Mwanda Waka Tulonde “Kidishitu”?
Mwanda Waka Tulonde “Kidishitu”?
“Shi kudi muntu usaka kunonda nankyo ēkale kwipeleja aye mwine, . . . ēkale kunonda.”—LUKA 9:23.
1, 2. Mwanda waka i kya kamweno tubandaule kine kyotufwaninwe kulondela “Kidishitu”?
BINE Yehova uloelelwanga pamona banwe bapya ne bankasampe mu bukata mwa bibumbo batōtyi bandi bikongakene pamo! Pomwendelela kwifunda Bible, kutanwa ku kupwila kitatyi kyonso, ne pomutama mu buyuki bwa bubinebine bupāna būmi budi mu Kinenwa kya Leza, kemwakilwai lwito lwa Yesu lwa amba: “Shi kudi muntu usaka kunonda nankyo ēkale kwipeleja aye mwine, ebiya atekune [mutyi wa masusu] wandi, dyuba, ku dyuba, ēkale kunonda.” (Luka 9:23) Yesu usaka’tu kunena amba kwipela ne kwikala mulondi wandi i kintu kyomufwaninwe kulonga. Penepa i biyampe tubandaule mwanda waka tufwaninwe kulonda “Kidishitu.”—Mat. 16:13-16.
2 Lelo batwe banangila kala mu mayo a Yesu Kidishitu netu le? Twi basoñanibwe amba “kankamanai’nka nankyo, mutabukidile’mo.” (1 Tes. 4:1, 2) Twikale bayuke bubine tamba kala nansha panopano, kulangulukila pa bubinga bwine bwa kulondela Kidishitu kuketukwasha tulonde madingi a Polo ne kutabukidila kumulonda mu būmi difuku ne difuku. Tubandaulei pano bubinga butano botufwaninwe kulondela Kidishitu.
Kutyityija kipwano kyetu na Yehova
3. Lelo i miswelo’ka ibidi ya kuyukidija Yehova?
3 Mutumibwa Polo “waimana mubukata mwa Aleopakusa” kanena Bene Atene amba: “[Leza] webatunga ne myaka po yatongelwe, po yatongelwe, ne mikalo mwakwikadila. Nanshi padi pa mwanda wa kunena’mba: Bamusakesake Leza kepabulwe bakamupupukutyila bakumone. Nanshi aye kadipo ne kulampe kwine na bātwe bonso, mhm.” (Bil. 17:22, 26, 27) Na bubine tukokeja kukimba Leza ne kumuyuka twamuyuka. Kimfwa shi tubatale bupangi bwisamba bivule pa mwikadile ngikadilo ya Leza ne bukomo bwandi. Kulangulukila pa mingilo ya bupangi na mutyima wa kufwija’ko kubwanya kwitufundija bivule padi Umpangi. (Loma 1:20) Kadi Yehova i mwitusokwele myanda yandi mivule mu Bible, Kinenwa kyandi kisonekelwe. (2 Tem. 3:16, 17) Shi ‘tufwatakanye mingilo yandi’ ne ‘kulanga pa bilongwa byandi’ tukayukidija senene Yehova.—Mit. 77:12.
4. Le kulonda Yesu kwitukwasha muswelo’ka tupwane bininge na Yehova?
4 Ino muswelo mulumbuluke kutabuka wa kuyuka Yehova senene i kulonda Kidishitu. Langa’po ntumbo yādi na Yesu pabwipi na Shandi “ne panopantanda pēne kepapangilwepo”! (Yoa. 17:5) Aye i “ngalwilo ya bipangwa bya Leza.” (Kus. 3:14) Byadi “umbedi wa byonso byakupangibwa,” wāshikete na Shandi Yehova myaka na myaka momwa mūlu. Yesu wālongele bivule kumeso kwa kwiya’ye bu muntu, kādipo ushikete bitupu na Shandi. Wādi mulunda wa pa mutyima wa Leza, wingidila pamo na Mwine Bukomo Bonso, ne kwikuta nandi mu kijimba kya buswe bukatampe bwine. Yesu kāimaninepo enka pa kubandila Shandi ulonga bintu, utala malango ne ngikadilo yandi, ino wāifwene ne kwiula byonso byaāfundile kudi Shandi. Mfulo mfulō uno Mwana wa kikōkeji wāikele bwa Shandi—o mwanda Bible umutela pavule bu “kyelekejo kya Leza wa kubulwa kumweka.” (Kol. 1:15) Shi tulonde Kidishitu pabwipi, nabya tukapwana bininge na Yehova.
Kwiula Yehova Potō
5. Lelo i bika biketukwasha twiule Yehova potō, ne mwanda waka?
5 Twi bapangwe mu ‘kyelekejo kya Leza, mu kimfwa kyandi,’ o mwanda tudi na bukomo bwa kumwekeja ngikadilo ya Leza. (Ngal. 1:26) Mutumibwa Polo wāsoñenye Bene Kidishitu bekale “bakulonda Leza bu-bāna bakuswedibwa.” (Ef. 5:1) Kulonda Kidishitu kwitukwasha twiule Tata wetu udi mūlu. Tubwanya kino mwanda Yesu wālombwele mulangilo wa Leza, malango, ne bumuntu bwandi senene, kadi washintulula ne pa mfulo kupita bonso mwāikadile. Paādi pano panshi, Yesu kāyukenyepo enka dijina Yehova kete. Ino wāsokwele ne Bumuntu bwa mwine dino dijina. (Tanga Mateo 11:27.) Yesu wāyukenye’byo mu binenwa, mu bilongwa, mu bufundiji, ne mu kimfwa kyandi.
6. Lelo bufundiji bwa Yesu bwitusokwela bika padi Yehova?
6 Yesu wālombwele mu bufundiji bwandi byobya bisaka Leza kotudi ne mwamwena batōtyi bandi. (Mat. 22:36-40; Luka 12:6, 7; 15:4-7) Kimfwa, pa kupwa kutela mbila imo ya mu Mbila Dikumi—ya amba “kokalāla makoji, mhm”—wāshintulwile mumwena Leza milangwe idi mu mutyima wa muntu kumeso kwa kulonga makoji. Yesu wānene amba: “Yewa wakutala mwanamukaji meso a mutyima wakumusaka, nankyo wapu kupya kala mambo nandi umutyima wandi.” (Div. 20:14; Mat. 5:27, 28) Yesu pa kupwa kunena mushintulwilanga Bafadiseo Mukanda wa Bijila—amba “ukasanswa mukwenu, ino wakukushikwa nobe ukamushikwe”—wālombwele milangwe ya Leza amba: “Sanswai bakwimushikwa, ne bakwimumweshamwesha malwa nabo mwikale kwibalombelelapo.” (Mat. 5:43, 44; Div. 23:4; Levi 19:18) Kujingulula mulangila Leza ne mwaetumwena ne byobya byasaka kotudi kwitulumbila tumwiule potō.
7, 8. Le i bika byotwifunda padi Yehova kupityila ku kimfwa kya Yesu?
7 Kadi Yesu wālombwele na kimfwa kyandi mwikadile Shandi. Potutanga mu ma Evanjile amba Yesu wādi ukwatyilwa bafudile lusa, basusuka, mwaāfunine bana bandi ba bwanga bādi bakalakanya bana batyetye, le ketumonangapo amba ye mwikadile ne Shandi? (Mako 1:40-42; 10:13, 14; Yoa. 11:32-35) Langa bidi bilongwa bya Yesu mobitulombwela ngikadila mikatampe ya Leza. Le bingelengele byālongele Kidishitu kebitulombolapo bukomo bwaādi nabo? Inoko, kashā kāingidijepo bukomo’bwa mwanda wa kumwena’mo mwine nansha mwanda wa kusanshija bakwabo. (Luka 4:1-4) Kupanga kwaāpangile basunga balwiso mu tempelo, bine kulombola kuswa kwādi uswile boloke! (Mako 11:15-17; Yoa. 2:13-16) Bufundiji ne myanda miya byaāngidije pa kunekenya mityima ya bantu bilombola’mba i “wakukilapo Solomone” tunangu. (Mat. 12:42) Le buswe bwa Yesu nabo bwālombwele pa kwelela bakwabo muya wandi, mwene “kekudi nansha umo udi na lusa lutabukile luno’lu”?—Yoa. 15:13.
8 Mwanā Leza wāelekeje Yehova mu muswelo mubwaninine mu byonso byānene ne byālongele, o mwanda wānene amba: “Wakumona ami nankyo wamone ne Tata mwine.” (Tanga Yoano 14:9-11.) Nanshi kulonda Yesu ko konka kulonda Yehova.
Yesu I Mushingwe Māni wa Yehova
9. Yesu wāikele ke Mushingwe māni wa Leza muswelo’ka ne kitatyi’ka?
9 Tala pano byālongekele ku dikumbi mu 29 K.K. pāile Yesu, aye papo na myaka 30, kudi Yoano Mubatyiji. “Yesu byābatyijibwa, aye wabuka’tu mu mema, ponkapo kala ne diulu dyamujikukila, wamona ne aye Mushipiditu wa Leza utūka bwa nkunda kumutentamapo.” Pano po pāikele ke Kidishitu, Meshiasa. Kadi po ponka pāyukenye Yehova amba Yesu i mushingwe māni wandi, na kunena’mba: “Uno nandi i wami Mwana wakuswedibwa o ntokelwe pa mutyima.” (Mat. 3:13-17) Bine buno bo bubinga botusakila kulondela Kidishitu!
10, 11. (a) Kitenta “Kidishitu” i kingidijibwe muswelo’ka padi Yesu? (b) Mwanda waka tufwaninwe kulonda Yesu Kidishitu?
10 Mu Bible kitenta “Kidishitu” i kingidijibwe mwanda wa kutela Yesu mu miswelo palapala, kimfwa, Yesu Kidishitu, Kidishitu Yesu, ne Kidishitu. Yesu aye mwine ye mubajinji kwitela bu “Yesu Kidishitu”—dijina dilondwa na kitenta. Wānene paādi ulombela kudi Shandi amba: “Bakuyūke, abe Leza enka wa binebine, ne Yesu Kidishitu o watumine nankyo bo būmi ne būmi bwine bwa kulādila nyeke na nyeke.” (Yoa. 17:3) Uno mwityilo ulombola patōka yewa wātuminwe na Leza, wāikala ke Mushingwe māni wandi. Shi kitenta i kibadikile dijina pamo bwa “Kidishitu Yesu,” nabya mulangwe ukokelwanga pa kitenta, nansha mwingilo wandi, ke pa muntupo. (2 Kod. 4:5) Kwingidija kishima “Kidishitu,” kyampikwa kubadikilwa nansha kulondwa na dijina Yesu, kilombola mwingilo wa Yesu wa bu Meshiasa waingila.—Bil. 5:42.
11 Nansha shi kitenta “Kidishitu” i kingidijibwe namani na dijina Yesu, kilombola patōka bubinebine bwa kamweno amba: Mwanā Leza nansha byāile bu muntu pano panshi ne kuyukanya kiswa mutyima kya Shandi, kādipo muntu bwa bantu bonso nansha bu mupolofeto’tu kete; wāikele ke Mushingwe māni wa Yehova. Tufwaninwe kulonda uno Muntu.
Yesu Dyo Dishinda Dimo Kete dya Lupandilo
12. Le i bika byānenenwe mutumibwa Tomase bitutala ne batwe?
12 Bubinga bukwabo bwa mvubu botufwaninwe kulondela Meshiasa butanwa mu binenwa byānene ku batumibwa bandi ba kikōkeji kitatyi kityetye kumeso kwa lufu lwandi. Yesu pa kulondolola ku kipangujo kya Tomase wāipangwile kwaenda ne kwakebalongolwela, wānene amba: “Ami enka ne dishinda, ne bīne, ne būmi, kekudi nansha umo wakukafikila kudi Tata poso ponka pa ami.” (Yoa. 14:1-6) Pano Yesu wādi wisamba na batumibwa ba kikōkeji 11. Wēbalaile bīkalo bya mūlu, Ino binenwa byandi bidi na mvubu ne ku boba bakulupile būmi bwa nyeke pano pa ntanda. (Kus. 7:9, 10; 21:1-4) Namani?
13. Yesu i “dishinda” mu buluji’ka?
13 Yesu Kidishitu i “dishinda.” Ko kunena’mba, i ponka padi aye kete pa kupityila pa kufwena kudi Leza. Ne pa kulombela napo mo monka, tufwaninwe kulombela kupityila mudi Yesu shi tusaka’mba Tata etupe byonso byotumulomba mungya kiswa-mutyima kyandi. (Yoa. 15:16) Inoko Yesu i “dishinda” ne mu buluji bukwabo. Bubi i bupalule bantu kudi Leza. (Is. 59:2) Yesu wāpēne “muya wandi ke kikūlwa kya bavule bene.” (Mat. 20:28) O mwanda Bible ushintulula’mba: “Mashi a Yesu . . . ētukōkejanga ku bubi bonsololo.” (1 Yoa. 1:7) Mwana ye ushitwile dishinda dya kupwana na Leza. (Loma 5:8-10) I ponka pa kwitabija ne kukōkela Yesu potukokeja kupwana kipwano kitabijibwe na Leza.—Yoa. 3:36.
14. Yesu i “bīne” muswelo’ka?
14 Yesu i “bīne,” mwanda wisambanga bya bine ne kulonga’byo, kadi bupolofeto bonsololo bwāsonekelwe padi Meshiasa—kisengele bonso—i bufikidile padi aye. Mutumibwa Polo waāndikile amba: “Ke-mintu myanda-ya-mulao ya Leza yonsololo’tu mudi aye i yonka ya eyo.” (2 Kod. 1:20) Enka ne “mujiñininya wa bintu bilumbuluke bya kukāya,” utanwa mu Bijila bya Mosesa i mufikidile mudi Kidishitu Yesu. (Bah. 10:1; Kol. 2:17) Padi Yesu popemanine bupolofeto bonso, bushintulula mwingilo wandi mu kufikidila kwa mpango ya Yehova. (Kus. 19:10) Shi tukimba kumwena mu mpango ya Leza potudi, nankyo tufwaninwe kulonda Meshiasa.
15. Yesu i “būmi” mu buluji’ka?
15 Yesu i “būmi” mwanda wāpotele muzo wa muntu ku mashi andi kadi būmi bwa nyeke i kyabuntu kipāna Leza “monka mudi Kidishitu Yesu Mfumwetu.” (Loma 6:23) Yesu i “būmi” ne ku boba bafwile bene. (Yoa. 5:28, 29) Kadi fwatakanya byobya byakalonga aye Mupidishitu Mukatampe mu Umbikalo wa Myaka Kanunu. Leka, ukanyongolola babikalwa bandi ba pano panshi dimo kupwididile ku bupika bwa bubi ne lufu!—Bah. 9:11, 12, 28.
16. Le i bubinga’ka botulondela Yesu?
16 Shi ke pano, byālondolwele Yesu kudi Tomase i bya kamweno kakatampe kotudi. Yesu i dishinda ne bine ne būmi. Aye kete ye wātuminwe na Leza kwiya pano pa ntanda, mwanda wa ba pano pa ntanda bapandile kupityila kudi aye. (Yoa. 3:17) I kutupu wa kwiya kudi Tata poso kupityila kudi aye. Bible unena patōkelela amba: “Kadi mutupu mukwabo, nansha umo, wakupandilwako, ke-muntu muno munshi monso mutupu dijina dikwabo dipebwe ku bantu mo tuswa kupandilamo.” (Bil. 4:12) Nanshi, twikale twadi tukulupile bintu’ka, i biyampe twitabije Yesu, tumulonde, ne kuludikwa nandi mu būmi.—Yoa. 20:31.
Twi Basoñanibwe Kwimvwana Kidishitu
17. Mwanda waka kwimvwana Mwanā Leza kudi na kamweno?
17 Petelo, Yoano, ne Yakoba bēmwenine kwalamuka kwa Yesu. Pa kine kitatyi’kya, bāimvwene diwi dīya mūlu amba: “Uno i wami Mwana wakuswedibwa mwikale kumūmvwana.” (Luka 9:28, 29, 35) Kukōkela musoñanya wa kuteja Meshiasa i mwanda utala būmi ne lufu.—Tala Bilongwa 3:22, 23.
18. I muswelo’ka otukokeja kwimvwana Yesu Kidishitu?
18 Kuteja Yesu i ne ‘kwela meso konka kudi aye, na kulanga kimfwa kyandi.’ (Bah. 12:2, 3) Pano “po pene pa mwanda ne mwanda pano o kitufwaninwe tuningidile kutámo mutyima mu bintu” byotutanga padi aye mu Bible ne mu mabuku a “umpika wa binebine, udi na manwa,” ne byotwivwana ku kupwila. (Bah. 2:1; Mat. 24:45) Byotudi mikōko yandi, twikalei nyeke na kipyupyu kya kwimvwana Yesu ne kumulonda.—Yoa. 10:27.
19. Le i bika biketukwasha tulonde Kidishitu nyeke?
19 Lelo tubwanya kulonda Kidishitu pampikwa kukomenwa, nansha shi kudi masusu kampanda? Eyo, tukokeja, shi tulonda “mu kyelekejo kya myanda mikomo” na kulonda mu būmi byobya byotwifunda “mu kwitabija, ne mu lusa lwa mu Kidishitu Yesu.”—2 Tem. 1:13.
Le I Bika Byowefunda?
• Mwanda waka kulonda “Kidishitu” kutyityijanga kipwano kyetu na Yehova?
• Mwanda waka kulonda Yesu ko konka kulonda Yehova?
• Le Yesu i “dishinda, ne bīne, ne būmi” muswelo’ka?
• Mwanda waka tufwaninwe kuteja Mushingwe māni wa Yehova?
[Bipangujo bya Kifundwa]
[Kifwatulo pa paje 28]
Bufundiji bwa Yesu bwālombwele milangwe milumbuluke ya Yehova
[Kifwatulo pa paje 29]
Tufwaninwe kulonda na kikōkeji Mushingwe māni wa Yehova
[Kifwatulo pa paje 31]
Yehova wānene amba: “Uno i wami Mwana wakuswedibwa mwikale kumūmvwana”