Sooq Kristusi malittariaqarpa?
Sooq Kristusi malittariaqarpa?
“Uannik malinnikkumasoq imminut isumakkiissaaq . . . [malissavaangalu].” — LUKASI 9:23.
1, 2. Kristusimik sooq malinnittariaqarnitsinnik eqqarsaatiginninnissaq sooq pingaaruteqarpa?
JEHOVA ilissi inuusuttut ilissilu soqutiginnilerlaat nunarsuarmi imminut kiffartortorpassuit imminillu pallorfiginnittorpassuit akornanniittusi takullusi qanoq nuannaartartigissava! Biibilimik atuaqqissaarnerujartortillusi, kristumiut ataatsimiinnerinut ilaajuartillusi sallusuissutillu inuunartut Guutip oqaasianiittut pillugit ilisimasaqarnerujartortillusi Jiisusip kajumissaarutaa una eqqarsaatigeqqissaartariaqassavarsi: “Uannik malinnikkumasoq imminut isumakkiissaaq, ullullu tamaasa sanningasulini [nappagaq anniartitaaffini, NV] ersullugu malissavaanga.” (Lukasi 9:23) Tassa Jiisusi oqarpoq imminik malinnikkumasut imminut naaggaartariaqartut. Taamaattumik Kristusimik, Missiarsimik, malinnikkumanitsinnut pissutaasunik misissuinissarput pingaaruteqarpoq. — Matthæusi 16:13-16.
2 Ilavummi Jiisusip tumai malillugit saqereersut? Taakku kajumissaarneqarput “suli annerusumik” taamaalioqqullugit. (1 Thessalonikamiut 4:1, 2) Pallorfiginninnermik ilumoortumik aallussilersimanerput qanittukkuugaluarpat qangaliliugaluarpalluunniit Kristusimik malinninnissamut pissutaasunik eqqarsaatiginninneq Paulusip ulluinnarni inuunitsinni suli annerusumik malinninnissamik kajumissaarutaa malillugu iliornissamut iluaqutigissavarput. Kristusimik malinninnissamik kissaateqartariaqarnitsinnut pissutaasut tallimat sammeriartigit.
Jehovamut qaninnerulerumalluni
3. Sutigut marlutsigut Jehova ilisarisimanerulersinnaavarput?
3 Paulusi ‘Areopagosip qeqqaniilluni’ Athenimiut oqaluffigigamigit ima oqarpoq: ‘Guutip sumi najugaqarnissaat aalajangersumik piffissalerpaa killissalerlugulu — Guuti ujaqqullugu satsillutik nanisinnaaneritsik, uffa ilatsinnit kimilluunniit ungasinngikkaluartoq.’ (Apustilit Suliaat 17:22, 26, 27) Tassa Guuti ujarsinnaallugulu ilisarisimalersinnaavarput. Assersuutigalugu pinngortitarsuarmi Guutip pissusiinut sunillu pisinnaasaqarneranut takussutissarpassuit takusinnaavavut. Guutip pinngortissimasai tamaasa qujamasulluta eqqarsaatigigutsigit Guuti pillugu ilikkagarpassuaqarsinnaavugut. (Romamiut 1:20) Aammali oqaatsimini allanneqarsimasumi, Biibilimi, imminut tunngasunik amerlasuunik paasinarsisitsisimavoq. (2 Timotheusi 3:16, 17) ‘Piliarsuinik isumaliutiginninnerujartortilluta’ ‘suliaanillu eqqarsaatiginninnerujartortilluta’ ilisarisimanerujartortarparput. — Tussiaat 77:13.
4. Kristusimik malinninnitsigut qanoq ililluta Jehova ilisarisimanerulerlugulu taassumunnga qaninnerulersinnaavugut?
4 Jehova ilisarisimanerulerumagutsigu qaninnerulerumagutsigulu, taamaaliorsinnaavugut Kristusimik malinninnikkut. Jiisusip “silarsuaq pinngunngikkallarmalli” Ataataminiilluni naalannassuserisimasaa eqqarsaatigeriaruk. (Johannesi 17:5) Taanna ‘Guutip pinngortitaasa pilerfigaat’. (Saqqummersitat 3:14) ‘Pinngortitani tamani erniusut siullersarimmanni’ ukiuni kisissaanngitsuni Ataatani, Jehova, qilammeeqatigaa. Inuttulli inunngunngikkallarami uninngaannarani Ataatani najorpaa. Guutip ikinngutigilluarlugulu suleqatigaa. Guuti Jiisusilu taamaalillutik imminnut qaninnerpaanngorput, allanillu taakkunatut asaqatigiitsigisoqarsimanngisaannarpoq. Jiisusip Ataatami misigissusii, pissusii periaasiilu qimerluuinnanngilai, aammali Ataataq pillugu ilikkarneqarsinnaasut tamaasa pigiliuppai namminerlu pissuserilerlugit. Tamatuma kingunerisaanik erneq naalattoq taanna Ataatamisorluinnaq ilerpoq — aap, ima angusisartigilerpoq Biibilimi “Guutip takussaanngitsup assinga”-nik taaneqarluni. (Kolossemiut 1:15) Uagut Kristusimik malinneqqissaarnitsigut Jehova ilisarisimanerulersinnaavarput taassumunngalu qaninnerulersinnaalluta.
Jehova assiginerulerumallugu
5. Suli annerusumik Jehovamik ilaarsinissamut suna iluaqutigissavarput, tamatumunngalu suna pissutaava?
5 ‘Guutip imminut assililluni immisullu ittussatut’ pinngortippaatigut, taamaattumillu Guutip pissusiinik ersersitsisinnaavugut. (1 Mosesi 1:26) Apustilip Paulusip kristumiut kajumissaarpai ‘Guuti maligassareqqullugu taassumunnga qitornaasutut asasaasutut’. (Efesosimiut 5:1) Kristusimik malinninneq Ataatatsinnik qilammiusumik ilaarsinissamut iluaqutigissavarput. Taassuminnga malinninneq iluaqutigissavarput Jiisusi Guutip eqqarsartaasianik, misigissusiinik kinaassusianillu ersersitsilluarnerummat taannalu pillugu allanit ilinniartitsilluarnerummat. Jiisusip nunarsuarmiikkallarami Jehovap aqqa ilisimaneqalersiinnanngilaa. Guutip kinaassusia pissusiilu uagutsinnut ersersippai. (Atuaruk Matthæusi 11:27). Taamaaliorpoq oqaatsimigut iliuutsimigullu, ilinniartitsinermigut maligassiuinermigullu.
6. Jiisusip ilinniartitsinera Jehova pillugu sumik paasinarsisitsiva?
6 Jiisusip ilinniartitsigaangami oqaluttuuttarpaatigut Guutip sumik piumaffigineraatigut aamma Guutip imminik pallorfiginnittut qanoq misigissuseqarfiginerai. (Matthæusi 22:36-40; Lukasi 12:6, 7; 15:4-7) Assersuutigalugu Inatsisit Qulit ilaat — “allasiussanngilatit” — issuareerlugu nassuiarpaa angutip iliuuseqannginnerani uummataani susoqartarnersoq. Jiisusi ima oqarpoq: “Kialuunniit allap nulia pilerigalugu isigiguniuk taanna uummatimigut allasiorfigereerpaa.” (2 Mosesi 20:14; Matthæusi 5:27, 28) Jiisusip farisiiarit Mosesip inatsisaaniittumut nassuiaataat — “tullit asassavat akeqqallu uumissorlugu” — saqqummiutereerlugu, oqaluttuaraa Jehovap tamanna qanoq isigineraa ima oqarluni: “Akeqqasi asasigit, ilissinnillu qinuginnittut qinnussigit.” (Matthæusi 5:43, 44; 2 Mosesi 23:4; 3 Mosesi 19:18) Jehovap qanoq eqqarsartarneranik, qanoq isumaqarneranik uagutsinnullu sunik piumasaqaateqarneranik paasinninnerput taassuminnga ilaarsinerunissamut iluaqutigissavarput.
7, 8. Jiisusip maligassiaa Jehova pillugu sumik ilinniarfigaarput?
7 Jiisusip aamma maligassiuinermigut ersersippaa Ataataq qanoq ittuunersoq. Iivangkiiliuni Jiisusip napparsimasut nalligingaarai, aliasuttut misiginneqatigigai ajoqersukkallu meeqqanut avoqqaarlernerat kamaatigigaa atuaraangatsigu, taava Ataatap misigissusii takusarpavut, ilaa? (Markusi 1:40-42; 10:13, 14; Johannesi 11:32-35) Eqqarsaatigiuk Jiisusi Jehovap pissusiinik pingaarnernik qanoq ersersitsisartoq. Tupinnartuliortarneratigut erserpoq pissaaneqangaartoq. Aamma pissaanini nammineq iluaqutissaminut allanulluunniit ajoqutaasumik atunngilaa. (Lukasi 4:1-4) Naapertuilluassusia niuertut piumatuut naalaffimmit anisimmagit erseqqippoq. (Markusi 11:15-17; Johannesi 2:13-16) Ilinniartitseriaasia oqaasiilu nuannersut inuit uummataannut annguttut Salomop ilisimassusianik akimuisumik ilisimassuseqarneranut ersiutaapput. (Matthæusi 12:42) Jiisusip asanninnera pillugu pissutissaqarluartumik Biibilimi allassimavoq ‘annerusumik asanninneqanngitsoq’. — Johannesi 15:13.
8 Guutip ernerata Jehova oqaasiisigut iliuusiisigullu ima assigilluinnartigaa ima oqarsinnaalluni: “Uannik takunnittup Ataataq takuaa.” (Atuaruk Johannesi 14:9-11). Tassa Kristusimik malinninneq Jehovamik ilaarsineruvoq.
Jiisusi Jehovap Tanitaraa
9. Qanga aamma qanoq ililluni Jiisusi tassaalerpa Jehovap Tanitaa?
9 Maanna ukiumi 29-mi ukiakkut Jiisusi 30-nik ukiulik Johannesimut Kuisisumukarmat pisimasoq eqqarsaatigeriartigu. “[Jiisusi] kuisereerluni erniinnaq imermit qaqimmat qilaat qulaagut ammarput, takuaalu Guutip anersaavata tuisut illuni aqqarfigigaani quliminut pilluni.” Taamatut pisoqarmat Kristusinngorpoq, imaluunniit Missiarsinngorpoq, Jehovallu nammineq nalunaarutigaa Jiisusi maanna Tanitaralugu ima oqarluni: “Tassa ernera asasara, nuannarisara.” (Matthæusi 3:13-17) Tamanna Kristusimik malinnikkumanissamut pissutissaalluarpoq!
10, 11. (a) Taaguut “Kristusi” atermut Jiisusimut tunngatillugu qanoq atorneqartarpa? (b) Sooq Jiisusi Kristusi malitassaraarput?
10 Biibilip grækerisut allassimaqqaarfiini taaguut “Kristusi” Jiisusimut taaguutigitinneqartoq assigiinngitsorpassuartigut atorneqarpoq. Assersuutigalugu atorneqarput “Jiisusi-Kristusi”, “Kristusi-Jiisusi” imaluunniit “Kristusi”. Jiisusip nammineq taaguut “Jiisusi-Kristusi” atoqqaarpaa, taaguut atermi kingornatungaaniitillugu. Ataataminut qinunermini ima oqarpoq: “Inuunerlu naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.” (Johannesi 17:3) Taaguummik “Kristusi”-mik taamatut atueriaatsimi Guutimit aallartitaasoq Tanitanngortorlu malugeqquneqarpoq. “Kristusi-Jiisusi”-mik oqarluni taaguut atip siornatungaanut inissinneqaraangat, inuk malugeqquneqarnani taassuma atorfia, imaluunniit inissisimaffia, malugeqquneqartarpoq. (Romamiut 8:34) Ateq “Jiisusi” ilanngunnagu taaguummik “Kristusi”-mik atuineq Jiisusip Missiarsitut inissisimaffianut erseqqissaataasut ilagaat. — Matthæusi 16:16.
11 Taaguut “Kristusi” Jiisusi pillugu qanoq atorneqaraluarpalluunniit ilumoortoq pingaarutilik manna erseqqissarneqartarpoq: Guutip ernera Ataatami piumasaa saqqummiunniarlugu inuttut nunarsuarmut pigaluarluni inuinnaananilu pruffiitiinnaanngilaq; Jehovap Tanitaraa. Taanna malitassaraarput.
Jiisusi Kristusi annaanneqarnissamut aqqutissatuaavoq
12. Jiisusip apustilimut Tuumamut oqaasii uagutsinnuttaaq pingaaruteqartut suuppat?
12 Kristusimik malinnittuarnissamut pissutissaq pingaarutilik alla Jiisusip toqunissani nalunaaquttap-akunnialuinik sioqqullugu apustiliminut aalajaatsunut oqaasiinit erserpoq. Tuumap Jiisusip qimagutissanerarneranut inissaminnillu piareersaajartorniarnerarneranut tunngatillugu apeqqutaanut akissutitut Jiisusi ima oqarpoq: “Uanga aqqutaavunga sallusuissutaallungalu inuussutaallungalu; uakkuinnaq Ataatamut pisoqarsinnaavoq.” (Johannesi 14:1-6) Taamanikkut Jiisusip apustilit aalajaatsut aqqanillit oqaluuppai. Neriorsorpai qilammi inissaqarumaartut, oqaasiili aamma nunarsuarmi naassaanngitsumik inuulernissamik neriuuteqartunut pingaaruteqarput. (Saqqummersitat 7:9, 10; 21:1-4) Qanoq?
13. Jiisusip ‘aqqutaanera’ qanoq paasisariaqarpa?
13 Jiisusi Kristusi ‘aqqutaavoq’. Tassa imaappoq, taamaallaat taanna aqqutigalugu Guutimut qanillisinnaavugut. Qinunermut tunngatillugu aqqutaavoq, taamaallaammi Jiisusi aqqutigalugu qinunitsigut qulakkeersinnaavarput Ataatatta tuniumaaraatigut taassuma piumasaanut naapertuuttumik qinnuigigutsinni. (Johannesi 15:16) Jiisusili aamma allatigut ‘aqqutaavoq’. Ajortip inuit Guutimit avissaartissimavai. (Esaja 59:2) Jiisusip ‘inuunini akissatut tunniuppaa amerlasuut utertinneqaatissaattut’. (Matthæusi 20:28) Biibili naapertorlugu tamatuma kingunerisaanik imaappoq: “Jiisusip aavata tamanik ajortaajassavaatigut.” (1 Johannesi 1:7) Taamaalilluni Erneq Guutimit saammaannartitaanissamut aqqutissiuussivoq. (Romamiut 5:8-10) Jiisusimut upperlutalu naalannikkut akuerisaasumik Guutimut attaveqalersinnaavugut. — Johannesi 3:36.
14. Jiisusi qanoq ililluni ‘sallusuissutaava’?
14 Jiisusi ‘sallusuissutaavoq’ sallusuissummik eqqartuiuarnini malinnittuarninilu pissutigiinnarnagit, aammali Missiarsi pillugu siulittuutit — amerlaqisut — tamarmik imminut eqquutitinneqarnerat pissutigalugu. Apustili Paulusi ima allappoq: ‘Guutip neriorsuutai tamarmik taassumani angerneqarput.’ (2 Korinthimiut 1:20) Allaat ‘ajunngitsuutit nalliuttussat tarraannaat’ Mosesip inatsisaaniittut Kristusimut Jiisusimut eqquutitinneqarput. (Hebræerit 10:1; Kolossemiut 2:17) Jiisusi siulittuutini tamani pingaarnersaavoq, siulittuutillu taakku Jehovap siunertaata naammassineqarnerani taassuma inissisimaffianik pingaarutilimmik paasinarsisitsipput. (Saqqummersitat 19:10) Guutip uagutsinnut siunertaata naammassineqarnera iluaqutigisinnaajumallugu Missiarsi malittariaqarparput.
15. Jiisusip ‘inuussutaanera’ qanoq paasisariaqarpa?
15 Jiisusi ‘inuussutaavoq’ inuit nammineq aamminik pisiarigamigit, aamma inuuneq naassaanngitsoq Guutip “Kristusi-Jiisusimi Naalakkatsinni” tunissutigimmagu. (Romamiut 6:23) Jiisusi aamma toqusimasunut ‘inuussutaavoq’, taakku inuulerseqqissagamigit. (Johannesi 5:28, 29) Aamma eqqarsaatigikkit ukiuni tusindini naalakkersuinermini palasiunertut iliuuseriumaagai. Innuttani nunamiusut ajortimit toqumillu utertinneqaatississavai naassaanngitsumik! — Hebræerit 9:11, 12, 28.
16. Sooq Jiisusi malittariaqarparput?
16 Tassa Jiisusip Tuumamut akissutaa uagutsinnut pingaaruteqartupilussuuvoq. Jiisusi aqqutaallunilu sallusuissutaallunilu inuussutaavoq. Taannaavoq Guutip silarsuarmut aallartitaa silarsuaq taassumuuna annaanneqaqqullugu. (Johannesi 3:17) Taamaallaat taassumuuna Ataatamut pisoqarsinnaavoq. Biibilimi erseqqissumik ima allassimasoqarpoq: “Allakkullumi annaffissaqanngilaq, ilami inuit qilaap ataani atermik allamik tunineqarsimanngillat annaanneqaatissatsinnik.” (Apustilit Suliaat 4:12) Taamaattumik siornatigut qanorluunniit upperisaqarsimagaluarutta silatusaassaagut Jiisusi upperalugulu malikkutsigu taamaalillutalu inuuinnarluta. — Johannesi 20:31.
Peqquneqarpugut Kristusi tusarnaaqqullugu
17. Guutip erneranut naalannissarput sooq pingaaruteqarpa?
17 Petrusi, Johannesi Jaakulu Jiisusip qaqqami naalannarsisitaaneranik takunnittuupput. Taakku nipi qilammeersoq ima oqartoq tusarpaat: “Tassa ernera qinigara. Taanna tusarsiuk.” (Lukasi 9:28, 29, 35) Kristusimut tusarnaarnissamik peqqussut malillugu iliornissaq pingaaruteqarpoq. — Atuaruk Apustilit Suliaat 3:22, 23.
18. Qanoq ililluta Jiisusi Kristusi tusarnaarsinnaavarput?
18 Jiisusimut tusarnaarnermut aamma ilaavoq taassuma maligassiaanik ‘tunaarinninnissaq isiginnittuarnissarlu’. (Hebræerit 12:2, 3) Taamaattumik silatusaassaagut ‘uatsinnut tusarliunneqartut sianigilluaqqissaarniartarutsigit’; aamma taanna pillugu Biibilimik Biibililersaarutinillu ‘inussiamit aalajaallunilu silatuumeersunik’ (NV) atuaraangatta kristumiullu ataatsimiinnerini taanna pillugu tusarnaaraangatta. (Hebræerit 2:1; Matthæusi 24:45) Taassuma paarsisutsitut tusarnaarnissaa malinnissaalu ilungersuutigisigu. — Johannesi 10:27.
19. Kristusimik malinnittuarnissamut suna iluaqutigissavarput?
19 Sunilluunniit nalaataqaraluarluta Kristusi malittuarsinnaavarput? Aap, malittuarsinnaavarput ilikkakkavut naapertorlugit iliuuseqarnitsigut “najoqqutassiaq oqaatsinit peqqissinartunit pisoq” aalajangiusimagutsigu, ‘Kristusimi Jiisusimi upperluta asannillutalu’. — 2 Timotheusi 1:13, NV. (w09 05/15-E)
Suna ilikkarpiuk?
• Sooq Kristusip malinneratigut Jehovamut qaninnerulersinnaavugut?
• Sooq Jiisusimik ilaarsineq Jehovamik ilaarsinerua?
• Jiisusip ‘aqqutaallunilu sallusuissutaallunilu inuussutaanera’ qanoq paasisariaqarpa?
• Sooq Jehovap Tanitaa tusarnaartariaqarparput?
[Atuaqqissaarnermi apeqqutit]
[Qupp. 29-mi assiliartaq]
Jiisusip ajoqersuutai Jehovap eqqarsaataanik qutsissunik ersersitsipput
[Qupp. 30-mi assiliartaq]
Jehovap Tanitaa aalajaalluta malittariaqarparput
[Qupp. 32-mi assiliartaq]
Jehova ima oqaluussivoq: “Tassa ernera . . . Taanna tusarsiuk!”