Pakiko Sigui “e Kristu”?
Pakiko Sigui “e Kristu”?
“Si un hende kier bin mi tras, lag’é nenga su mes . . . i sigui mi.”—LUK. 9:23.
1, 2. Dikon ta importante pa nos konsiderá e motibunan pakiko nos mester sigui “e Kristu”?
YEHOVA ta sintié masha kontentu ora e mira boso hóbennan i boso ku a kuminsá mustra interes den e bèrdat entre e multitut di su adoradónan riba tera. Segun ku boso ta sigui studia Beibel, asistí na e reunionnan kristian regularmente i oumentá boso konosementu di e bèrdat ku ta salba bida ku Dios su Palabra ta kontené, boso tin ku pensa seriamente riba e siguiente invitashon di Hesus. E ta bisa: “Si un hende kier bin mi tras, lag’é nenga su mes i hisa su [“staka di tormento,” NW] tur dia i sigui mi.” (Luk. 9:23) Ku e palabranan ei, Hesus ta bisando ku boso tin ku nenga boso mes i bira su siguidó. P’esei, ta importante pa nos analisá pakiko nos mester sigui “e Kristu.”—Mat. 16:13-16.
2 Kiko di nos ku ta kanando kaba den e pasonan di Hesukristu? Beibel ta konsehá nos pa ‘hasi mas di loke nos ta hasiendo kaba.’ (1 Tes. 4:1, 2, BPK) Sea ku ta resientemente òf hopi tempu pasá nos a aseptá e adorashon berdadero, ta bon pa nos meditá riba e motibunan ku nos tin pa sigui e Kristu. Pasobra esaki lo yuda nos apliká Pablo su konseho i sigui e Kristu mas plenamente tur dia. Laga nos konsiderá sinku motibu pakiko nos mester sigui e Kristu.
Pa Nos Por Tin un Mihó Relashon ku Yehova
3. Menshoná dos manera ku nos por siña konosé Yehova.
3 Ora apòstel Pablo tabata “pará den sentro di Areópago,” el a bisa e hendenan di Atenas: ‘[Dios] a fiha tempunan stipulá i e límitenan di [hende su] lugánan di biba, pa nan buska Dios, si di algun manera, fulando, nan por hañ’é, maske e no ta leu di kada un di nos.’ (Echo. 17:22, 26, 27) Pues, nos por buska Dios i siña konos’é di bèrdat. Por ehèmpel, ora nos opservá Dios su kreashon i ta meditá ku apresio riba esaki, nos por siña masha hopi kos tokante Dios su kualidat- i abilidatnan. (Rom. 1:20) Ademas, Yehova a revelá detayenan tokante su mes den su Palabra, e Beibel. (2 Tim. 3:16, 17) Mas nos ‘meditá riba su obranan’ i ‘keda pensa riba su echonan,’ òf manera di trata, nos ta siña konosé Yehova mihó.—Sal. 77:12.
4. Dikon nos por tin un mihó relashon ku Yehova si nos ta sigui e Kristu?
4 Un manera masha bunita ku nos por tin asta un mihó relashon ku Yehova ta di sigui e Kristu. Djis pensa riba e gloria ku Hesus tabatin serka su Tata “promé ku mundu tabata.” (Juan 17:5) E ta “e prinsipio di e kreashon di Dios.” (Rev. 3:14) Komo “e primogénito di henter kreashon,” el a biba míles i míles di aña den shelu serka su Tata, Yehova. Durante Hesus su eksistensia prehumano, el a hasi mas ku djis pasa tempu huntu ku su Tata. E tabata Dios su kompañero personal; el a traha felismente huntu ku e Todopoderoso, i nan dos a forma e laso di amor di mas fuerte ku hamas a yega di eksistí. Hesus no solamente a opservá e manera ku su Tata a hasi kosnan dor di tuma nota di Su sintimentu- i atributonan, pero ademas di esei, el a apsorbá i adoptá tur loke el a siña tokante su Tata. Komo resultado di esei, e Yu obediente akí a bira meskos ku su Tata. El a imit’é asina bon ku Beibel ta referí na dje komo “e imágen di e Dios invisibel.” (Kol. 1:15) P’esei, si nos ta sigui e Kristu kuidadosamente, nos por tin un mihó relashon ku Yehova.
Pa Nos Imitá Yehova Mihó
5. Kiko lo yuda nos imitá Yehova mihó, i dikon?
5 Debí ku nos ta ‘trahá segun e imágen di Dios, konforme su semehansa,’ nos tin e kapasidat di reflehá e atributonan di Dios. (Gén. 1:26) Apòstel Pablo a urgi kristiannan pa “sea imitadónan di Dios, manera yunan stimá.” (Efe. 5:1) Ora nos ta sigui e Kristu, esaki ta yuda nos imitá nos Tata selestial. Esei ta asina pasobra no tin ningun hende ku por imitá Dios su manera di pensa, su sintimentunan i su personalidat mihó ku Hesus. Ademas, no tin ningun otro persona ku por splika na un manera mas kla ki klase di persona Dios ta. Ora Hesus tabata na tera, e no a djis menshoná e nòmber di Yehova. Mas bien, el a revelá na hende e Persona ku e nòmber ei ta representá. (Lesa Mateo 11:27.) Hesus a hasi esaki mediante su palabra- i echonan, su siñansanan i su ehèmpel.
6. Kiko Hesus su siñansanan ta revelá tokante Yehova?
6 Mediante su siñansanan, Hesus a mustra kiko Dios ta rekerí di nos i ki balor Dios su adoradónan tin den Su bista. (Mat. 22:36-40; Luk. 12:6, 7; 15:4-7) Por ehèmpel, despues ku Hesus a sita un di e Dies Mandamentunan—esun ku ta bisa “no kometé adulterio”—el a splika kon Dios ta pensa di loke ta tuma lugá den kurason di un hende hopi tempu promé ku e kometé e akto ei. El a bisa: “Ken ku wak un muhé pa dese’é, ya kaba el a kometé adulterio kuné den su kurason.” (Eks. 20:14; Mat. 5:27, 28) Despues ku Hesus a menshoná un parti di e Lei ku e fariseonan tabata interpretá robes, esta, ku bo mester “stima bo próhimo i odia bo enemigu,” el a mustra kiko ta Yehova su punto di bista. El a bisa: ‘Stima boso enemigunan, i hasi orashon pa esnan ku ta persiguí boso.’ (Mat. 5:43, 44; Eks. 23:4; Lev. 19:18) Ora nos ta komprondé kon Dios ta pensa i sinti i kiko e ta rekerí di nos, esaki ta yuda nos imit’é mihó.
7, 8. Kiko nos ta siña tokante Yehova for di Hesus su ehèmpel?
7 Mediante Hesus su ehèmpel tambe el a revelá ken su Tata ta. Den e Evangelionan nos ta lesa ku Hesus tabatin kompashon pa hende den nesesidat, komprenshon pa esnan ku tabata sufri i ku el a rabia ku su disipelnan pasobra nan a reprendé e muchanan. Ora nos lesa e relatonan akí, nos ta imaginá nos mes ku e Tata lo a desplegá e mesun sintimentunan, no ta bèrdat? (Mar. 1:40-42; 10:13, 14; Juan 11:32-35) Konsiderá kon Hesus su echonan ta yuda nos identifiká Dios su atributonan. E milagernan ku Kristu a hasi no a demostrá ku e tabatin un inmenso poder na su disposishon? Apesar di esei, nunka el a usa e poder ei pa probecho personal òf ku e intenshon di hasi daño na otro persona. (Luk. 4:1-4) E manera ku el a saka e komersiantenan golos for di e tèmpel a demostrá su sentido di hustisia na un manera masha kla! (Mar. 11:15-17; Juan 2:13-16) Su siñansa- i e palabranan agradabel ku el a usa pa alkansá kurason di hende ta indiká ku e tabata “mas ku Salomon” den sabiduria. (Mat. 12:42) Beibel ta duna un bunita deskripshon di e amor ku Hesus a desplegá dor di entregá su bida pa otro hende. E ta bisa: “Ni un hende no tin amor mas grandi ku esaki.”—Juan 15:13.
8 E Yu di Dios a representá Yehova na un manera asina perfekto den tur loke el a bisa i hasi ku e por a bisa: “Esun ku a mira mi a mira e Tata.” (Juan 14:9) Ora nos ta sigui e Kristu ta meskos ku imitá Yehova.
Hesus Ta e Ungí di Yehova
9. Na ki tempu i kon Hesus a bira Dios su Ungí?
9 Konsiderá loke a tuma lugá den hèrfst di aña 29 di nos era ora ku Hesus, na edat di 30 aña, a bai serka Juan Boutista. “Despues di a wòrdu batisá, Hesus a sali mesora for di awa; i ata, e shelunan a wòrdu habrí i el a mira e spiritu di Dios baha manera un palomba i keda riba dje.” Na e momento ei, el a bira e Kristu, òf Mesias. E ora ei, Yehova mes a duna di konosé ku Hesus tabata su Ungí. El a bisa: “Esaki ta mi Yu stimá, den kende mi tin goso.” (Mat. 3:13-17) Esei ta un ekselente motibu pakiko nos mester sigui e Kristu!
10, 11. (a) Den ki maneranan e título “Kristu” ta ser usá pa referí na Hesus? (b) Dikon nos tin ku hasi sigur di sigui Hesukristu?
10 Beibel ta usa e título “Kristu” den vários manera pa referí na Hesus. Por ehèmpel, e ta yam’é Hesukristu, Kristu Hesus i e Kristu. Hesus mes a usa e promé kombinashon, esta, “Hesukristu,” ku ta e nòmber siguí pa e título. Den orashon na su Tata, el a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) E manera ku el a usa su nòmber akinan klaramente ta hala atenshon na esun ku Dios a manda i ku a bira Su Ungí. Ora ku pone e título dilanti di e nòmber, manera den e kaso di “Kristu Hesus,” e énfasis ta riba e persona su posishon òf funshon i no riba e mes. (2 Kor. 4:5) Un otro manera pa enfatisá Hesus su funshon komo e Mesias ta di usa e ekspreshon “e Kristu,” esta, e título ku e artíkulo definí su dilanti.—Echo. 5:42.
11 Sin importá kon e título “Kristu” ta wòrdu usá ora e ta referí na Hesus, e ta resaltá e bèrdat importante akí: Ounke e Yu di Dios a bini na tera komo hende i a hasi e boluntat di su Tata konosí, e no tabata djis un hòmber komun i koriente ni un simpel profeta; el a bira e Ungí di Yehova. Nos tin ku hasi sigur di sigui e Ungí akí.
Hesus Ta e Úniko Kaminda pa Salbashon
12. Kiko Hesus a bisa apòstel Tomas ku ta importante pa nos?
12 Nos ta haña un otro motibu masha importante pa sigui e Mesias den e palabranan ku Hesus a deklará na su fiel apòstelnan djis promé ku su morto. Despues ku el a bisa nan ku lo el a bai i prepará un lugá pa nan por ta huntu kuné, Tomas a hasié un pregunta relashoná ku e asuntu ei. Hesus a kontest’é: “Ami ta e kaminda, i e bèrdat, i e bida; ni un hende no ta bin serka e Tata, sino pa medio di mi.” (Juan 14:1-6) Na e momento ei, Hesus tabata papiando ku e 11 fiel apòstelnan i a primintí nan un lugá den shelu. Pero su palabranan ta importante tambe pa esnan ku tin e speransa di haña bida eterno riba tera. (Rev. 7:9, 10; 21:1-4) Dikon nos por bisa esei?
13. Den ki sentido Hesus ta “e kaminda”?
13 Hesukristu ta “e kaminda.” Esei ta nifiká ku ta pa medio di dje so nos por aserká Dios. Esaki ta sierto den asuntu di orashon, pasobra ta solamente si nos hasi orashon den e nòmber di Hesus, nos tin e siguransa ku e Tata lo duna nos tur loke nos pidi na armonia ku Su boluntat. (Juan 15:16) Sinembargo, Hesus ta “e kaminda” den un otro sentido tambe. Piká a alehá humanidat for di Dios. (Isa. 59:2) Hesus a duna “su bida komo preis di reskate pa hopi.” (Mat. 20:28) Beibel ta splika ku komo resultado di esei, “e sanger di Hesus . . . ta limpia nos di tur piká.” (1 Juan 1:7) Di e manera ei, e Yu a habri e kaminda pa nos rekonsiliá ku Dios. (Rom. 5:8-10) Pero, ta solamente si nos pone fe den Hesus i obedes’é, nos por tin un bon relashon ku Dios.—Juan 3:36.
14. Den ki sentido Hesus ta “e bèrdat”?
14 Hesus ta “e bèrdat” no solamente pasobra semper el a papia i biba e bèrdat, sino tambe pasobra tur e profesianan skirbí tokante e Mesias—i nan ta hopi—a kumpli den dje. Apòstel Pablo a skirbi: “Tur e promesanan di Dios den dje ta sí.” (2 Kor. 1:20) Asta “un sombra di e bon kosnan ku ta bin” ku e Lei di Moisés ta kontené a bira realidat den Kristu Hesus. (Heb. 10:1; Kol. 2:17) Hesus ta e persona sentral di tur e profesianan, i nan ta yuda nos komprondé su papel importante den kumplimentu di Yehova su propósito. (Rev. 19:10) Pa nos por benefisiá di e kumplimentu di Dios su propósito pa nos, nos tin ku sigui e Mesias.
15. Den ki sentido Hesus ta “e bida”?
15 Hesus ta “e bida” pasobra el a kumpra e rasa humano ku su sanger, i bida eterno ta un regalo ku Dios ta duna hende mediante “Kristu Hesus, nos Señor.” (Rom. 6:23) Hesus ta “e bida” tambe pa esnan ku a muri, pasobra e ta esun ku lo lanta nan for di morto. (Juan 5:28, 29) Es mas, pensa riba loke lo e hasi komo Sumo Saserdote durante su Reinado di Mil Aña. Sí, lo e optené liberashon eterno for di piká i morto pa su súpditonan terenal.—Heb. 9:11, 12, 28.
16. Ki motibu nos tin pa sigui Hesus?
16 Pues, e kontesta ku Hesus a duna Tomas ta di sumo importansia pa nos. Hesus ta e kaminda i e bèrdat i e bida. E ta esun ku Dios a manda na mundu pa mundu por ser salbá pa medio di dje. (Juan 3:17) I ningun hende no ta yega serka e Tata sino ta pa medio di dje. Beibel ta bisa bon kla: “No tin salbashon den ningun otro; pasobra no tin bou di shelu ningun otro nòmber ku a wòrdu duná na hende, pa medio di kual nos mester wòrdu salbá.” (Echo. 4:12) P’esei, sea kual sea nos background, ta sabí pa nos kere den Hesus, siguié i asina haña bida.—Juan 20:31.
Nos A Haña e Mandato pa Skucha e Kristu
17. Dikon ta importante pa nos skucha e Yu di Dios?
17 Pedro, Juan i Santiago tabata presente ora e transfigurashon a tuma lugá. Na e okashon ei, nan a tende un bos for di shelu ku a bisa: “Esaki ta mi Yu skohí; tende na dje!” (Luk. 9:28, 29, 35) Ta masha importante pa nos obedesé e mandato pa skucha e Mesias.—Lesa Echonan 3:22 i 23.
18. Kon nos lo por skucha Hesukristu?
18 Skucha Hesus ta enserá ‘fiha nos wowo riba dje i konsiderá su ehèmpel’ kuidadosamente. (Heb. 12:2, 3) P’esei, ta bon pa nos “paga muchu mas atenshon na loke” nos ta lesa tokante Hesus den Beibel, den e publikashonnan di “e esklabo fiel i prudente” i na loke nos ta tende di dje na e reunionnan kristian. (Heb. 2:1; Mat. 24:45) Komo Hesus su karnénan, laga nos ta ansioso pa skuch’é i siguié.—Juan 10:27.
19. Kiko lo yuda nos sigui e Kristu kontinuamente?
19 Ta posibel pa nos sigui e Kristu kontinuamente apesar di kualke opstákulo? Sí, basta nos sigui “retené e ehèmpel di palabranan sano” dor di praktiká loke nos ta siña ku “fe i amor, kuanan ta den Kristu Hesus.”—2 Tim. 1:13.
Kiko Bo A Siña?
•Dikon ora nos ta sigui “e Kristu” nos por tin un mihó relashon ku Yehova?
•Dikon ora nos ta imitá Hesus ta meskos ku imitá Yehova?
•Den ki sentido Hesus ta “e kaminda, i e bèrdat, i e bida”?
•Dikon nos mester skucha Yehova su Ungí?
[Preguntanan di Estudio]
[Plachi na página 27]
Hesus su siñansa a reflehá Yehova su manera elevá di pensa
[Plachi na página 28]
Nos tin ku sigui Yehova su Ungí fielmente
[Plachi na página 30]
Yehova a deklará: “Esaki ta mi Yu . . . tende na dje!”