Te Au Angera—E “Tavini Vaerua Anake”
Te Au Angera—E “Tavini Vaerua Anake”
“Kare aina ratou ravarai i te tavini vaerua anake, i tonokia ei matuapuru i te aronga tuanga i te ora ra?”—EBE. 1:14.
1. Eaa te pumaana ta tatou ka rauka mai mei ia Mataio 18:10 e Ebera 1:14?
KUA akamatakite a Iesu Karaiti i tetai aronga te ka akaturori i tana au pipi e: “Kia matakite ko te akava[a]vaa aea kotou i tetai o teianei aronga tangata rikiriki, te karanga atu nei au kia kotou, Ko to ratou au angela i te rangi, e tika ïa i te akara anga i te mata o taku Metua i te ao ra.” (Mata. 18:10) I te taiku anga ki te au angera tuatua tika, kua tata te apotetoro ko Paulo e: “Kare aina ratou ravarai i te tavini vaerua anake, i tonokia ei matuapuru i te aronga tuanga i te ora ra?” (Ebe. 1:14) E akapapu anga pumaana taua au tuatua ra e ka taangaanga te Atua i teia au angera i runga i te rangi i te tauturu i te au tangata. Eaa ta te Pipiria e akakite maira kia tatou no runga i te au angera? Akapeea ratou i te tauturu anga ia tatou? Eaa ta tatou ka kite mai mei to ratou au akaraanga?
2, 3. Eaa tetai au angaanga a te au angera i runga i te rangi?
2 E mirioni ua atu te au angera akarongo mou i runga i te rangi. Te maataanga ia ratou e ‘maata te ririnui, e te akono ra i tana akauenga.’ (Sala. 103:20; e tatau ia Apokalupo 5:11.) E au tu tukeke to teia au tamariki vaerua a te Atua, e au tu aiteite ki to te Atua, e te tu rangatira. Kua akanoo meitaki tikaiia ratou e e taoonga teitei to ratou i roto i ta te Atua akanoonooanga, ko te angela maata koia oki ko Mikaela (ko Iesu tona ingoa i runga i te rangi). (Dani. 10:13; Iuda 9) Ko teia ‘Tama mua o te au mea ravarai i angaia’ ko “te Logo,” me kore te Vaa Tuatua a te Atua e kua taangaangaia aia e Iehova i te anga i te au mea ravarai.—Kolo. 1:15-17; Ioa. 1:1-3.
3 I raro ake i te angera maata ko te au terapi, tei akakite aere i to Iehova tu tapu e te tauturu anga i tona iti tangata kia vai viivii kore ua i te pae vaerua. Te vai katoa ra te au kerupi, te tavini ra ratou ei au angera akangateitei i tona tu ngateitei. (Gene. 3:24; Isa. 6:1-3, 6, 7) Ko tetai au angera ke atu, me kore te au karere, e au angaanga tukeke ta ratou i te rave anga i to te Atua anoano.—Ebe. 12:22, 23.
4. Akapeea te au angera i te ariu anga i te akatumuia anga te enua, e eaa ra te aiteanga te taangaanga tau anga i te tu rangatira no te au tangata ra?
4 Kua rekareka te au angera katoatoa i te ‘akatumuia anga te enua’ e kua piri atu ma te rekareka i roto i ta ratou tuanga angaanga i te riro anga mai te enua manea ei kainga no te au tangata ravarai. (Iobu 38:4, 7) Kua anga a Iehova i te tangata ‘i raro iti ake i te au angela’ inara i roto i Tona “uaorai tu,” i te akatika anga i te au tangata kia akaata mai i te tu teitei o Tei Anga mai ia ratou. (Ebe. 2:7; Gene. 1:26) Naringa a Adamu raua ko Eva i taangaanga tau i to raua tu rangatira, kua rauka ia raua e ta raua uanga i te noo mataora ua i roto i te kainga parataito ei tuanga no to Iehova pamiri i te ao katoa e pini ua ake.
5, 6. Eaa te meameaau tei tupu i runga i te rangi, e akapeea te Atua i te ariu anga atu?
5 Papu e kua poitirere tikai te au angera tapu i to ratou kite atu anga te akamata anga te meameaau i roto i te pamiri o te Atua i runga i te rangi. Ko tetai i rotopu ia ratou kare e mareka akaou ana i te akapaapaa ia Iehova, inara te inangaro ra kia akamoriia aia. Kua akariro aia iaia uaorai e ko Satani (te aiteanga “Tei Patoi”) na te akaaoanga i te tu tikaanga o ta Iehova tutaraanga, e na te tauta noinoi anga i te akatupu i tetai tutaraanga ei patoianga. No runga i te pikikaa mua tei rekotiia, kua akavare pikikaa a Satani i nga tangata mua kia piri atu kiaia i te meameaau anga i Tei Anga aroa mai ia raua.—Gene. 3:4, 5; Ioa. 8:44.
6 Kua oronga viviki mai a Iehova i te akavaanga ki runga ia Satani na te akakite anga i te totou mua o te Pipiria e: “Ka tuku oki au i te ke ia korua ko te vaine, e to uanga e tona uanga; nana e akaparuparu i to mimiti, e naau e akaparuparu i tona pooavae.” (Gene. 3:15) Ka tupu ua rai te ke anga i rotopu ia Satani e ta te Atua “vaine.” Ae, kua akara a Iehova i te au angera akarongo mou no te akaaerenga i runga i te rangi ei vaine akaperepere tei tatuaia kiaia ei Tane. Te oronga mai nei teia totou i tetai tumuanga papu no te manakonakoanga, noatu e te vai ra rai te au akakiteanga no te “tuatua ngaro” kia akaari marieia mai. Kua akakoro te Atua e e tai no roto mai i te tuanga o tana akaaerenga i te rangi ra, te ka akaparuparu i te aronga meameaau katoatoa e ka tavaitaiia na roto iaia te “au mea katoatoa i te Mesia ra, to te rangi, e to te ao katoa nei.”—Ephe. 1:8-10.
7. Eaa ta tetai au angera i rave i te tuatau o Noa, e eaa tei tupu kia ratou?
7 I to Noa tuatau, e maata te au angera tei ‘akaruke i to ratou nooanga tikai’ e kua mama mai na roto i te au kopapa tangata kia rauka ia ratou i te aruaru i te navenave noinoi i runga nei i te enua. (Iuda 6; Gene. 6:1-4) Kua titiri a Iehova i taua aronga meameaau ra ki roto i te poiri tangotango, e no reira kua kapiti atu ratou kia Satani i te riro anga mai ei “au vaerua kikino” e ei au enemi kino no te au tavini o te Atua.—Ephe. 6:11-13; 2 Pete. 2:4.
Akapeea te Au Angera i te Tauturu Anga ia Tatou?
8, 9. Akapeea a Iehova i te taangaanga anga i te au angera i te tauturu anga i te au tangata?
8 Ko tetai aronga tei matuapuruia e te au angera ko Aberahama, Iakoba, Mose, Iosua, Isaia, Daniela, Iesu, Petero, Ioane, e Paulo. Na te au angera tuatua tika e rave ana i te akavaanga a te Atua e te tuku mai anga i te au totou e te au aratakianga, kapiti mai te Ture a Mose. (2 Ari. 19:35; Dani. 10:5, 11, 14; Anga. 7:53; Apo. 1:1) I te mea e kua rauka ia tatou i teianei te katoaanga o te Tuatua a te Atua, penei kare te au angera e anoanoia kia akakite mai i te au karere a te Atua. (2 Timo. 3:16, 17) Inara, i runga i te rangi, te angaanga maata nei te au angera i te rave i to te Atua ra anoano e te turuturu anga i tona au tavini.
9 Te akapapu maira te Pipiria kia tatou e: “Te patia nei te Angela a Iehova i te puakapa, e pini ua ake te aronga i mataku iaia, e kua akaora ia ratou.” (Sala. 34:7; 91:11) No te maroanga o te tu tiratiratu, kua akatika a Iehova ia Satani kia apai mai i te au tu timataanga ki runga ia tatou. (Luka 21:16-19) Inara, kua kite te Atua e mei teaa te maata o te timataanga ta tatou ka rauka i te akakoromaki no to tatou tu tiratiratu kiaia. (E tatau ia 1 Korinetia 10:13.) Kua papa ua te au angera i te akao mai ia ratou kia tau ki to te Atua ra anoano. Kua akaora ratou ia Sadaraka, Medeka, Abedenego, Daniela e Petero, inara kare ratou i arai ana i te au enemi i te tamate anga ia Setephano raua ko Iakobo. (Dani. 3:17, 18, 28; 6:22; Anga. 7:59, 60; 12:1-3, 7, 11) E tuke rai te au turanga e te au maroanga. Pera katoa, kua tamateia tetai o to tatou au taeake i roto i te au puakapa tamamaeanga Nazi, inara kua akapapu a Iehova e kia ora mai te maataanga ia ratou.
10. Kapiti mai ki te tauturu anga a te angera, eaa te tauturu anga ka rauka ia tatou?
10 Kare te au Tuatua Tapu i apii mai ana e e angera paruru to te au tangata tataki tai i runga nei i te enua. E pure tatou ma te irinaki anga tikai e “kia pati ua atu tatou i te au mea ravarai i tau iaia ra, te akarongo maira [te Atua] ia tatou.” (1 Ioa. 5:14) E tika rai, ka rauka ia Iehova i te tono mai i tetai angera i te tauturu ia tatou, inara ka rauka mai te tauturu na tetai mataara ke. E ka akakeuia te au taeake Kerititiano kia oronga i te tauturu e te pumaana. Penei ka oronga mai te Atua i te pakari e te maroiroi te anoanoia ra kia akakoromaki ua i ‘te tara i roto i te kopapa’ te takinokino maira ia tatou mei te mea rai e te papaia maira tatou e te “karere na Satani.”—2 Kori. 12:7-10; 1 Tesa. 5:14.
Aru ia Iesu
11. Akapeea te au angera i te taangaangaia anga i te tauturu ia Iesu, e eaa tana i akatupu na te vai akarongo mou anga ki te Atua?
11 E akamanako ana e akapeea a Iehova i te taangaanga anga i te au angera i roto i to Iesu turanga. Na ratou i akakite i tona anauanga e te akatuia anga mai e te matuapuru anga kiaia, iaia i runga nei i te enua. Ka rauka ua i te au angera i te arai kia kore aia e opuia e e tamate kinoia. Inara, kua tonoia mai tetai angera ei akamaroiroi iaia. (Mata. 28:5,6; Luka 2:8-11; 22:43) Kia tau ki to Iehova akakoroanga, kua mate a Iesu i tetai mate akaatinga e kua oronga mai i te akapapuanga e, ka rauka i tetai tangata apa kore i te vai tiratiratu ki te Atua noatu e kua timata pakari tikaia. No reira kua akatu mai a Iehova ia Iesu ki te oraanga mate kore i runga i te rangi, i te oronga anga kiaia i te “mana katoa” e te tuku anga i te au angera ki raro ake iaia. (Mata. 28:18; Anga. 2:32; 1 Pete. 3:22) No reira kua akapapuia mai e ko Iesu te tuanga maata o te “uanga” o ta te Atua “vaine.”—Gene. 3:15; Gala. 3:16.
12. Na roto i teea mataara ka rauka ia tatou i te aru i te akaraanga tau o Iesu?
12 Kua kite a Iesu e e tarevake i te timata ia Iehova na te tapapa atu anga e ka akaora te au angera iaia me tuku manako kore ua aia i tona oraanga ki roto i te kino. (E tatau ia Mataio 4:5-7.) No reira e aru tatou i te akaraanga o Iesu na te akono ‘tau meitaki anga’ i te oraanga, kare e na te tuku tau kore anga ia tatou ki roto i te kino, inara na te aro anga atu i te takinokino ma te mataku kore.—Tito 2:12.
Ta Tatou i Kite Mai mei te Au Angera Akarongo Mou
13. Eaa ta tatou ka kite mai mei te akaraanga o te au angera tuatua tika tei taikuia mai i roto ia 2 Petero 2:9-11?
13 I te akoanga i te aronga e “akakino ra” i te au tavini akatainuia o Iehova, kua tou atura te apotetoro ko Petero ki te akaraanga meitaki a te au angera tuatua tika. Noatu rai e e mana maata to ratou, kare rava te au angera i tapepe akakino ana “ki mua i te aroaro o te Atu [Iehova] ra.” (E tatau ia 2 Petero 2:9-11.) Auraka katoa tatou e akava ma te tu tau kore, e akangateitei ra i te aronga tei orongaia te taoonga akaaere i roto i te putuputuanga, e kia akaruke i te au manamanata ki roto i te nga rima o Iehova, te Akava Teitei Rava.—Roma 12:18, 19; Ebe. 13:17.
14. Eaa te au akaraanga no te tavini akaaka anga ta te au angera e oronga maira?
14 Te oronga maira te au angera a Iehova kia tatou i te au akaraanga meitaki no te tavini akaaka anga. Kua patoi tetai au angera i te akakite mai i to ratou ingoa ki te au tangata. (Gene. 32:29; Aka. 13:17, 18) Noatu e e mirioni ua atu au angera i runga i te rangi, te akakite maira te Pipiria i te nga ingoa ua o Mikaela raua ko Gaberiela. Penei te riro ra teia ei paruruanga ia tatou i te oronga anga i te akangateitei ki te au angera. (Luka 1:26; Apo. 12:7) I te tipapa atu anga te apotetoro a Ioane ki raro i te pae vaevae i te akamori i tetai angera, kua ako maira aia e: “Auraka koe e akapera, e taeake tavini oki au noou, e no te au taeake.” (Apo. 22:8, 9) E oronga anake ua i ta tatou akamorianga e ta tatou pure ki te Atua.—E tatau ia Mataio 4:8-10.
15. Akapeea te au angera i te akanoo anga i tetai akaraanga no tatou no te akakoromaki?
15 Kua akanoo katoa te au angera i tetai akaraanga no te akakoromaki. Noatu e e inangaro maata tikai to ratou i te kite i te tuatua ngaro a te Atua, kare ra ratou i kite pouroa i te reira. ‘Te arōrō maira te au angela i te akara i te au mea,’ i akakite mai ei te Pipiria. (1 Pete. 1:12) No reira, eaa ra ta ratou ka rave? Te tiaki marie ra ratou ki tae ki te tuatau o te Atua ‘kia akakiteia mai tona pakari tumatatini i te ekalesia.’—Ephe. 3:10, 11.
16. Akapeea to tatou tu i te akakeu anga i te au angera?
16 Kua riro te au Kerititiano i raro ake i te timataanga ‘ei akaraanga na te au angera.’ (1 Kori. 4:9) Ma te marekaanga maata, te akara maira te au angera i ta tatou au angaanga tu akarongo mou e te rekareka katoa nei te tataraara anga a tetai tangata rave ara. (Luka 15:10) Te kite nei te au angera i te au tu akono tau o te au vaine Kerititiano. Te akaari maira te Pipiria e e “tapoki to te upoko o te vaine e tikaʼi, no te au angela.” (1 Kori. 11:3, 10) Ae, te mareka nei te au angera i te kite anga i te au vaine Kerititiano e te au tavini katoatoa o te Atua i runga nei i te enua i te aru anga i te akauenga teokaratiki e te taoonga upoko. E akamaaraanga tau taua akarongo ra no teia au tamariki a te Atua i runga i te rangi.
Te Turuturu Maroiroi nei te Au Angera i te Angaanga Tutuanga
17, 18. Eaa ra i rauka ai ia tatou i te karanga e te turuturu nei te au angera i ta tatou tutuanga?
17 Kua o mai te au angera i roto i tetai au mea umere te tupu ra i roto i “te rā o te Atu.” Te kapiti maira teia i te anauanga o te Patireia i te mataiti 1914 e te titiri mai anga a “Mikaela e tana au angela” ia Satani e tana au temoni mei te rangi mai. (Apo. 1:10; 11:15; 12:5-9) Kua kite atu te apotetoro ko Ioane “i tetai angela i te rere anga na rotopu i te mareva nei, ma te evangelia mutu kore, e tutu ki te aronga e noo i te ao nei.” Kua akakite te angera e: “Ka mataku i te Atua, e akakakā iaia; kua tae oki ki te ora akautunga anga nana; e akamori kotou iaia i tei anga i te rangi, e te enua, e te tai, e te au vai pupui ra.” (Apo. 14:6, 7) Kua akapapuia mai ki te au tavini o Iehova i te turuturu anga a te au angera, ia ratou e tutu aere ra i te tuatua meitaki o te Patireia akatinamouia, noatu te patoi anga kino pakari a te Tiporo.—Apo. 12:13, 17.
18 I teia tuatau, kare te au angera e arataki ana ia tatou ki te aronga ngakau tika na te tuatua anga kia tatou mei tetai angera rai tei tuatua ana kia Philipa e te arataki anga iaia ki te eunuka Etiopia. (Anga. 8:26-29) Inara, e manganui ua atu te au tupuanga no teia tuatau te akapapu maira e te turuturu nei te au angera i ta tatou angaanga tutuanga o te Patireia e te arataki nei ia tatou ki te aronga tei “akonoia no te ora mutu kore.” * (Anga. 13:48) E puapinga tikai kia piri putuputu atu ki roto i te angaanga orometua kia rauka ia tatou i te rave i ta tatou tuanga i te kimi anga i te aronga te inangaro ra i te ‘akamori i te Metua, ma te vaerua e te tuatua-mou’!—Ioa. 4:23, 24.
19, 20. Eaa ta te au angera tuanga i te akairo anga i te au tupuanga no “te openga o teianei ao”?
19 I te tou anga ki to tatou tuatau, kua karanga a Iesu e “kia tae te openga o teianei ao,” ka “akataka [te au angera] i te aronga kino no roto i te aronga tuatua-tika.” (Mata. 13:37-43, 49) Ka o mai te au angera ki roto i te akaputuputu anga openga e te akairo anga o te aronga akatainuia. (E tatau ia Mataio 24:31; Apo. 7:1-3) Pera katoa, ka piri mai te au angera kia Iesu i tona ‘akataka anga i te mamoe e te puaka-nio.’—Mata. 25:31-33, 46.
20 “Kia mama mai te Atu ra ko Iesu mei te rangi mai, ma tana au angela mana katoa ra” e ko “tei kore i akarongo i te evangelia o to tatou Atu o Iesu Mesia” ka takore katoatoaia. (2 Tesa. 1:6-10) I te kite atu anga a Ioane i taua tupuanga i roto i te orama, kua akataka mai aia ia Iesu e te nuku vaeau o te au angera i runga i te rangi ra e te na runga ra i te au oroenua teatea i te tamaki anga i te tamaki ma te tuatua tika.—Apo. 19:11-14.
21. Eaa ta te angera tei iaia “te taviri o te vaarua takere kore ra, e pirianganaoa maata tei tona rima” ka rave kia Satani e tana au temoni?
21 Kua “kite atura [a Ioane] i tetai angela i te eke anga mai mei te rangi mai, e tei iaia te taviri o te vaarua takere kore ra, e pirianganaoa maata tei tona rima.” Ko teia angera maata ko Mikaela, koia tei tapeka i te Tiaporo e te titiri mai anga iaia—e te au temoni katoa—ki roto i te vaarua takere kore. Ka tukuia mai ratou no tetai manga tuatau i te openga o to Karaiti Tutaraanga Tauatini Mataiti me raveia te timataanga openga ki te au tangata apa kore. I muri mai, ka takore takiriia a Satani e te au aronga meameaau katoatoa. (Apo. 20:1-3, 7-10; 1 Ioa. 3:8) Ka takore pouroaia te aronga meameaau te patoi ra i te Atua.
22. Akapeea te au angera i te o mai anga i te ka tupu i mua ua atu, e eaa to tatou manako no runga i ta ratou tuanga angaanga?
22 Tei mua ua akenei te akaoraanga mei te au akatereanga o te au mea kino a Satani. E tuanga papu tikai ta te au angera i roto i teia au tupuanga puapinga, te ka akapapu mai i te tikaanga o to Iehova tu ngateitei e te akatupu takiri anga i tona akakoroanga no te enua e no te au tangata. Ko te au angera tiratiratu e “tavini vaerua anake [tikai ratou], i tonokia ei matuapuru i te aronga tuanga i te ora ra.” No reira, e akameitaki tatou i te Atua ko Iehova no te tu i taangaanga ai aia i te au angera ei tauturu mai ia tatou kia rave i to te Atua ra anoano e kia rauka te ora mutu kore.
[Tataanga Rikiriki i Raro]
^ para. 18 Akara i te puka Jehovah’s Witnesses—Proclaimers of God’s Kingdom, kapi 549-551.
Akapeea Koe me Pau?
• Akapeea te au angera i te rangi i te akanooia anga?
• Eaa ta tetai au angera i rave i te tuatau o Noa?
• Akapeea te Atua i te taangaanga anga i te au angera kia tauturu mai ia tatou?
• Eaa te au angaanga ta te au angera tuatua tika e rave nei i to tatou tuatau?
[Au Uianga Apii]
[Tutu i te kapi 21]
Rekareka te au angera i te rave i to te Atua anoano
[Tutu i te kapi 23]
Mei to Daniela turanga rai, kua papa ua te au angera i te akao mai kia tau ki to te Atua ra anoano
[Au Tutu i te kapi 24]
Kia maroiroi, no te mea te turuturu nei te au angera i te angaanga tutuanga i te Patireia!
[Akameitakianga]
Globe: NASA photo