Mulandu Nshi Tufwile Ukulakonkela “Kristu”?

“Umuntu nga alefwaya ukunkonka, aikaane umwine . . . alenkonka lyonse.”—LUKA 9:23.

1, 2. Cinshi cicindamine ukusambilila pa mulandu tufwile ukulakonkela “Kristu”?

YEHOVA afwile alatemwa sana nga amona pa balongene ku kumupepa pe sonde pali mwe bapya e lyo na mwe misepela! Ilyo muletwalilila ukusambilila Baibolo, ukusangwa ku kulongana lyonse, no kwishibilapo na fimbi pa cine icipeela umweo icisangwa mu Cebo ca kwa Lesa, mulingile ukutontonkanya sana pa bwite bwa kwa Yesu ubwa kuti: “Umuntu nga alefwaya ukunkonka, aikaane umwine, alesenda icimuti cakwe ica kucushiwilwapo cila bushiku, alenkonka lyonse.” (Luka 9:23) Yesu aletila ukuikaana no kuba umusambi wakwe cintu ico mufwile ukufwaya ukucita. Kanshi nacicindama ukuti tusambilile umulandu tufwile ukulakonkela “Kristu.”—Mat. 16:13-16.

² Inga ifwe fwe bakonka kale mu makasa ya kwa Yesu Kristu? Baibolo itukonkomesha ‘ukucita ifyo fine sana.’ (1 Tes. 4:1, 2) Nampo nga ni nomba line twaishile mu cine nangu ni kale sana, ukutontonkanya pa milandu tufwile ukulakonkela Kristu kwalatwafwa ukukonka ukukonkomesha kwa kwa Paulo no kulakonka Kristu sana cila bushiku. Natulande pa milandu isano iyo tufwile ukulakonkela Kristu.

 Pa Kuti Tube Ifibusa Sana na Yehova

3. Ni nshila nshi shibili isho twingeshibilamo Yehova?

³ Ilyo umutumwa Paulo alelanda ku bena Atena ninshi ‘eminine mu kati ka Areopagi,’ atile: “[Lesa] abikile inshita no kupakula imipaka ya bwikalo bwa bantunse, pa kuti [inko] shifwaye Lesa, nalimo shingamupampanta no kumusanga, nangu line kwena taba kutali kuli ifwe umo umo.” (Imil. 17:22, 26, 27) Kuti twafwaya Lesa e lyo no kumwishiba kuti twamwishiba. Ku ca kumwenako, nga ca kuti tuletontonkanya pa fyo Lesa abumba, kuti fyatusambilisha ifingi sana pa mibele yakwe na maka yakwe. (Rom. 1:20) Yehova alisokolola na fimbi pa mwine ukupitila mu Cebo cakwe, Baibolo. (2 Tim. 3:16, 17) Nga ‘tuletontonkanya sana pa milimo yakwe’ e lyo no ‘kubika amano ku mibombele yakwe,’ e lyo twingeshiba sana Yehova.—Amalu. 77:12.

4. Bushe ukukonka Kristu kuti kwatwafwa shani ukuba na bucibusa ubusuma na Yehova?

⁴ Inshila yawamisha iya kwishibilamo sana Yehova kulakonka Kristu. Taleni tontonkanyeni pa bukata Yesu akwete lintu ali na Wishi “ilyo icalo cishilabako”! (Yoh. 17:5) Yesu e o “Lesa abalilepo ukupanga.” (Ukus. 3:14) Apo “e beli pa fibumbwa fyonse,” aikele mu muulu na Wishi Yehova pa mintapendwa ya myaka. Ilyo Yesu talaisaba umuntunse, taleikala fye na Wishi capwa. Ali ni cibusa wa kwa Lesa, aleipakisha ukubombela pamo no Wa Maka Yonse, ne ci calengele batemwane ukutemwa ukushatala akumonwapo. Yesu talemona fye ifyo Wishi alecita ifintu, ifyo atontonkanya pa fintu, ne mibele yakwe, lelo alisambilile imibele ya kwa Wishi no kuba nga ena. E calengele ukuti uyu Mwana wa cumfwila apalane sana na Wishi ica kuti Baibolo ilemwita no kuti “icipasho ca kwa Lesa uushimoneka.” (Kol. 1:15) Nga tulekonka sana Kristu, kuti twaba na bucibusa ubusuma sana na Yehova.

Pa Kuti Tupashanye Sana Yehova

5. Cinshi cikatwafwa ukupashanya sana Yehova, kabili mulandu nshi?

⁵ Apo fwe bantu ‘twabumbwa mu cipasho ca kwa Lesa kabili twaba nga ena,’ ninshi kuti twakwata imibele Lesa akwata. (Ukute. 1:26) Umutumwa Paulo akonkomeshe Abena Kristu ukuti “mulepashanya Lesa, apo muli bana bakwe abo atemwa.” (Efes. 5:1) Ukulakonka Kristu kulatwafwa ukupashanya Shifwe wa ku muulu. Pantu Yesu e wapashenye sana imitontonkanishishe, imicitile, ne mibele ya kwa Yehova, kabili e wingatusambilisha bwino sana pali Lesa ukucila umuntu uuli onse. Ilyo Yesu ali pe sonde, talengele fye ishina lya kwa Lesa ukwishibikwa. Lelo, alitulangile ne fyo Lesa aba. (Belengeni Mateo 11:27.) Acitile fi ukupitila mu fyo alesosa, ifyo alesambilisha ne fyo alecita.

6. Bushe ifyo Yesu alesambilisha fisokolola finshi pali Yehova?

⁶ Yesu alesambilisha ifyo Lesa afwaya  tulecita ne fyo omfwa pa bamupepa. (Mat. 22:36-40; Luka 12:6, 7; 15:4-7) Ku ca kumwenako, ilyo ayambwile ifunde limo mu Mafunde 10, ilya kuti, “Wilacita ubucende,” Yesu alondolwele ifyo Lesa amona ificitika mu mutima wa muntu ilyo talacita no bucende. Atile: “Onse uwatwalilila ukulolekesha umwanakashi no kumukumbwa, ninshi nacita kale ubucende nankwe mu mutima wakwe.” (Ukufu. 20:14; Mat. 5:27, 28) Pa numa ya kulanda ifyo abaFarise balelondolola bubi bubi Ifunde abati, “Uletemwa umunobe no kupata umulwani obe,” Yesu alondolwele ifyo Yehova atontonkanya lintu atile: “Muletemwa abalwani benu kabili mulepepelako abamucusha.” (Mat. 5:43, 44; Ukufu. 23:4; Lebi 19:18) Ukwishiba ifyo Lesa atontonkanya ne fyo omfwa kabili ne fyo afwaya tulecita kulatwafwa ukumupashanya sana.

7, 8. Bushe ifyo Yesu alecita fitusambilisha cinshi pali Yehova?

⁷ Ifyo Yesu alecita, fyalangile ne fyo Wishi aba. Nga twabelenga mu mabuuku yane ayalanda pali Yesu, no kumona ifyo aleumfwila abapiina uluse, ifyo alelangulukilako abalecula, ifyo akalipe ilyo abasambi bakalipile abana banono, tulamona ukuti e fyo na Wishi omfwa. (Marko 1:40-42; 10:13, 14; Yoh. 11:32-35) Tontonkanyeni pa fyo imicitile ya kwa Yesu itwafwa ukwishiba imibele yapulamo iya kwa Lesa. Ifipesha amano Kristu acitile filanga ukuti alikwete sana amaka. Lelo, tatalile abomfya ayo maka pa kuti ainonshe umwine nangu ukulimwinako bambi. (Luka 4:1-4) Filya atamfishe bashimakwebo mwi tempele cilangililo ca kuti ali wa mulinganya nga nshi! (Marko 11:15-17; Yoh. 2:13-16) Ifyo alesambilisha na mashiwi ayasuma ayo alelanda pa kufika abantu pa mitima filangilila ukuti amano yakwe ‘yalicilile pa ya kwa Solomone.’ (Mat. 12:42) Ukutemwa Yesu alangile pa kutuulila bambi umweo wakwe kulatupesha amano ica kuti Baibolo itila “takuli uwaba no kutemwa ukwacila pali uku.”—Yoh. 15:13.

⁸ Umwana wa kwa Lesa alipashenye Yehova bwino bwino muli fyonse ifyo alesosa no kucita ica kuti asosele no kutila: “Uwamona ine, ninshi amona na Tata.” (Belengeni Yohane 14:9-11.) Ukulakonka Kristu cimo cine no kulakonka Yehova.

Pantu Yesu E Wasubwa wa kwa Yehova

9. Ni lilali Yesu asangwike Uwasubwa wa kwa Lesa kabili cali shani?

⁹ Tontonkanyeni pa cacitike mu 29 C.E. ilyo Yesu, uwali ne myaka 30 pali ilya nshita, aile kuli Yohane Kabatisha. “Ilyo Yesu abatishiwe, apo pene afumine mu menshi; kabili, moneni! umuulu waliswike, kabili amwene umupashi wa kwa Lesa uleika kwati ni nkunda, uleisa pali ena.” Pali ilya nshita, asangwike Kristu, nangu Mesia. Pali ilya ine nshita e po Yehova umwine alengele cishibikwe ukuti Yesu e Wasubwa wakwe, ilyo atile: “Uyu e Mwana wandi, uwatemwikwa, uo nsekelamo.” (Mat. 3:13-17) We mulandu nobe ulawama uwa kuti tulekonkela Kristu!

10, 11. (a) Bushe ilumbo lya kuti “Kristu” libomfiwa mu nshila nshi ukukuma kuli Yesu? (b) Mulandu nshi tufwile fye ukulakonka Yesu Kristu?

¹⁰ Muli Baibolo, ilumbo lya kuti “Kristu” balibomfya ukukuma kuli Yesu mu nshila shitatu ishapusana: Inshita shimo batila Yesu Kristu, limbi ati Kristu Yesu, e lyo limbi batila fye Kristu. Yesu umwine e wabalilepo ukuita ati “Yesu Kristu,” e kutila ukubalilapo ishina e lyo  pakonka ilumbo. Ilyo alepepa kuli Wishi, atile: “Nomba pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.” (Yoh. 17:3) Nga batila Yesu Kristu, ninshi balelanda sana pa muntu uo Lesa atumine kabili uwaishileba Uwasubwa wakwe. Nga babalilapo ilumbo e lyo pakonka ishina, e kutila nga basosa ati “Kristu Yesu,” ninshi balelanda sana pa cifulo akwata. (2 Kor. 4:5) Nga balanda fye ati “Kristu,” ni nshila fye na imbi iya kulandilamo sana pa cifulo Yesu akwata ica buMesia.—Marko 14:61.

¹¹ Te mulandu ne nshila ilumbo lya kuti “Kristu” lingabomfiwilwamo kuli Yesu, likomaila fye pali ci cishinka cacindama: Nangu cingati Umwana wa kwa Lesa aishile pano isonde mu buntu no kulenga abantu ukwishiba ukufwaya kwa kwa Wishi, tali muntu-untu fye kabili tali fye ni kasesema; lelo aishile mu kuba Uwasubwa wa kwa Yehova. Tufwile ukushininkisha ukuti uyu wine e o tulekonka.

Pantu Yesu E Nshila Yeka Iitwala kwi Pusukilo

12. Mashiwi nshi Yesu aebele umutumwa Toma ayacindama na kuli ifwe?

¹² Yesu alilandile umulandu ukalamba na umbi uo tufwile ukulakonkela Mesia lintu alelanda ku batumwa bakwe aba cishinka ilyo kwashele fye inshita inono ukuti afwe. Ilyo Toma amwipwishe pa fyo alandile ukuti ali no kuya mu kubapekanishisha icifulo, Yesu pa kwasuka atile: “Nine nshila ne cine no mweo. Takuli uwisa kuli Tata kano aishila muli ine.” (Yoh. 14:1-6) Yesu alelanda ku batumwa ba cishinka 11. Abalaile ukuti bali no kukwata apa kwikala mu muulu, lelo amashiwi yakwe yalicindama na ku balesubila ukuba no mweo wa muyayaya pe sonde. (Ukus. 7:9, 10; 21:1-4) Cinshi twasosela ifyo?

13. Cinshi twingasosela ati Yesu e “nshila”?

¹³ Yesu Kristu e “nshila.” E kutila kupitila fye muli ena eka emo twingapalamina kuli Lesa. E fyo caba na kwi pepo, nga twapepela fye ukupitila muli Yesu, e lyo twingashininkisha ukuti Shifwe akatupeela conse ico twalomba icilingene no kufwaya kwakwe. (Yoh. 15:16) Lelo, Yesu ni “nshila” na mu fintu fimbi. Ulubembu lwalenga abantunse ukutaluka kuli Lesa. (Esa. 59:2) Yesu apeele “umweo wakwe icilubula pa kuti alubule abengi.” (Mat. 20:28) Pali uyo mulandu, Baibolo ilondolola ukuti: “Umulopa wa kwa Yesu . . . ulatusangulula ku lubembu lonse.” (1 Yoh. 1:7) Kanshi Umwana alitwiswila inshila ya kuti tubwelele kuli Lesa. (Rom. 5:8-10) Pa kuti tube na bucibusa na Lesa, kano twatetekela Yesu no kulamumfwila.—Yoh. 3:36.

14. Ni mu nshila nshi Yesu abela “icine”?

¹⁴ Yesu e “cine” pantu alelanda pa cine kabili aleikala ukulingana ne cine. E lyo na kabili Yesu e “cine” pa mulandu wa kuti ukusesema konse fye ukwalembelwe pali Mesia, kwafikilishiwe muli ena. Umutumwa Paulo alembele ati: “Amalayo ya kwa Lesa nelyo yafula shani, yaisaba Ee muli ena.” (2 Kor. 1:20) Nangu fye “cinshingwa ca fintu ifisuma ifikesa,” icali mu Mafunde ya kwa Mose caishilefikilishiwa muli Kristu Yesu. (Heb. 10:1; Kol. 2:17) Yesu e o ukusesema konse kwalelandapo, kabili kulatwafwa ukumfwikisha incito abomba pa kuti ukufwaya kwa kwa Yehova kucitike. (Ukus. 19:10) Pa kuti na ifwe tukanonkelemo mu fyo Lesa afwaya ukutucitila, tulingile ukulakonka Mesia.

15. Cinshi twingasosela ukuti Yesu “mweo”?

 ¹⁵ Yesu “mweo” pantu alishita abantunse ku mulopa wakwe, kabili umweo wa muyayaya bupe ubo Lesa apeelela “muli Kristu Yesu Shikulwifwe.” (Rom. 6:23) Yesu “mweo” na ku bafwa. (Yoh. 5:28, 29) Tontonkanyeni na pa fyo akacita ilyo akaba Shimapepo Mukalamba mu kuteka kwakwe ukwa myaka 1,000. Akalenga abantu akalateka pe sonde ukulubuka umuyayaya ku lubembu ne mfwa!—Heb. 9:11, 12, 28.

16. Mulandu nshi tufwile ukulakonkela Yesu?

¹⁶ Amashiwi Yesu asosele pa kwasuka Toma yalicindama sana kuli ifwe. Yesu e nshila, e cine, kabili e mweo. E o Lesa atumine mu calo pa kuti aba mu calo bakapusukile muli ena. (Yoh. 3:17) Kabili takuli uwisa kuli Shifwe kano apitila muli ena. Baibolo ilandilapo fye apabuuta ukuti: “Tamwaba ipusukilo mu muntu umbi iyo, pantu takwaba ishina limbi mwi samba lya muulu ilyapeelwa na Lesa mu bantu, umo tufwile ukupusukila.” (Imil. 4:12) Kanshi, te mulandu ne fyo twasuminemo akale, ca mano ukusumina muli Yesu no kulamukonka, kabili ukucita ifi kukatutungulula ku mweo.—Yoh. 20:31.

Lesa Atweba Ukuti Tufwile Ukumfwa Kuli Kristu

17. Mulandu nshi cacindamina ukuti tuleumfwa ku Mwana uwa kwa Lesa?

¹⁷ Petro, Yohane, na Yakobo balimwene icimonwa ca kupapusha. Pali yo nshita, baumfwile ishiwi ukufuma mu muulu lileti: “Uyu e Mwana wandi, uo nasala. Muumfweni.” (Luka 9:28, 29, 35) Calicindama sana ukuti tulekonka ifyo Lesa atweba ati tuleumfwa kuli Mesia.—Belengeni Imilimo 3:22, 23.

18. Kuti twacita shani nga tulefwaya ukulaumfwa kuli Yesu Kristu?

¹⁸ Ukumfwa kuli Yesu kusanshamo no ‘kutonta amenso pali ena, ukutontonkanya pa fyo acitile.’ (Heb. 12:2, 3) E ico, tufwile “[ukubika] sana amano ku fyo” tubelenga pali ena muli Baibolo na mu mpapulo sha “musha wa cishinka kabili uwashilimuka,” pamo ne fyo tumfwa pali ena ilyo tuli ku kulongana. (Heb. 2:1; Mat. 24:45) Apo tuli mpaanga shakwe, natulefwaisha ukumfwa kuli Yesu no kulamukonka.—Yoh. 10:27.

19. Cinshi cikatwafwa ukulakonka Kristu lyonse?

¹⁹ Bushe kuti twakumamo ukulakonka Kristu, te mulandu na mafya yonse ayo twakwata? Ee kuti twamukonka, kulila fye “[tuleikatisha] icipasho ca mashiwi ayatuntulu” ilyo tulecita ifyo tusambilila mu “citetekelo no kutemwa ifyaba muli Kristu Yesu.”—2 Tim. 1:13.

Finshi Musambilile?

• Mulandu nshi ukukonka “Kristu” kwingalengela twaba na bucibusa busuma na Yehova?

• Mulandu nshi twingasosela ati ukupashanya Yesu cimo cine no kupashanya Yehova?

• Bushe Yesu aba shani “inshila ne cine no mweo”?

• Mulandu nshi tufwile ukuumfwila ifilesosa Uwasubwa wa kwa Yehova?

[Amepusho]

[Icikope pe bula 29]

Ifyo Yesu alesambilisha fyalelanga ukutontonkanya kwa kwa Yehova ukwapulamo

[Icikope pe bula 30]

Tufwile ukulakonka Uwasubwa wa kwa Yehova ukwabula ukuleka

[Icikope pe bula 32]

Yehova abilishe ati: “Uyu e Mwana wandi . . . muumfweni”