Ntak Emi Ikpetienede “Christ”?
Ntak Emi Ikpetienede “Christ”?
“Edieke owo ekededi oyomde nditiene mi, yak enye akan̄ idemesie . . . onyụn̄ aka iso etiene mi.”—LUKE 9:23.
1, 2. Ntak emi ọfọnde itie ikere ntak emi ikpetienede Christ?
ESỊT esinen̄ede enem Jehovah ndikụt mbufa mbon oro ẹnyenede udọn̄ ye mbufo mme uyen ke otu ikọt esie. Nte osụk ekpepde Bible, odụkde mme mbono esop kpukpru ini, onyụn̄ akade iso ọkọ ifiọk Abasi oro ọnọde uwem, afo ekpenyene ndinen̄ede n̄kere mban̄a ikot oro Jesus ọkọnọde mi ete: “Edieke owo ekededi oyomde nditiene mi, yak enye akan̄ idemesie onyụn̄ emen eto ndutụhọ esie ke usen ke usen onyụn̄ aka iso etiene mi.” (Luke 9:23) Jesus ọdọhọ ke afo ekpenyene ndikan̄ idemfo nnyụn̄ ntiene imọ. Mmọdo, enen̄ede odot itie ikere ntak emi ikpetienede Christ.—Matt. 16:13-16.
2 Nso kaban̄a nnyịn emi isụk itienede nde ikpat Jesus Christ idahaemi? Apostle Paul ama esịn udọn̄ ọnọ nnyịn ete ‘ika iso inam ntre ata ọyọhọ ọyọhọ.’ (1 Thess. 4:1, 2) Edide idụk esop Abasi obufa m̀mê ebịghi ikọtọn̄ọ ndidụk, edieke itiede ikere ntak emi ikpetienede Christ, oro ayanam ikeme ndinam item Paul emi inyụn̄ inen̄ede itiene Christ ke usen ke usen. Ẹyak ineme ntak ition emi ikpetienede Christ.
Man Inen̄ede Isan̄a Ikpere Jehovah
3. Nso ye nso idin̄wam nnyịn inen̄ede idiọn̄ọ Jehovah?
3 Ke ini apostle Paul eketịn̄de ikọ ọnọ mbon Athens, enye ama “ada ke ufọt Areopagus” ọdọhọ ete: “[Abasi] ama onyụn̄ enịm edimek ini ye adan̄a ebietidụn̄ owo, man mmọ ẹyom Abasi, m̀mê mmọ ẹyefiọn̄ọ ubọk ẹn̄wana ẹsịm enye ẹnyụn̄ ẹkụt enye, okposụkedi enye ke akpanikọ mîyomke usụn̄ ikpọn̄ owo nnyịn kiet kiet.” (Utom 17:22, 26, 27) Nnyịn imekeme ndiyom Abasi inyụn̄ inen̄ede idiọn̄ọ enye. Ke uwụtn̄kpọ, mme n̄kpọ oro enye obotde ẹkeme ndinam nnyịn ifiọk mme edu ye odudu esie. (Rome 1:20) Bible onyụn̄ etịn̄ ekese n̄kpọ aban̄a Jehovah. (2 Tim. 3:16, 17) Adan̄a nte itiede ‘ikere kpukpru se enye anamde,’ ntre n̄ko ke nnyịn idinen̄ede ifiọk Jehovah.—Ps. 77:12.
4. Didie ke nditiene Christ edinam nnyịn inen̄ede idiọn̄ọ Jehovah?
4 Idụhe se idinamde nnyịn inen̄ede idiọn̄ọ Jehovah nte nditiene Christ! Kere ban̄a ubọn̄ oro Jesus ekenyenede ke ini enye okodude ye Ete esie “mbemiso ererimbot ekedide edidu”! (John 17:5) Enye edi “ntọn̄ọ edibot n̄kpọ Abasi.” (Edi. 3:14) Enye n̄ko edi “akpan ke otu kpukpru edibotn̄kpọ,” ntre enye ama odu anana-ibat isua ye Jehovah Ete esie ke heaven. Enye ama anam ekese n̄kpọ ke ini enye okodude ye Ete esie ke heaven mbemiso edide isọn̄. Enye ekedi ata ufan Abasi, adiana kiet ye enye anam utom, mmọ mbiba ẹma ẹnen̄ede ẹma kiet eken. Jesus ama ese nte Ete esie esinamde n̄kpọ, okụt mme n̄wọrọnda edu esie onyụn̄ ekpebe enye. Enye ama enen̄ede ebiet Ete esie tutu Bible ọdọhọ ke “enye edi mbiet Abasi oro enyịn mîkwe.” (Col. 1:15) Nnyịn ima itiene Christ ketket, iyenen̄ede idiọn̄ọ Jehovah.
Man Inen̄ede Ikpebe Jehovah
5. Nso idin̄wam nnyịn inen̄ede ikpebe Jehovah, ndien ntak-a?
5 Ẹkebot nnyịn ‘ke mbiet Abasi,’ ntre imekeme ndinyene mme edu esie. (Gen. 1:26) Apostle Paul eketeme mme Christian ete “ẹdi mme andikpebe Abasi, nte ndima nditọ.” (Eph. 5:1) Nditiene Christ anam nnyịn ikeme ndikpebe Ete nnyịn eke heaven koro idụhe owo ekededi oro ekekpebede Jehovah nte Jesus, inyụn̄ idụhe owo en̄wen oro ekemede ndinam nnyịn ifiọk Jehovah nte Jesus. Ke ini Jesus okodude ke isọn̄, enye ama anam mme owo ẹfiọk enyịn̄ Jehovah ye orụk owo emi Jehovah edide. (Kot Matthew 11:27.) Jesus ama anam mme owo ẹfiọk orụk owo emi Abasi edide ke ikọ ye ke edinam ye ke se enye ekekpepde mme owo.
6. Nso ke Jesus ekpep nnyịn aban̄a Jehovah?
6 Jesus ama ekpep mme owo se Abasi oyomde inam ye nte enye esede mme andituak ibuot nnọ Enye. (Matt. 22:36-40; Luke 12:6, 7; 15:4-7) Ke uwụtn̄kpọ, ke ini Jesus okokotde oto kiet ke otu Ibet Duop, oro ọdọhọde “kûsịn efịbe,” enye ama etịn̄ nte Abasi esede se owo esitiede ekere ke esịt esie idem mbemiso enye anamde use. Enye ọkọdọhọ ete: “Owo ekededi eke owụkde enyịn ese n̄wan tutu udọn̄ idan̄ edemede enye, enye esesịn efịbe ama ke esịt esie ye enye.” (Ex. 20:14; Matt. 5:27, 28) Ke Jesus ama eketịn̄ nte mme Pharisee ẹsikabarede Ibet Abasi emi—“ma mbọhọ-idụn̄ fo nte idem fo”—enye ama etịn̄ se Jehovah oyomde inam ete: “Ẹka iso ẹma mme asua mbufo ẹnyụn̄ ẹbọn̄ akam ẹban̄a mmọ eke ẹkọbọde mbufo.” (Matt. 5:43, 44; Ex. 23:4; Lev. 19:18) Ndifiọk nte Abasi esisede n̄kpọ nnyụn̄ mfiọk se enye oyomde nnyịn inam ayanam idọdiọn̄ ikpebe enye.
7, 8. Nte Jesus akanamde n̄kpọ ekpep nnyịn nso aban̄a Jehovah?
7 Nte Jesus akanamde n̄kpọ n̄ko ama anam mme owo ẹfiọk nte Ete esie esinamde n̄kpọ. Ke ini ikotde mme mbụk Gospel ikụt nte Jesus ekesituade mme ubuene mbọm, ekere aban̄a mbon oro ẹbọde ufen, onyụn̄ ayatde esịt ye mme mbet esie ke ini mmọ mîkayakke n̄kpri nditọwọn̄ ẹsan̄a ẹkpere enye, ndi oro iwụtke nte Ete esie akpanamde n̄kpọ? (Mark 1:40-42; 10:13, 14; John 11:32-35) Kere ban̄a nte mme edinam Jesus anamde nnyịn idiọn̄ọ mme n̄wọrọnda edu Abasi. Mme utịben̄kpọ oro enye akanamde ẹma ẹwụt ke enye enen̄ede enyene odudu. Kpa ye oro, akananam enye idaha odudu esie inam n̄kpọ ke ufọn idem esiemmọ m̀mê ndida mbak ibak. (Luke 4:1-4) Ndikebịn mme ọdiọk-itọn̄ mbonurua nsion̄o ke temple okowụt ke enye enen̄ede ama se inende. (Mark 11:15-17; John 2:13-16) Se enye ekekpepde ye ndinem ikọ oro ẹkewọn̄ọde enye ke inua ẹwụt ke enye ama enyene ọniọn̄ ‘akan Solomon.’ (Matt. 12:42) Nnyịn ikpetịn̄ke-tịn̄ iban̄a ima oro enye akamade owo tutu enye ayak uwem esie ọnọ ke ibuot nnyịn. Bible ọdọhọ ke “idụhe owo emi enyenede ima eke okponde akan emi.”—John 15:13.
8 Eyen Abasi ama enen̄ede ekpebe Jehovah ke kpukpru n̄kpọ emi enye eketịn̄de onyụn̄ anamde tutu enye ọdọhọ ete: “Owo eke okụtde mi okụt Ete n̄ko.” (Kot John 14:9-11.) Nditiene Christ etie nte nditiene Jehovah.
Jesus Edi Enye Emi Jehovah Eyetde Aran
9. Ini ewe ke Jehovah ekeyet Jesus aran, ndien akanam emi didie?
9 Kere ban̄a se iketịbede ke ini idọk eke isua 29 E.N., kpa ini oro Jesus emi ekedide n̄kpọ nte isua 30 ekebịnede John ete enịm imọ Baptism. “Ke Jesus ama akana baptism kpa idaha oro enye ọwọrọ ke mmọn̄ ọdọk; ndien, sese! enyọn̄ eberede, ndien enye okụt spirit Abasi osụhọrede nte ibiom edidoro enye ke idem.” Ini oro ke enye akakabade edi Christ, m̀mê Messiah. Jehovah ke idemesie ama ọdọhọ ke Jesus edi Enye Oro imọ imekde. Enye ọkọdọhọ ete: “Emi edi edima Eyen mi, emi ami nnyịmede.” (Matt. 3:13-17) Ata akpan ntak oro ikpetienede Christ akam edi oro!
10, 11. (a) Nso idi nsio nsio usụn̄ emi ẹkotde Jesus ke Bible? (b) Ntak emi nnyịn ikpakade iso itiene Jesus Christ-e?
10 Ẹkot Jesus ke nsio nsio usụn̄ ke Bible, utọ nte Jesus Christ, Christ Jesus, ye Christ.” Jesus ke idemesie ekebem iso asiak ata enyịn̄ esie mbemiso adiande “Christ” emi edide udorienyịn̄, ke ini ọkọbọn̄de akam ọnọ Ete esie ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet, ye enye emi afo okosiode ọdọn̄, kpa Jesus Christ.” (John 17:3) Ndikot Eyen Abasi “Jesus Christ” enen̄ede owụt ke Abasi okosio enye ọdọn̄, ye nte ke Abasi ekeyet enye aran. Ke ini ẹbemde iso ẹkot udorienyịn̄ Esie “Christ,” ndien ẹkot ata enyịn̄ esie “Jesus,” oro ọwọrọ ke ẹyom nditịn̄ n̄kpọ mban̄a ifetutom esie. (2 Cor. 4:5) Ndikot enye “Christ” kpọt onyụn̄ edi usụn̄ en̄wen nditịn̄ mban̄a utom esie nte Messiah.—Utom 5:42.
11 Inamke n̄kpọ m̀mê ikot enye “Jesus Christ,” “Christ Jesus,” m̀mê “Christ,” udorienyịn̄ emi anam nnyịn idiọn̄ọ ke kpa ye oro enye ekedide isọn̄ nte owo onyụn̄ ekpepde mme owo uduak Ete esie, enye ikedịghe ikpîkpu owo m̀mê ikpîkpu prọfet; enye ekedi man Jehovah ediyet enye aran. Ntre, akpana ika iso itiene Enye.
Jesus Edi N̄kukụre Usụn̄ Emi Ekemede Ndida Owo Nsịm Edinyan̄a
12. Nso ke Jesus ọkọdọhọ apostle Thomas, oro osụk enyenede ufọn ọnọ nnyịn mfịn?
12 Se Jesus eketịn̄de ọnọ mme anam-akpanikọ apostle esie esisịt ini mbemiso enye akakpade anam ifiọk akpan ntak efen oro ikpakade iso itiene enye. Ke ini enye ọkọdọhọde ke imọn̄ ika iketịm itie inọ mmọ, Thomas ama obụp m̀mê mmimọ idisan̄a didie ifiọk ebiet eke enye akade. Ntre, Jesus ama ọbọrọ enye ete: “Ami ndi usụn̄ ye akpanikọ ye uwem. Baba owo kiet itieneke Ete ibọhọke ebe ke ami.” (John 14:1-6) Jesus eketịn̄ ikọ emi ọnọ mme anam-akpanikọ apostle esie 11. Enye ọkọn̄wọn̄ọ nditịm itie nnịm nnọ mmọ ke heaven, edi ikọ esie emi enyene ufọn n̄ko ọnọ mbon oro ẹdidude nsinsi uwem mi ke isọn̄. (Edi. 7:9, 10; 21:1-4) Ntak emi idọhọde ntre?
13. Didie ke Jesus edi usụn̄?
13 Jesus Christ edi “usụn̄.” Oro ọwọrọ ke enye kpọt ekeme ndinam nnyịn isan̄a ikpere Abasi. Emi edi akpanikọ, sia edieke ibọn̄de akam ke enyịn̄ Jesus, imenyene idotenyịn ke Abasi ọyọnọ nnyịn se ededi oro iben̄ede ekekem ye uduak Esie. (John 15:16) Edi Jesus onyụn̄ edi “usụn̄” ke afan̄ efen. Idiọkn̄kpọ adian̄ade mme owo ọkpọn̄ Abasi. (Isa. 59:2) Ntak edi oro Jesus ọkọnọde “ukpọn̄ esie nte ufak ke ibuot ediwak owo.” (Matt. 20:28) Ndien Bible ọdọhọ ke “iyịp Jesus . . . eyet nnyịn isana ke kpukpru idiọkn̄kpọ.” (1 John 1:7) Ntre ke Eyen Abasi anam nnyịn itie ke emem ye Abasi. (Rome 5:8-10) Se idinamde nnyịn isan̄a ikpere Abasi edi ndibuọt idem ke Jesus nnyụn̄ n̄kop uyo esie.—John 3:36.
14. Nso inam Jesus edi akpanikọ?
14 Idịghe ntak emi Jesus ekekpepde akpanikọ onyụn̄ edide owo akpanikọ kpọt anam ẹkot enye akpanikọ, ntak en̄wen edi nte ke kpukpru ntịn̄nnịm ikọ oro ẹban̄ade Messiah ẹkesu enye ke idem. Apostle Paul ekewet ete: “Inamke n̄kpọ m̀mê mme un̄wọn̄ọ Abasi ẹwak adan̄a didie, mmọ ẹmekabade ẹdi Ih ebe ke enye.” (2 Cor. 1:20) Idem “mbukpọn̄ nti n̄kpọ” oro ẹkedude ke Ibet Moses ẹma ẹsu Christ Jesus ke idem. (Heb. 10:1; Col. 2:17) Kpukpru ntịn̄nnịm ikọ ke Bible ẹban̄a Jesus, ndien mmọ ẹnam nnyịn idiọn̄ọ nte Jehovah adade Jesus osu uduak esie. (Edi. 19:10) Ana itiene Messiah edieke iyomde nditiene ndu ini emi Abasi edisude se enye ọkọn̄wọn̄ọde ndinam nnọ nnyịn.
15. Didie ke Jesus edi uwem?
15 Jesus edi uwem n̄ko sia enye ama ada iyịp esie edep ubonowo, n̄ko Abasi edida “Christ Jesus Ọbọn̄ nnyịn” ọnọ nnyịn nsinsi uwem. (Rome 6:23) Jesus onyụn̄ edi “uwem” ọnọ mbon oro ẹma ẹkekpan̄a sia enye edinam mmọ ẹset. (John 5:28, 29) Kere n̄ko ban̄a se enye edinamde nte Akwa Oku ke Tọsịn Isua oro enye edikarade. Enye ayanam mbon emi enye edikarade ẹbọhọ idiọkn̄kpọ ye n̄kpa ke nsinsi!—Heb. 9:11, 12, 28.
16. Ntak emi ikpetienede Jesus?
16 Se Jesus ọkọbọrọde Thomas enen̄ede enyene ufọn ọnọ nnyịn. Jesus edi usụn̄ ye akpanikọ ye uwem. Enye ke Abasi okosio ọdọn̄ ke ererimbot man ererimbot ekpenyene edinyan̄a. (John 3:17) Owo ndomokiet inyụn̄ ikemeke nditiene Ete ibọhọke ebe ke enye. Bible etịn̄ in̄wan̄-in̄wan̄ ete: “Edinyan̄a itoho owo efen ekededi, koro enyịn̄ baba kiet efen idụhe ke idak enyọn̄ eke ẹnọde ke otu owo emi anade ẹda ẹnyan̄a nnyịn.” (Utom 4:12) Ntre, inamke n̄kpọ m̀mê nso ke ẹkekpep nnyịn, ọfọn inịm Jesus ke akpanikọ inyụn̄ itiene enye man inyene uwem.—John 20:31.
Abasi Ọdọhọ Ikpan̄ Utọn̄ Inọ Christ
17. Ntak emi edide akpan n̄kpọ ndikpan̄ utọn̄ nnọ Eyen Abasi?
17 Peter, John, ye James ẹma ẹkụt ini emi mbiet Jesus okokpụhọrede. Mmọ ẹma ẹkop nte uyo ọwọrọde ke heaven, ete: “Emi edi Eyen mi, kpa enye emi ẹmekde. Ẹkpan̄ utọn̄ ẹnọ enye.” (Luke 9:28, 29, 35) Enen̄ede edi akpan n̄kpọ ndikpan̄ utọn̄ nnọ Messiah.—Kot Utom 3:22, 23.
18. Didie ke ikeme ndikpan̄ utọn̄ nnọ Jesus Christ?
18 Ndikpan̄ utọn̄ nnọ Jesus esịne ‘ndiwụk enyịn nse enye nnyụn̄ ntiene uwụtn̄kpọ esie ketket.’ (Heb. 12:2, 3) Ke ntre, nnyịn ikpenyene ‘nditịm nnọ n̄kpan̄utọn̄ ke mme n̄kpọ oro’ ikpepde iban̄a enye ke Bible, ke mme n̄wed oro “ofụn emi anamde akpanikọ onyụn̄ enyenede ọniọn̄” osiode, ye ke mme mbono esop. (Heb. 2:1; Matt. 24:45) Ẹyak nnyịn emi idide mme erọn̄ esie ikpan̄ utọn̄ inọ enye inyụn̄ itiene enye.—John 10:27.
19. Nso idinam ika iso itiene Christ?
19 Ndi imekeme ndika iso ntiene Christ inamke n̄kpọ m̀mê nso itịbe inọ nnyịn? Ih, imekeme edieke ikade iso ‘imụm mbiet nti ikọ ikama,’ oro edi, ndinam se nnyịn ikpepde ke “mbuọtidem ye ima emi ẹdude ke ebuana ye Christ Jesus.”—2 Tim. 1:13.
Nso ke Afo Ekekpep?
• Ntak emi nditiene “Christ” ekemede ndinam nnyịn inen̄ede isan̄a ikpere Jehovah?
• Ntak emi nditiene Jesus etiede nte nditiene Jehovah?
• Didie ke Jesus edi “usụn̄ ye akpanikọ ye uwem”?
• Ntak emi nnyịn ikpakpan̄de utọn̄ inọ Enye Emi Jehovah Eyetde Aran?
[Mme Mbụme Ukpepn̄kpọ]
[Ndise ke page 29]
Jesus ekekpep mme owo ekikere Jehovah
[Ndise ke page 30]
Akpana ika iso itiene Enye Emi Jehovah Eyetde Aran
[Ndise ke page 32]
Jehovah ọkọdọhọ ete: “Emi edi Eyen mi. . . ẹkpan̄ utọn̄ ẹnọ enye”