Ke ka Baka La’ng re Swanetše go Latela “Kriste”?

“Ge e ba motho le ge e le ofe a nyaka go ntšhala morago, a a itatole gomme . . . a ntatele ka go se kgaotše.”—LUKA 9:23.

1, 2. Ke ka baka la’ng go le bohlokwa gore re ahla-ahle mabaka ao ka ona re swanetšego go latela “Kriste”?

JEHOFA o swanetše go ba a thaba gakaakang ge a bona lena bao ba sa tšwago go thoma go kopanela gotee le lena bafsa le le gare ga barapedi ba gagwe ba bantši! Ge le tšwela pele go ithuta Beibele, go ba gona dibokeng tša Bokriste ka mehla le go gola tsebong ya lena ya therešo e phološago bophelo yeo e hwetšago ka Lentšung la Modimo, le swanetše go naganišiša ka taletšo ya Jesu e rego: “Ge e ba motho le ge e le ofe a nyaka go ntšhala morago, a a itatole gomme a tšee kota ya gagwe ya tlhokofatšo letšatši le letšatši a ntatele ka go se kgaotše.” (Luka 9:23) Jesu o re go itatola le go ba balatedi ba gagwe ke selo seo le swanetšego go nyaka go se dira. Ka gona, ke ga bohlokwa gore re ahla-ahle lebaka leo ka lona re swanetšego go latela “Kriste.”—Mat. 16:13-16.

² Go thwe’ng ka rena bao re šetšego re latela Jesu Kriste? Re eletšwa gore re ‘tšwele pele re dira bjalo ka botlalo kudu.’ (1 Bathes. 4:1, 2) Go sa šetšwe gore re sa tšwa go amogela borapedi bja therešo goba ke kgale re bo amogetše, go naganišiša ka mabaka ao ka ona re swanetšego go latela Kriste go tla re thuša go diriša keletšo ya Paulo le go latela Kriste ka mo go feletšego bophelong bja rena bja letšatši le letšatši. Anke re ahla-ahleng mabaka a mahlano ao ka ona re swanetšego go latela Kriste.

 Gore re be le Tswalano ya Kgaufsi Kudu le Jehofa

3. Ke ditsela dife tše pedi tšeo ka tšona re ka tsebago Jehofa?

³ Ge a be a bolela le banna ba Athene a ‘eme gare ga Areopago,’ moapostola Paulo o itše: “[Modimo] o laetše gore go be le dinako tše di beilwego le mellwane e beilwego ya bodulo bja batho, gore ba tsome Modimo ge e ba ba ka mo phopholetša gomme ba mo hwetša e le ka kgonthe, gaešita le ge ruri a se kgole le yo mongwe le yo mongwe wa rena.” (Dit. 17:22, 26, 27) Re ka tsoma Modimo gomme ra mo tseba e le ka kgonthe. Ka mohlala, tlholo e re botša mo gontši ka dika tša Modimo le bokgoni bja gagwe. Go naganišiša ka tebogo ka mediro ya gagwe ya tlholo go ka re ruta mo gontši ka Mmopi. (Baroma 1:20) Le gona, Jehofa o re utollotše ditaba ka botlalo tša mabapi le yena ka Lentšung la gagwe le ngwadilwego e lego Beibele. (2 Tim. 3:16, 17) Ge re dutše re ‘elelwa ka ditiro tša gagwe’ le go ‘akanya ka tšeo a di dirilego,’ ke mo re tla tsebago Jehofa.—Ps. 77:12.

4. Go latela Kriste go ka re thuša bjang go ba le tswalano ya kgaufsi le Jehofa?

⁴ Tsela e botse kudu yeo ka yona re ka batamelago kgaufsi le Jehofa ke ka go latela Kriste. Nagana feela ka letago leo Jesu a bego a e-na le lona ge a be a e-na le Tatagwe “pele lefase le e-ba gona!” (Joh. 17:5) Jesu ke “mathomo a tlholo ya Modimo.” (Kut. 3:14) Bjalo ka “leitšibulo la tlholo yohle,” o phetše nako e telele kudu legodimong a e-na le Tatagwe e lego Jehofa. Pele a phela mo lefaseng bjalo ka motho, Jesu o dirile mo gontši go feta go fo fetša nako a e-na le Tatagwe. E be e le mothuši wa Modimo, a šoma ka lethabo le Ra-matla-ohle gomme a ba le tswalano e tiilego kudu e lerato le Modimo yeo go sego motho yo a kilego a ba le yona. Jesu ga se a fo ithuta tsela ya Tatagwe ya go dira dilo le go lemoga maikwelo le dika tša Gagwe, eupša gape o ile a amogela le go diriša dilo ka moka tšeo a ithutilego tšona ka Tatagwe. Ka baka leo, Morwa yo yo a kwago o ile a swana le Tatagwe kudu—moo e lego gore Beibele e mmitša “seswantšho sa Modimo yo a sa bonagalego.” (Bakol. 1:15) Ka go latela Kriste kgaufsi, re ka ba le tswalano ya kgaufsi kudu le Jehofa.

Gore re Ekiše Jehofa ka Botlalo

5. Ke’ng seo se tla re thušago go ekiša Jehofa ka botlalo, gona ka baka la’ng?

⁵ Ka ge re ‘bopilwe ka seswantšho sa Modimo,’ re kgona go bonagatša dika tša gagwe. (Gen. 1:26) Moapostola Paulo o kgothaleditše Bakriste go ‘ba baekiši ba Modimo bjalo ka bana ba ratwago.’ (Baef. 5:1) Go latela Kriste go re thuša go ekiša Tatago rena wa legodimong. Se ke ka gobane Jesu o bonagaditše tsela ya Modimo ya go nagana, maikwelo le semelo sa Gagwe gakaone gomme a mo hlalosa ka mo go feletšego go feta kamoo motho le ge e le ofe a bego a ka mo hlalosa ka gona. Ge a be a le lefaseng, Jesu ga se a ka a fo tsebatša leina la Modimo. Go ena le moo, o ile a utolla Motho yo a emelwago ke leina leo. (Bala Mateo 11:27.) Jesu o dirile seo ka mantšu, ditiro, dithuto le mohlala wa gagwe.

6. Dithuto tša Jesu di utolla’ng ka Jehofa?

 ⁶ Ka dithuto tša gagwe, Jesu o bontšhitše seo Modimo a se nyakago go rena le gore o ikwa bjang ka barapedi ba gagwe. (Mat. 22:36-40; Luka 12:6, 7; 15:4-7) Ka mohlala, ka morago ga go tsopola o mongwe wa Melao e Lesome—“o se kê wa ôtswa”—Jesu o ile a hlalosa pono ya Modimo ka seo se diregago ka pelong ya motho nako e telele pele a otswa. O itše: “Yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe.” (Ek. 20:14; Mat. 5:27, 28) Ka morago ga go bolela tlhaloso ya Bafarisei ya polelwana e itšego yeo e lego ka Molaong—“o rate moagišani wa gago gomme o hloye lenaba la gago”—Jesu o ile a tsebatša tsela ya Jehofa ya go nagana ka gore: “Tšwelang pele le rata manaba a lena le go rapelela bao ba le tlaišago.” (Mat. 5:43, 44; Ek. 23:4; Lef. 19:18) Go tseba kamoo Modimo a naganago le go ikwa ka gona le go tseba seo a se nyakago go rena go re thuša go mo ekiša ka botlalo.

7, 8. Ke’ng seo re ithutago sona ka Jehofa mohlaleng wa Jesu?

⁷ Le gona, Jesu ka mohlala wa gagwe o utollotše seo Tatagwe a lego sona. Ge re bala Diebangeding gore Jesu o be a šokela badiidi, a kwela bao ba tlaišegago bohloko, a galefela barutiwa ba gagwe bao ba ilego ba kgalema bana, na ga re bone Tate a bontšha maikwelo a swanago? (Mar. 1:40-42; 10:13, 14; Joh. 11:32-35) Nagana kamoo ditiro tša Jesu di re thušago go kwešiša dika tša Modimo tše dikgolo ka gona. Na mehlolo yeo Kriste a e dirilego ga e bontšhe matla a magolo kudu ao a bego a e-na le ona? Lega go le bjalo, ga se a ka a diriša matla ao go ikhola goba ka maikemišetšo a go gobatša ba bangwe. (Luka 4:1-4) Ruri go leleka ga gagwe bagwebi ba nago le megabaru ka tempeleng go bontšha gore o na le toka! (Mar. 11:15-17; Joh. 2:13-16) Dithuto tša gagwe le mantšu a gagwe a bose ao a a dirišitšego go fihlelela dipelo tša batho di bontšha gore o be a ‘feta Solomone’ ka bohlale. (Mat. 12:42) Ke’ng seo re ka se bolelago ka lerato leo Jesu a le bontšhitšego ka go gafa bophelo bja gagwe bakeng sa ba bangwe ge e se gore “ga go yo a nago le lerato le le fetago le”?—Joh. 15:13.

⁸ Morwa wa Modimo o emetše Jehofa ka mo go phethagetšego dilong ka moka tšeo a di boletšego le go di dira, moo a bego a ka bolela gore: “Yo a bonego nna o bone le Tate.” (Bala Johane 14:9-11.) Go latela Kriste go swana le go ekiša Jehofa.

Jesu ke Motlotšwa wa Jehofa

9. Jesu o bile Motlotšwa wa Modimo neng, gona bjang?

⁹ Ela hloko seo se diregilego seruthwaneng sa 29 C.E. ge Jesu wa nywaga e 30 a be a e-tla go Johane Mokolobetši. “Jesu ka morago ga ge a kolobeditšwe a rotoga gatee-tee meetseng; bonang! magodimo a bulega, a bona moya wa Modimo o theoga bjalo ka leeba o e-tla godimo ga gagwe.” Ka nako yeo, o ile a ba Kriste goba Mesia. Ka nako yeo, Jehofa ka boyena o ile a tsebatša gore Jesu ke Motlotšwa wa gagwe ka gore: “Yo ke Morwa wa-ka, morategi, yo ke mo amogetšego.” (Mat. 3:13-17) Ruri re na le lebaka le lebotse la go nyaka go latela Kriste!

10, 11. (a) Sereto “Kriste” se dirišitšwe ka ditsela dife go Jesu? (b) Ke ka baka la’ng re sa swanela go kgaotša go latela Jesu Kriste?

¹⁰ Ka Beibeleng, sereto “Kriste” se dirišwa ge go bolelwa ka Jesu ka ditsela tše fapa-fapanego, e lego Jesu Kriste, Kriste Jesu le Kriste. Jesu ka boyena e bile wa mathomo wa go diriša  leina “Jesu Kriste”—leina leo le latelwago ke sereto. Ge a be a rapela Tatagwe o itše: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.” (Joh. 17:3) Go dirišwa ga leina le go lebiša tlhokomelo gabotse go yo a rometšwego ke Modimo gomme a ba Motlotšwa wa gagwe. Ge sereto se bewa pele ga leina, ge go thwe “Kriste Jesu,” tlhokomelo e tlošwa mothong gomme e lebišwa boemong bjo a bo neilwego. (2 Bakor. 4:5) Ge go dirišwa lentšu “Kriste,” sereto se sa semmušo ke tsela e nngwe ya go gatelela boemo bja Jesu bjalo ka Mesia.—Dit. 5:42.

¹¹ Go sa šetšwe gore sereto “Kriste” se dirišwa bjang go šupa Jesu, se gatelela therešo ye ya bohlokwa: Gaešita le ge Morwa wa Modimo a ile a tla lefaseng e le motho gomme a tsebatša thato ya Tatagwe, e be e se motho feela yo a tlwaelegilego goba moporofeta; o ile a ba Motlotšwa wa Jehofa. Re swanetše go tšwela pele re latela Motlotšwa yo.

Jesu ke Yena Tsela e Nnoši e Lebišago Phološong

12. Ke selo sefe sa bohlokwa seo Jesu a se boditšego moapostola Thomase pele ga lehu la gagwe?

¹² Lebaka le lengwe la bohlokwa leo ka lona re swanetšego go latela Mesia le ngwadilwe mantšung a Jesu ao a yago go baapostola ba gagwe ba botegago ao a ilego a a bolela diiri tše sego kae pele ga lehu la gagwe. Ge a araba potšišo ya Thomase mabapi le seo Jesu a se boletšego ka go ya go ba lokišetša lefelo, Jesu o itše: “Ke nna tsela le therešo le bophelo. Ga go yo a tlago go Tate ge e se ka nna.” (Joh. 14:1-6) Ka nako Jesu yeo o be a bolela le baapostola ba 11 ba botegago. O ba holofeditše lefelo legodimong eupša mantšu a gagwe a na le seo a se bolelago go bao ba nago le kholofelo ya go phela ka mo go sa felego mo lefaseng. (Kut. 7:9, 10; 21:1-4) Bjang?

13. Ke ka kwešišo efe Jesu e lego “tsela”?

¹³ Jesu Kriste ke “tsela.” Ke gore, ke yena a nnoši yoo ka yena re kgonago go batamela Modimo. Se ke therešo ge go tliwa thapelong, ka gobane ge re rapela re diriša leina la Jesu, re tla ba le kgodišego ya gore Tate o tla re nea selo le ge ele sefe seo re se kgopelago ka go dumelelana le thato ya gagwe. (Joh. 15:16) Lega go le bjalo, Jesu ke “tsela” ka kwešišo e nngwe gape. Sebe se arotše batho go Modimo. (Jes. 59:2) Jesu o neile “moya wa gagwe gore e be topollo bakeng sa ba bantši.” (Mat. 20:28) Ka baka leo, Beibele e hlalosa gore: “Madi a Jesu . . . a re hlwekiša sebeng sohle.” (1 Joh. 1:7) Ka go rialo, Morwa o butše tsela ya gore re boelanywe le Modimo. (Baroma 5:8-10) Re ka bago le tswalano e amogelegago le Modimo ka go bontšha tumelo go Jesu le go mo kwa.—Joh. 3:36.

14. Ke ka tsela efe Jesu e lego “therešo”?

¹⁴ Jesu ga se “therešo” feela ka gobane ka mehla a be a bolela therešo le go e phelela, eupša le ka gobane o phethagaditše diporofeto ka moka tšeo di ngwadilwego ka Mesia. Moapostola Paulo o ngwadile gore: “Go sa šetšwe gore dikholofetšo tša Modimo ke tše dintši gakaakang, di bile Ee ka yena.” (2 Bakor. 1:20) Gaešita le “moriti wa dilo tše di tlago go tla” woo o lego Molaong wa Moše o ile wa phethagatšwa go Kriste Jesu. (Baheb. 10:1; Bakol. 2:17) Diporofeto ka moka di bolela ka Jesu gomme di re thuša go kwešiša karolo ya gagwe ya bohlokwa go phethagatšweng ga morero wa Jehofa. (Kut. 19:10) E le gore re holwe ke seo Modimo a re reretšego sona, re swanetše go latela Mesia.

15. Ke ka kwešišo efe Jesu e lego “bophelo”?

 ¹⁵ Jesu ke “bophelo” ka gobane o rekile moloko wa batho ka madi a gagwe gomme bophelo bjo bo sa felego ke mpho yeo Modimo a e neago “ka Kriste Jesu Morena wa rena.” (Baroma 6:23) Le gona, Jesu ke “bophelo” go bao ba hwilego. (Joh. 5:28, 29) Go feta moo, nagana ka seo a tlago go se dira bjalo ka Moperisita yo a Phagamego nakong ya Pušo ya gagwe ya Nywaga e Sekete. O tla nea balata ba gagwe ba lefaseng tlhakodišo ya ka mo go sa felego sebeng le lehung!—Baheb. 9:11, 12, 28.

16. Re na le lebaka lefe la go latela Jesu?

¹⁶ Ka gona, karabo ya Jesu go Thomase ke ya bohlokwa kudu go rena. Jesu ke tsela, therešo le bophelo. Ke yena yoo Modimo a mo rometšego lefaseng gore lefase le phološwe ka yena. (Joh. 3:17) Le gona, ga go yo a tlago go Tate ge e se ka yena. Beibele e bolela ka mo go kwagalago gore: “Ga go phološo go motho le ge e le ofe yo mongwe, gobane ga go leina le lengwe ka tlase ga legodimo leo le neilwego batho leo ka lona re tlago go phološwa.” (Dit. 4:12) Ka gona, go sa šetšwe seo re bego re se dumela pele, ke gabohlale gore re dumele go Jesu gomme re mo latele e le gore a re iše bophelong.—Joh. 20:31.

Re Laelwa Gore re Theetše Kriste

17. Ke ka baka la’ng go le bohlokwa gore re theetše Morwa wa Modimo?

¹⁷ Petro, Johane le Jakobo ba ile ba bona ge Jesu a fetoga lebopo. Ka nako yeo ba ile ba kwa lentšu le e-tšwa legodimong le re: “Yo ke Morwa wa-ka, yena yo a kgethilwego. Le mo theetšeng.” (Luka 9:28, 29, 35) Go kwa ga rena taelo ya gore re theetše Mesia ke taba ya bohlokwa.—Bala Ditiro 3:22, 23.

18. Re ka theetša Jesu Kriste bjang?

¹⁸ Go theetša Jesu go akaretša ‘go mo tsepelela le go naganišiša ka mohlala wa gagwe.’ (Baheb. 12:2, 3) Ka gona, re dira gabotse ge re ‘hlokomela go feta ka mo go tlwaelegilego dilo’ tšeo re di balago ka yena ka Beibeleng le dikgatišong tša “mohlanka yo a botegago le wa temogo” gaešita le tšeo re di kwago tša mabapi le yena dibokeng tša Bokriste. (Baheb. 2:1; Mat. 24:45) Bjalo ka dinku tša gagwe, anke re ikemišetšeng go theetša Jesu le go mo latela.—Joh. 10:27.

19. Ke’ng seo se tlago go re thuša go tšwela pele re latela Kriste?

¹⁹ Na re ka kgona go tšwela pele re latela Kriste ka katlego go sa šetšwe seo se re diragalelago? Ee re ka kgona, ge feela re “dula [re] swere mohlala wa mantšu a phedišago” ka go diriša seo re ithutago sona ‘ka tumelo le lerato tšeo di lego mabapi le Kriste Jesu.’—2 Tim. 1:13.

Ke’ng Seo o Ithutilego Sona?

• Ke ka baka la’ng go latela “Kriste” go ka re batametša kgaufsi le Jehofa?

• Ke ka baka la’ng go ekiša Jesu go swana le go ekiša Jehofa?

• Ke bjang Jesu e lego “tsela le therešo le bophelo”?

• Ke ka baka la’ng re swanetše go theetša Motlotšwa wa Jehofa?

[Dipotšišo tša Thuto]

[Seswantšho go letlakala 29]

Dithuto tša Jesu di bonagaditše tsela ya Jehofa e phagamego ya go nagana

[Seswantšho go letlakala 30]

Re swanetše go latela Motlotšwa wa Jehofa ka potego

[Seswantšho go letlakala 32]

Jehofa o itše: “Yo ke Morwa wa-ka . . . le mo theetšeng”