tsëllatam huk visionchö rikarqan, ciëlochö Jesucristuta yulaq caballonkuna montashqa tröpanwan guerrata rurayänampaq listo këkaqta (Apo. 19:11-14).

21. ¿Imataraq ruranqa Satanastawan demoniokunata hatun uchkupa “llabinta y jatun cadenata” tsararëkaq ángel?

²¹ Juanqa rikarqanmi mastapis, kënömi nin: “Tsepitanam riquecorqä juc anjel sielupita urecamoqta. Tse anjelmi tsararëcarqan [...] [hatun uchkupa, NM] llabinta y jatun cadenata”. Kë angelqa, arcángel Miguelmi, këmi Diablutawan demonionkunata alli sinchi cadënawan watarkur hatun uchkuman qeykonqa. Cristu waranqa wata gobernar ushariptinmi, Satanaswan demonionkuna tsë hatun uchkupita kachashqa kayanqa, y llapan hutsannaq nunakunam huk ultimo pruëbapa pasayanqa. Tsëpitam sïqa Satanastawan demonionkunata Jehová chipyëpa ushakätsenqa (Apo. 20:1-3, 7-10; 1 Juan 3:8). ¡Tsënöpam Jehoväpa chikeqninkuna imëpis kanqanatsu!

22. a) ¿Imakunatataq angelkuna rurayanqa shamoq tiempochö? b) ¿Imanötaq sientekuntsik angelkuna yanapamanqantsikta musyar?

²² Ichik tiempollatanam Satanaswan mana alli mundon pasëpa ushakärenqa y noqantsikqa librakashqanam karishun. Kë ushakë hunaqkunachömi angelkuna alläpa yanapakuyanqa Jehoväpa shutin santo kanampaq y kë Patsapaq y nunakunapaq Jehová munanqan rurakänampaq. Angelkunaqa “kayan sirwikoq espiritukuna, kachamushqa llapan salbasyon eredaqkunata sirwiyänanpaq[mi]”. ¡Alläpam kushikuntsik y agradecikuntsik Jehová Dios angelninkunawan voluntadninta ruranapaq, y mana wanushpa kawakïta tarinapaq yanapamanqantsikta!

[Päginapa ura kuchunchö willakï]

¿Yarpankiku?

• ¿Ëka cläsetaq angelkunaqa kayan?

• ¿Imatataq rurayarqan wakin angelkuna Noëpa tiemponchö?

• ¿Imanötaq Jehová angelninkunawan yanapamantsik?

• ¿Kanan tiempontsikchöqa imatataq rurëkäyan angelkuna?

[Yachakunapaq kaqpa tapukïninkuna]

[23 kaq päginachö dibüju]

Angelkunaqa alläpam kushikuyan Jehoväpa voluntadninta rurarnin

[24 kaq päginachö dibüju]

Danielta huk ángel yanapanqanchömi rikantsik Diosnintsik disponiptenqa pëkuna yanapamänapaq listo këkäyanqanta

[25 kaq päginachö dibüjukuna]

Mantsakushuntsu: angelkunaqa yanapëkämantsikmi Jehoväpita yachatsikoq ëwashqa

[Pikunapa kanqan]

Globo terráqueo: NASA photo