Omokonda Yatyi Wesukisila Okulandula “Kristu”?
Omokonda Yatyi Wesukisila Okulandula “Kristu”?
“Inkha umue uhanda okulandula muame, elianye oe muene . . . atualako okundandula kese nthiki.”—LUCAS 9:23.
1, 2. Omokonda yatyi tyakolela pala onthue okulilongesa omokonda yatyi tuesukisila okulandula “Kristu”?
JEOVA uhambukwa unene ngatyi, okutala mo mawaneno mo vafendeli vae ovape no vakuendye vesuka notyili! Tyina utualako nokulilongesa Ombimbiliya, nokuenda apeho komaliongiyo Ovakristau, nokuyawisa enoñgonoko liove liotyili tyeyovo tyikahi mondaka ya Huku, wesukisa okutavela nomutima onondaka mba Jesus ukonga okuti: “Inkha umue uhanda okulandula muame, elianye oe muene iya atyindipo omuti wae wemone, atualako okundandula kese nthiki.” (Lucas 9:23) Jesus wati liaanya ove muene otualako okumulandula, tyilekesa okuti, una etyi wesuka okulinga. Otyo tyakolela pala onthue, okulilongesa omokonda yatyi tuna okulandula “Kristu.”—Mateus 16:13-16.
2 Iya onthue vokukahi nokuendelale monomphai mba Jesus Kristu? Tuavelwa ondundo opo “tutualeko okulinga vali unene.” (1 Tessalonicenses 4:1, 2) Inkha tuelilongesa otyili pahe ine tuehimbikale kohale okusokolola omokonda yatyi tuna okulandula Kristu matyitukuatesako okutavela ondundo ya Paulu yokutualako okulandula Kristu ononthiki ambuho mbomuenyo wetu. Pahe matulilongesa omahunga etano alekesa omokonda yatyi tuna okulandula Kristu.
Okuyawisa Oupanga Wetu na Jeova
3. Omononkhalelo patyi onombali tupondola okunoñgonoka Jeova?
3 Etyi ankho Apostolu Paulu apopila voko Atena oe “watalama mo Areopagu” (Ombonge Onene yoko Atena), evepopila okuti: “[Huku] wanaka omivo na apa paoyela otyilongo ovanthu vena okukala. Opo vaovole Huku, inkha tyili vahanda okumuvasa, namphila Huku kekahi kokule na kese umue puonthue.” (Atos 17:22, 26, 27) Onthue tupondola kuovola Huku atumunoñgonoka nawa. Mongeleka, tyina tutala ovipuka Huku atunga vitulongesa unene konthele yovituwa nounongo wa Huku. Okusokolola unene movipuka viatungwa tyitulongesa unene konthele Yomutungi wetu. (Romanos 1:20) Tupu, Jeova Mondaka yae Ombimbiliya, wapopia nawa oñgeni oe ekahi. (2 Timóteo 3:16, 17) Tyina tuamasokolola vali unene ‘movilinga viae’ ‘nokusuka novituwa viae’ tyitukuatesako okunoñgonoka nawa Jeova.—Salmo 77:12.
4. Oñgeni okulandula Kristu tyitukuatesako okukala noupanga na Jeova?
4 Onkhalelo onkhuavo ongwa yokukala noupanga omunene na Jeova, okulandula Kristu. Soka kenkhimano Jesus ena mokuakala ponthele ya Tate yae omuwo omunyingi “etyi nkhele eheneye mouye”! (João 17:5) Jesus “onthyimbi yovipuka Huku atunga.” (Revelação 3:14) “Ngotyiveli kovipuka aviho,” wakala omavonge-vonge omanima na Tate yae, Jeova. Jesus etyi eheneye pano pohi, wakala omuwo omunyingi na Tate yae. Jesus wali epanga liotyotyili lia Huku, nehambu liokuundapa kumue no Wepondolo Aliho, kutupu nawike ankho una oupanga una Huku na Jesus. Jesus ankho katale vala oñgeni Tate yae alinga ovipuka, nokukoneka ovituwa viae no ñgeni elitehelela, mahi ankho tupu utala nokulinga atyiho ekahi nokulilongesa konthele ya Tate yae. Moluotyo, Omona omutaveli walifwa na Tate yae—haunene Ombimbiliya ipopia okuti Oe “otyifuika tya Huku uhamonwa.” (Colossenses 1:15) Mokulandula nawa Kristu, matukala noupanga omunene na Jeova.
Pala Okuhetekela Vali Nawa Jeova
5. Oityi matyitukuatesako okulandula vali nawa Jeova, iya omokonda yatyi?
5 Onthue tuatungwa otyifuika tya Huku, tuelifwa nae, tuna ounongo wokulekesa ovituwa ngo viae. (Gênesis 1:26) Apostolu Paulu waavela ondundo ovakristau okuti: “Hetekelei Huku, ngovana ononthyolwa.” (Efésios 5:1) Okulandula Kristu tyitukuatesako okuhetekela Tate yetu keulu. Mokonda nawike wahetekela vali nawa omalusoke a Jeova novituwa viae tyivile Jesus, nawike walongesa vali nawa konthele ya Jeova tyipona Jesus. Etyi ekahi pano pohi, keivalesile vala enyina lia Jeova. Anthi, wapopia nawa konthele Yomunthu una enyina olio. (Tanga Mateus 11:27.) Otyo wetyilinga monondaka no movituwa nomokulongesa no monongelaka mbae.
6. Oityi onondonga mba Jesus mbuhololola konthele ya Jeova?
6 Mokulongesa, Jesus walekesa oityi Huku ahanda kuonthue no ñgeni elitehelela konthele yo vafendeli vae. (Mateus 22:36-40; Lucas 12:6, 7; 15:4-7) Mongeleka, etyi atumbula otyitumino tyimue po vitumino ekwi tyati “Wahalinge oumbalehi” Jesus wahangununa okusoka kua Huku, okuti otyo tyimoneka momutima womuthu tyina nkhele ehenetyilige. Oe wati: “Kese una utualako okutala komukai, nepeleyo lio kumuhanda, ngotyo momutima walingale oumbalehi nae.” (Êxodo 20:14; Mateus 5:27, 28) Etyi amana okupopia oñgeni ova Faliseu vahangununa Ovitumino, okuti “Humbei ovo munthele yenyi amuyale onondyali mbenyi,” Jesus wevenoñgonokesa omalusoke a Huku okuti: “Tualeiko nokukala nohole nonondyali mbenyi nokuitilako vana vemumonesa ononkhumbi.” (Mateus 5:43, 44; Êxodo 23:4; Levítico 19:18) Okunoñgonoka nawa etyi Huku asoka netyi elitehelela netyi ahanda kuonthue tyituvatela okumuhetekela vali nawa.
7, 8. Oityi tulilongesa konthele ya Jeova mokutalela ku Jesus?
7 Tupu movipuka Jesus alinga walekesile oñgeni Tate yae atuwa. Tyina tutanga mono Evandyeliu tumona okuti Jesus wakala nokankhenda na vana vamona ononkhumbi, novahepi, netyi anumana novalongwa vae ankho vatyilika ovana okuya kwe. Otyo katyilekesa nawa okuti Jesus ankho ulitehela nga Tate yae? (Marcos 1:40-42; 10:13, 14; João 11:32-35) Soka oñgeni etyi Jesus alinga tyitukuatesako okunoñgonoka nawa ovituwa via Huku. Omahuviso Kristu alingile kaalekesa epondolo enene ena? Jesus kaundapesile epondolo olio opo amone ine okunyona vakuavo. (Lucas 4:1-4) Kuetyi alingile kovakua-vitanda mondyuo ya Huku tyilekesa okuti ankho uhole ouviuki! (Marcos 11:15-17; João 2:13-16) Monondonga mbae nonondaka mbae onongwa mbehikile komitima viovanthu, tyilekesa okuti omunongo “vali tyipona Salomau.” (Mateus 12:42) Jesus walekesa okuti ankho una ohole mokuava omuenyo wae, ngetyi apopia okuti: “Nawike una ohole ipona yauna waava omuenyo mokonda yomapanga ae.”—João 15:13.
8 Omona wa Huku walekesile nawa Jeova muetyi apopia netyi alinga, otyo apopila okuti: “Una uluete ame, tupu uluete Tate.” (Tanga João 14:9-11.) Okulandula Kristu tyelifwa nokulandula Jeova.
Jesus Omulembulwa wa Jeova
9. Onalupi Jesus akala Omulembulwa wa Huku, iya oñgeni?
9 Tala etyi tyaendelepo mo 29 P.K. etyi Jesus ena omanima 30, etyi apita ku João Batista. “Etyi Jesus ambatisalwa, watunda momeva. Iya eulu aliikuka, amono ospilitu ya Huku imulaukila ngo pomba.” Opo muvo oo, akala Kristu ine o Mesia. Tupu, opo Jeova muene alekesa okuti Omulembulwa Wae etyi ati: “Ou Omona wange onthyolwa, ame napanda unene.” (Mateus 3:13-17) Oo omahunga omawa pala onthue tuhanda okulandula Kristu!
10, 11. (a) Omononkhalelo patyi enyina “Kristu” liaundapeswa mu Jesus? (b) Omokonda yatyi tuhapondola okuyekapo okulandula Jesus Kristu?
10 Mombimbiliya, enyina “Kristu” liaundapeswa mu Jesus mononkhalelo ononyingi mbelikalaila, ngetyi o Jesus Kristu, na Kristu Jesus na Kristu. Jesus muene wapopia okuti “Jesus Kristu”—okutetekela Jesus akulandula enyina lienkhimano Kristu, etyi elikuambela ku Tate yae okuti: “Omuenyo wahapu oyou, okunoñgonoka ove awike Huku yotyotyili, na Jesus Kristu una watumine.” (João 17:3) Etyi aundapesa onondaka ombo wapopia konthele yauna watumua na Huku iya akala Omulembulwa wae. Tyina kutetekela enyina lienkhimano, iya akulandula enyina Jesus, okuti “Kristu Jesus” tyilekesa otyilinga apewa. (2 Coríntios 4:5) Tyina konyima yenyina Kristu kuna oletela o, okuti “o Kristu” tyitoneka unene otyilinga tya Jesus tyo Mesiya.—Atos 5:42.
11 Konthele oñgeni enyina lienkhimano “Kristu” liaundapeswa mu Jesus, tyatonekwa monondaka ombu mbakolela: Namphila Omona wa Huku eile pano pohi ngomunthu nokulinga ehando lia Tate yae, wavilapo vali tyipona kese munthu ine omuuli. Oe weya okukala omulembulwa wa Jeova. Onthue, katupondola okuyekapo okulandula Mue.
Jesus Oe Ondyila Ike Yeyovo
12. Onondaka patyi Jesus apopila Tome mbuna ehangununo enene pala onthue?
12 Ehunga ekuavo liakolela tuesukisila okulandula Mesia likahi monondaka Jesus apopila ovalongwa vae vekolelo etyi kuakamba katutu pala ononkhia mbae. Mekumbululo aavela Tome konthele yetyi apopia okuti mekevepakela omphangu, Jesus wati: “Ame ndyila, ame tyili, ame muenyo. Nawike uya ku Tate ahapiti puame.” (João 14:1-6) Opo muvo oo, Jesus apopila apostolu mbae vekolelo 11. Oe wevelaa okukevepakela omphangu keulu, mahi onondaka mbae tupu mbuna ehangununo enene pala vana vena ekevelelo liokukamona omuenyo wahapu pano pohi. (Revelação 7:9, 10; 21:1-4) Ñgeni ngotyo?
13. Omonkhalelo patyi Jesus “ondyila”?
13 Jesus Kristu “ondyila.” Jesus oe vala ondyila ike pala una wahanda okufuena ku Huku. Otyo tyakolela unene momalikuambelo okuita menyina liae, namphila Jesus etupopila okuti Tate metuavela etyi tuesukisa tyelikuata nehando Liae. (João 15:16) Tupu oe “ondyila” monkhalelo onkhuavo. Onkhali yayapula ovanthu ku Huku. (Isaías 59:2) Jesus waava “omuenyo wae ngofeto pala okuyovola ovanthu ovanyingi.” (Mateus 20:28) Moluotyo, Ombimbiliya yahangununa okuti: “Ohonde ya Jesus . . . ituyelesa ononkhali mbetu ambuho.” (1 João 1:7) Omona waikula ondyila opo tukale noupanga omuwa na Huku. (Romanos 5:8-10) Okukala nekolelo mu Jesus nokutavela kwe tupondola okukala nomukalelo omuwa na Huku.— João 3:36.
14. Oñgeni Jesus “otyili”?
14 Jesus “otyili” hamokonda vala apeho ankho upopia otyili nokulinga ovipuka viotyotyili, mahi omokonda omaulo aeho apopia konthele ya Mesia, omanyingi pomaulo oo, elifwilapo mue. Apostolu Paulu wahoneka okuti: “Omilao aviho Huku alinga, vilifuilapo menyina liae.” (2 Coríntios 1:20) Okupopia konthele Yovitumino Viapelwe Moisesi vilekesa okuti ankho “okahi kovipuka maviya” viafuiswapo mu Kristu Jesus. (Hebreus 10:1; Colossenses 2:17) Jesus oe omunthu wakolela muna omilao aviho viwanena, otyo tyitukuatesako okunoñgonoka otyilinga tyae mehando lia Jeova. (Revelação 19:10) Opo tupoleko ouwa tyina Huku afuisapo ehando ena nonthue, tuesukisa okulandula Mesia.
15. Omonkhalelo patyi Jesus “omuenyo”?
15 Jesus “omuenyo” mokonda walanda ovanthu aveho nohonde yae yakolela, iya omuenyo wahapu otyali tya Huku “menyina lia Kristu Jesus Tatekulu yetu.” (Romanos 6:23) Jesus tupu omuenyo pala vana vankhia. (João 5:28, 29) Tupu, soka kuetyi makalinga tyina maundapa Ngomunene-nakwa mokueenda Kuoutumini wae Womanima Ovityita Ekwi. Makayovola ovanthu vae apeho monkhali no mononkhia!—Hebreus 9:11, 12, 28.
16. Ehunga patyi tuna lituhindila okulandula Jesus?
16 Ekumbululo Jesus aavelele Tome, lina esilivilo enene pala onthue. Jesus ondyila notyili nomuenyo. Jesus oe Huku atumine mouye opo ouye uhupe menyina liae. (João 3:17) Iya nawike wenda ku Tate ahakuate pu Jesus. Ombimbiliya itupopila nokuayandyuluka okuti: “Kutupu eyovo momunthu omukuavo. mokonda mombuelo yeulu mutupu vali enyina ekuavo, ovanthu vapewa opo tuyovolwe.” (Atos 4:12) Ngotyo, kese tyipuka ankho tutavela kohale, tyitupu vali esilivilo, tyakolela okutavela ku Jesus, nokulandula mue, iya otyo tyituala komuenyo.—João 20:31.
Onthue Tuatumua Okutehelela Kristu
17. Omokonda yatyi kuonthue tyakolela okutehelela Komona wa Huku?
17 Petulu na João na Tiago vamuene emonekelo limue liakolela. Momuwo oo, aveivi ondaka yatunda keulu yati: “Ou omana wange, una naholovona. Mutehelelei.” (Lucas 9:28, 29, 35) Okutavela kuetu kotyitumino tyokutehele Mesia tyakolela unene.—Tanga Atos 3:22, 23.
18. Oñgeni tupondola okutehelela Jesus Kristu?
18 Okutehelela ku Jesus muakutikinya ‘okutala nawa kue, nukulandulila popepi onondyila mbae.’ (Hebreus 12:2, 3) Moluotyo, otyiwa “okutehelela vali nawa tyipona etyi tutehaililale ovipuka” tutanga konthele yae Mombimbiliya nomomikanda vio “omupika wekolelo nokualunguka,” nokutehele nawa konthele yae momaliongiyo Ovakristau. (Hebreus 2:1; Mateus 24:45) Ngonongi mbae, tutehelelei ku Jesus nombili nokumulandula.—João 10:27.
19. Oityi matyitukuatesako okulandula apeho Kristu?
19 Okuti tupondola okulandula Kristu apeho, namphila tuvahiwa novitateka? Enga, tupondola okutyivila, inkha “tukakatela monondaka ombu onongwa” mokuundapesa etyi tualongeswa “kuame nekolelo nohole vikahi mu Kristu Jesus.”—2 Timóteo 1:13.
Oityi Ove Welilongesa?
• Omokonda yatyi okulandula “Kristu” tyipameka oupanga wetu na Jeova?
• Omokonda yatyi okuhetekela Jesus tyelifwa nokuhetekela Jeova?
• Oñgeni Jesus “ondyila notyili nomuenyo”?
• Omokonda yatyi tuesukisa okutehelela Omulembulwa wa Jeova?
[Omapuko Elongeso]
[Olutalatu pefo 28]
Onondonga mba Jesus mbulekesa nawa omaluske a Jeova
[Olutalatu pefo 29]
Tuna yokulandula nekolelo Omulembulwa wa Jeova
[Olutalatu pefo 31]
Jeova wapopia okuti: “ou Omona wange . . . mutehelelei”