Naegbọn Mí Nado Hodo “Klisti”?
Naegbọn Mí Nado Hodo “Klisti”?
‘Eyin mẹde jlo nado hodo mi, gbọ e ni mọ́n ede bo to hihodo mi.’—LUKU 9:23.
1, 2. Naegbọn e do yin nujọnu dọ mí ni gbadopọnna nuhewutu mí nado hodo “Klisti”?
LEHE homẹ Jehovah tọn na ko hùn nado mọ mì jlodotọ yọyọ lẹ po jọja lẹ po to gbẹtọgun he to sinsẹ̀n ẹn to aigba ji lẹ ṣẹnṣẹn do sọ! Dile a to nukọnzindo nado to Biblu plọn, to opli Klistiani tọn lẹ yì to gbesisọ mẹ, bosọ to nukunnumọjẹnumẹ towe gando nugbo gbẹwhlẹngán tọn he tin to Ohó Jiwheyẹwhe tọn mẹ hẹn sudeji, hiẹ dona yí nukun nujọnu tọn do pọ́n oylọ-basinamẹ Jesu tọn he dọmọ: ‘Eyin mẹde jlo nado hodo mi, gbọ e ni mọ́n ede, bosọ ze yatin etọn egbesọegbesọ bo to hihodo mi.’ (Luku 9:23) Nuhe dọ Jesu te wẹ yindọ, mẹde mimọ́n bo lẹzun hodotọ etọn yin nude he hiẹ na jlo nado wà. To whelọnu lo, nujọnu wẹ e yin nado gbadopọnna nuhewutu mí na jlo nado hodo “Klisti.”—Mat. 16:13-16.
2 Etẹwẹ dogbọn míwu mẹhe ko to zọnlinzin gbọn afọ̀domẹ Jesu Klisti tọn ji lẹ dali? Biblu dotuhomẹna mí nado “zindonukọn nado to ehe wà to gigọ́ mẹ.” (1 Tẹs. 4:1, 2, NW) Vlavo mí ṣẹṣẹ mọ nugbo kavi e ko dẹn, nulinlẹnpọndo nuhewutu mí nado hodo Klisti ji na gọalọna mí nado yí tudohomẹnamẹ Paulu tọn lẹ do yizan mẹ bo hodo Klisti pẹkipẹki to gbẹzan egbesọegbesọ tọn mítọn mẹ. Mì gbọ mí ni gbadopọnna whẹwhinwhẹ́n atọ́n he wutu mí nado hodo Klisti.
Nado Wleawuna Haṣinṣan Pẹkipẹki de hẹ Jehovah
3. Aliho awe tẹlẹ mẹ wẹ mí na penugo nado yọ́n Jehovah dogọ te?
3 To whenuena apọsteli Paulu “fọnṣite to gblagbla Alẹọpagu tọn mẹ” bo to hodọna Atẹninu lẹ, e dọmọ: ‘Jiwheyẹwhe de ojlẹ dide lẹ bosọ na dogbó fininọ tọn gbẹtọ lẹ, na yé nido nọ dín Jiwheyẹwhe, eyin vlavo ayiha yetọn sọgan dọ̀n do e go, bosọ dín in mọ, mọ e ma tlẹ dẹn sọn dopodopo mítọn dè gba.’ (Owalọ 17:22, 26, 27) Mí sọgan dín Jiwheyẹwhe bosọ yọnẹn dogọ. Di apajlẹ, eyin mí lẹnnupọndo nudida lẹ ji, enẹ na gọalọna mí nado yọ́n jẹhẹnu po nugopipe Jiwheyẹwhe tọn lẹ po. Ayihamẹlinlẹnpọn do azọ́n nudida tọn Mẹdatọ lọ tọn lẹ ji po pinpẹn-nutọn-yinyọnẹn po sọgan plọn mí nususu gando ewọ go. (Lom. 1:20) Jehovah sọ dọ nususu na mí dogọ gando ede go to Ohó etọn, Biblu mẹ. (2 Tim. 3:16, 17) Lehe mí ‘lẹnayihamẹpọn do azọ́n Jehovah tọn lẹ ji’ do sọ, mọ wẹ mí na penugo nado yọ́n ẹn dogọ do niyẹn.—Ps. 77:12.
4. Nawẹ Klisti hihodo sọgan gọalọna mí nado wleawuna haṣinṣan pẹkipẹki de hẹ Jehovah gbọn?
4 Aliho dagbe hugan nado wleawuna haṣinṣan pẹkipẹki de hẹ Jehovah wẹ nado hodo Klisti. Yí nukun homẹ tọn do pọ́n gigo he Jesu tindo to Otọ́ etọn dè “whẹpo aihọn do jọ”! (Joh. 17:5) Ewọ wẹ “omẹ tintan to nudida Jiwheyẹwhe tọn lẹ mẹ.” (Osọhia 3:14) Taidi “viplọnji to yé he yè dá lẹpo mẹ,” e yí owhe madosọha lẹ zan to olọn mẹ hẹ Otọ́ etọn, Jehovah. Whẹpo Jesu do wá aigba ji, e ma yí whenu zan hẹ Otọ́ etọn poun gba. Ewọ wẹ gbẹdohẹmẹtọ Jiwheyẹwhe tọn tlọlọ, podọ e yí ayajẹ do wazọ́n dopọ hẹ Ganhunupotọ lọ bosọ wleawuna haṣinṣan owanyi tọn he nkọ ma pé awe hẹ Ẹ. Jesu ma doayi aliho he mẹ Otọ́ etọn nọ yinuwa te, enẹ wẹ numọtolanmẹ po jẹhẹnu Etọn lẹ po go kẹdẹ gba, ṣigba e sọ mọnukunnujẹ nuhe e plọn gando Otọ́ etọn go lẹpo mẹ bo nọgbẹ̀ sọgbe hẹ yé. Taidi kọdetọn de, Ovi tonusetọ ehe yinuwa pẹpẹ di Otọ́ etọn sọmọ bọ Biblu dlẹnalọdo e taidi ‘apajlẹ Jiwheyẹwhe he yè ma mọ tọn.’ (Kọl. 1:15) Eyin mí nọ hodo Klisti afọsu-afọsi, mí na penugo nado wleawuna haṣinṣan pẹkipẹki de hẹ Jehovah.
Nado Hodo Apajlẹ Jehovah Tọn Pẹkipẹki
5. Etẹwẹ na gọalọna mí nado hodo apajlẹ Jehovah tọn pẹkipẹki, podọ etẹwutu?
5 Na mí yin ‘didá to apajlẹ Jiwheyẹwhe tọn mẹ’ wutu, mí tindo nugopipe lọ nado nọ do jẹhẹnu Jiwheyẹwhe tọn lẹ hia. (Gẹn. 1:26) Apọsteli Paulu dotuhomẹna Klistiani lẹ nado “yin mẹhodotọ Jiwheyẹwhe tọn di ovi yiwanna lẹ.” (Efe. 5:1) Klisti hihodo na gọalọna mí nado hodo apajlẹ Otọ́ mítọn olọn mẹ tọn, na Jesu do pọndohlan, numọtolanmẹ po jẹhẹnu Jiwheyẹwhe tọn lẹ po hia bosọ do mẹhe E yin hia hezeheze hugan mẹdevo depope wutu. Jesu ma hẹn oyín Jehovah tọn zun yinyọnẹn poun to whenue e tin to aigba ji. Kakatimọ, e do Mẹhe tindo oyín lọ hia. (Hia Matiu 11:27.) Jesu wà ehe to ohó po walọ po mẹ podọ to nuplọnmẹ etọn lẹ po apajlẹ etọn po mẹ.
6. Etẹwẹ nuplọnmẹ Jesu tọn lẹ dohia gando Jehovah go?
6 Nuplọnmẹ Jesu tọn lẹ do nuhe Jiwheyẹwhe biọ to mí si po numọtolanmẹ he e tindo gando sinsẹ̀n-basitọ etọn lẹ go po hia. (Mat. 22:36-40; Luku 12:6, 7; 15:4-7) Di apajlẹ, to whenue Jesu donù dopo to Gbedide Ao lọ lẹ mẹ go—enẹ wẹ “hiẹ ma na deayọ”—e basi zẹẹmẹ nuhe yin pọndohlan Jiwheyẹwhe tọn gando nuhe nọ jọ to ahun mẹde tọn mẹ ojlẹ dindẹn whẹpo e do nọ doalọ to nuyiwa mọnkọtọn mẹ go tọn. E dọmọ: “Eyin mẹdepope pọ́n yọnnusi de nado wà onú gbigble hẹ ẹ, e ko deayọ hẹ ẹ to ayiha etọn mẹ dote.” (Eks. 20:14; Mat. 5:27, 28) To whenue Jesu donù aliho he mẹ Falesi lẹ nọ basi zẹẹmẹ adà Osẹ́n lọ tọn de tọn te—yèdọ “hiẹ ni yiwanna hẹnnumẹ towe, bo gbẹwanna kẹntọ towe”—godo, e do nuhe yin pọndohlan Jehovah tọn hia dọmọ: “Mì [nọ] yiwanna kẹntọ mìtọn lẹ, bosọ [nọ] hodẹ̀ na mẹhe to vivlẹ mì kò, bosọ to homẹkẹndo mì lẹ.” (Mat. 5:43, 44; Eks. 23:4; Lev. 19:18) Pọndohlan po numọtolanmẹ Jiwheyẹwhe tọn lẹ po gọna nuhe e biọ to mí si lẹ yinyọnẹn nọ gọalọna mí nado hodo apajlẹ etọn pẹkipẹki.
7, 8. Etẹwẹ mí plọn sọn apajlẹ Jesu tọn mẹ gando Jehovah go?
7 Apajlẹ Jesu tọn sọ do omẹ nankọ he Otọ́ etọn yin hia. Whenue mí hia to owe Wẹndagbe tọn lẹ mẹ dọ Jesu vẹawu mẹhe tin to nuhudo mẹ po mẹhe to yaji lẹ po, bo gblehomẹ do devi etọn he gbẹna yọpọ lẹ nado wá e dè lẹ go, be e ma sọgbe nado lẹndọ numọtolanmẹ dopolọ wẹ Otọ́ etọn na ko tindo ya? (Malku 1:40-42; 10:13, 14; Joh. 11:32-35) Lẹnnupọndo lehe nuyiwa Jesu tọn lẹ tá hinhọ́n do jẹhẹnu tangan Jiwheyẹwhe tọn lẹ ji do. Be azọ́njiawu he Klisti wà lẹ ma dohia dọ e tindo huhlọn he sẹhundaga ya? Ṣogan, e ma yí huhlọn enẹ zan na ale mẹdetiti tọn kavi nado gbleawuna mẹdevo lẹ gbede. (Luku 4:1-4) Lehe nuyiwa etọn nado yàn ajọwatọ nukunkẹnnọ lẹ tọ́n sọn tẹmpli mẹ do whẹdida dodo tọn etọn hia do sọ! (Malku 11:15-17; Joh. 2:13-16) Nuplọnmẹ etọn gọna hogbe ojọmiọn tọn etọn he e yizan lẹ nado jẹ ahun gbẹtọ lẹ tọn mẹ dohia dọ e “hú Sọlọmọni” to nuyọnẹn mẹ. (Mat. 12:42) Etẹwẹ dogbọn owanyi he Jesu dohia gbọn alindọn etọn zizejo do ota mẹdevo lẹ tọn mẹ nado dohia dọ “mẹde ma tindo owanyi he klo hú ehe” dali?—Joh. 15:13.
8 Ovi Jiwheyẹwhe tọn ze afọ Jehovah tọn dai to pipé mẹ to ohó po walọ po mẹ sọmọ bọ e sọgan dọ dọ: “Ewọ he ko mọ mi ko mọ Otọ́.” (Hia Johanu 14:9-11.) Klisti hihodo yin nudopolọ po apajlẹ Jehovah tọn hihodo po.
Jesu Wẹ Mẹyiamisisadode Jehovah Tọn
9. Whetẹnu wẹ Jesu lẹzun Mẹyiamisisadode Jiwheyẹwhe tọn, podọ gbọnna?
9 Lẹnnupọndo nuhe jọ to afò-whenu to owhe 29 W.M. ji, whenue Jesu he yin owhe 30 mẹvi wá Johanu Baptizitọ lọ dè. “Jesu, whenuena yè ko baptizi na ẹn, e tọ́n jẹ agé to afọdoponẹji sọn osin mẹ: bo pọ́n, olọn hùn hlan ẹn, e mọ [gbigbọ] Jiwheyẹwhe tọn jẹte di apoe bo jẹ do e ji.” Whẹnẹnu wẹ e lẹzun Klisti kavi Mẹssia. To ojlẹ enẹ mẹ, Jehovah lọsu do Jesu hia taidi Mẹyiamisisadode etọn dọmọ: “Ehe wẹ Visunnu ṣie; Mẹvivẹ ṣie, mẹhe mẹ homẹ ṣie vivi te tlala.” (Mat. 3:13-17) Whẹwhinwhẹ́n dagbe nankọ die mí tindo nado jlo nado hodo Klisti!
10, 11. (a) Aliho tẹlẹ mẹ wẹ tẹnmẹ-yinkọ lọ “Klisti” yin yiyizan nado dlẹnalọdo Jesu te? (b) Naegbọn mí dona hẹn ẹn diun dọ mí to Jesu Klisti hodo?
10 To Biblu mẹ, tẹnmẹ-yinkọ lọ “Klisti” yin yiyizan nado dlẹnalọdo Jesu to aliho voovo mẹ, enẹ wẹ Jesu Klisti, Klisti Jesu podọ Klisti lọ. Jesu lọsu wẹ yí hogbe lọ “Jesu Klisti” zan jẹnukọn, e yí tẹnmẹ-yinkọ lọ zan bọdo yinkọ etọn go. Whenue e to dẹ̀ho hlan Otọ́ etọn, e dọmọ: “Ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.” (Joh. 17:3) Wefọ ehe dọ̀n ayidonugo wá mẹhe Jiwheyẹwhe dohlan bọ e wá lẹzun Mẹyiamisisadode etọn ji hezeheze. Eyin tẹnmẹ-yinkọ lọ jẹnukọnna yinkọ lọ—enẹ wẹ “Klisti Jesu”—e nọ dọ̀n ayidonugo wá otẹn kavi ogántẹn etọn ji. (2 Kọl. 4:5) Whenue hogbe alọdlẹndonu tọn he yin “lọ” yin yiyizan bọdo tẹnmẹ-yinkọ lọ go, enẹ wẹ “Klisti lọ,” ehe yin aliho devo nado zinnudo ogántẹn Jesu tọn ji taidi Mẹssia lọ.—Mat. 16:16.
11 Mahopọnna lehe tẹnmẹ-yinkọ lọ “Klisti” yin yiyizan nado dlẹnalọdo Jesu do, e nọ zinnudo nugbo tangan ehe ji: Dile etlẹ yindọ Ovi Jiwheyẹwhe tọn wá aigba ji taidi gbẹtọ bo hẹn ojlo Otọ́ etọn tọn zun yinyọnẹn, e ma yin gbẹtọ kavi yẹwhegán tata de poun gba; Mẹyiamisisadode Jehovah tọn wẹ e yin. Mí dona hẹn ẹn diun dọ mí to Mẹyiamisisadode ehe hodo.
Jesu Wẹ Aliho Dopo Akàn lọ Na Whlẹngán
12. Etẹwẹ Jesu dọna apọsteli Tọmasi, he tindo zẹẹmẹ na mí?
12 Whẹwhinwhẹ́n tangan devo he wutu mí dona to Mẹssia lọ hodo sọawuhia to nuhe Jesu dọna apọsteli nugbonọ etọn lẹ mẹ, ojlẹ vude jẹnukọnna okú etọn. To whenue Jesu to gblọndo na kanbiọ Tọmasi tọn bo dọ dọ emi na yì wleawu otẹn de tọn dai na yé, e dọmọ: “Yẹn wẹ aliho lọ, nugbo, po ogbẹ̀ po; mẹde ma sọgan wá Otọ́ dè, adavo gbọn yẹn dali.” (Joh. 14:1-6) Apọsteli nugbonọ 11 lọ lẹ wẹ Jesu to hodọna to whenẹnu. E dopagbe otẹn de tọn na yé to olọn mẹ, ṣigba hogbe etọn lẹ sọ tindo zẹẹmẹ na mẹhe tindo todido nado nọgbẹ̀ kakadoi to aigba ji lẹ. (Osọhia 7:9, 10; 21:1-4) Gbọnna?
13. Linlẹn tẹ mẹ wẹ Jesu yin “aliho lọ” te?
13 Jesu Klisti wẹ “aliho lọ.” Enẹ wẹ yindọ, ewọ kẹdẹ ji wẹ mí sọgan gbọn nado dọnsẹpọ Jiwheyẹwhe. Ehe yin nugbo to whẹho odẹ̀ tọn mẹ, na to dẹ̀hiho gbọn Jesu kẹdẹ gblamẹ wẹ mí sọgan deji dọ Otọ́ lọ na na mí nudepope he mí biọ sọgbe hẹ ojlo Etọn. (Joh. 15:16) Ṣigba, Jesu yin “aliho lọ” to linlẹn devo mẹ ga. Ylando ko hẹn gbẹtọvi lẹ jẹla sọn Jiwheyẹwhe dè. (Isa. 59:2) Jesu yí “ogbẹ̀ etọn do basi ofligọ na mẹsusu.” (Mat. 20:28) Taidi kọdetọn de, Biblu basi zẹẹmẹ dọmọ: ‘Ohùn Jesu Klisti tọn klọ́ mí sọn ylando lẹpo mẹ.’ (1 Joh. 1:7) Gbọnmọ dali, Ovi lọ hùn aliho whẹgbigbọ hẹ Jiwheyẹwhe tọn dote. (Lom. 5:8-10) Yise tintindo to Jesu mẹ po tonusisena ẹn po kẹdẹ wẹ na hẹn mí tindo haṣinṣan pẹkipẹki de hẹ Jiwheyẹwhe.—Joh. 3:36.
14. Linlẹn tẹ mẹ wẹ Jesu yin alọdlẹndo taidi “nugbo” te?
14 E ma yin na Jesu dọho bo nọgbẹ̀ sọgbe hẹ nugbo lọ to whepoponu kẹdẹ wutu wẹ zọ́n bọ e do yin alọdlẹndo taidi “nugbo” gba, ṣigba na dọdai susu he yin kinkàndai gando Mẹssia lọ go lẹpo mọ hẹndi to ewọ mẹ wutu. “Mahopọnna lehe opagbe Jiwheyẹwhe tọn lẹ sù sọ,” wẹ apọsteli Paulu wlan, “yé ko lẹzun Mọwẹ gbọn ewọ gblamẹ.” (2 Kọl. 1:20, NW) “Oyẹ̀ onú dagbe he ja lẹ tọn” he Osẹ́n Mose tọn bẹhẹn lẹ tlẹ sọ mọ hẹndi to Klisti Jesu mẹ. (Heb. 10:1; Kọl. 2:17) Jesu wẹ omẹ dopo gee he ji dọdai lẹpo sinai do, podọ yé tá hinhọ́n do adà tangan he e na yiwà to lẹndai Jehovah tọn mẹ ji. (Osọhia 19:10) Nado mọaleyi sọn hẹndi lẹndai Jiwheyẹwhe tọn mẹ, mí dona hodo Mẹssia lọ.
15. Linlẹn tẹ mẹ wẹ Jesu yin alọdlẹndo taidi “ogbẹ̀” te?
15 Jesu yin “ogbẹ̀,” na e fli gbẹtọ lẹ gọ̀ po ohùn etọn po, podọ ogbẹ̀ madopodo yin nunina de sọn Jiwheyẹwhe dè gbọn “Jesu Klisti Oklunọ mítọn” gblamẹ. (Lom. 6:23) Jesu sọ yin “ogbẹ̀” na mẹhe kú lẹ. (Joh. 5:28, 29) Humọ, sọ lẹnnupọndo nuhe e na wà taidi Yẹwhenọ Daho to Gandudu Owhe Fọtọ́n tọn etọn whenu ji. Na nugbo tọn, e na na mẹjidugando etọn he tin to aigba ji lẹ whlẹngán madopodo sọn ylando po okú po si!—Heb. 9:11, 12, 28.
16. Whẹwhinwhẹ́n tẹwẹ mí tindo nado nọ hodo Jesu?
16 To whelọnu lo, gblọndo he Jesu na Tọmasi tindo zẹẹmẹ titengbe de na mí. Jesu wẹ aliho lọ nugbo po ogbẹ̀ po. Ewọ wẹ Jiwheyẹwhe dohlan aihọn mẹ, na aihọn nido mọ whlẹngán gbọn ewọ gblamẹ. (Joh. 3:17) Podọ mẹdepope ma sọgan wá Otọ́ dè adavo gbọn ewọ gblamẹ. Biblu dọ to aliho he họnwun mẹ dọmọ: “Whlẹngán masọ tin to mẹdevo dè; na oyín de ma tin to olọn glọ he yè namẹ to gbẹtọ mẹ he yè nado whlẹn mí gán.” (Owalọ lẹ 4:12) Enẹwutu, mahopọnna nudepope he mí ko yise wayi, nuyọnẹnnu wẹ e na yin nado tindo yise to Jesu mẹ bo hodo e bosọ gbọnmọ dali mọ ogbẹ̀.—Joh. 20:31.
Mí Yin Gbedena Nado Dotoaina Klisti
17. Naegbọn e do yin nujọnu na mí nado dotoaina Ovi Jiwheyẹwhe tọn?
17 Pita, Johanu po Jakobu po yí nukun yetọn do mọ wunmẹdidiọ Jesu tọn. To whenẹnu, yé sè ogbè de sọn olọn mẹ dọmọ: ‘Ehe wẹ Ovi yiwanna ṣie; mẹhe ko yin dide lọ. Mì nọ dotoaina ẹn.’ (Luku 9:28, 29, 35) Mí dona yí nukun nujọnu tọn do pọ́n gbedide lọ nado nọ setonuna Mẹssia lọ.—Hia Owalọ lẹ 3:22, 23.
18. Nawẹ mí sọgan dotoaina Jesu Klisti gbọn?
18 Todidoai na Jesu nọ biọ dọ mí ni ‘nọ pọ́n ẹn hlan tlintlin bo nọ lẹnnupọndo apajlẹ etọn ji po sọwhiwhe po.’ (Heb. 12:2, 3) Enẹwutu, mí na wà dagbe nado ‘nọ yí sọwhiwhe do doayi’ nuhe mí nọ hia gandego to Biblu mẹ podọ to owe “afanumẹ nugbonọ, nuyọnẹntọ” lọ tọn lẹ mẹ go, gọna nuhe mí nọ sè gandego to opli Klistiani tọn lẹ ji. (Heb. 2:1; Mat. 24:45) Taidi lẹngbọ Jesu tọn lẹ, mì gbọ mí ni yí jejejininọ do dotoaina ẹn bo hodo e.—Joh. 10:27.
19. Etẹwẹ na gọalọna mí nado to Klisti hodo zọnmii?
19 Be mí sọgan penugo nado to Klisti hodo zọnmii mahopọnna nudepope he to jijọ ya? Mọwẹ, mí sọgan wàmọ eyin mí nọ “hẹn ohia ohó tọn he pegan lọ go gligli” gbọn nuhe mí plọn lẹ yíyí do yizan mẹ “to yise po owanyi po mẹ, he tin to Klisti Jesu mẹ” dali.—2 Tim. 1:13.
Etẹwẹ Hiẹ Plọn?
• Naegbọn “Klisti” hihodo sọgan gọalọna mí nado wleawuna haṣinṣan pẹkipẹki de hẹ Jehovah?
• Naegbọn Jesu hihodo do yin nudopolọ po apajlẹ Jehovah tọn hihodo po?
• Linlẹn tẹ mẹ wẹ Jesu yin “aliho lọ, nugbo, po ogbẹ̀ po” te?
• Naegbọn mí dona dotoaina Mẹyiamisisadode Jehovah tọn?
[Kanbiọ Oplọn tọn lẹ]
[Yẹdide to weda 29]
Nuplọnmẹ Jesu tọn lẹ do pọndohlan yiaga Jehovah tọn hia
[Yẹdide to weda 30]
Mí dona hodo Mẹyiamisisadode Jehovah tọn lọ po nugbonọ-yinyin po
[Yẹdide to weda 32]
Jehovah dọmọ: ‘Ehe wẹ Ovi yiwanna ṣie. Mì nọ dotoaina ẹn’