¿Kunatsa Cristor arkañasa?
¿Kunatsa Cristor arkañasa?
“Maynitix nayar arkañ munchitu ukaxa, jupa kikpat armtʼaspan, [...] sapüru arkitpan.” (LUC. 9:23.)
1, 2. Kunatsa Criston arkiripätanxa, ¿uka tuqit amuytʼasiñax kunatsa wali askixa?
WAYN tawaqunakas jan ukax Bibliat jichhaki yatiqasipki ukanakas kunjamsa markapan nayrar sartasipki uk uñjasax wal Jehová Diosax kusispacha. Ukat jumatix ukham sartasksta ukhaxa, Biblia sum uñtʼañatakisa tantachäwinakar sarañatakis wal chʼamachasiñamawa, ukhamatwa Diosan yatichäwinakapxa sum uñtʼäta. Ukat tiempompix Jesusan aka arunakapat sum amuytʼasiñaw wakisirakini, jupax akham sänwa: “Maynitix nayar arkañ munchitu ukaxa, jupa kikpat armtʼaspan, [‘tʼaqhisiñ lawap’, NM] aptʼat sapüru arkitpan, jakañap aptʼasirjamächi ukasa” sasa (Luc. 9:23). Ukhamasti, juma kikpat armtʼasisina, mä arunxa, munañanakam apanukusin Cristor arkañamawa. Ukampis ¿kunatsa ukham lurañax wali wakisirïpacha? Uka tuqitwa jichhax amuytʼañäni (Mat. 16:13-16).
2 Ukat khitinakatix Cristor walja tiempo arkasipki ukanakarux Bibliax akham siwa: “Ukhamarjama lurasipkakim jukʼamp jukʼampi” sasa (1 Tes. 4:1, 2). Ukhamasti, kunatsa Cristor arkañasa ukxa, taqiniw sum amuytʼasiñasa, ukhamatakwa “jukʼamp jukʼampi” nayrar sartañäni, kunjamtï apóstol Pablox siskäna ukhama. Uk jichhax phisqa tuqit amuytʼañäni.
Diosampi sum apasipxañäni
3. ¿Kunjamatsa Diosar uñtʼsna?
3 Pablox akham sasaw Atenas markanxa “Areópago sat chiqana” jaqinakar säna: “[Diosan] munañaparakiw jaqinakan qawqha maranaka akapachan utjañapasa, ukhamarak kawkhakam jakañapasa. Diosax jaqinakan jupar thaqapxañapatakiw ukham ukx luri, inampis jupar kunjämats jikxatapxaspa. Ukampis Diosax chiqpachana janiw jayankkiti sapaqat jiwasanakatxa” sasa (Hech. 17:22, 26, 27). Ukhamasti Diosarux uñtʼsnawa. Ukatakix luratanakapat amuytʼañasawa. Chiqansa, luratanakapax wali muspharkañawa, ukhamatwa kunjam Diosasa qhawqha chʼamanisa ukanakxa sumpach amuysnaxa (Rom. 1:20). Maysa tuqitsti, Arupwa churarakistu, ukanwa Jupat jukʼamp yatichistu (2 Tim. 3:16, 17). Ukhamasti, Diosar sum uñtʼañatakix luratanakapata ukat Arupat sum amuytʼañasawa (Sal. 77:12).
4. ¿Cristor arkasax kunjamatsa Jehová Diosampi sum apassna?
4 Ukat Jehová Diosampi sum apasiñ munasax Cristor arkañasarakiwa. Amtañäni, “janïr aka uraqi[x]” utjkäna ukhatpachwa Jesusax Awkipampi wali sum alaxpachan qamasipxäna (Juan 17:5). Juparuw Diosax taqi kunat sipansa nayraqat luratayna (Apo. 3:14). Ukatxa millón millón maranakaw alaxpachan Awkipampi jakäna, ukhamax “taqi kunatix utjki” ukanakat nayrïrjamaxa, taqi kun lurañwa Awkipar yanaptʼatayna. Ukat Yuqa Awki jakʼa pura irnaqasaxa, wali sumpun apasipxäna. Janipuniw khitis ukham apaskaspati. Kuntï Awkipax lurki, kunjam chuymanisa ukat kunjam Diosasa ukxa, Jesusax janiw ukhamaki uñchʼukkänti, jan ukasti wali amuyumpiw yatiqasïna. Ukat taqi kunsa Awkipjamaw luräna. Ukatwa Bibliax jupat akham saraki: “Jan uñjkay Diosax uñjkañaw juti Yuqap tuqi” sasa (Col. 1:15). Ukhamasti, Jesusar arkasaw Jehová Diosampix sum apasiraksna.
Jehová Diosat yatiqasipxañäni
5. ¿Kunas Jehová Diosat yatiqasiñ yanaptʼistani, ukat kunatsa?
5 Niyakixay jaqinakax Diosar uñtasita luratästanxa, ukhamax Jupat yatiqasisaw sarnaqaraksna (Gén. 1:26). Munat wawanakjamax Diosar uñtasit sarnaqapxam sasaw Pablox cristianonakar säna (Efe. 5:1). Ukham sarnaqañatakix Cristot yatiqasiñasawa. ¿Kunatsa? Kunattix Jehová Diosax kunjam Diosasa kunjam chuymanisa ukat kunsa amuyi ukxa, wali sum jakäwipan uñachtʼayäna. Ukat Janirakiw khitis Jesusjamax Dios Awkit sum qhanañchkaspati. Jesusax janiw Diosan sutipak yatichkänti, jan ukasti kunjam Diosas ukwa sum yatichäna ukat ukarjamaw sarnaqarakïna (Mateo 11:27 liytʼasiñapawa).
6. ¿Jesusan yatichäwinakapax kunsa Jehová Diosat uñachtʼayistu?
6 Kunsa Diosax luqtirinakapat suyi ukat kunjamsa jupanakar uñji ukxa Jesusaw sum uñachtʼayäna (Mat. 22:36-40; Luc. 12:6, 7; 15:4-7). Mä kutixa, Diosan kamachinakapat yatichkasaw wachuq juchar jan puriñ tuqit parläna, ukampis uk qhanañchañatakix kunas jaqin chuymapan utji ukat Diosax uka tuqit kamsisa ukwa sum qhanañchtʼäna. Ukatwa akham säna: “Khititix mä warmirux munapayañataki uñtixa, niyaw chuymapanxa jupampi wachuqa juchxa lurxi” sasa (Mat. 5:27, 28; Éxo. 20:14). Ukatxa, Diosan yaqha kamachipatwa qhanañcharakïna, uka kamachxa maysaruw fariseonakax uñtayapxatayna. Munat masinakarukis munasiñäkaspa ukat uñisirirux uñisiñäkarakispas ukhamwa yatichapxäna. Ukampis Jesusax akham sasaw Jehová Diosan amuyupxa qhanañchäna: “Uñisirinakamarux munapxam, Diosat mayirapipxarakim khitinakatix [...] jan walinaks lurapktam ukanakatakisa” sasa (Mat. 5:43, 44; Éxo. 23:4; Lev. 19:18). Ukhamasti, kunsa Diosax amuyi ukat kunsa jiwasat suyi uk sumpach amuyañäni ukhaxa, jupat yatiqasiñax janiw chʼamäkaniti.
7, 8. ¿Jehová Diosat yatiqasiñatakix kun lurañasasa?
7 Jesusax luratanakapampiw Diosax kunjam amuyunis ukxa uñachtʼayarakïna. Mateo, Marcos, Lucas ukat Juan libronakanxa kunjamsa Jesusax jan walin uñjasirinakatsa tʼaqhisitanakatsa khuyaptʼayasïna uka tuqinakatwa sum parli. Ukat kunapachatï apostolanakapax wawanakar jarkʼaqapxäna ukhaxa, colerasïnwa sasaw saraki. Ukhamax kunjamas Jehová Diosax jikxatasïna ukxa, ¿janit sum amuyktanxa? (Mar. 1:40-42; 10:13, 14; Juan 11:32-35). Ukhamaw Jesusax Diosan munasiñapsa, yatiñapsa, chiqakankañapsa ukat chʼamanïtapsa uñachtʼayäna. Amtañäni, kunapachatï milagronak lurkäna ukhaxa, wali chʼamanïtapwa uñachtʼayäna ukat janirakiw ukham chʼamanïsax jan walinak lurkänti, ni yaqhanakarus tʼaqhisiykänti (Luc. 4:1-4). Ukat qullqi chuym jaqinakar Diosar yupaychañ utat alisnukusax chiqa chuymanïtapwa uñachtʼayäna (Mar. 11:15-17; Juan 2:13-16). Ukat Salomonat sipansa wali yatiñanïnwa, ukatwa chuymar purtʼkiri wali sum yatichäna (Mat. 12:42). Ukat jaqinakar wal munasitap laykuw jakañapsa aptʼasiwayaraki. Chiqansa, ¡“Janiw jukʼampi jachʼa munasiñanix utjkaspati”! (Juan 15:13.)
8 Jesusax taqi kunsa Awkipat yatiqasisaw sum luräna. Ukatwa akham säna: “Khititix nayar uñjkitu ukax Awkirux uñjarakiwa” sasa (Juan 14:9 liytʼasiñapawa). Ukhamasti Jehová Diosat yatiqasis sarnaqañatakixa, Cristor arkañasawa.
Jesusax Jehová Diosan Ajllitapawa
9. ¿Kunjamasa ukat kunapachasa Jesusax Jehová Diosan Ajllitapäxäna?
9 Jesusax kimsa tunka marnïxäna ukhaw Bautisir Juanampi bautisayasiñatakix saratayna. Ukat Bibliax akham siwa: “Kunapachatix Jesusax bautisatäxän ukkhaxa, umatwa mistunxäna, ukatsti mayakwa alaxpachax jistʼartäna Jesusasti uñjarakïnwa Qullan Ajayurux palomar uñtat jupxar saraqasinkiri. Alaxpachatsti istʼasirakïnwa mä aru akham siri: ‘Akawa munat Wawaxaxa, kawkïrirutix nayax ajllista ukaxa’” sasa (Mat. 3:13-17). Ukatwa Jesusar arkañasaxa.
10, 11. 1) “Jesucristo” “Cristo Jesús” ukat “Cristo” sasin Bibliax siski ukhaxa, ¿kunsa uñachtʼayi? 2) ¿Kunatsa Jesusar arkañasapuni?
10 Biblianxa Diosan Yuqapax “Jesucristo” “Cristo Jesús” ukat “Cristo” sasin uñtʼatarakiwa. Kunapachatï “Jesucristo” sasin uñstki ukhaxa, khitis uka suti api ukwa uñachtʼayi, juparuw Diosax Ajllitapjam aka Uraqir khitanitayna. Pachpa Jesusaw uka sutxa aytasïna, akham sasaw Awkipar säna: “Aka wiñay jakañax juma sapa chiqpach Diosar uñtʼañanwa utji, ukhamarak Jesucristoru kawkïrirutix jumax khitankta ukaru” sasa (Juan 17:3). Ukat kunapachatï “Cristo Jesús” sasin uñstki ukhaxa, kunsa Jesusax Apnaqirjamax luraski ukwa uñachtʼayi (2 Cor. 4:5, NM). Ukampis “Cristo” sasin uñstki ukhaxa, kunsa Mesiasjam luri uk uñachtʼayaraki (Juan 4:29).
11 Chiqansa Jesusax janiw jiwasjam jaqikïkänti, janirakiw aliq profetakïkänsa, ukwa “Cristo” siski uka arux uñachtʼayistu, uk yatiñax wali wakiskiripuniwa. Jupaw Diosan Yuqapaxa, juparuw Diosax aka Uraqin jaqjam jakañapataki khitanitayna, ukhamata kuntï Jupax munki uk jaqinakar yatiyañapataki. Ukhamasti, Cristor arkañasapuniwa.
Jesús tuqikiw qhispiyasiñax utji
12. ¿Kuna wakiskir arunaksa Jesusax Tomás sat apostolapar säna?
12 Katuntapkäna uka arumaxa, wali sumwa chiqa chuyman apostolanakapampix parltʼasiwayatayna. Uka arunakapat amuytʼañäni, jumanakataki mä utjäwi wakichiriw sarä sasaw satayna. Ukat kuna tuqitsa parlaskäna uk yatiñ munasaw Tomás sat apostolapax jisktʼäna, ukat Jesusax akham sänwa: “Nayätwa thakixa, chiqasa, jakañasa. Naya tuqikiw Awkin ukar puriñax utji” sasa (Juan 14:1-6). Uka arunakxa alaxpachar sarir cristianonakarukis siskchïnxa, aka Uraqin jakapkani uka cristianonakatakix wali askirakiwa (Apo. 7:9, 10; 21:1-4). ¿Kunatsa ukham sistanxa?
13. ¿Jesusax kuna tuqinakatsa thakixa?
13 Jesucristow “thakixa”, mä arunxa, jupa tuqikiw Awkir puriñax utji. Ukhamasti jupan sutipxar mayisiñäni ukhakiw Jehová Diosax istʼistani ukat kuntï munañaparjam mayiskañäni ukxa churistaniwa (Juan 15:16). Ukat Jesusax Diosampi sum apasiñasatakis mä ‘thakïkaspa’ ukhamarakiwa. Niyakixay juchanïstanxa, uka juchas Diosat jaqinakar jarkʼaqkistaspa ukhamawa (Isa. 59:2). Ukatwa Jesusax “jakañap churiri walja jaqinakar qhispiyañataki” luqtasiwayäna (Mat. 20:28). Kunjamtï Biblian siskixa, wilapaw “taqi juchanakasat qʼumacharakistu” (1 Juan 1:7). Ukhamaw Diosan Yuqapax Awkipampi sum apasiñasatakix mä thaki jistʼarawayi (Rom. 5:8-10). Ukhamax jupar iyawsañäni ukat arunakap istʼañäni ukhakiw Diosampix sum apasiñäni (Juan 3:36).
14. ¿Kunatsa Jesusarux ‘chiqawa’ sasin sissna?
14 Mesiasxat parlki uka profecianakax jan mayaniw Jesusan phuqasiwayi, ukat kunatix chiqäki ukpun Jupax parlirïna ukat ukarjamaw sarnaqarakïna, ukatwa jupax “chiqa” satarakixa. Pablox akham sasaw jupat säna: “Jupanarakwa taqi Diosan arsutanakapax phuqhasixa” sasa (2 Cor. 1:20). Ukat Moisés tuqi Diosax markapar Ley churkäna ukax jaqinakan askinak jikxatapxañapataki mä ‘chʼiwjamäkchïnsa’, Jesusanwa wali sum phuqasiwayäna (Heb. 10:1; Col. 2:17). Chiqansa, taqi profecianakas Jesusxat parlkaspa ukhamawa ukat kunsa jupax Diosan amtanakap phuqañatakix luri taqi ukanakwa sum amuytʼayistu (Apo. 19:10). Ukhamasti, kunjamsa Diosan amtanakapax phuqasini uk uñjañatakix Cristor arkañasawa.
15. ¿Jesusax kuna tuqinakatsa ‘jakañaxa’?
15 Ukat Jesusax ‘jakañarakiwa’, kuna laykutix jupaw wilapampi jaqinakar alasiwayi. Amtañäni, “Diosan waxtʼäwipax wiñay jakañawa Cristo Jesús” tuqnama (Rom. 6:23). Ukat khitinakatix jiwxapxi ukanakatakis Jesusax ‘jakañarakïniwa’ (Juan 5:28, 29). Ukat Waranq Maranak Apnaqxani ukhaxa, juchampit jiwañampitwa jaqinakar Jilïr Sacerdotjama qhispiyistani (Heb. 9:11, 12, 28).
16. ¿Kunatsa Jesusar arkañasaxa?
16 Ukhamasti, kuntï Jesusax Tomás arkiripar siskäna ukaxa, jiwasatakix wali askiwa. Jesusaw thakisa chiqasa jakañasa. Juparuw Diosax Ajllisin jaqinakar qhispiyañapataki khitanitayna (Juan 3:17). Ukatxa, jupa tuqikiw Diosar jakʼachassna. Bibliax akham siwa: “Janiw yaqha khitinsa qhispiyasiñax utjkiti. Janirakiw akapachanxa yaqha sutix Diosan churata utjkiti, jaqinakan qhispiyasipxañapatakixa” sasa (Hech. 4:12). Ukhamasti, inas nayrax yaqha yupaychäwinakar sarchiyätan, ukampis jichhax Jesucristor iyawsxañasawa, ukatxa jupat yatiqasisin sum sarnaqxañasarakiwa, ukhamatakwa wiñay jakañ jikxatañäni (Juan 20:31).
Diosax Cristor istʼapxam sistuwa
17. ¿Kunatsa Diosan Yuqapar istʼañax wali wakiskirïpacha?
17 Pedrompi Juanampi Santiagompix mä muspharkañ unañchäwi uñjapxatayna. Ukatxa alaxpachat akham siri istʼapxarakitayna: “Akaw munat Wawaxaxa, juparu istʼapxam” sasa (Luc. 9:28, 29, 35). Ukhamasti Diosan uka arunakapar istʼañasa ukat Mesiasar istʼañasa wali wakiskiriwa (Hechos 3:22, 23 liytʼasiñapawa).
18. ¿Jesusat yatiqasisax kun lurañas wakisispa?
18 Chiqansa janiw aliqakix Jesusar istʼañasäkiti, jan ukasti sarnaqäwipat “wali amuyumpi” yatiqasiñasarakiwa (Heb. 12:2, 3). Ukhamasti, Bibliansa jan ukax Amuyasiri Chiqapa Uywatax apayankistu uka qillqatanakansa ukat tantachäwinakansa Jesusxat yatiqañäni ukhaxa, “wali amuyu uchañasa[wa]” (Heb. 2:1; Mat. 24:45, MT). Uwijanakapjamax wali sumwa jupar istʼañasa ukat arkañasaraki (Juan 10:27).
19. Jan qhiparas Jesusar arkaskakiñxa, ¿kunas yanaptʼistani?
19 Inas kuna jan walinakansa uñjaschiñäni. Ukampis ¿Jesusar arkaskakiñäniti? Jïsa. “Kuna suma yatichäwtix” katuqktan ukanakatxa janipun armasiñäniti, mä arunxa, yatiqatasarjamapuni sarnaqañäni, ‘iyawsäwinsa munasiñansa Cristo Jesusampi mayaru tukutas layku’ (2 Tim. 1:13).
¿Kunsa yatiqawayta?
• ¿Kunjamsa Cristor arkañax Jehová Diosar jakʼachasiñ yanaptʼistaspa?
• Jesusat yatiqasisax Jehová Diosatwa yatiqastanxa, ¿kunatsa ukham sistanxa?
• ¿Kuna tuqinsa Jesusax “thakixa, chiqasa, jakañasa”?
• ¿Kunatsa Jehová Diosan Ajllitapar istʼañasa?
[Jisktʼanaka]
[29 janan fotopa]
Kunjamsa Jehová Diosax amuyi ukwa Jesusan yatichäwinakapax uñachtʼayistu
[30 janan fotopa]
Jehová Diosan Ajllitapar taqi chuym arkapxañäni
[32 janan fotopa]
Jehová Diosax akham siwa: “Akaw munat Wawaxaxa, juparu istʼapxam” sasa