Bõe yĩng tɩ d segd n tũ “Kiristã”?
Bõe yĩng tɩ d segd n tũ “Kiristã”?
‘Ned sã n dat n tũ maam, bɩ a kɩɩs a meng raab n tũ maam.’—LUK 9:23.
1, 2. Bõe yĩng tɩ tar yõod tɩ d bao n bãng d sẽn segd n tũ “Kiristã” võore?
A ZEOVA sã n get neb nins sẽn na n wa a nin-buiidã sʋk paalmã la kom-bɩɩsã, noom-a-la hal wʋsgo! Y sã n ket n wɩngd ne Biiblã zãmsg la y kẽnd tigissã, n bãngd vɩɩm koɛɛgã sẽn be Wẽnnaam Gomdã pʋgẽ wã võor n paasdẽ, y segd n wa tagsa a Zezi gom-kãngã zug neere. A yeela woto: “Ned sã n dat n tũ maam, bɩ a kɩɩs a meng raabo, n dɩk a kũum [“da-luk,” NW ] daar fãa n tũ maam.” (Luk 9:23) A Zezi gomdã wilgdame tɩ kɩɩs f meng raab la f tũ yẽ wã yaa bũmb yãmb sẽn segd n maane. Woto yĩnga, tara yõod tɩ d bao n bãng d sẽn segd n tũ “Kiristã” võore.—Mat. 16:13-16.
2 La bõe la neb nins sẽn zoe n tũud a Zezi Kiristã yẽ segd n maane? B sagend-d lame tɩ d “kell n maan woto daar fãa n paase.” (1 Tes. 4:1, 2) D sɩng n yaa kiris-ned yʋʋm sẽn zãr wall d lebga kiris-ned sẽn nan pa kaoos me, d sã n bʋgs bʋʋm nins sẽn kɩt tɩ d tũud Kiristã zugu, na n sõng-d lame tɩ d reeg a Poll sẽn sagl-d tɩ d ket n tũud Kiristã. Bɩ d ges bʋʋm a nu sẽn kɩt tɩ d segd n tũ Kiristã.
Sẽn na yɩl n paas d zoodã ne a Zeova
3. Wilg-y bũmb a yiib sẽn tõe n sõng-d tɩ d bãng a Zeova.
3 Daar a yembre, tʋm-tʋmd a Poll sẽn da yaas Atɛn nebã sʋk Areopaazẽ wã n sõs ne-bã, a yeel-b-la woto: “[Wẽnnaam] pĩnd n wilga wakat welgr la soolem todse, tɩ bãmb tõe n bao Wẽnnaam n babl ne b pãng tɛk n yã bãmba, tɩ bõe, bãmb ka zãr ne tõnd fãa ye.” (Tʋʋ. 17:22, 26, 27) D tõe n baoa Wẽnnaam, la d tõe n sɩd bãng-a lame me. Wala makre, d sã n maag d yĩng n ges bũmb nins fãa Wẽnnaam sẽn naanã neer la d bʋgs rẽ zugu, tõe n sõng-d lame tɩ d bãng a sẽn yaa Wẽnnaam ning buudã la d bãng t’a tõe n maana yel-kãsemse. (Rom 1:20) A Zeova leb n wilgda tõnd a sẽn yaa Wẽnnaam ning buudã ne Biiblã maasem. (2 Tɩm. 3:16, 17) D sã n bʋgsd a tʋʋmã la a sẽn tar manesem ning ne ninsaalbã zugu, d na n bãngd-a lame n paasdẽ.—Yɩɩl 77:13.
4. Bõe yĩng tɩ Kiristã tũub na n sõng-d tɩ d paam zood sõma ne a Zeova n paase?
4 Bũmb ning sẽn tõe n sõng-d tɩ d bãng a Zeova sõma n yɩɩd yaa d sẽn na n tũ Kiristã. Yãmb we n tags-y n ges-y a Zezi sẽn da tar ziir ning a sẽn da wa n nan be saasẽ tɩ b ra nan ka naan dũniyã! (Zã 17:5) A yaa “Wẽnd bõn-naandsã fãa Kãsma.” (Wil. 3:14, Sebr Sõngo) A Zezi sẽn yaa “bi-kãseng sẽn yɩɩd bõn-naandsã fãa” wã yĩnga, a zĩnda saasẽ ne a Ba a Zeova n maan yʋʋm ka tɛka. Wakat kãnga, a pa zĩnd zaalem bal ye. Yaa yẽ a ye bal n da be ne Wẽnnaam sẽn ka to wã, n naagd-a n tʋmd ne sũ-noogo, tɩ b zems-n-taarã buud ka to ye. A Zezi pa ges a Ba wã sẽn tʋmd to-to wã n bãng a sẽn yaa a soaba, la sẽn get yɛlã to-to wã bal ye. A maaga a yĩng n ges rẽ fãa me, n dɩk a togs-n-taar kɛpɩ. Woto kɩtame tɩ bi-ribl kãngã sẽn yaa sakdã wõneg a Ba wã wʋsgo, hal tɩ Biiblã yetẽ t’a yaa ‘Wẽnnaam sẽn ka tõe n yã wẽnego.’ (Kol. 1:15) D sã n tũud Kiristã neere, d na n paama zood sõma ne a Zeova n paase.
Sẽn na yɩl n dɩk a Zeova mak-sõngã neere
5. Bõe n tõe n sõng tõnd tɩ d rɩk a Zeova togs-n-taar sõma, la bõe yĩnga?
5 Wẽnnaam sẽn naan tõnd n ‘wõneg a mengã’ yĩng kɩtame tɩ d tõe n dɩk a mak-sõngã. (Sɩng. 1:26) Tʋm-tʋmd a Poll sagla kiris-nebã tɩ b “yɩ Wẽnnaam togs-n-taas wa kom-nongdse.” (Ef. 5:1) D sã n tũud Kiristã, na n sõng-d lame tɩ d rɩkd d saasẽ Ba wã mak-sõngã. Bala ned baa a ye pa tol n tõog n tall Wẽnnaam tagsgã la a manesmã buudu, la a tõog n bilg Wẽnnaam sẽn yaa a soabã kɛpɩ wa a Zezi ye. A sẽn wa tẽngã zugã, a pa wilg nebã a Zeova yʋʋrã bal ye. A wilga tõnd a Zeova sẽn sɩd yaa a soabã me. (Karm-y Matɩe 11:27.) A Zezi maana woto ne a no-goamã la a tʋʋmã, a sẽn da zãmsd nebã bũmb ninsã la a sẽn da tũud rẽ n kõt-d mak-sõngã.
6. Bõe la a Zezi sẽn zãms nebã bũmb ningã wilgd a Zeova zugu?
6 A Zezi sẽn zãms nebã bũmb ninsã pʋgẽ, a wilg-d-la Wẽnnaam sẽn dat tɩ d maane, la Wẽnnaam sẽn get neb nins sẽn tũud-a wã to-to. (Mat. 22:36-40; Luk 12:6, 7; 15:4-7) Wala makre, daar a ye, a Zezi sẽn sõdg Tõod piigã noor ning sẽn yet tɩ “ra yo” wã poore, a wilgame tɩ Wẽnnaam mii bũmb ning sẽn sɩngd ninsaal sũurẽ, hal n wa kɩt t’a yo wã. A yeela woto: “Ned ninga fãa sẽn get pag ne ratem wẽnga, a maana yoob ne yẽnda a sũur pʋgẽ.” (Yik. 20:14; Mat. 5:27, 28) A Zezi sẽn wilg tɩ fariziẽ rãmbã wẽnemda tõogã n yetẽ tɩ f ‘nong f to la kisg f bɛ’ wã poore, a wilga a Zeova tagsg n yeel woto: ‘Nong-y yãmb bɛɛbã, . . . la y pʋʋs neb nins sẽn maand yãmb wẽng la sẽn namsd yãmbã yĩnga.’ (Mat. 5:43, 44; Yik. 23:4; Maan. 19:18) D sã n mi Wẽnnaam sẽn dat tɩ d maanã la a sẽn get yɛlã to-to wã, na n sõng-d lame tɩ d tũu a mak-sõngã neere.
7, 8. Bõe la a Zezi mak-sõngã wilgd tõnd a Zeova zugu?
7 A Zezi wilga a Ba wã sẽn yaa a soabã me ne mak-sõng ning a sẽn kõ wã. D sã n karemd evãnzill dãmbã n bãngd a Zezi sẽn da kʋmd naong rãmbã la neb nins sẽn da namsdã nimbãaneg to-to wã, a sũur sẽn da sãam ne a karen-biisã b sẽn zab kom-bõoneg tɩ b ra wa a nengẽ yĩngã, d bãngdame t’a Ba wã me ra na n maanẽ-la woto bal kɛpɩ. (Mark 1:40-42; 10:13, 14; Zã 11:32-35) Yãmb we n tags n ges a Zezi tʋʋmã sẽn sõng nebã to-to tɩ b bãng Wẽnnaam sẽn sɩd yaa a soabã. Yel-soalem nins a Zezi sẽn da maandã kɩtame tɩ b bãng t’a Zeova kõ-a-la pãn-kãsenga. La a pa tol n tũnug ne pãn-kãng n bao a meng nafre, bɩ n maan ned wẽng ye. (Luk 4:1-4) A sẽn dig lɛɛbdbã sẽn da be wẽnd-doogã pʋgẽ n wẽgd nebã, wilgda vẽeneg t’a nonga tɩrlem. (Mark 11:15-17; Zã 2:13-16) A sẽn da zãmsd nebã Wẽnnaam daabã to-to wã la a sẽn da gomd to-to tɩ kẽed nebã sũyã wilgdame t’a yam sɩd ‘yɩɩda a Salomo.’ (Mat. 12:42) Hakɩka, a Zezi sẽn tall nonglem ning ne ãdem-biisã tɩ kɩt t’a sak n ki n na n fãag-bã buud ka to ye. Sɩd me, Biiblã yeelame tɩ “nonglem ka be sẽn yɩɩd woto ye.”—Zã 15:13.
8 Wẽnnaam a Zeova bi-riblã rɩka a togs-n-taar a sẽn maan la a yeel bũmb ninsã fãa pʋgẽ kɛpɩ, hal tɩ kɩt t’a tõog n yeel woto: “Ned ninga sẽn yã maam, a yãa m Ba.” (Karm-y Zã 14:9-11.) F sã n tũud Kiristã, yaa a Zeova mak-sõngã la f rɩkda.
Yaa a Zezi la a Zeova sẽn yãk-a soabã
9. Yɩɩ wakat bʋg la a Zezi lebg Wẽnnaam sẽn yãk a soabã, la bõe n wilg rẽ?
9 Tẽeg-y bũmb nins sẽn maan yʋʋmd 29 soabã pʋgẽ, a Zezi sẽn wa n kẽng a Zãmbatiis nengẽ a yʋʋm 30 wã sasa, n na n deeg lisgã. “A Zezi sẽn paam lisgu, b yii koomẽ wã, la gese, yĩngr pakame, la b yãa Wẽnnaam Sɩɩg sẽn wẽnd wall sẽn sigd bãmb zugu.” Yaa wakat kãng la a Zezi lebg Kiristã bɩ Mesi wã. Sasa kãnga, a Zeova sɩd wilgame tɩ yaa a Zezi la ned ning a sẽn yãkã, n yeel woto: “Ada yaa mam Bi-nongre, mam sẽn nong ne m sũur fãa zãnga.” (Mat. 3:13-17) Ad woto sɩd kɩtame tɩ d rat n tũ Kiristã!
10, 11. a) Wãn-wãn la b boond a Zezi ne a yʋʋr ning sẽn yaa “Kiristã”? b) Bõe yĩng tɩ d segd n modg n tũ a Zezi Kiristi?
10 Biiblã pʋgẽ, b mi n boola a Zezi sẽn yaa Kiristã t’a Zezi Kirist wall Kirist Zezi, pa rẽ bɩ Kiristã. La boaal a tãabã fãa tara võore. Yaa a Zezi n yɩ pipi n bool a meng t’a ‘Zezi Kirist.’ A boola “Zezi” wã n yaool n paas “Kiristã.” Yɩɩ a pʋʋsg a ye pʋgẽ. A yeela a Ba wã woto: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn ka to la a Zezi Kirist yãmb sẽn tʋm a soabã.” (Zã 17:3) A sẽn bool “Zezi” wã n yaool n paas “Kiristã,” a wilga vẽeneg tɩ yaa yẽ la Wẽnnaam sẽn tʋm a soab t’a wa lebg Kiristã. B sã n deng n yeel tɩ “Kirist” n yaool n paas “Zezi” wã, bilgda tʋʋmd ning Wẽnnaam sẽn bobl-a wã. (2 Kor. 4:5) La b sã n bool-a bal tɩ “Kiristã,” b rat n wilgame tɩ yẽ la ned ning Wẽnnaam sẽn yãkã.—Ef. 5:21.
11 La b boond-a lame t’a Zezi Kirist wall Kirist Zezi, pa rẽ bɩ Kiristã me, yaa bũmb sẽn tar yõod la rẽ wilgda. Yaa tɩ Wẽnnaam bi-riblã sẽn wa tẽngã zug n wilg ãdem-biisã Wẽnnaam daabã pa nin-zaalga, wall no-rɛɛs bal ye. A waame n na n wilg tɩ yẽ la ned ning a Zeova sẽn yãkã. D segd n modg n tũ-a lame.
Yaa ne a Zezi maasem bal la d tõe n paam fãagre
12. Bõe la a Zezi yeel tʋm-tʋmd a Toma tɩ tar yõod ne tõndo?
12 Bʋʋm a to me n kɩt tɩ d segd n ket n tũud Mesi wã. Yaa a Zezi sẽn yeel a tʋm-tʋmdbã bũmb ning bilf sẽn deng a kũumã. A sẽn da wa n yeel a karen-biisã t’a na n tɩ segla zĩis n bĩng-bã poore, a Toma sok-a-la sokr t’a leok woto: “Mam yaa sore la sɩda la vɩɩm. Ned ka tõe n ta m Ba nengẽ, a sã n ka mam maasem yĩng ye.” (Zã 14:1-6) A Zezi ra gomda ne a karen-biis 11 wã sẽn kell n sak-a wã. A yeel-b lame tɩ b na n wa tɩ vɩɩmda saasẽ ne yẽ, la a sẽn yeelã tara yõod ne neb nins sẽn na n wa vɩɩmd tẽngã zug wakat sẽn kõn sa wã me. (Wil. 7:9, 10; 21:1-4) Bõe yĩng tɩ d yet woto?
13. Bõe n kɩt t’a Zezi “yaa sore”?
13 A Zezi Kirist “yaa sore.” Woto rat n yeelame tɩ yaa ne a Zezi maasem bal la d tõe n paam zood ne Wẽnnaam. Sɩd yaa woto pʋʋsgã wɛɛngẽ. Bala yaa tõnd sẽn na n kotẽ tɩ zemsd ne Ba wã raab a Zezi yʋʋrã maasem yĩnga, la d tõe n kɩs sɩd tɩ d na n paama bũmb nins d sẽn kotã. (Zã 15:16) La a Zezi sẽn yeel tɩ yẽ ‘yaa sorã’ leb n tara võor a to. Yel-wẽnã zãaga ãdem-biisã ne Wẽnnaam. (Ezai 59:2) A Zezi kõ a vɩɩmã tɩ yɩ yaood neb wʋsg yĩnga. (Mat. 20:28) Rẽ n kɩt tɩ Biiblã yetẽ t’a “Zezi Kirist zɩɩm pekda tõnd n yiisd tõnd yel-wẽna fãa.” (1 Zã 1:7) Biigã sẽn maan woto wã, a yiisa bũmb ning sẽn da zãag tõnd ne Wẽnnaamã, tɩ d le tõe n paam a zoodo. (Rom 5:8-10) Dẽnd yaa d sẽn na n tall tẽeb ne a Zezi la d sak-a, la d tõe n paam zood ne Wẽnnaam.—Zã 3:36.
14. Bõe n kɩt t’a Zezi yeel tɩ yẽ yaa “sɩda”?
14 A Zezi sẽn yeel tɩ yẽ yaa “sɩdã” pa a sẽn da tũud bũmb nins a sẽn da zãmsd nebã la a pa tol n yag ziri wã yĩng bal ye. Yaa bãngr goam nins fãa sẽn da gomd Mesi wã yellã sẽn pids a zugã yĩngã me. Tʋm-tʋmd a Poll yeelame tɩ “Wẽnnaam kãabg fãa yaa n-ye Kirist maasem yĩnga.” (2 Kor. 1:20) Pʋd n yaa Kirist Zezi n kɩt tɩ bõn-neeb nins yell b sẽn da gomd a Moiiz Tõogã pʋgẽ wã pidsi. (Heb. 10:1; Kol. 2:17) Bãngr-goamã fãa b sẽn da pĩnd n togsã gomda bũmb nins a Zezi sẽn pidsi, la a sẽn na n wa pidsã yelle. Bala b sõngd-d lame tɩ d bãng tʋʋm-kãsems nins a sẽn segd n wa tʋm a Zeova raabã pidsg wɛɛngẽ wã. (Wil. 19:10) D sã n dat n wa paam bark nins Wẽnnaam sẽn kãabã, yaa tɩlae tɩ d tũ Mesi wã.
15. Bõe yĩng t’a Zezi yeel tɩ yẽ yaa “vɩɩm”?
15 A Zezi yaa “vɩɩm,” bala yaa a zɩɩmã maasem yĩng la ãdem-biisã na n paam fãagrã. Vɩɩm sẽn pa satã me yaa kũun Wẽnnaam sẽn kõt tõndo, “Zusoab a Kirist Zezi maasem yĩnga.” (Rom 6:23) A Zezi yaa “vɩɩm” sẽn ki-bã yĩng me, bala yaa yẽ n na n wa vʋʋg-ba. (Zã 5:28, 29) Sẽn paase, a sẽn yaa maan-kʋʋdb kãsmã, tags-y n ges-yã a sẽn na n maan bũmb nins a yʋʋm tusr naamã sasa wã. Hakɩka, a na n kɩtame t’a nin-buiidã sẽn na n zĩnd tẽngã zugã paam b mens ne yel-wẽnã la kũumã yembd zãng-zãnga!—Heb. 9:11, 12, 28.
16. Bõe yĩng tɩ d segd n tũ a Zezi?
16 Dẽnd a Zezi sẽn da leok a Toma bũmb ningã tara yõod wʋsg ne tõndo. A Zezi sɩd yaa sore, sɩda, la vɩɩm. Yaa yẽ la Wẽnnaam tʋm dũniyã zug sẽn na yɩl tɩ ãdem-biisã paam fãagr a maasem yĩnga. (Zã 3:17) Ned sɩd pa tõe n ta Ba wã nengẽ tɩ pa tũ ne yẽ maasem ye. Biiblã yeta woto vẽenega: “Fãagr ka be ne ned a to ye; tɩ bõe, yʋʋr a to ka be dũniyã zugu sẽn kõ nebã tɩ tõnd tõe n paam fãagr ne-a ye.” (Tʋʋ. 4:12) Baa d sẽn da tẽed bũmb nins pĩnd me, d segd n bãngame tɩ yaa d sẽn na n tẽ a Zezi la d tũ-a bala, la d na n paam vɩɩmã.—Zã 20:31.
B kõo tõnd noor tɩ d kelg Kiristã
17. Bõe yĩng tɩ d segd n sak n kelg Wẽnnaam bi-riblã?
17 Daar a yembr tãng zugu, a Pɩɛɛr ne a Zã la a Zak yãa a Zezi nengã sẽn tedg t’a futã lebg peels fasɩ n pɩnda. La wakat kãnga, b wʋma koɛɛg sẽn yi saasẽ n yeel woto: “Ada yaa mam Biiga, mam nin-tũusdga; bɩ y kelg-a.” (Luk 9:28, 29, 35) D sɩd segd n saka noor ning b sẽn kõ-d tɩ d kelg Mesi wã, bala a yaa yõor yelle.—Karm-y Tʋʋm 3:22, 23.
18. Wãn-wãn la tõnd tõe n kelg a Zezi Kiristi?
18 Kelg a Zezi rat n yeelame tɩ d ‘get a Zezi, bɩ tɩ d tagsd a mak-sõngã yell wakat fãa.’ (Heb. 12:2, 3) Woto yĩnga, d segd n kelgda bũmb nins d sẽn karemd a Zezi wɛɛngẽ Biiblã pʋgẽ wã, “tʋm-tʋmd sẽn tũud sɩd la sẽn tar yamã” sɛb pʋsẽ la d tigissẽ wã neer n yɩɩd raasenkamã. (Heb. 2:1, Mat. 24:45) D sẽn yaa a Zezi piisã yĩnga, bɩ d tʋlg ne d sũy fãa n kelg-a la d tũ-a.—Zã 10:27.
19. Bõe n na n sõng-d tɩ d ket n tũud Kiristã?
19 La rẽ yĩnga d tõe n kell n tũu Kiristã baa zu-loees pʋsẽ bɩ? N-ye, d sã n kell n ‘tall gom-sõma wã mamsgo,’ la d tũud bũmb nins d sẽn zãmsd Kiristã zugã ne ‘tẽeb la nonglem,’ d na n tõogame.—2 Tɩm. 1:13.
Bõe la yãmb bãng-yã?
• Bõe yĩng tɩ Kiristã tũub sõngd-d tɩ d paas d zoodã ne a Zeova?
• Bõe n wilgd tɩ f sã n tũud Kiristã, yaa a Zeova mak-sõngã la f rɩkda?
• Bõe n kɩt t’a Zezi yaa ‘sore, sɩda, la vɩɩm’?
• Bõe yĩng tɩ d segd n kelg a Zeova sẽn yãk a soabã?
[Zãmsgã sogsgã]
[Foto, seb-neng 28]
A Zezi wilga nebã a Zeova sẽn get yɛlã to-to wã
[Foto, seb-neng 29]
D segd n tũu a Zeova sẽn yãk a soabã ne d sũy fãa
[Foto, seb-neng 31]
A Zeova yeela woto: ‘Ada yaa mam Biiga, bɩ y kelg-a’