ហេតុអ្វីយើងគួរធ្វើតាម«គ្រិស្ដ»?
ហេតុអ្វីយើងគួរធ្វើតាម«គ្រិស្ត»?
«បើអ្នកណាចង់មកតាមខ្ញុំ អ្នកនោះត្រូវប្រគល់ខ្លួនឲ្យព្រះ . . . ហើយមកតាមខ្ញុំជាដរាបចុះ»។—លូក. ៩:២៣
១, ២. ហេតុអ្វីបានជាសំខាន់ឲ្យយើងពិចារណាមូលហេតុដែលយើងគួរធ្វើតាម«គ្រិស្ត»?
ព្រះយេហូវ៉ាពិតជារំភើបចិត្តមែន! ពេលឃើញអ្នករាល់គ្នាដែលជាអ្នកចាប់អារម្មណ៍ថ្មីៗនិងប្អូនៗវ័យក្មេងក្នុងចំណោមអ្នកគោរពប្រណិប័តន៍ជាច្រើននាក់របស់លោក។ កាលដែលអ្នកបន្តរៀនគម្ពីរ ទៅកិច្ចប្រជុំរបស់ពួកគ្រិស្តសាសនិកយ៉ាងទៀងទាត់ និងមានចំណេះកាន់តែច្រើនអំពីសេចក្ដីពិតក្នុងគម្ពីរដែលសង្គ្រោះជីវិត នោះអ្នកត្រូវគិតយ៉ាងហ្មត់ចត់អំពីសេចក្ដីអញ្ជើញរបស់លោកយេស៊ូដែលថា៖ «បើអ្នកណាចង់មកតាមខ្ញុំ អ្នកនោះត្រូវប្រគល់ខ្លួនឲ្យព្រះ រួចលីបង្គោលទារុណកម្ម របស់ខ្លួនរៀងរាល់ថ្ងៃ ហើយមកតាមខ្ញុំជាដរាបចុះ»។ (លូក. ៩:២៣) លោកយេស៊ូមានប្រសាសន៍ថាការប្រគល់ខ្លួនឲ្យព្រះហើយកាន់តាមលោកជាអ្វីដែលយើងគួរធ្វើ។ បើដូច្នេះ គឺសំខាន់ឲ្យយើងពិចារណាអំពីមូលហេតុដែលយើងគួរធ្វើតាម«គ្រិស្ត»។—ម៉ាថ. ១៦:១៣-១៦
២ ចុះយ៉ាងណាចំពោះយើងដែលកំពុងដើរតាមលំអានដានរបស់លោកយេស៊ូគ្រិស្តឥឡូវ? យើងត្រូវបានដាស់តឿនឲ្យ«បន្តធ្វើដូច្នោះឲ្យកាន់តែប្រសើរឡើងថែមទៀត»។ (១ថែ. ៤:១, ២) សូម្បីតែយើងទើបគោរពប្រណិប័តន៍តាមរបៀបត្រឹមត្រូវឬបានធ្វើដូច្នេះយូរឆ្នាំហើយក៏ដោយ ការរំពឹងគិតអំពីមូលហេតុយើងធ្វើតាមគ្រិស្ត នោះនឹងជួយយើងឲ្យអនុវត្តតាមការដាស់តឿនរបស់ប៉ូល ហើយធ្វើតាមគ្រិស្តឲ្យបានកាន់តែប្រសើរឡើងរៀងរាល់ថ្ងៃ។ សូមឲ្យយើងពិនិត្យមើលមូលហេតុប្រាំយ៉ាងដែលយើងគួរមានចិត្តចង់ធ្វើតាមគ្រិស្ត។
ដើម្បីរឹតតែជិតស្និទ្ធជាមួយព្រះយេហូវ៉ា
៣. តើយើងអាចស្គាល់ព្រះយេហូវ៉ាតាមវិធីពីរណា?
៣ ពេលប៉ូល«ឈរនៅកណ្ដាលអារីយ៉ូស»និយាយទៅអ្នកក្រុងអាថែន នោះគាត់ពោលថា៖ «[ព្រះ]បានចេញបញ្ជាស្តីអំពីគ្រាកំណត់ ក៏បានដាក់កម្រិតលើទីអាស្រ័យនៅរបស់មនុស្សជាតិ ដើម្បីឲ្យពួកគេរកព្រះ ប្រសិនបើពួកគេនឹងស្វះស្វែងរកលោកទាល់តែឃើញ ទោះជាការពិត លោកមិននៅឆ្ងាយពីយើងម្នាក់ៗក៏ដោយ»។ (សកម្ម. ១៧:២២, ២៦, ២៧) យើងអាចរកព្រះ ហើយពិតជាអាចស្គាល់លោកច្បាស់បាន។ ជាឧទាហរណ៍ ពេលយើងមើលអ្វីដែលព្រះបានបង្កើត នោះយើងរៀនជាច្រើនអំពីគុណសម្បត្ដិនិងសមត្ថភាពរបស់លោក។ ការរំពឹងគិតដោយឲ្យតម្លៃចំពោះស្នាដៃរបស់ព្រះពិតជាអាចបង្រៀនយើងច្រើនណាស់អំពីអ្នកបង្កើត។ (រ៉ូម ១:២០) ព្រះយេហូវ៉ាក៏បានកត់ទុកព័ត៌មានអំពីលោកក្នុងគម្ពីរដែលជាបណ្ដាំរបស់លោក។ (២ធី. ៣:១៦, ១៧) ប្រសិនបើយើង‹រំពឹងគិតពីគ្រប់ទាំងការរបស់ព្រះ›ហើយ‹ពិចារណាពីកិច្ចដែលលោកធ្វើទាំងប៉ុន្មាន›ឲ្យបានកាន់តែច្រើនឡើង នោះយើងអាចស្គាល់ព្រះយេហូវ៉ាកាន់តែច្បាស់ជាង។—ទំនុក. ៧៧:១២
៤. តើការធ្វើតាមគ្រិស្តជួយយើងឲ្យមានចំណងមេត្រីភាពជិតស្និទ្ធជាមួយព្រះយេហូវ៉ាយ៉ាងដូចម្ដេច?
៤ វិធីដ៏ល្អប្រសើរមួយទៀតដើម្បីឲ្យបានរឹតតែជិតស្និទ្ធជាមួយព្រះយេហូវ៉ាគឺដោយធ្វើតាមគ្រិស្ត។ ពិតមែនហើយ លោកយេស៊ូមានសិរីរុងរឿងដោយនៅក្បែរបិតារបស់លោក«កាលមិនទាន់មានពិភពលោកនៅឡើយ»! (យ៉ូន. ១៧:៥) លោកជា«អ្នកដំបូងបង្អស់ដែលព្រះបានបង្កើត»។ (បប. ៣:១៤) ដោយសារលោកជា«បុត្រច្បងក្នុងចំណោមអ្វីៗទាំងអស់ដែលព្រះបានបង្កើត» លោកបានរស់នៅអស់រាប់លានឆ្នាំជាមួយព្រះយេហូវ៉ាដែលជាបិតា។ មុនលោកយេស៊ូមានកំណើតជាមនុស្ស នោះលោកមិនគ្រាន់តែចំណាយពេលជាមួយបិតាប៉ុណ្ណោះឡើយ។ លោកជាមិត្តជិតស្និទ្ធរបស់ព្រះ លោកបានធ្វើការយ៉ាងរីករាយជាមួយព្រះដែលមានឫទ្ធានុភាពខ្លាំងក្លាបំផុត ហើយមានចំណងមេត្រីភាពដ៏ជិតស្និទ្ធបំផុតជាមួយបិតា ដែលគ្មានអ្នកណាអាចជិតស្និទ្ធជាងនេះឡើយ។ លោកយេស៊ូមិនគ្រាន់តែបានសង្កេតមើលរបៀបដែលបិតាប្រព្រឹត្តដោយកត់សម្គាល់អារម្មណ៍និងគុណសម្បត្ដិរបស់បិតាប៉ុណ្ណោះទេ ប៉ុន្តែលោកបានធ្វើឲ្យខ្លួនមានគុណសម្បត្ដិដូចបិតាបេះបិទ ស្របតាមអ្វីៗទាំងអស់ដែលលោកបានរៀនអំពីបិតា។ ជាលទ្ធផល បុត្រដែលចេះស្ដាប់បង្គាប់នេះមានលក្ខណៈដូចបិតាបេះបិទដល់ម្ល៉េះដែលគម្ពីររៀបរាប់ថា៖ «លោកនិងព្រះដែលយើងមើលមិនឃើញមានលក្ខណៈដូចគ្នាទាំងស្រុង»។ (កូឡ. ១:១៥) ដោយធ្វើតាមគ្រិស្តយ៉ាងដិតដល់ យើងអាចមានចំណងមេត្រីភាពជិតស្និទ្ធជាងជាមួយព្រះយេហូវ៉ា។
ដើម្បីយកតម្រាប់តាមព្រះយេហូវ៉ាកាន់តែច្រើន
៥. តើអ្វីដែលនឹងជួយឲ្យយើងយកតម្រាប់តាមព្រះយេហូវ៉ាឲ្យបានកាន់តែច្រើន? ហើយហេតុអ្វី?
៥ ព្រះបានបង្កើតយើងឲ្យ‹ដូចជារូបលោក ឲ្យមានភាពដូចលោក› ដូច្នេះយើងមានលទ្ធភាពបង្ហាញគុណសម្បត្ដិរបស់ព្រះ។ (លោ. ១:២៦) សាវ័កប៉ូលបានដាស់តឿនគ្រិស្តសាសនិកឲ្យ«យកតម្រាប់តាមព្រះ ក្នុងនាមជាកូនជាទីស្រឡាញ់របស់លោក»។ (អេភ. ៥:១) ការធ្វើតាមគ្រិស្តជួយយើងឲ្យយកតម្រាប់តាមព្រះរបស់យើងដែលជាបិតានៅស្ថានសួគ៌។ នេះគឺដោយសារគ្មាននរណាបានយកតម្រាប់តាមគំនិតនិងការប្រព្រឹត្តរបស់ព្រះល្អជាងលោកយេស៊ូ ហើយក៏គ្មាននរណាអាចបង្រៀនយើងអំពីព្រះយេហូវ៉ាច្បាស់ជាងលោកដែរ។ ពេលលោកយេស៊ូនៅផែនដី លោកមិនគ្រាន់តែប្រាប់យើងឲ្យស្គាល់នាមរបស់ព្រះយេហូវ៉ាប៉ុណ្ណោះទេ ផ្ទុយទៅវិញ លោកបានបង្ហាញយើងឲ្យស្គាល់ច្បាស់ថា ព្រះជាបុគ្គលបែបណា។ (សូមអាន ម៉ាថាយ ១១:២៧) លោកយេស៊ូបានធ្វើដូច្នោះដោយសម្ដីនិងការប្រព្រឹត្ត ពោលគឺសេចក្ដីបង្រៀននិងគំរូរបស់លោក។
៦. តើសេចក្ដីបង្រៀនរបស់លោកយេស៊ូបង្ហាញអ្វីអំពីព្រះយេហូវ៉ា?
៦ តាមរយៈសេចក្ដីបង្រៀនរបស់លោកយេស៊ូ នោះលោកពន្យល់អំពីអ្វីដែលព្រះតម្រូវពីយើង ហើយអំពីអារម្មណ៍របស់ព្រះស្តីអំពីអ្នកគោរពប្រណិប័តន៍លោក។ (ម៉ាថ. ២២:៣៦-៤០; លូក. ១២:៦, ៧; ១៥:៤-៧) ជាឧទាហរណ៍ ក្រោយពីលោកយេស៊ូដកស្រង់ក្រឹត្យវិន័យមួយពីចំណោមក្រឹត្យវិន័យ១០ប្រការដែលថា ‹អ្នកមិនត្រូវផិតក្បត់ឲ្យសោះ› នោះលោកពន្យល់អំពីទស្សនៈរបស់ព្រះចំពោះអ្វីដែលកើតឡើងក្នុងចិត្តរបស់បុរសម្នាក់យូរមុនគាត់ប្រព្រឹត្តអំពើនោះ។ លោកមានប្រសាសន៍ថា៖ «ខ្ញុំប្រាប់អ្នករាល់គ្នាថា អ្នកណាដែលសម្លឹងមើលស្រីរហូតដល់កើតមានចិត្តស្រើបស្រាល អ្នកនោះបានផិតក្បត់ជាមួយនឹងនាងនៅក្នុងចិត្តរួចហើយ»។ (និក្ខ. ២០:១៤; ម៉ាថ. ៥:២៧, ២៨) ម្យ៉ាងទៀត ក្រោយរៀបរាប់អំពីរបៀបដែលពួកផារិស៊ីបកស្រាយឃ្លាមួយក្នុងច្បាប់ដែលថា៖ «អ្នកត្រូវស្រឡាញ់អ្នកជិតខាងតែត្រូវស្អប់សត្រូវ» នោះលោកយេស៊ូបានប្រាប់អំពីគំនិតរបស់ព្រះយេហូវ៉ាដោយមានប្រសាសន៍ថា៖ «ចូរបន្តស្រឡាញ់សត្រូវរបស់អ្នក ហើយអធិដ្ឋានដើម្បីអ្នកដែលបៀតបៀនអ្នក»។ (ម៉ាថ. ៥:៤៣, ៤៤; និក្ខ. ២៣:៤; លេវី. ១៩:១៨) ដូច្នេះ ការយល់ដឹងអំពីអារម្មណ៍របស់ព្រះ និងរបៀបដែលលោកគិត ព្រមទាំងអ្វីដែលលោកតម្រូវពីយើង នោះនឹងជួយយើងឲ្យយកតម្រាប់តាមលោកឲ្យបានកាន់តែប្រសើរឡើង។
៧, ៨. ពីគំរូរបស់លោកយេស៊ូ តើយើងរៀនអ្វីខ្លះអំពីព្រះយេហូវ៉ា?
៧ ម្យ៉ាងទៀត តាមរយៈគំរូរបស់លោកយេស៊ូ លោកបានបង្ហាញឲ្យឃើញលក្ខណៈរបស់បិតានៅស្ថានសួគ៌។ សៀវភៅដំណឹងល្អក្នុងគម្ពីររៀបរាប់ថា លោកយេស៊ូមានចិត្តអាណិតអាសូរចំពោះមនុស្សដែលខ្វះខាត លោកយល់ចិត្តអស់អ្នកដែលរងទុក្ខលំបាក ហើយលោកក៏ទើសចិត្តនឹងអ្នកកាន់តាមលោកដែលស្តីបន្ទោសកូនក្មេង។ ដូច្នេះ ពេលយើងអានកំណត់ហេតុដែលបញ្ជាក់អំពីអារម្មណ៍របស់លោកយេស៊ូ យើងក៏ដឹងថាបិតារបស់លោកក៏មានអារម្មណ៍ដូចគ្នាដែរ មែនទេ? (ម៉ាក. ១:៤០-៤២; ១០:១៣, ១៤; យ៉ូន. ១១:៣២-៣៥) សូមគិតអំពីរបៀបដែលការប្រព្រឹត្តរបស់លោកយេស៊ូជួយយើងឲ្យស្គាល់គុណសម្បត្ដិរបស់ព្រះ។ អព្ភូតហេតុដែលគ្រិស្តបានធ្វើបង្ហាញពីឫទ្ធានុភាពដែលលោកមាន។ ប៉ុន្តែ លោកមិនដែលប្រើឫទ្ធានុភាពនោះដើម្បីប្រយោជន៍ផ្ទាល់ខ្លួន ឬដើម្បីធ្វើបាបអ្នកដទៃទេ។ (លូក. ៤:១-៤) លោកពិតជាបង្ហាញថាលោកស្រឡាញ់យុត្ដិធម៌មែន ពេលលោកបណ្ដេញទាំងអ្នកទិញទាំងអ្នកលក់ដែលលោភលន់ចេញពីវិហារ! (ម៉ាក. ១១:១៥-១៧; យ៉ូន. ២:១៣-១៦) លោកយេស៊ូប្រើពាក្យពីរោះនិងសេចក្ដីបង្រៀនដើម្បីមានឥទ្ធិពលលើចិត្តមនុស្ស ហើយនេះបង្ហាញថាលោកមានប្រាជ្ញាច្រើន«ជាងសាឡូម៉ូន»។ (ម៉ាថ. ១២:៤២) សេចក្ដីស្រឡាញ់ដែលលោកយេស៊ូបង្ហាញដោយលះបង់ជីវិតដើម្បីអ្នកឯទៀតបានត្រូវរៀបរាប់យ៉ាងល្អក្រៃលែងពេលគម្ពីរចែងថា៖ «គ្មានអ្នកណាមានសេចក្ដីស្រឡាញ់ច្រើនជាង»នេះ។—យ៉ូន. ១៥:១៣
៨ ក្នុងអ្វីៗទាំងអស់ដែលលោកយេស៊ូដែលជាបុត្រនៃព្រះពោលនិងប្រព្រឹត្ត បង្ហាញយ៉ាងល្អឥតខ្ចោះពីគុណសម្បត្ដិរបស់ព្រះយេហូវ៉ាដល់ម្ល៉េះដែលលោកមានប្រសាសន៍ថា៖ «អ្នកណាដែលបានឃើញខ្ញុំ អ្នកនោះបានឃើញបិតាដែលនៅស្ថានសួគ៌ហើយ»។ (សូមអាន យ៉ូហាន ១៤:៩-១១) ការធ្វើតាមគ្រិស្តគឺដូចគ្នានឹងការធ្វើតាមព្រះយេហូវ៉ា។
លោកយេស៊ូជាអ្នកដែលព្រះយេហូវ៉ាបានរើសតាំង
៩. តើលោកយេស៊ូក្លាយទៅជាអ្នកដែលព្រះរើសតាំងនៅពេលណា? ហើយតាមរបៀបណា?
៩ សូមគិតអំពីអ្វីដែលបានកើតឡើងនៅរដូវស្លឹកឈើជ្រុះនាឆ្នាំ២៩ គ.ស. កាលដែលលោកយេស៊ូមានអាយុ៣០ឆ្នាំ ហើយមកជួបយ៉ូហានដែលជាអ្នកជ្រមុជទឹក។ «ក្រោយពីលោកយេស៊ូបានត្រូវជ្រមុជទឹកហើយ លោកបានងើបឡើងពីទឹកមកភ្លាម ហើយមេឃបានបើកចំហ រួចគាត់ឃើញសកម្មពលរបស់ព្រះចុះមកដូចជាសត្វព្រាប ហើយសណ្ឋិតលើលោក»។ នៅពេលនោះលោកបានក្លាយទៅជាគ្រិស្ត ឬមេស្ស៊ី។ នៅពេលនោះ ព្រះយេហូវ៉ាបានប្រាប់ឲ្យដឹងថាលោកយេស៊ូជាអ្នកដែលលោករើសតាំងដោយមានប្រសាសន៍ថា៖ «នេះជាបុត្រដែលជាទីស្រឡាញ់របស់ខ្ញុំ ជាទីពេញចិត្តខ្ញុំណាស់»។ (ម៉ាថ. ៣:១៣-១៧) នេះពិតជាមូលហេតុដ៏ល្អប្រសើរឲ្យយើងមានចិត្តចង់ធ្វើតាមគ្រិស្ត!
១០, ១១. (ក) តើពាក្យ«គ្រិស្ត»បានត្រូវប្រើយ៉ាងណាដើម្បីសំដៅទៅលើលោកយេស៊ូ? (ខ) ហេតុអ្វីបានជាគប្បីឲ្យយើងធ្វើតាមលោកយេស៊ូគ្រិស្ត?
១០ ក្នុងគម្ពីរ ឋានៈជា«គ្រិស្ត»សំដៅទៅលើលោកយេស៊ូតាមវិធីផ្សេងៗដូចជាយេស៊ូគ្រិស្ត គ្រិស្តយេស៊ូ និងគ្រិស្ត។ លោកយេស៊ូបានប្រើពាក្យ«យេស៊ូគ្រិស្ត»មុនគេ ពោលគឺបញ្ជាក់នាមមុនឋានៈ។ ក្នុងសេចក្ដីអធិដ្ឋានទៅបិតានៅស្ថានសួគ៌ លោកមានប្រសាសន៍ថា៖ «ដើម្បីបានជីវិតដែលគ្មានទីបញ្ចប់ ពួកគាត់ត្រូវស្គាល់លោកដែលជាព្រះពិតតែមួយឲ្យបានច្បាស់ ព្រមទាំងយេស៊ូគ្រិស្ត ដែលលោកបានចាត់ឲ្យមក»។ (យ៉ូន. ១៧:៣) ការបញ្ជាក់នាមមុនឋានៈបែបនេះសំដៅទៅលើបុគ្គលដែលព្រះបញ្ជូនមក ហើយបុគ្គលនោះបានក្លាយទៅជាអ្នកដែលព្រះរើសតាំង។ កាលណាបញ្ជាក់ឋានៈមុននាមដូចជា«គ្រិស្តយេស៊ូ» នេះសំដៅទៅលើមុខតំណែងរបស់លោកយេស៊ូវិញ ជាជាងទៅលើបុគ្គល។ (២កូ. ៤:៥) ពេលណាប្រើពាក្យថា «គ្រិស្ត»ទទេ នោះជាវិធីមួយទៀតដែលដៅបញ្ជាក់លើតំណែងរបស់លោកយេស៊ូជាមេស្ស៊ី។—សកម្ម. ៥:៤២
១១ មិនថាពាក្យ«គ្រិស្ត»បានត្រូវប្រើយ៉ាងណាក៏ដោយដើម្បីសំដៅទៅលើលោកយេស៊ូ តែទាំងអស់នេះបញ្ជាក់ពីសេចក្ដីពិតដ៏សំខាន់មួយ។ សេចក្ដីពិតនេះគឺជា ទោះបើបុត្ររបស់ព្រះបានមកផែនដីជាមនុស្សហើយប្រាប់ពីបំណងប្រាថ្នារបស់បិតាក៏ពិតមែន លោកយេស៊ូមិនគ្រាន់តែជាមនុស្សធម្មតាឬគ្រាន់តែជាអ្នកប្រកាសទំនាយប៉ុណ្ណោះឡើយ តែលោកបានមកផែនដីដើម្បីក្លាយទៅជាអ្នកដែលព្រះយេហូវ៉ារើសតាំង។ ហេតុនេះហើយ យើងត្រូវប្រាកដថាយើងធ្វើតាមអ្នកដែលព្រះរើសតាំង។
លោកយេស៊ូជាផ្លូវតែមួយគត់ទៅដល់សេចក្ដីសង្គ្រោះ
១២. តើលោកយេស៊ូមានប្រសាសន៍អ្វី ទៅកាន់សាវ័កថូម៉ាស់ដែលនៅតែសំខាន់ចំពោះយើង?
១២ មូលហេតុសំខាន់ចាំបាច់មួយទៀតឲ្យយើងបន្តធ្វើតាមអ្នកដែលជាមេស្ស៊ី គឺបានត្រូវរៀបរាប់ក្នុងប្រសាសន៍របស់លោកយេស៊ូទៅកាន់សាវ័កស្មោះត្រង់ មិនយូរមុនលោកទទួលមរណភាព។ លោកយេស៊ូបានរៀបរាប់ថាលោកនឹងទៅដើម្បីរៀបចំកន្លែងមួយឲ្យពួកគេ តែថូម៉ាស់បានសួរសំណួរអំពីរឿងនេះ។ ដូច្នេះ លោកយេស៊ូបានឆ្លើយតបថា៖ «ខ្ញុំជាផ្លូវ ជាសេចក្ដីពិត និងជាជីវិត។ គ្មានអ្នកណាអាចមកឯបិតានៅស្ថានសួគ៌បានឡើយ លើកលែងតែអ្នកនោះមកតាមខ្ញុំ»។ (យ៉ូន. ១៤:១-៦) នៅពេលនោះ លោកយេស៊ូមានប្រសាសន៍ទៅសាវ័ក១១នាក់ដែលស្មោះត្រង់ ហើយសន្យាថានឹងទុកកន្លែងនៅស្ថានសួគ៌ឲ្យពួកគេ។ ប៉ុន្តែពាក្យរបស់លោកក៏សំខាន់ដែរចំពោះអស់អ្នកដែលមានសេចក្ដីសង្ឃឹមទទួលជីវិតដែលគ្មានទីបញ្ចប់នៅផែនដី។ (បប. ៧:៩, ១០; ២១:១-៤) តើសំខាន់យ៉ាងណា?
១៣. តើលោកយេស៊ូជា«ផ្លូវ»ក្នុងន័យអ្វីខ្លះ?
១៣ លោកយេស៊ូគ្រិស្តជា«ផ្លូវ»មានន័យថា លោកជាបុគ្គលតែមួយគត់ដែលបើកផ្លូវឲ្យយើងអាចចូលទៅជិតព្រះបាន។ ជាឧទាហរណ៍ យើងអាចមានទំនុកចិត្តថា ព្រះដែលជាបិតានៅស្ថានសួគ៌នឹងផ្ដល់អ្វីៗដែលយើងសុំតាមបំណងប្រាថ្នារបស់លោក លុះត្រាតែយើងអធិដ្ឋានតាមរយៈនាមរបស់លោកយេស៊ូ។ (យ៉ូន. ១៥:១៦) លោកយេស៊ូក៏ជា«ផ្លូវ»ក្នុងន័យមួយទៀតដែរ។ ភាពខុសឆ្គងបានធ្វើឲ្យមនុស្សជាតិឃ្លាតចេញពីព្រះ។ (អេ. ៥៩:២) លោកយេស៊ូបានផ្ដល់«ជីវិតខ្លួនជាថ្លៃលោះមនុស្សជាច្រើន»។ (ម៉ាថ. ២០:២៨) ជាលទ្ធផល គម្ពីរពន្យល់ថា៖ «ឈាមរបស់លោកយេស៊ូ . . . សម្អាតយើងពីភាពខុសឆ្គងទាំងអស់»។ (១យ៉ូន. ១:៧) យ៉ាងនេះ បុត្ររបស់ព្រះបានបើកផ្លូវផ្សះផ្សាយើងជាមួយនឹងព្រះ។ (រ៉ូម ៥:៨-១០) យើងត្រូវតែមានជំនឿលើលោកយេស៊ូហើយស្ដាប់បង្គាប់លោក ទើបយើងអាចមានចំណងមេត្រីភាពជាមួយព្រះបាន។—យ៉ូន. ៣:៣៦
១៤. តើលោកយេស៊ូជា«សេចក្ដីពិត»យ៉ាងដូចម្ដេច?
១៤ លោកយេស៊ូជា«សេចក្ដីពិត»មិនគ្រាន់តែដោយសារលោកតែងតែនិយាយពិត ហើយរស់នៅតាមសេចក្ដីពិតប៉ុណ្ណោះទេ តែដោយព្រោះលោកបានសម្រេចទំនាយទាំងអស់ដែលបានទាយទុកអំពីមេស្ស៊ី។ សាវ័កប៉ូលបានសរសេរថា៖ «ទោះជាសេចក្ដីសន្យារបស់ព្រះមានច្រើនយ៉ាងណាក៏ដោយ ក៏សេចក្ដីសន្យាទាំងអស់នោះបានទៅជាមែន តាមរយៈលោក»។ (២កូ. ១:២០) សូម្បីតែ«ស្រមោលនៃពរដែលនឹងមកដល់»ដែលបានកត់ទុកក្នុងក្រឹត្យវិន័យម៉ូសេក៏បានទៅជាពិតតាមរយៈគ្រិស្តយេស៊ូ។ (ហេ. ១០:១; កូឡ. ២:១៧) លោកយេស៊ូជាបុគ្គលដែលជាប់ពាក់ព័ន្ធនឹងទំនាយទាំងអស់ ហើយទំនាយទាំងនោះជួយយើងឲ្យយល់អំពីតួនាទីដ៏សំខាន់របស់លោកក្នុងការសម្រេចគោលបំណងរបស់ព្រះយេហូវ៉ា។ (បប. ១៩:១០) ដើម្បីទទួលប្រយោជន៍ពីការរៀបចំរបស់ព្រះសម្រាប់យើង នោះយើងត្រូវធ្វើតាមអ្នកដែលជាមេស្ស៊ី។
១៥. តើលោកយេស៊ូជា«ជីវិត»ក្នុងន័យអ្វី?
១៥ លោកយេស៊ូជា«ជីវិត»ពីព្រោះលោកបានទិញមនុស្សជាតិដោយឈាមរបស់លោក ហើយជីវិតដែលគ្មានទីបញ្ចប់ជាអំណោយដែលព្រះផ្ដល់ឲ្យ«ដោយគ្រិស្តយេស៊ូជាម្ចាស់របស់យើង»។ (រ៉ូម ៦:២៣) លោកយេស៊ូក៏ជា«ជីវិត»ចំពោះអស់អ្នកដែលបានស្លាប់ដែរ។ (យ៉ូន. ៥:២៨, ២៩) ម្យ៉ាងទៀត សូមគិតអំពីអ្វីដែលលោកនឹងធ្វើក្នុងនាមជាសម្ដេចសង្ឃក្នុងអំឡុងការសោយរាជ្យមួយពាន់ឆ្នាំរបស់លោក។ ពិតមែនហើយ លោកនឹងជួយឲ្យរាស្ត្ររបស់លោកនៅផែនដីទទួលសេចក្ដីសង្គ្រោះដែលគ្មានទីបញ្ចប់ ឲ្យរួចពីភាពខុសឆ្គងនិងសេចក្ដីស្លាប់!—ហេ. ៩:១១, ១២, ២៨
១៦. តើមានមូលហេតុអ្វីដើម្បីធ្វើតាមលោកយេស៊ូ?
១៦ ដូច្នេះ ចម្លើយរបស់លោកយេស៊ូទៅថូម៉ាស់មានន័យខ្លឹមសារជ្រៅណាស់សម្រាប់យើង។ លោកយេស៊ូជាផ្លូវ ជាសេចក្ដីពិត និងជាជីវិត។ លោកជាបុគ្គលដែលព្រះបានចាត់ឲ្យចូលក្នុងពិភពលោកនេះ ដើម្បីឲ្យពិភពលោកអាចត្រូវសង្គ្រោះតាមរយៈលោក។ (យ៉ូន. ៣:១៧) គ្មានអ្នកណាអាចមកឯបិតានៅស្ថានសួគ៌បានទេ លើកលែងតែអ្នកនោះមកតាមលោកយេស៊ូ។ គម្ពីរបានរៀបរាប់យ៉ាងច្បាស់ថា៖ «គ្មានសេចក្ដីសង្គ្រោះតាមរយៈអ្នកណាទៀតឡើយ ព្រោះនៅក្រោមមេឃ គ្មាននាមណាផ្សេងទៀតដែលព្រះបានផ្ដល់ក្នុងចំណោមមនុស្សជាតិឲ្យយើងរាល់គ្នាទទួលសេចក្ដីសង្គ្រោះទេ»។ (សកម្ម. ៤:១២) ដូច្នេះ មិនថាយើងជឿលើអ្វីពីមុនក៏ដោយ យកល្អឲ្យយើងជឿលើលោកយេស៊ូ ធ្វើតាមលោក ហើយបើធ្វើដូច្នេះ នោះនាំឲ្យយើងទទួលជីវិត។—យ៉ូន. ២០:៣១
ព្រះបានបញ្ជាឲ្យយើងស្ដាប់តាមគ្រិស្ត
១៧. ហេតុអ្វីបានជាសំខាន់ឲ្យយើងស្ដាប់តាមបុត្ររបស់ព្រះ?
១៧ ពេត្រុស យ៉ូហាន យ៉ាកុបបានឃើញលោកយេស៊ូផ្លាស់ប្រែលក្ខណៈក្រៅ។ នៅពេលនោះពួកគេបានឮសំឡេងមួយបន្លឺចេញពីស្ថានសួគ៌ថា៖ «នេះជាកូនរបស់ខ្ញុំ ជាអ្នកដែលបានត្រូវរើសតាំង ចូរស្ដាប់តាមលោក»។ (លូក. ៩:២៨, ២៩, ៣៥) ដូច្នេះ ជាការសំខាន់ណាស់ដែលយើងធ្វើតាមបញ្ជាដែលថាឲ្យយើងស្ដាប់តាមអ្នកដែលជាមេស្ស៊ី។—សូមអាន សកម្មភាព ៣:២២, ២៣
១៨. តើយើងអាចស្ដាប់តាមលោកយេស៊ូគ្រិស្តតាមវិធីណាខ្លះ?
១៨ ការស្ដាប់តាមលោកយេស៊ូរួមបញ្ចូល‹ការសម្លឹងមើលលោក ហើយពិចារណាឲ្យបានដិតដល់អំពីលោក›ផង។ (ហេ. ១២:២, ៣) អាស្រ័យហេតុនេះ យកល្អឲ្យយើង«យកចិត្តទុកដាក់ឲ្យបានច្រើនជាងធម្មតាចំពោះអ្វី»ដែលយើងអានអំពីលោកក្នុងគម្ពីរ និងក្នុងសៀវភៅនានារបស់«ខ្ញុំបម្រើដ៏ស្មោះត្រង់ហើយចេះពិចារណា» ព្រមទាំងព័ត៌មានដែលយើងឮអំពីលោកនៅឯកិច្ចប្រជុំរបស់ពួកគ្រិស្តសាសនិក។ (ហេ. ២:១; ម៉ាថ. ២៤:៤៥) ក្នុងនាមជាចៀមរបស់លោក សូមឲ្យយើងមានចិត្តរីករាយក្នុងការស្ដាប់តាមលោកយេស៊ូ ហើយមកតាមលោកចុះ។—យ៉ូន. ១០:២៧
១៩. តើអ្វីដែលនឹងជួយយើងឲ្យធ្វើតាមគ្រិស្តរហូត?
១៩ ទោះជាមានទុក្ខលំបាកក៏ដោយ តើយើងអាចធ្វើតាមគ្រិស្តរហូតបានទេ? យើងអាចធ្វើតាមបាន បើយើង«កាន់ខ្ជាប់គំរូនៃពាក្យដែលមានប្រយោជន៍»ដោយអនុវត្តតាមអ្វីដែលយើងបានរៀន«ដោយមានជំនឿនិងសេចក្ដីស្រឡាញ់ដែលទាក់ទងនឹងគ្រិស្តយេស៊ូ»។—២ធី. ១:១៣
តើអ្នកបានរៀនអ្វីខ្លះ?
• ហេតុអ្វីបានជាការធ្វើតាម«គ្រិស្ត»អាចនាំឲ្យយើងមាន ភាពជិតស្និទ្ធកាន់តែច្រើនឡើងជាមួយព្រះយេហូវ៉ា?
• ហេតុអ្វីការយកតម្រាប់តាមលោកយេស៊ូគឺដូចនឹងការយកតម្រាប់តាមព្រះយេហូវ៉ា?
• តើលោកយេស៊ូជា«ផ្លូវ ជាសេចក្ដីពិត និងជាជីវិត»យ៉ាងដូចម្ដេច?
• ហេតុអ្វីបានជាគប្បីឲ្យយើងស្ដាប់តាមអ្នកដែលព្រះយេហូវ៉ាបានរើសតាំង?
[សំណួរសម្រាប់អត្ថបទសិក្សា]
[រូបភាពនៅទំព័រ២៩]
សេចក្ដីបង្រៀនរបស់លោកយេស៊ូ បង្ហាញពីគំនិតខ្ពង់ខ្ពស់របស់ព្រះយេហូវ៉ា
[រូបភាពនៅទំព័រ៣០]
យើងត្រូវធ្វើតាមលោកដែលជាអ្នករើសតាំងរបស់ព្រះដោយស្មោះត្រង់
[រូបភាពនៅទំព័រ៣២]
ព្រះយេហូវ៉ាបានប្រកាសថា៖ «នេះជាកូន . . . របស់ខ្ញុំ ចូរស្ដាប់តាមលោក»