Engvangin Nge “Krista” Hnung Kan Zui Ang?

“Tupawhin mi zui a duh chuan mahni hrehawm pawisa lovin, . . . mi zui rawh se.”—LK. 9:23.

1, 2. Engvângin nge “Krista” hnung kan zui chhan tûr ngaihtuah chu thil pawimawh tak a nih?

LEIA amah chibai bûktute zînga nangni tuina neite leh ṭhalaite a hmuh che u avângin Pathian Jehova chu a va hlim dâwn êm! Bible i zir chhunzawm zêl a, Kristian inkhâwmnaa i tel ziah a, Pathian Lehkha Thua awm nun chhanhim thei thutak hriatnaa i ṭhan chhoh zêl lai hian, Isua sâwmna: “Tupawhin mi zui a duh chuan mahni hrehawm pawisa lovin, ni tin . . . mi zui rawh se,” tih chu i lâk thu tak hle a ngai a ni. (Lk. 9:23) Isua chuan mahni hrehawm pawisa lo leh a hnungzuitu nih chu i thiltih duhzâwng tak a nih a ngai tih a sawi a. Chuti chu, “Krista” hnung kan zui a ngaih chhan ngaihtuah chu a pawimawh a ni.—Mt. 16:13-16.

² Keini, Isua Krista hniak hnung zui tawh sate tân chutianga a hnung kan zui chhan ngaihtuah chu a pawimawh ve em? Pawimawh ve e, a hniak hnung zui ‘lehzual’ tûra fuih kan ni si a. (1 Thes. 4:1, 2) Biakna dik chu kan pawm thar chauh emaw, kan pawmna a rei tawh emaw pawh ni se, Krista hnung zuitu kan lo nih chhan ngaituahna chuan Paula fuihna nunpui tûr leh kan nî tin nuna Isua hnung zui nasa lehzual tûrin min ṭanpui ang. Krista hnung zui kan duh chhan tûr pa-nga i lo ngaihtuah ang u.

Jehova Nêna Inlaichînna Hnai Tak Neihna Tûrin

3. Eng kawng hnihin nge Pathian Jehova kan hriat theih?

³ Atheni khuaa mite hnêna thu a hrilh khân Paula chu “Areopagi lai takah a ding a . . . [Pathian chuan] hun bite a ruat a, an awmna rîte pawh a khamsak a, Pathian an zawn a, an dap an dap a, an hmuh mial theih nân; nimahsela ani chuan min hlat lo ṭheuh si a,” tiin a sawi a ni. (Tirh. 17:22, 26, 27) Pathian kan zawng thei a, amah chu kan hre chiang thei a ni. Entîr nân, thil siamte aṭangin Pathian mizia leh a theihna tam tak kan hmu thei a. A thil siamte ngaihlu taka chhûtna chuan Siamtu chungchâng  nasa takin min zirtîr thei a ni. (Rom 1:20) Pathian Jehova chuan a Thu Bible-ah a chungchâng thu kim chang takin a târ lang bawk a. (2 Tim. 3:16, 17) ‘A hnathawhte kan ngaihtuah a, a thiltihte kan chhût’ ngun poh leh Pathian Jehova chu kan hre chiang lehzual dâwn a ni.—Sâm 77:12.

4. Engtin nge Krista hnung zuina chuan Pathian Jehova nêna inlaichînna hnai lehzual nei tûra min ṭanpui theih?

⁴ Pathian Jehova kan hnaih zual telh telh theih dân kawng ṭha ber chu Krista hnung zui hi a ni a. Isua’n “khawvêl awm hmaa” a Pa hnêna mawina a neih kha han ngaihtuah teh! (Joh. 17:5) Ani chu “Pathian thil siam bula” a ni a. (Thup. 3:14) “Thil siam zawng zawnga piang hmasa ber” a nih angin, vânah a Pa, Jehova hnênah kum chhiarsên loh khawpa tam a awm tawh a ni. Mihring anga a lo awm hma khân, a Pa nêna hun hman dun mai aia tam thil a ti a. Pathian ṭhian niin, Engkimtitheia nêna hlim taka hna thawk dûnin, inṭhianna nghet ber mai chu an nei a ni. Isua chuan a Pa thiltih dân a en a, a rilru put hmang leh miziate a hmu mai a ni lo, a Pa hnên aṭanga a thil zir zawng zawng chu a nunah a la lût a, a nun chhuahpui thlap bawk a ni. Chuvângin, he Fapa thu âwih tak hi a Pa ang chiah a lo ni a, a an êm avângin Bible chuan “hmuh theih loh Pathian anpui” tiin a sawi hial a ni. (Kol. 1:15) Krista hnung zui tlatna hmangin, Pathian Jehova nêna inlaichînna hnai lehzual kan nei thei a ni.

Pathian Jehova Kan Entawn Lehzual Theihna Tûrin

5. Engin nge Jehova entawn lehzual tûrin min ṭanpui ang a, engvângin nge?

⁵ ‘Pathian anpui, amah ang taka siam’ kan nih avângin, Pathian miziate lan chhuahtîr theihna kan nei a. (Gen. 1:26) Tirhkoh Paula chuan Kristiante chu “a fa duh takte angin Pathian awm dân latute ni rawh u,” tiin a fuih a. (Eph. 5:1) Krista hnung zuina chuan kan Pa vâna mi entawn tûrin min ṭanpui a ni. A chhan chu Isua chuan Pathian ngaihtuahna te, rilru veizâwng te, leh a mizia te chu mi dang zawng zawng aia ṭhaa a târ lan leh a hrilhfiah vâng a ni. He leia a awm lai khân, Isua chuan Jehova hming a hriattîr mai a ni lo va, chu hming phêna Mi nihna chiah chu a puang chhuak a. (Matthaia 11:27 chhiar rawh.) Chu chu a ṭawngkam te, a thiltih te, a zirtîrna te, leh a entawn tûr siam te hmangin a ti a ni.

6. Isua zirtîrnate chuan Pathian Jehova chungchâng eng nge a târ lan?

⁶ Isua chuan a thu zirtîrte hmangin, Pathianin thil min phûtte leh amah betute a thlîr dân min hrilhfiah a. (Mt. 22:36-40; Lk. 12:6, 7; 15:4-7) Entîr nân, Thu Sâwm Pêk zînga pakhat—“I uirê tûr a ni lo,”—tih a lâk chhâwn hnuah Isua chuan miin thil sual a tih hma daih aṭanga a thinlung chhûnga thil awm Pathian thlîr dân chu a hrilhfiah a. “Tupawh ngaih châka hmeichhe melh apiang chu, a thinlungah a uirê tawh reng a ni” tiin a sawi a ni. (Ex. 20:14; Mt. 5:27, 28) Pharisaite’n Pathian Dân thu zînga pakhat dik lo  taka—“I vêngte hmangaih la, i hmêlma haw rawh”—tia an hrilhfiah thu a sawi hnuah, Isua chuan: “In hmêlmate chu hmangaih ula, a tiduhdahtu che u chu ṭawngṭaisak rawh u,” tiin Jehova rilru chu a târ lang a ni. (Mt. 5:43, 44; Ex. 23:4; Lev. 19:18) Pathian rilru leh ngaihtuah dân, leh a thil min phûtte hriatthiamna chuan amah entawn lehzual tûrin min ṭanpui a ni.

7, 8. Isua entawn tûr siam aṭangin Pathian Jehova chungchâng eng nge kan zir?

⁷ Isua chuan entawn tûr siamin a Pa nihna chu a târ lang bawk a. Chanchin Ṭha ziaka chhinchhiah, Isua’n mi rethei te a khawngaihzia te, hrehawm tuarte a lainatzia te, leh a hnêna lo kal tûr naupangte an lo dan avânga a zirtîrte chunga a thinurzia te kan chhiar hian Pa rilru put hmang kan hmu thei a ni lâwm ni? (Mk. 1:40-42; 10:13,14; Joh. 11:32-35) Isua thiltihte’n Pathian mize langsârte hmu thiam tûra min ṭanpui dân chu han ngaihtuah teh. Krista thilmak tihte chuan a thiltihtheihna nasatzia a târ lang a ni lâwm ni? Mahse, a thiltihtheihna chu mahni hlâwk nân emaw, mi dangte tihnat nân emaw a hmang ngai lo. (Lk. 4:1-4) Pathian biak in aṭanga sumdâwng duhâm takte a hnawhchhuahna chuan dikna a duhzia a va târ lang chiang tak êm! (Mk. 11:15-17; Joh. 2:13-16) Mite rilru hneh theih nâna a ṭawngkam hman duhawm takte leh a zirtîrnate chuan finna lama “Solomona aia” a sân zâwkzia a târ lang a. (Mt. 12:42) Isua’n mi dangte tâna a nun pea a târ lan hmangaihna chu hei aia “hmangaihna nasa zâwk tuman an nei lo,” tiin Bible chuan mawi takin a sawi.—Joh. 15:13.

⁸ Pathian Fapa chuan a thusawi leh a thiltih apiangah famkim taka Jehova a entawn avângin: “Tupawh mi hmu chu Pa hmu a ni,” tiin a sawi thei a. (Johana 14:9-11 chhiar rawh.) Krista entawn chu Jehova entawn nên a thuhmun chiah a ni.

Isua chu Pathian Jehova Hriak Thih A Ni

9. Engtik khân nge Isua chu Pathian Hriak Thiha a lo nih a, engtin nge a lo nih?

⁹ C.E. 29 favâng lai khân, kum 30 mi Isua chu Baptistu Johana hnênah a lo kal a, chutih laia thilthleng chu han ngaihtuah teh. “Isua baptisma a chan veleh tui ata a chhuak ta nghâl a: tin, ngai teh, a tân vân a lo inhawng a, Pathian thlarau chu ṭhuro anga lo chhukin, a chunga lo fu a hmu a.” Chuta ṭang chuan Krista, a nih loh leh Messia a lo ni ta a ni. Chutih lai chuan Jehova chuan a Hriak Thiha a nihzia târ langin: “Hei hi ka Fapa duh tak, ka lawm êm êma chu a ni,” tiin a sawi a ni. (Mt. 3:13-17) Krista kan zui duhna tûr chhan ṭha a va ni êm!

10, 11. (a) Eng kawngtein nge “Krista” tih chu Isua sawi nâna hman a nih? (b) Engvângin nge Isua Krista chu kan zui tlat ang?

¹⁰ Bible-ah chuan “Krista” tih hi kawng hrang hranga Isua sawi nâna hman a ni: Isua Krista, Krista Isua, leh Krista tihte chu. Isua ngei chuan “Isua Krista”—hming hnua nihnain a zui chu a hmang hmasa a. A Pa hnêna a ṭawngṭainaah: “Hei hi chatuana nunna a ni, nang Pathian tak chauh leh i tirh Isua Krista hriat hi,” a ti a. (Joh. 17:3) Chutianga hmanna chuan Pathian tirh a nihna leh Hriak Thih a lo nihna chu min hrilhfiah chiang hle a ni. “Krista Isua” tia hming hmaa nihna a awm chuan, chu chu mihring a nihna lam ni lovin, a dinhmun, a nih loh leh a nihna chelh sawi uarna a ni. (2 Kor. 4:5) “Krista”  tia Isua hming tel lova a nihna chauh sawi chu Messia a nihzia kawng danga sawi uarna a ni bawk.—Tirh. 5:42.

¹¹ Isua chungchâng sawi nân a nihna “Krista” tih chu engti kawng zâwng pawhin lo hmang ta ila, he thudik: Pathian Fapa chu leiah mihring anga lo kalin, a Pa duhzâwng rawn hriattîr mah se, mi narân mai a ni lo va, zâwlnei satliah mai a ni hek lo; Jehova Hriak Thih ni tûra lo kal a ni tih hi a chiang a ni. Chu Hriak Thiha chu kan zui tlat tûr a ni.

Isua Chauh Hi Chhandamna Kawng Awmchhun A Ni

12. Tirhkoh Thoma hnêna Isua thusawi chuan kan tân pawimawhna eng nge a neih?

¹² Messia kan zui reng nachhan tûr kawng pawimawh tak dang pakhat chu a thih hma lawka a zirtîr rinawmte hnêna a thu sawi aṭang hian a hriat theih a. Isua’n a kal bo tûr thu leh an tâna hmun a siam tûr thu a sawi chungchânga Thoma zawhna chu: “Keimah hi kawng leh thutak leh nunna ka ni; keimaha kal lo chu tumah Pa hnênah an thleng ngai lo,” tiin a chhâng a. (Joh. 14:1-6) Chu thu chu a tirhkoh rinawm 11 te hnênah a sawi a ni. Anni chu vânah an awm ang tih a tiam a; mahse, leia chatuana nun beiseitute tân pawh a thusawi chuan pawimawhna a nei a ni. (Thup. 7:9, 10; 21:1-4) Engtin nge?

13. Engtin nge Isua chu “kawng” a nih?

¹³ Isua Krista chu “kawng” a ni a. Chu mi awmzia chu amah kal tlang chauhvin Pa kan pan thei tihna a ni. Chu chu ṭawngṭaina chungchângah hian a hriat theih a; Isua hminga kan dîl chauhvin, Pa chuan A duhzâwng nêna inmil kan thil dîl engpawh min pe ang tih rinna kan nei thei a ni. (Joh. 15:16) Amaherawhchu, Isua chu “kawng” a nih dân chi dang pawh a awm a. Sual chuan mihringte chu Pathian lak ata a tihrang a. (Is. 59:2) Isua chuan ‘mi tam tak tlan nân a nun a pe’ a. (Mt. 20:28) Chuvângin, Bible chuan: “Isua thisenin kan sual zawng zawng min tlenfaisak ṭhîn,” tiin min hrilhfiah a ni. (1 Joh. 1:7) Chutiang chuan Fapa chuan Pathian nêna inzawm leh theihna kawng a hawng a. (Rom 5:8-10) Isua kan rin a, a thu kan zawm chuan Pathian nêna inlaichînna kan nei thei a ni.—Joh. 3:36.

14. Eng kawngin nge Isua chu “thutak” a nih?

¹⁴ Isua “thutak” a nih chhan chu englai pawha thutak a sawi a, dik taka a nun reng vâng chauh ni lovin, Messia chungchânga hrilh lâwk thu zawng zawng amaha a thlen famkim vek vâng pawh a ni. Tirhkoh Paula chuan: “Pathian thutiamte chu engzât pawh ni se, amahah chuan ‘A ni’ tih chu a awm si a,” tiin a ziak a. (2 Kor. 1:20) Mosia Dâna tel “thil ṭha, lo awm tûrte . . . thla” chu Krista Isuaah chuan a takin a lo chang a ni. (Heb. 10:1; Kol. 2:17) Isua chu hrilh lâwkna zawng zawng bul fûkna ber a ni a, chûng chuan Pathian Jehova thiltuma a chanvo chelh pawimawh tak hre thiam tûrin min ṭanpui a. (Thup. 19:10) Kan tâna Pathian thiltum hlâwkpui tûr chuan Messia hnung kan zui a ngai a ni.

15. Eng kawngin nge Isua chu “nunna” a nih?

¹⁵ Isua “nunna” a nih chhan chu a thisena mihringte a lei vâng a ni a, chatuan nunna chu ‘kan Lalpa Krista Isua zâra’ Pathian thilthlâwnpêk a ni. (Rom 6:23) Isua chu mitthi tawhte tân pawh “nunna” a ni bawk. (Joh. 5:28, 29) Kum Sâng Rorêl chhûnga Puithiam Lal anga a thil la tih tûrte pawh han ngaihtuah bawk teh. Lei lama a khua leh tuite tân sual leh thihna laka chatuan chhan chhuahna a awmtîr dâwn a ni.—Heb. 9:11, 12, 28.

16. Isua hnung zui chhân tûr eng nge kan neih?

 ¹⁶ Chuti a nih chuan, Isua’n Thoma a chhânna chuan kan tân awmze thûk tak a nei a. Isua chu kawng leh thutak leh nunna a ni a. Amah chu a ni, Pathianin khawvêl chhan chhuak tûra a tirha chu. (Joh. 3:17) Amaha kal lo chu tumah Pa hnên an thleng ngai lo. Bible chuan: “Mi dang tuma hnênah chhandamna a awm lo; vân hnuaia mihring sak zîngan, min chhandam tûr hming dang rêng a awm lo,” tiin chiang takin a sawi. (Tirh. 4:12) Chuvângin, kan lo rin dânte chu eng pawh ni se, Isua rin a, a hnung zui a, nunna neih phah chu a finthlâk a ni.—Joh. 20:31.

Krista Thu Ngaithla Tûrin Thupêk Kan Dawng

17. Engvângin nge Pathian Fapa thu ngaihthlâk chu thil pawimawh tak a nih?

¹⁷ Petera te, Johana te, leh Jakoba te chuan inlârna danglam tak an hmu a. Chutih lai chuan vân aṭanga aw: “Hei hi ka Fapa, ka thlana chu a ni, ama thu ngai rawh u,” tih chu an hria a. (Lk. 9:28, 29, 35) Messia thu ngaithla tûra thupêk kan dawn zawm chu a pawimawh a ni.—Tirhkohte 3:22, 23 chhiar rawh.

18. Engtin nge Isua Krista thu chu kan ngaihthlâk ang?

¹⁸ Isua thu ngaihthlâknaah chuan amah “en tlat” leh a entîrna siam “ngaihtuah” tlat a tel a ni. (Heb. 12:2, 3, C.L. Re-edited) Chuvângin, a chanchin Bible leh “bawi rinawm, fing tak” chhuah thu leh hlaa kan chhiarte leh Kristian inkhâwmnaa kan ngaihthlâkte chu ‘ṭhahnemngai takin kan pawisa lehzual tûr’ a ni. (Heb. 2:1; Mt. 24:45) A berâmte kan nih angin, Isua thu ngaihthlâk leh a hnung zui chu i châk reng ang u.—Joh. 10:27.

19. Engin nge Krista hnung zui reng tûrin min ṭanpui ang?

¹⁹ Harsatna eng ang hnuaiah pawh hlawhtling takin Krista hnung chu kan zui reng thei em? Thei e, “Krista Isuaa awm rinna leh hmangaihna” nêna kan thil zirte nunpuina hmanga “thu dik dân” kan vawn tlat chuan kan thei a ni.—2 Tim. 1:13. (w09 5/15)

Eng Nge Kan Zir?

• Engvângin nge “Krista” hnung zuina chuan Jehova min hnaih lehzualtîr theih?

• Engvângin nge Isua entawn chu Jehova entawn nên a thuhmun chiah?

• Engtin nge Isua chu “kawng leh thutak leh nunna” a nih?

• Engvângin nge Jehova Hriak Thiha thu chu kan ngaihthlâk ang?

[Zirlai Atâna Zawhnate]

[Phêk 29-naa milem]

Isua zirtîrnate chuan Pathian ngaihtuahna sâng tak a lan chhuahtîr

[Phêk 30-naa milem]

Pathian Jehova Hriak Thiha chu rinawm takin kan zui tûr a ni

[Phêk 32-naa milem]

Pathian Jehova chuan: “Hei hi ka Fapa . . . a ni, ama thu ngai rawh u,” tiin a puang chhuak