Muloñadi Wutwatelela Kulondela ‘muMahaji aKristu’?
Muloñadi Wutwatelela Kulondela ‘muMahaji aKristu’?
‘Muntu wukukeña kunlondami, adibondi yomweni, . . . anlondaña.’—LUKA 9:23.
1, 2. Muloñadi chichalemena kwiluka muloña wutwatela kulondela mumahaji “aKristu”?
YEHOVA watiyaña kuwaha chikupu hakumona hakachi kawakwakudifukula indi ahamaseki anapompi hadi enu amaha mukweti mpwila yakudiza niatwansi. Chimunakutwalekahu kudiza Bayibolu, kuwanika kukupompa kwawakwaKristu mafuku ejima, nichimunakukula mukwiluka nsañu yalala yapulwishaña antu yakela Mwiizu daNzambi, mwatela kutoñojoka chikupu hamutambi waYesu wakwila nawu: ‘Muntu wukukeña kunlondami, adibondi yomweni, anyamunaña mutondu windi wakuyandishila hefuku hefuku, anlondaña.’ (Luka 9:23) Yesu nakuhosha nindi kudibonda enu aweni nakwikala kambanji kindi hichuma chimwatela kwila. Chalema nankashi kwiluka muloña wutwatela kulondela mumahaji “aKristu.”—Matewu 16:13-16.
2 Indi etu tunakwenda mumahaji aYesu Kristu twatela kwiladi? Atukonkomwena ‘kuswejeshamu.’ (1 Atesalonika 4:1, 2) Chili tunadizi kudifukula kwalala katataka chili twadizili hayaaka, kutoñojoka hamuloña wutwatela kulondela mumahaji aKristu kukutukwasha kuzatisha kufumba kwaPawulu nikumulondela Kristu chikupu muchihandilu chetu chamafuku ejima. Tushinshikenu nyiloña yitanu yikutuletesha kulondela mumahaji aKristu.
Kwikala naWulunda Wawuwahi naYehova
3. Njilanyi jiyedi mutwatela kumwilukila Yehova?
3 Pawulu chahosheleñayi nawakwaAtenisi, ‘wemeni hakachi kampidi yaMarasa,’ nakuhosha nindi: ‘Nzambi watoñola mpinji yawu, niñinza jawu mwakushakaminawu. Nindi akakeñakeñi Nzambi, hamwaha akamupapata, akamuwana; kutoña yena hekala kwakulehi nanetu ejimaku.’ (Yililu 17:22, 26, 27) Tunateli kumukeñakeña Nzambi nikumwiluka chikupu. Chakutalilahu, neyi tushinshika hayileñaleña tukudiza yuma yayivulu hayililu yaNzambi nihawuswa windi, nawa tukumwiluka Nleñi yetu chikupu. (Aroma 1:20) Yehova washimuna cheñi nsañu yindi yayivulu Mwiizu dindi, Bayibolu. (2 Timotewu 3:16, 17) Neyi tusweja kutoñojoka hanyidimu yindi nikushinshika chikupu mwelañayi tukumwiluka Yehova chachiwahi.—Masamu 77:12.
4. Indi kulondela mumahaji aKristu kunateli kutukwasha ñahi kumwiluka chikupu Yehova?
4 Njila yayiwahi yakumwilukilamu Yehova chikupu hikulondela mumahaji aKristu. Toñojokenu ntahi hakulema kwadiñi naYesu hadiñiyi naTata yindi, ‘henohu mpata yamunu mwishina yichidi kanda.’ (Yowanu 17:5) Diyi “mukulumpi wayuma yaleñeluwu kudi Nzambi.” (Chimwekeshu 3:14) Hakwikala “wedi wayuma yaleñeluwu yejima,” washakamini mpinji yayilehi nankashi mwiwulu naTata yindi, Yehova. Henohu wuchidi mwiwulu, Yesu wakoñeli yuma yayivulu kubadika kushakama hohu hamu naTata yindi. Wadiña mulunda naNzambi chikupu nikuzata hamu naYena, nawa kwosi muntu wadiñi nawulunda waweni naNzambi neyi wadiñi naYesuku. Yesu hadiñi nakumutala Tata yindi chazatileñayi nyidimu, nikushinshika yitoñojoka niyililu Yindi hohuku, ilaña washiluku kashinshi nikwila yuma yejima yadiziliyi kudi Tata yindi. Chafuminumu, iwu Mwana wovwahila wekalili neyi Tata yindi, chakwila Bayibolu yamutena nawu, ‘wamufwana chikupu Nzambi wakamonewaña.’ (Akolose 1:15) Kuhitila mukulondela mumahaji aKristu, tunateli kumwiluka chikupu Yehova.
Kumwimbujola Yehova Chikupu
5. Chumanyi chikutukwasha kumwimbujola Yehova chikupu, nawa muloñadi?
5 Atuleña ‘neyi chekalayi Nzambi, twadifwana nindi,’ dichi tukweti wuswa wakwimbujola yililu yaNzambi. (Kutachika 1:26) Kapostolu Pawulu wayikonkomweneni akwaKristu nindi, “ikalenu akwakwimbujola Nzambi, neyi anyana akeñewa.” (Aefwesesa 5:1) Kulondela mumahaji aKristu kwatukwashaña kumwimbujola Tata yetu wamwiwulu. Muloña kwosi muntu wembujolahu dehi yitoñojoka yaYehova niyililu kubadika Yesuku, nawa kwosi muntu wunateli kutudizisha chachiwahi chikupu hadi Yehova kubadika yenaku. Hampinji yadiñayi hamaseki, Yesu hakuminini hohu dakutiyakesha ijina daYehovaku. Ilaña, watulejeli chekalayi Nzambi. (Tañenu Matewu 11:27.) Yesu welili mwenimu kuhitila mumazu niyuma yakoñeliyi, muntañishilu nichakutalilahu chindi.
6. Indi yuma yatañishiliyi Yesu yamwekeshañadi hadi Yehova?
6 Kuhitila muyuma yatañishiliyi, Yesu watulejeli yuma yakeñañayi Nzambi kudi etu nichatiyañayi nawakwakudifukula indi. (Matewu 22:36-40; Luka 12:6, 7; 15:4-7) Chakutalilahu, hanyima yakusombolola lushimbi lumu lwekala haNshimbi Ikumi lwakwila nawu, “kwila wuvumbi, chinjila,” Yesu walumbulwili chamonañayi Nzambi yuma yatoñojokañayi muntu mukachi kamuchima henohu kanda yakoña chumichi. Wahosheli nindi: “Muntu wukutala mumbanda namesu akumufwila, neli dehi nindi wuvumbi mumuchima windi.” (Kwidika 20:14; Matewu 5:27, 28) Hanyima yakuhosha yitoñojoka yawaFwarisi kutalisha hanshimbi yakwila nawu, “Keñaku mukwenu, helaku chilumbu cheyi”—Yesu washimwini hatooka yitoñojoka yaYehova, nindi: “Keñenu ayilumbu jenu, ninawa ayikabishaña, yilombelenu.” (Matewu 5:43, 44; Kwidika 23:4; Alevi 19:18) Kwiluka chatoñojokañayi Nzambi nichatiyañayi niyuma yakeñañayi nindi twileñamu kukutukwasha kumwimbujola chikupu.
7, 8. Indi chakutalilahu chaYesu chatudizishaña yumanyi hadi Yehova?
7 Yesu wamumwekesheli cheñi chekalayi Tata yindi kuhitila muchakutalilahu chindi. Hampinji yitwatañaña Nsañu Yayiwahi yahosha nawu Yesu watiyililiyi wushona antu adiñi nakukala, nikutiyila luwi antu akabakeneña, nichatiyiliyi kutama hampinji yalekesheluwu atumbanji twindi anyana anyanya enjileña kudi yena, twelukaña netu Tata yindi niyena watiyaña chochimu. (Maku 1:40-42; 10:13, 14; Yowanu 11:32-35) Toñojokenu yuma yakoñeliyi Yesu chiyatukwashaña kwiluka yililu yaNzambi yabadika kulema. Yihayamisha yakoñeliyi Kristu yamwekeshaña nawu wadiña nañovu chikupu. Hela chochu, hazatishili ñovu yeniyi kulonda yadiluñishi yomweni hela kukatisha nachu amakwawuku. (Luka 4:1-4) Wuñanji windi wamwekeneni hakuhaña antu adiña nakulandishila mutembeli. (Maku 11:15-17; Yowanu 2:13-16) Ntañishilu yindi nimazu amawahi atañishileñayi kulonda kushika antu hanyichima amwekeshaña nawu ‘wamubadikili Solomoni’ maana. (Matewu 12:42) Kukeña kwamwekesheliyi Yesu hakuhana wumi windi kudi antu amavulu akushimuna chachiwahi muBayibolu nawu: “Hikudi kukeña kwabadika kwenikuku.”—Yowanu 15:13.
8 Mwana kaNzambi wamumwekesheli Yehova chachiwahi muyuma yejima yahosheliyi niyakoñeliyi dihafumini kuhosha nindi: “Muntu nanmonami namoni Tata.” (Tañenu Yowanu 14:9-11.) Kulondela mumahaji aKristu hohamu nakumwimbujola Yehova.
Yesu Diyi waWayishewa waYehova
9. Mpinjinyi nawa munjilanyi mwekalililiyi Yesu waWayishewa waNzambi?
9 Shinshikenu chuma chamwekeni muchaaka cha 29 C.E. hampinji yenjiliyi Yesu kudi Yowanu Mpapatishu henohu wudi nayaaka 30. ‘Yesu chanamupapatishuwu, hohenohu azambuka nimumenji. Kutala mawulu hiyakwenzuluka, hakumona spiritu yaNzambi yidi nakusuluka neyi katela, hiyikuwila hadi yena.’ Haniyi mpinji, wekalili Kristu hela Mesiya. Hampinji yeniyi, Yehova yomweni washimwini hatooka to-o nindi Yesu wadiña windi waWayishewa, hakuhosha nindi: “Diyi Mwanami nakeña, natiyaña kuwaha nankashi mudi yena.” (Matewu 3:13-17) Iwu himuloña wawuwahi watela kutuletesha kulondela mumahaji aKristu.
10, 11. (a) Jinjilanyi mwazatishilañawu nkumbu yakwila nawu “Kristu” hakumutena Yesu? (b) Muloñadi chitwatela kwiluka chikupu netu tunakulondela mumahaji aYesu Kristu?
10 MuBayibolu, nkumbu yakwila nawu “Kristu” ayizatishaña hakutena Yesu munjila jashiyashana chidi neyi Yesu Kristu, Kristu Yesu, niKristu. Yesu yomweni diyi wasambilili kutena ijina ‘daYesu Kristu,’ hejina halondela nkumbu. Hampinji yalombeliyi kudi Tata yindi wahosheli nindi: “Wumi wahaya nyaka woweniwu, wakukwiluka eyi Nzambi walala wumu hohu, niYesu Kristu watemesheli.” (Yowanu 17:3) Iyi nhoshelu yashimunaña chikupu muntu yatemesheluwu kudi Nzambi nawa wekalili windi waWayishewa. Neyi nkumbu yitachikilahu ijina dikumininaku, chidi neyi “Kristu Yesu,” dikwila nawu anakukonkomwena hachifulu hela hamudimu wukwetiyi, bayi muntu yomwenuku. (2 Akorinda 4:5) Nhoshelu yakwila nawu “Kristu” hinjila yikwawu yakukonkomwena mudimu wukwetiyi Mesiya.—Yililu 5:42.
11 Hichikweti muloña nachazatishañawu nkumbu yakwila nawu Kristu hakutena Yesuku, yakonkomwenaña iyi nsañu yalala yalema nawu: Hela chakwila Mwana kaNzambi wenjili hamaseki neyi muntu nakutiyakesha nkeñelu yaTata yindi, hadiña muntu hela kaprofwetu hohuku; wenjili kulonda yekali waWayishewa waYehova. Twatela kwiluka chikupu netu tunakulondela mumahaji aKristu, waWayishewa waYehova.
Yesu Diyi Njila Hohu Yawamwinu
12. Mazwinyi alema ahosheliyi Yesu kudi kapostolu Tomasi henohu wudi kwakwihi nakufwa?
12 Muloña wukwawu walema wutwatela kutwalekelahu kulondela mumahaji aMesiya, awushimuna mumazu aYesu alejeliyi apostolu indi ashinshika henohu kunashali maora antesha nakufwa. Yesu wakwili lwihu lwehwiliyi Tomasi kutalisha hamazu ahosheliyi Yesu akuya nakuyiloñeshela mwakushakama, nindi: “Ami yami njila, yami walala, yami wumi. Kwosi muntu niwumu wukwinza kudi Tata chiña hadami.” (Yowanu 14:1-6) Hayina mpinji Yesu wahosheleña nawapostolu 11 ashinshika. Wayikanini kuyiloñeshela iluña mwiwulu, ilaña mazwindi cheñi alema kudi antu achiñejaña kutambwila wumi wahaya nyaka hamaseki. (Chimwekeshu 7:9, 10; 21:1-4) Muloñadi chitunahosheli mwenimu?
13. Munjilanyi mwekalilayi Yesu “njila”?
13 Yesu Kristu diyi “njila.” Dikwila nawu, tunateli kumusolomoka Nzambi kuhitila mudi yena hohu. Neyi tulombaña kuhitila mwijina daYesu hohu, tunateli kukuhwelela netu Tata yetu wukutwinka yuma yejima yitukulomba yesekana nankeñelu Yindi. (Yowanu 15:16) Hela chochu, Yesu amutena cheñi nawu diyi “njila” munjila yikwawu. Nshidi yaletesha antu kwambuka kudi Nzambi. (Isaya 59:2) Yesu waheni ‘wumi windi neyi ifutu danyiloña hakukuula nachu antu amavulu.’ (Matewu 20:28) Bayibolu yashimuna chafuminumu nawu: ‘Mashi . . . aYesu atutookeshaña nshidi yejima.’ (1 Yowanu 1:7) Dichi Mwana watwenzulwila njila yakutukundamishila kudi Nzambi. (Aroma 5:8-10) Tunateli kwikala nawulunda wawuwahi naNzambi kuhitila mukumukuhwelela Yesu hohu nikumwovwahila.—Yowanu 3:36.
14. Munjilanyi mwekalilayi Yesu “walala”?
14 Yesu diyi “walala” bayi neyi hamuloña wakwila wahosheleña nsañu yalala nikwilamu hohuku, ilaña hamuloña wakwila wuprofwetu wawuvulu wasonekeluwu kutalisha hadi Mesiya—washikijeweli mudi yena. Kapostolu Pawulu wasonekeli nindi: “Muloña hela yikaninu yaNzambi yasweja kuvula, mudi Yesu diyi eña.” (2 Akorinda 1:20) Hela “mwevulu wayuma yayiwahi yikwinza” yadiña muNshimbi yamwinkeluwu Mosi yekalili yalala mudi Kristu Yesu. (Aheberu 10:1; Akolose 2:17) Wuprofwetu wejima washindamena hadi Yesu hohu, nawa watukwashaña kwiluka mudimu windi walema hakushikija nkeñelu yaYehova. (Chimwekeshu 19:10) Hakwila nawu tuheteli muyuma yatufuukwilayi Nzambi yakashikijewa, twatela kulondela mumahaji aMesiya.
15. Munjilanyi mwekalilayi Yesu “wumi”?
15 Yesu diyi “wumi” muloña walanda antu namashi indi, nawa wumi wahaya nyaka hichamukunkulu chahanañayi Nzambi kuhitila ‘mudi Kristu Yesu Mwanta wetu.’ (Aroma 6:23) Yesu cheñi ‘hiwumi’ muloña wakasañula afu. (Yowanu 5:28, 29) Kubombelahu, toñojokenu cheñi chuma chakelayi hakaYulayi neyi Kapristu Muneni hadi Ikombakaji daYaaka. Wakamwina antu akayulañayi hamaseki kunshidi nikukufwa haya nyaka.—Aheberu 9:11, 12, 28.
16. Muloñanyi wukuletesha kulondela mumahaji aYesu?
16 Dichi, ñakwilu yaYesu kutalisha halwihu lwehwiliyi Tomasi, yalema nankashi kudi etu. Yesu diyi njila, diyi walala nawa diyi wumi. Nzambi wamutemesheli Yesu mumpata yamunu mwishina kulonda kwamwina antu kuhitila mudi yena. (Yowanu 3:17) Nawa kwosi muntu wukwinza kudi Tata chiña kuhitila mudi yena. Bayibolu yashimuna hatooka to-o nawu: “Hikwekala kuhanda mudi wacheñuku, muloña munu mwishina mukachi kawantu hiyanenkumu ijina dacheñi dakuhanda nachuku.” (Yililu 4:12) Hela chochu, hichikweti muloña nayuma yitwakuhweleleli kunyumaku, twatela kumukuhwelela Yesu nikulondela mumahaji indi kulonda yatulomboli kuwumi.—Yowanu 20:31.
Atuleja Kumutiyilila Kristu
17. Muloñadi chichalemena kudi etu kumutiyilila Mwana kaNzambi?
17 Petulu, Yowanu niYakoba amweni chimwenu chakubalumuka. Hayina mpinji, atiyili izu kufuma mwiwulu nawu: ‘Diyi Mwanami, inatondi, mutiyililenu.’ (Luka 9:28, 29, 35) Chalema nankashi kwovwahila lushimbi lwakumutiyilila Mesiya.—Tañenu Yililu 3:22, 23.
18. Tunateli kumutiyilila ñahi Yesu Kristu?
18 Kumutiyilila Yesu kwabombelamu ‘kutalisha mesu kudi yena, nikutoñojoka chikupu hachakutalilahu chindi.’ (Aheberu 12:2, 3) Dichi, chachiwahi neyi ‘tukusweja kusha muchima kunsañu’ yitwatañaña muBayibolu nimunyikanda ‘yanduñu wamaana nikashinshi’ yahoshaña hadi Yesu, ninsañu yitwatiyaña hadi yena hakupompa kwawakwaKristu. (Aheberu 2:1; Matewu 24:45) Hakwikala anyikoku jindi, tufwilenu kumutiyilila Yesu nikulondela mumahaji indi.—Yowanu 10:27.
19. Chumanyi chikutukwasha kutwalekahu kulondela mumahaji Kristu?
19 Komana chaswayi kutwalekahu kulondela mumahaji aKristu hichikweti muloña nakukala kutunakumonaku? Eña, tunateli, neyi ‘tukwatisha mazu akukolesha’ kuhitila mukuzatisha yuma yitwadizaña ‘nakukuhwelela nikukeña kwekala mudi Kristu Yesu.’—2 Timotewu 1:13.
Yumanyi Yimunadizi?
• Muloñadi kulondela mumahaji “aKristu” chikukutuletesha kwikala nawulunda waweni naYehova?
• Muloñadi kumwimbujola Yesu chikwesekena nakumwimbujola Yehova?
• Munjilanyi mwekalilayi Yesu ‘njila, walala, niwumi’?
• Muloñadi wutwatelela kumutiyilila waWayishewa waYehova?
[Malwihu aKuzatisha haKudiza]
[Mwevulu wudi hefu 28]
Ntañishilu yaYesu yamwekesheleña yitoñojoka yaYehova yabadika
[Mwevulu wudi hefu 29]
Twatela kulondela chikupu waWayishewa waYehova
[Mwevulu wudi hefu 31]
Yehova wahosheli nindi: ‘Diyi Mwanami . . . mutiyililenu’