Akoz nou swiv “Kris”?
Akoz nou swiv “Kris”?
“Si en dimoun i oule swiv mwan, fodre ki i aret mazin zis limenm . . . e swiv mwan.”—LIK 9:23.
1, 2. Akoz i enportan pour nou egzaminen akoz nou devret swiv “Kris”?
PA ZEOVA i bezwen kontan ler i vwar zot, bann nouvo ek bann zenn rasanble ansanm parmi son gran lafoul adorater lo later! Anmezir ki ou kontinyen etidye Labib, asiste bann renyon regilyerman, e agrandi ou konnesans lo sa laverite sorti dan Parol Bondye ki sov lavi, ou bezwen pran aker sa lenvitasyon ki Zezi ti ofer: “Si en dimoun i oule swiv mwan, fodre ki i aret mazin zis limenm e pran son [“poto martir,” NW] sak zour e swiv mwan.” (Lik 9:23) Zezi pe dir ki aret mazin zis ou menm e vin son disip i en keksoz ki ou devret anvi fer. I enportan alor pour nou egzaminen akoz nou devret swiv “Mesi [oubyen “Kris,” NW].”—Mat. 16:13-16.
2 Ki nou pou dir lo bann parmi nou ki pe deza swiv Zezi Kri? Nou’n ganny ankouraze pour kontinyen “fer pli byen ankor.” (1 Tesa. 4:1, 2) Ki swa nou fek konn laverite oubyen i fer plizyer dizenn lannen depi ki nou dan laverite, ler nou reflesir lo bann rezon ki ti fer nou swiv Kris, sa pou ed nou aplik konsey Pol e swiv Li pli byen ankor dan nou lavi tou le zour. Annou egzamin senk rezon akoz nou devret anvi swiv Kris.
Pour annan en relasyon pros avek Zeova
3. Ki sa de fason nou kapab konn Zeova?
3 Kan zapot Pol ti debout pe koze “devan tou sa bann [Atenyen] ki ti’n rasanble dan Lareopaz,” i ti dir: “[Bondye] ki davans in fikse en letan egzakt e limit bann rezyon kot zot devre reste. [I’n] fer sa pour ki zonm i rod li, e esey antre an kontak avek li, e ki an tatan zot a trouv li. An realite i pa lwen avek sakenn parmi nou.” (Akt 17:22, 26, 27) Nou kapab rod Bondye e vreman arive konn li. Par egzanp, sa ki nou vwar dan kreasyon i fer nou konn en kantite lo bann kalite ek abilite ki Bondye i annan. Ler nou medit lo tou son bann travay ki i’n fer dan kreasyon, nou kapab aprann en kantite lo sa Kreater. (Rom. 1:20) Zeova in osi donn bann detay lo li dan son Parol, Labib. (2 Tim. 3:16,17) Pli nou ‘medit lo tou sa ki i’n fer,’ pli nou pou konn Zeova pli byen ankor.—Ps. 77:12.
4. Ki mannyer ler nou swiv Kris sa i kapab ed nou vin vreman pros avek Zeova?
4 En pli bon fason pour vin pli pros ankor avek Zeova i pour swiv Kris. Zis mazin sa laglwar ki Zezi ti annan akote son Papa “avan kreasyon lemonn”! (Zan 17:5) I “konmansman kreasyon Bondye.” (Rev. 3:14) Konman “premye-ne tou kreasyon,” i’n viv pour en kantite letan avek son Papa Zeova dan lesyel. Pandan sa letan ki i ti pe viv dan lesyel avan vin lo later, Zezi ti fer plis ki zis pas letan avek son Papa. I ti sa zanmi pli pros Bondye. I ti kontan pour travay ansanm avek sa enn Tou Pwisan, e zot lanmour ti sa lanmour pli for ki’n deza egziste. Zezi pa ti zis obzerv lafason ki son Papa ti fer keksoz, ni zis obzerv Son bann santiman ek kalite, i ti osi aksepte e imit sa ki i ti aprann lo son Papa. Sa ti fer sa Garson obeisan vin zis parey son Papa. I ti telman parey Li ki Labib i dir ki i ti sa enn ki annan “resanblans vizib Bondye ki envizib.” (Kol. 1:15) Par swiv Kris byen, nou pou kapab annan en relasyon pli pros avek Zeova.
Imit Zeova pli byen ankor
5. Kwa ki pou ed nou imit Zeova pli byen ankor e akoz?
5 Nou’n ganny ‘fer parey Bondye, dan son resanblans,’ alor nou annan sa kapasite pour imit son bann kalite. (Zen. 1:26) Zapot Pol ti konsey bann Kretyen pour ‘fer tou zot zefor pour fer tou parey Bondye’ konman bann zanfan ki i kontan. (Efe. 5:1) Swiv Kris i ed nou pour imit nou Papa ki dan lesyel. Sa i akoz Zezi ti pli byen reflekte fason panse, santiman ek personnalite Bondye e i ti kapab ansenny konsernan li pli byen ki nenport dimoun. Ler i ti lo later, Zezi pa ti zis fer dimoun konn non Zeova. Plito, i ti fer zot konn konsernan sa Enn ki port sa non. (Lir Matye 11:27.) Zezi ti fer sa par son parol, aksyon, lansennyman ek legzanp.
6. Ki lansennyman Zezi i fer nou konnen lo Zeova?
6 Par son lansennyman Zezi ti montre sa ki Bondye i ekspekte nou fer e ki mannyer i santi anver son bann adorater. (Mat. 22:36-40; Lik 12:6, 7; 154-7) Par egzanp, apre ki i ti’n sit enn parmi sa Dis Komannman ki dir: “Ou pa devret komet adilter,” Zezi ti eksplik pwennvi Bondye lo sa ki pase dan leker en zonm avan ki i fer sa aksyon. I ti dir: “En dimoun ki get madanm en lot zonm avek dezir in deza komet adilter avek li dan son leker.” (Egz. 20:14; Mat. 5:27, 28) Apre ki Zezi ti mansyonn fason ki bann Farizyen ti mal enterpret Lalwa par dir: “Kontan zot zanmi e ay zot lennmi,” Zezi ti fer konn pwennvi Zeova lo sa topik, an dizan: “Kontan zot lennmi e priy pour bann ki persekit zot.” (Mat. 5:43, 44; Egz. 23:4; Lev. 19:18) Par annan en bon konprenezon lo pwennvi Bondye, son santiman e sa ki i ekspekte nou fer, sa pou ed nou pour imit li pli byen ankor.
7, 8. Ki nou kapab aprann lo Zeova atraver legzanp Zezi?
7 Zezi ti osi fer konnen ki mannyer son Papa i ete atraver legzanp. Ler nou lir dan bann Levanzil ki Zezi ti pran pitye pour bann ki ti dan bezwen, konpran bann ki ti pe soufer, mekontan avek son bann disip ler zot ti reprimann bann pti zanfan, pa sa i montre nou ki i ti annan menm santiman ek lemosyon ki son Papa? (Mark 1:40-42; 10:13, 14; Zan 11:32-35) Ler nou mazin fason ki Zezi ti azir, sa i ed nou rekonnet bann kalite prensipal Zeova. Pa sa bann mirak ki Kris ti akonplir i montre ki i ti’n ganny en pwisans ekstraordiner! Me pourtan, i pa ti zanmen servi sa pwisans pour son byennet personnel oubyen avek lentansyon pour fer ditor lezot. (Lik 4:1-4) Pa ler i ti pous bann marsan voras an deor tanp, sa ti montre ki i annan lazistis! (Mark 11:15-17; Zan 2:13-16) Son lansennyman ek bann parol atiran ki i ti servi pour tous leker bann dimoun i montre ki i ti annan plis lasazes ki Salomon. (Mat. 12:42) Sa lanmour ki Zezi ti demontre par donn son lavi pour lezot i ganny dekrir dan en zoli fason dan Labib, “napa personn ki annan en pli gran lanmour ki sa.”—Zan 15:13.
8 Garson Bondye ti sitan byen reprezant Zeova parfetman dan tou sa ki i ti dir e fer ki i ti kapab dir: “Sa ki’n war mwan in osi war mon Papa.” (Lir Zan 14:9-11.) Ler nou swiv Kris i konmsi nou pe imit Zeova.
Zezi i sa Enn ki Zeova in swazir
9. Kan e ki mannyer Zezi ti vin sa Enn ki Zeova in swazir?
9 Annou vwar ki ti arive lotonn lannen 29 N.L. ler Zezi ti annan 30 an, i ti vin kot Zan Batis. “Zis konman Zezi ti’n fini batize, i ti sorti dan delo. Lesyel ti ouver, i ti war Lespri Bondye desann lo li dan laform en kolonm.” Sa zour, i ti vin Kris oubyen Mesi. Sa menm zour, Zeova li menm ti fer konnen ki Zezi ti sa Enn ki i’n swazir an dizan: “Sa mon Garson byenneme, ki donn mwan bokou lazwa.” (Mat. 3:13-17) Pa sa i en bon rezon pour nou anvi swiv Kris!
10, 11. (a) Dan ki fason sa tit “Kris” i ganny servi an rapor avek Zezi? (b) Akoz nou devret swiv Zezi Kri?
10 Dan Labib, sa tit “Kris” i ganny servi an rapor avek Zezi dan diferan fason, parey Zezi Kri, Kris Zezi ek Kris. Zezi li menm ti premye pour servi sa term Zezi Kri setadir met sa non avan sa tit. Dan en lapriyer ki i ti fer avek son Papa, i ti dir: “Ou’n donn li pouvwar lo tou dimoun pour donn lavi eternel tou bann ki ou’n donn li. Savedir ki zot konn ou konman sel vre Bondye, ek Zezi-Kri ki ou’n anvoye.” (Zan 17:2, 3) Par servi sa term Zezi Kri, sa i klerman atir latansyon lo sa enn ki ti’n ganny anvoye par Bondye e ki ti ganny swazir par li. Kan sa tit i ganny mete avan sa non, setadir “Kris Zezi,” lanfaz i ganny mete plis lo sa pozisyon oubyen fonksyon olye sa dimoun. (2 Kor. 4:5, NW) Par servi sa lekspresyon “Kris,” zis sa tit tousel, sa i en lot fason pour met lanfaz lo fonksyon ki Zezi i annan konman Mesi.—Akt 5:42, NW.
11 Nenport konman sa tit “Kris” i ganny servi an rapor avek Zezi, i met lanfaz lo sa laverite enportan: Menm si Garson Bondye ti vin lo later konman en zonm e i ti fer konnen lavolonte son Papa, i pa ti zis en zonm ordiner, oubyen zis en profet me i ti vin konman sa Enn ki Zeova in swazir. Nou merit fer sir ki nou swiv sa Enn.
Zezi i sa sel mwayen pour ganny sove
12. Ki parol ki ti ganny anonse avek Toma ki osi enportan pour nou ozordi?
12 En lot rezon vreman enportan pour kontinyen swiv Mesi i ganny trouve dan parol ki Zezi ti dir avek son bann zapot fidel, en pti pe letan avan son lanmor. Pour reponn kestyon Toma lo sa ki Zezi ti’n anonse konmkwa i ti pe ale pour al prepar en plas pour zot, Zezi ti dir: “Se mwanmenm semen, laverite ek lavi. Personn pa kapab ariv kot mon Papa san pas par mwan.” (Zan 14:1-6) Dan sa moman, Zezi ti pe koz avek son 11 zapot fidel. I ti promet zot en plas dan lesyel, me son parol i osi enportan pour bann dimoun ki annan sa lespwar pour ganny lavi eternel lo later. (Rev. 7:9, 10; 21:1-4) Ki mannyer sa?
13. Dan ki sans Zezi i sa “semen”?
13 Zezi Kri i sa “semen,” setadir i sa sel mwayen atraver ki i posib pour nou apros avek Bondye. Sa i vre kan nou priye, akoz nou annan sa lasirans ki zis ler nou priy o non Zezi ki nou Papa pou donn nou nenport keksoz ki nou demande an armoni avek Son lavolonte. (Zan 15:16) Me, Zezi i osi sa “semen” dan en lot sans. Pese in fer imen elwannyen avek Bondye. (Iza. 59:2) Zezi ti donn “son lavi konman pri pour liberasyon bokou dimoun.” (Mat. 20:28) Se pour sa rezon ki Labib i dir: “Disan Zezi . . . i lav nou avek tou pese.” (1 Zan 1:7) Alor, sa Garson in ouver semen pour nou kapab rekonsilye avek Bondye. (Rom. 5:8-10) Nou kapab annan en bon relasyon avek Bondye si nou met lafwa dan Zezi e obeir li.—Zan 3:36.
14. Ki mannyer Zezi i “laverite”?
14 Zezi i “laverite” pa zis akoz i ti koz e viv laverite, me osi akoz i ti akonplir plizyer profesi ki ti’n ganny ekrir konsernan Mesi. Zapot Pol ti ekrir: “Tou bann promes Bondye i trouv dan li zot ‘wi’ dan Zezi-Kri.” (2 Kor. 1:20) Menm “lonbraz keksoz ki pou vini dan lavenir,” ki ti dan Lalwa Moiz ti vin vre par Kris Zezi. (Ebr. 10:1; Kol. 2:17) Zezi i sa enn lo ki tou profesi i konsantre lo la, e sa bann profesi i ed nou pour konpran rol esansyel ki i pou zwe pour akonplir plan Zeova. (Rev. 19:10) Pour benefisye avek lakonplisman plan Bondye pour nou, nou bezwen swiv Mesi.
15. Dan ki sans Zezi i “lavi”?
15 Zezi i “lavi” akoz i’n aste bann imen avek son disan, e lavi eternel i en kado ki Bondye i donnen “dan Kris-Zezi nou Senyer.” (Rom. 6:23) Zezi i osi “lavi” pour bann ki’n mor. (Zan 5:28, 29) Deplis, mazin sa ki i pou fer konman Gran Pret pandan sa Mil An ki i pou rennyen. Sirman i pou fer ki son bann sitwayen ki pou reste lo later i ganny delivrans eternel avek pese ek lanmor!—Ebr. 9:11, 12, 28.
16. Ki rezon nou annan pour swiv Zezi?
16 Alor, larepons ki Zezi ti donn avek Toma i annan en gran sinifikasyon pour nou. Zezi i semen, laverite ek lavi. I sa enn ki Bondye in anvoy dan lemonn pour ki par li lemonn i a ganny sove. (Zan 3:17) Personn pa kapab al kot Papa san pas par li. Labib i klerman dir: “Zis limenm ki kapab sov zot, parski napa okenn lot non dan lemonn ki Bondye in donnen par lekel nou kapab ganny sove.” (Akt 4:12) Pour sa rezon alor, nenport ki lanvironnman ki nou’n grandi ladan, i saz pour krwar dan Zezi, swiv li, e koumsa nou a ganny lavi.—Zan 20:31.
Nou’n ganny demande pour ekout Kris
17. Akoz i enportan pour nou ekout Garson Bondye?
17 Pyer, Zan ek Zak ti bann temwen sa transfigirasyon. Dan sa moman zot ti tann en lavwa sorti dan lesyel dir: “Sa se mon garson ki mon’n swazir, ekout li.” (Lik 9:28, 29, 35) I enportan pour nou obeir sa lord pour ekout Mesi.—Lir Akt 3:22, 23.
18. Ki mannyer nou kapab ekout Zezi Kri?
18 Ekout Zezi i enplik “gard nou regar fikse lo [li]” e swiv byen son legzanp. (Ebr. 12:2, 3) Pour sa rezon, i ti pou byen pour nou “port en pli gran latansyon” lo sa ki nou lir lo li dan Labib ek bann piblikasyon sorti kot “sa lesklav fidel e pridan,” osi byen ki lo sa ki nou tande konsernan li dan renyon. (Ebr. 2:1; Mat. 24:45, NW) Konman son bann mouton, annou determinen pour ekout Zezi e swiv li.—Zan 10:27.
19. Kwa ki pou ed nou kontinyen swiv Kris?
19 Eski nou pou reisi kontinyen swiv Kris malgre nenport difikilte ki nou kapab rankontre? Wi, nou kapab, si nou kontinyen “tenir byen for . . . model, parol laverite” par met an pratik sa ki nou aprann avek “lafwa ek lanmour ki nou posede dan Kris Zezi.”—2 Tim. 1:13.
Ki ou’n aprann?
• Akoz ler nou swiv “Kris” sa i kapab fer nou vin pli pros avek Zeova?
• Akoz imit Zezi i konmsi nou pe imit Zeova?
• Ki mannyer Zezi i “semen, laverite ek lavi”?
• Akoz nou devret ekout sa Enn ki Zeova in swazir?
[Kestyon]
[Portre lo paz 28]
Lansennyman Zezi ti reflekte fason panse Zeova ki pli siperyer
[Portre lo paz 29]
Nou devret swiv fidelman sa Enn ki Zeova in swazir
[Portre lo paz 31]
Zeova ti dir: “Sa se mon Garson . . . ekout li”