Taano ta Dapat na Sunodon “an Cristo”?
Taano ta Dapat na Sunodon “an Cristo”?
“Kun an siisay man boot na sumunod sa sako, paindahan nia an saiyang sadiri . . . asin padagos na sumunod sa sako.”—LUC. 9:23.
1, 2. Taano ta mahalaga na pag-adalan niato kun taano ta maninigo tang sunodon “an Cristo”?
SIERTONG kanigoan an kaogmahan ni Jehova na maheling kamo, na bagong mga interesado asin mga hoben, na kabilang sa kadakol na nagsasamba sa saiya digdi sa daga! Mantang padagos kamong nag-aadal sa Biblia, regular na nag-aatender sa Kristianong mga pagtiripon, asin nagtatalubo sa saindong kaaraman dapit sa nagliligtas-buhay na katotoohan na nasa Tataramon nin Dios, kaipuhan nindong isapuso an pangagda ni Jesus: “Kun an siisay man boot na sumunod sa sako, paindahan nia an saiyang sadiri asin magpasan kan saiyang hariging pasakitan aroaldaw asin padagos na sumunod sa sako.” (Luc. 9:23) Sinasabi ni Jesus na an pagpainda sa saindong sadiri asin pagigin parasunod nia sarong bagay na bobooton nindong gibohon. Kun siring, mahalaga na pag-adalan niato kun taano ta maninigo tang sunodon “an Cristo.”—Mat. 16:13-16.
2 Kumusta man kita na mga nagsusunod na sa mga lakad ni Jesu-Cristo? Sinasadol kita na ‘padagos na gibohon iyan nin mas lubos pa.’ (1 Tes. 4:1, 2) Baga man kasuarin pa sana o dakol na taon na an nakaagi kan akoon niato an tunay na pagsamba, an paghorophorop sa mga dahelan na sunodon an Cristo makakatabang sa sato na iaplikar an sadol ni Pablo asin pirmeng sunodon Sia nin mas lubos pa sa satong pangaroaldaw na buhay. Pag-adalan niato an limang dahelan kun taano ta maninigo tang booton na sunodon an Cristo.
Tanganing Kita Magin Orog na Dayupot ki Jehova
3. Sa anong duwang paagi niato mamimidbid si Jehova?
3 Kan kinakaolay ni apostol Pablo an mga taga Atenas mantang sia ‘nakatindog sa tahaw kan Areopago,’ sia nagsabi: “Dineterminaran [nin Dios] an itinalaan na mga panahon asin an mga kasagkodan kan erokan nin mga tawo, tanganing hanapon ninda an Dios, na kinakapkap sia kun baga asin talagang makua sia, minsan ngani, sa katunayan, sia bakong harayo sa lambang saro sa sato.” (Gibo 17:22, 26, 27) Puede niatong hanapon an Dios asin talagang mamidbid sia. Halimbawa, kun nagheheling kita sa mga linalang, dakol an manonodan niato manongod sa mga kualidad asin kakayahan nin Dios. An may pagpahalagang paghorophorop sa saiyang mga paglalang igwa nin dakol na ikakatokdo sa sato manongod sa Kaglalang. (Roma 1:20) Ihinayag man ni Jehova an mga detalye manongod sa saiya paagi sa saiyang nasusurat na Tataramon, an Biblia. (2 Tim. 3:16, 17) Mantang orog tang ‘hinohorophorop an saiyang aktibidad’ asin ‘inaatoman an saiyang mga ginibo,’ orog man niatong mamimidbid si Jehova.—Sal. 77:12.
4. Paano makakatabang sa sato an pagsunod sa Cristo na magin dayupot ki Jehova?
4 An sarong marahayon na paagi na magin orog pang dayupot ki Jehova iyo na sunodon an Cristo. Isip-isipa na sana an kamurawayan na yaon ki Jesus sa kaibanan kan saiyang Ama “bago pa kan kinaban”! (Juan 17:5) Sia “an kapinonan kan paglalang nin Dios.” (Kap. 3:14) Bilang “an panganay sa gabos na linalang,” haloyon na panahon na siang nabuhay sa langit kaiba kan saiyang Ama, si Jehova. Durante kan buhay ni Jesus bago nagin tawo, sia bako sanang nakaibanan kan saiyang Ama. Sia an personal na kaibaiba nin Dios, na maogmang nagtatabang sa Makakamhan sa Gabos asin igwa sinda kan pinakamakosog na pagkamoot sa lambang saro. Bako sanang inobserbaran ni Jesus an mga paagi kan saiyang Ama, na minamasdan an mga saboot asin kualidad Nia, kundi isinaboot asin inarog man nia an gabos na nanodan nia manongod sa saiyang Ama. Bilang resulta, an makinuyog na Aking ini nagin arog nanggad kan saiyang Ama—kaya inaapod sia kan Biblia na “an ladawan kan Dios na dai naheheling.” (Col. 1:15) Paagi sa estriktong pagsunod sa Cristo, puede kitang magin orog na dayupot ki Jehova.
Tanganing Maarog nin Mas Lubos Pa si Jehova
5. Ano an makakatabang sa sato na maarog nin mas lubos pa si Jehova, asin taano?
5 Kita ‘ginibo sa ladawan nin Dios, kasugad nia,’ kaya igwa kita nin kakayahan na magpaheling nin diosnon na mga kualidad. (Gen. 1:26) Sinadol ni apostol Pablo an mga Kristiano na ‘magin mga paraarog sa Dios, bilang mga aki na namomotan na marhay.’ (Efe. 5:1) An pagsunod sa Cristo nakakatabang sa sato na maarog an satong langitnon na Ama. Ini huli ta mas ikinapaheling ni Jesus an kaisipan, mga saboot, saka personalidad nin Dios asin mas lubos na ikinapaliwanag nia an Dios kisa sa magigibo nin siisay man. Kan si Jesus nasa daga pa, bako sanang ipinamidbid nia an ngaran ni Jehova. Imbes, ihinayag nia an Persona na irinerepresentar kan ngaran na iyan. (Basahon an Mateo 11:27.) Ginibo ini ni Jesus paagi sa saiyang mga tataramon asin gibo, saka sa saiyang mga katokdoan asin halimbawa.
6. Ano an ihinahayag manongod ki Jehova kan mga katokdoan ni Jesus?
6 Paagi sa saiyang mga katokdoan, ipinaheling ni Jesus kun ano an kahagadan sa sato nin Dios asin kun ano an namamatean nin Dios sa mga nagsasamba sa saiya. (Mat. 22:36-40; Luc. 12:6, 7; 15:4-7) Halimbawa, pakatapos na kotaron an saro sa Sampulong Togon—“dai ka magsambay”—ipinaliwanag ni Jesus an pagmansay nin Dios sa kun ano an nangyayari sa laog kan puso nin tawo haloy pa bago nia gibohon an aktong iyan. Sia nagsabi: “An lambang saro na nagpaparaheling sa sarong babae tanganing magkaigwa nin horot sa saiya nagsasambay na sa saiya sa saiyang puso.” (Ex. 20:14; Mat. 5:27, 28) Pakatapos na sabihon an interpretasyon kan mga Fariseo sa sarong nasambitan sa Ley—“kamotan mo an saimong kapwa asin ikaongis mo an saimong kaiwal”—sinabi ni Jesus an kaisipan ni Jehova: “Padagos na kamotan an saindong mga kaiwal asin ipamibi an mga nagpepersegir sa saindo.” (Mat. 5:43, 44; Ex. 23:4; Lev. 19:18) Paagi sa pakasabot sa kaisipan asin saboot nin Dios saka sa kun ano an kahagadan nia sa sato, natatabangan kita na maarog sia nin mas lubos pa.
7, 8. Ano an manonodan niato manongod ki Jehova sa halimbawa ni Jesus?
7 Ihinayag man ni Jesus paagi sa halimbawa an personalidad kan saiyang Ama. Kun nababasa niato sa mga Ebanghelyo na si Jesus nakamate nin pagmalasakit sa mga nangangaipo, empatiya sa mga nagsasakit, pagkaanggot sa saiyang mga disipulo na nagtuyaw sa mga aki, bako daw na naheheling niato na arog man kaiyan an namamatean kan Ama? (Mar. 1:40-42; 10:13, 14; Juan 11:32-35) Isip-isipa kun paano an mga ginibo ni Jesus nagtataong liwanag dapit sa pangenot na mga kualidad nin Dios. Bako daw na an mga milagrong ginibo ni Cristo nagpapaheling kan saiyang pambihirang kapangyarihan na magagamit nia ano man na oras? Pero, nungka niang ginamit an kapangyarihan na iyan para sa personal na pakinabang o sa intension na gumibo nin maraot sa iba. (Luc. 4:1-4) Malinaw nanggad na an pagpalayas nia sa mahanab na mga negosyante sa templo nagpapaheling na sia igwa nin hustisya! (Mar. 11:15-17; Juan 2:13-16) An saiyang mga katokdoan asin an managom na mga tataramon na ginamit nia tanganing aboton an puso nin mga tawo nagpaparisa na sia “labi pa kisa ki Salomon” kun dapit sa kadonongan. (Mat. 12:42) Manongod sa pagkamoot na ipinaheling ni Jesus paagi sa pagtao kan saiyang kalag para sa iba, may masasabi pa daw kita apuera sa “mayo nin siisay man na may pagkamoot na orog pa kaini”?—Juan 15:13.
8 An Aki nin Dios sangkap na marhay na nagin ladawan ni Jehova sa gabos niang sinabi asin ginibo kaya masasabi nia: “Sia na nakaheling sa sako nakaheling man sa Ama.” (Basahon an Juan 14:9-11.) An pagsunod sa Cristo pag-arog man ki Jehova.
Si Jesus an Linahidan ni Jehova
9. Kasuarin asin paano si Jesus nagin Linahidan nin Dios?
9 Isip-isipa an nangyari kan tigrakdag nin 29 C.E. kan an 30 anyos na si Jesus magduman ki Juan na Bautisador. “Kan mabautismohan na, si Jesus tolos-tolos na naghawas sa tubig; asin, uya! an kalangitan nagkaburukasan, asin naheling nia an espiritu nin Dios na nag-iibaba siring sa salampati na nagtutugdon sa saiya.” Kan panahon na iyan, sia nagin an Cristo, o Mesiyas. Kan panahon man na iyan, ipinamidbid ni Jehova mismo na si Jesus an saiyang Linahidan, na sinasabi: “Ini an sakong Aki, an namomotan, na sakong inoyonan.” (Mat. 3:13-17) Sarong marahayon nanggad na dahelan iyan na booton niatong sunodon an Cristo!
10, 11. (a) Sa anong mga paagi ginagamit may koneksion ki Jesus an titulong “Cristo”? (b) Taano ta maninigo na siertohon ta na sunodon si Jesu-Cristo?
10 Sa Biblia, an titulong “Cristo” ginagamit manongod ki Jesus sa laen-laen na paagi, arog baga kan Jesu-Cristo, Cristo Jesus, asin an Cristo. Si Jesus mismo an enot na naggamit kan terminong “Jesu-Cristo”—an ngaran na sinusundan kan titulo. Sa pamibi sa saiyang Ama, sia nagsabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) An paggamit kaini malinaw na dinadara an atension sa saro na isinugo nin Dios asin nagin saiyang Linahidan. Kun an titulo nasa enotan kan ngaran, arog kan sa “Cristo Jesus,” an idinodoon bakong an persona, kundi an posisyon, o katongdan nia. (2 Cor. 4:5) Kun ginagamit an pananaram na “an Cristo,” na an titulo igwa nin artikulo depinido na “an” (definite article “the”) sa enotan, iyan saro pang paagi tanganing idoon an katongdan ni Jesus bilang an Mesiyas.—Gibo 5:42.
11 Ano man an pagkagamit kan titulong “Cristo” may koneksion ki Jesus, idinodoon kaiyan an mahalagang katotoohan na ini: Minsan ngani an Aki nin Dios nagdigdi sa daga bilang tawo asin ipinahayag an kabotan kan saiyang Ama, sia bako sanang ordinaryong tawo o basta propeta; sia an Linahidan ni Jehova. Dapat na siertohon ta na sunodon an Linahidan na ini.
Si Jesus an Solamenteng Paagi Tanganing Maligtas
12. Anong sinabi ki apostol Tomas an may kahulogan para sa sato?
12 An saro pang mahalagang marhay na dahelan na padagos na sunodon an Mesiyas maheheling sa sinabi ni Jesus sa saiyang maimbod na mga apostol pira sanang oras bago sia magadan. Bilang simbag sa hapot ni Tomas manongod sa sinabi ni Jesus na paghale nia asin pag-andam nin lugar para sa sainda, si Jesus nagsabi: “Ako iyo an dalan asin an katotoohan patin an buhay. Mayo nin makakaduman sa Ama kundi paagi sa sako.” (Juan 14:1-6) Kaolay kaidto ni Jesus an 11 maimbod na apostol. Pinanugaan nia sinda nin lugar sa langit, alagad an saiyang mga tataramon may kahulogan man para sa mga naglalaom na magkamit nin buhay na daing katapusan sa daga. (Kap. 7:9, 10; 21:1-4) Taano man?
13. Ano an kahulogan kan pag-apod ki Jesus na “an dalan”?
13 Si Jesu-Cristo “an dalan.” An boot sabihon, sia an solamenteng paagi na kita makakadolok sa Dios. Totoo ini kun dapit sa pamibi, huli ta paagi sana sa pamimibi sa ngaran ni Jesus na nagkakaigwa kita kan garantiya na itatao sa sato kan Ama an ano man na tibaad hagadon niato kaoyon kan Saiyang kabotan. (Juan 15:16) Minsan siring, si Jesus man “an dalan” sa saro pang kahulogan. Huli sa kasalan, an katawohan nagin siblag sa Dios. (Isa. 59:2) Itinao ni Jesus “an saiyang kalag bilang pantubos na karibay nin dakol.” (Mat. 20:28) Bilang resulta, ipinapaliwanag kan Biblia: “An dugo ni Jesus . . . naglilinig sa sato sa gabos na kasalan.” (1 Juan 1:7) Sa siring, binuksan kan Aki an dalan sa pakipag-ulian sa Dios. (Roma 5:8-10) Paagi sa pagtubod ki Jesus asin pagkuyog sa saiya, magkakaigwa kita nin inooyonan na relasyon sa Dios.—Juan 3:36.
14. Ano an kahulogan kan pag-apod ki Jesus na “an katotoohan”?
14 Si Jesus “an katotoohan” bako sanang huli ta pirme siang nagtataram asin nagsasagibo kan katotoohan kundi huli man ta naotob gabos sa saiya an kadakol na hulang isinurat manongod sa Mesiyas. “Minsan gurano kadakol kan panuga nin Dios,” an isinurat ni apostol Pablo, “iyan nagin Iyo paagi sa saiya.” (2 Cor. 1:20) Dawa an “anino kan marahay na mga bagay na madatong” na nasa Ley ni Moises nagin totoo ki Cristo Jesus. (Heb. 10:1; Col. 2:17) Ki Jesus nakasentro an gabos na hula, asin iyan nagtataong liwanag dapit sa saiyang mahalagang marhay na papel sa kaotoban kan katuyohan ni Jehova. (Kap. 19:10) Tanganing makinabang sa kaotoban kan katuyohan nin Dios para sa sato, kaipuhan niatong sunodon an Mesiyas.
15. Ano an kahulogan kan pag-apod ki Jesus na “an buhay”?
15 Si Jesus “an buhay” huling binakal nia an katawohan paagi sa saiyang dugo, asin an buhay na daing katapusan sarong balaog na itinatao nin Dios “paagi ki Cristo Jesus na satong Kagurangnan.” (Roma 6:23) Si Jesus iyo man “an buhay” para sa mga nagadan. (Juan 5:28, 29) Dugang pa, isip-isipa an gigibohon nia bilang Halangkaw na Saserdote durante kan saiyang Milenyal na Paghade. Iyo nanggad, makamit sia nin daing katapusan na kaligtasan sa kasalan asin kagadanan para sa saiyang mga sakop sa daga!—Heb. 9:11, 12, 28.
16. Ano an dahelan niato na sunodon si Jesus?
16 Kun siring, an simbag ni Jesus ki Tomas may dakulang kahulogan para sa sato. Si Jesus an dalan asin an katotoohan patin an buhay. Sia an isinugo nin Dios sa kinaban tanganing maligtas an kinaban paagi sa saiya. (Juan 3:17) Asin mayo nin makakaduman sa Ama kundi paagi sa saiya. Malinaw na sinasabi kan Biblia: “Mayo nin kaligtasan sa kiisay pa man, huli ta mayo na nin ibang ngaran sa sirong nin langit na itinao sa mga tawo na dapat niatong ikaligtas.” (Gibo 4:12) Kun siring, ano man an pinaghalean niato, madonong na magtubod kita ki Jesus, sunodon sia, asin sa siring magiyahan pasiring sa buhay.—Juan 20:31.
Pinagbobotan Kita na Maghinanyog sa Cristo
17. Taano ta mahalaga na maghinanyog kita sa Aki nin Dios?
17 Naheling ni Pedro, Juan, asin Santiago an transpigurasyon. Kan panahon na iyan, nakadangog sinda nin boses hale sa langit na nagsabi: “Iyo ini an sakong Aki, an pinili. Maghinanyog kamo sa saiya.” (Luc. 9:28, 29, 35) Sarong seryosong bagay an pagkuyog niato sa pagboot na maghinanyog sa Mesiyas.—Basahon an Gibo 3:22, 23.
18. Paano kita makakahinanyog ki Jesu-Cristo?
18 Kalabot sa paghinanyog ki Jesus an ‘pagheling nin maingat sa saiya, an paghorophorop nin marhay sa saiyang halimbawa.’ (Heb. 12:2, 3) Huli kaini, maninigo na ‘magtao kita nin orog kisa sa dating atension sa mga bagay’ na nababasa niato manongod sa saiya sa Biblia asin sa mga publikasyon kan “maimbod asin mapagmansay na oripon,” saka sa nadadangog niato manongod sa saiya sa Kristianong mga pagtiripon. (Heb. 2:1; Mat. 24:45) Bilang saiyang mga karnero, booton niato na maghinanyog ki Jesus asin sunodon sia.—Juan 10:27.
19. Ano an makakatabang sa sato na padagos na sunodon an Cristo?
19 Puede daw kitang magin mapanggana sa padagos na pagsunod sa Cristo, ano man an mangyari? Iyo, basta ‘padagos niatong pangaptan an arogan nin ikakarahay na mga tataramon’ paagi sa pagsagibo kan nanonodan niato “kaiba kan pagtubod asin pagkamoot na mapadapit ki Cristo Jesus.”—2 Tim. 1:13.
Ano an Nanodan Nindo?
• Taano ta magigin orog na dayupot kita ki Jehova kun sinusunod niato “an Cristo”?
• Taano ta an pag-arog ki Jesus pag-arog man ki Jehova?
• Ano an kahulogan kan pag-apod ki Jesus na “an dalan asin an katotoohan patin an buhay”?
• Taano ta maninigo kitang maghinanyog sa Linahidan ni Jehova?
[Mga Hapot Para sa Pag-adal]
[Ritrato sa pahina 29]
Maheheling sa mga katokdoan ni Jesus an halangkaw na kaisipan ni Jehova
[Ritrato sa pahina 30]
Dapat na maimbod niatong sunodon an Linahidan ni Jehova
[Ritrato sa pahina 32]
Ipinahayag ni Jehova: “Iyo ini an sakong Aki . . . maghinanyog kamo sa saiya”