Why Nao Iumi Mas Followim “Christ”?
Why Nao Iumi Mas Followim “Christ”?
“Sapos eniwan laek followim mi, hem mas givim laef bilong hem for God . . . and gohed followim mi olowe.”—LUKE 9:23.
1, 2. Why nao hem important for iumi ting raonem why iumi shud followim “Christ”?
JEHOVAH hapi tumas for lukim iufala young wan and iufala wea interest long truth kam hipap witim pipol bilong hem! Taem iufala gohed studyim Bible, kam long olketa meeting evritaem, and gohed for lanem olketa tru teaching long Bible, ting strong long disfala toktok wea Jesus talem: “Sapos eniwan laek followim mi, hem mas givim laef bilong hem for God and hem mas karem post wea mi karem, and gohed followim mi olowe.” (Luke 9:23) Samting wea Jesus talem hem showimaot man bae laek for givim laef bilong hem long God and followim Jesus. Dastawe hem important for iumi ting raonem why nao iumi shud followim “Christ.”—Matt. 16:13-16.
2 Waswe sapos iumi gohed finis for followim Jesus Christ? Bible talem for iumi ‘trae hard for followim hem gud go moa.’ (1 Thess. 4:1, 2) Nomata sapos iumi worshipim Jehovah for staka year finis or tu-thri year nomoa, hem gud for iumi ting raonem why nao iumi mas followim Christ. Datwan bae helpem iumi for followim toktok wea Paul talem and followim Jesus gud go moa. Distaem iumi bae storyim faevfala samting wea showimaot why iumi shud laek followim Christ.
Mekem Iumi Barava Fren Gud Witim Jehovah
3. Wanem nao tufala samting wea helpem iumi for savve gud long Jehovah?
3 Taem aposol Paul “standap long ples wea olketa kolem Areopagus” and story long olketa long Athens, hem sei: “[God] markem olketa taem and putim olketa spialaen for olketa man stap, bikos God laekem olketa for lukaotem hem. And taem olketa lukaotem hem, bae olketa savve faendem hem, bikos God hem no farawe from eniwan long iumi.” (Acts 17:22, 26, 27) Iumi savve lukaotem God and barava savve gud long hem. Tingim diswan. Taem iumi lukluk long olketa samting wea God wakem, iumi lanem staka samting abaotem olketa wei bilong God and savve bilong hem. (Rom. 1:20) Jehovah storyim staka samting abaotem hem tu long Bible. (2 Tim. 3:16, 17) Taem iumi ‘ting raonem evri waka wea Jehovah duim,’ iumi bae savve gud long hem.—Ps. 77:12.
4. Taem iumi followim Christ, long wanem wei nao datwan helpem iumi barava fren gud witim Jehovah?
4 Taem iumi followim Christ, datwan savve helpem iumi for fren gud go moa witim Jehovah tu. Tingim taem wea Jesus stap witim Dadi bilong hem long heven “long bifor kam yet”! (John 17:5) Hem nao “first wan wea God wakem.” (Rev. 3:14) Hem stap witim Dadi bilong hem long heven for staka year tumas. Long datfala taem, Jesus no stap nating nomoa. Tufala waka tugeta and hem fren gud witim God, dastawe tufala barava lovem tufala. Jesus lukluk taem Dadi bilong hem duim olketa samting and hem minim tingting and olketa wei bilong hem. Bat nara samting tu, hem followim wanem hem lanem and hem showimaot olketa semkaen wei olsem Dadi bilong hem. From hem duim olketa samting hia, datwan mekem hem barava olsem Dadi bilong hem nao. Dastawe Bible story olsem abaotem hem: “Hem tekem olketa wei bilong God.” (Col. 1:15) Sapos iumi barava followim Christ, iumi bae barava fren gud witim Jehovah.
Mekem Iumi Followim Gud Olketa Wei Bilong Jehovah
5. Wanem nao bae helpem iumi barava followim wei bilong Jehovah, and why nao olsem?
5 Taem God ‘wakem iumi, hem wakem iumi for tekem olketa wei bilong hem,’ dastawe iumi savve showimaot olketa semkaen wei olsem God. (Gen. 1:26) Aposol Paul talem olketa Christian: “Iufala nao olketa pikinini bilong God wea hem lovem tumas. Dastawe iufala mas trae for followim wei bilong hem tu.” (Eph. 5:1) Taem iumi followim Christ, iumi bae showimaot semkaen wei olsem Dadi bilong iumi long heven tu. Diswan hem bikos Jesus nao garem semkaen tingting olsem Jehovah, hem duim olketa samting olsem hem, and hem nao savve lanem iumi staka samting abaotem Jehovah. Taem Jesus stap long earth, hem story long pipol abaotem nem bilong Jehovah and hem showimaot tu wanem kaen wei nao God garem. (Readim Matthew 11:27.) Olketa samting wea Jesus talem, duim, teach abaotem, and wei bilong hem nao showimaot diswan.
6. Wanem nao samting wea Jesus teachim showimaot abaotem Jehovah?
6 Jesus lanem iumi abaotem wanem God laekem iumi for duim and hao nao tingting bilong Jehovah abaotem pipol bilong hem. (Matt. 22:36-40; Luke 12:6, 7; 15:4-7) Tingim diswan. Jesus storyim wanfala long Tenfala Komandment wea sei, “Iu mas no duim adultery.” Bihaen datwan, hem storyim tingting bilong God abaotem samting wea man gohed for tingim long heart bilong hem bifor hem duim adultery. Hem sei: “Eniwan wea gohed for lukluk long wanfala woman and laek for durong witim hem, hem duim adultery finis witim hem long heart bilong hem.” (Ex. 20:14; Matt. 5:27, 28) Olketa Pharisee no minim stret wanfala law bilong God and olketa sei, “Iu mas lovem olketa wea lovem iu, and heitim enemy bilong iu.” Bat Jesus talemaot tingting bilong Jehovah abaotem diswan. Hem sei: “Gohed lovem olketa enemy bilong iufala and for prea for olketa wea spoelem iufala.” (Matt. 5:43, 44; Ex. 23:4; Lev. 19:18) Taem iumi savve long tingting bilong God and wanem hem laekem iumi for duim, datwan helpem iumi for barava showimaot gud olketa wei bilong hem.
7, 8. Wanem nao iumi lanem abaotem Jehovah from olketa wei bilong Jesus?
7 Iumi savve lane abaotem Jehovah tu taem iumi ting raonem wei bilong Jesus. Olketa Gospel storyim hao Jesus sorre long pipol, tingim feeling bilong pipol wea kasem nogud samting, and tok strong long olketa disaepol wea stopem olketa pikinini for no kam long hem. Taem iumi readim olketa story hia, iumi luksavve Jehovah garem semkaen wei tu. (Mark 1:40-42; 10:13, 14; John 11:32-35) Tingim hao olketa samting wea Jesus duim showimaot fofala main wei bilong God. Olketa mirakol wea Christ duim showimaot hem kasem bigfala paoa from God. Nomata olsem, hem nating iusim datfala paoa for hemseleva or for spoelem pipol. (Luke 4:1-4) Taem Jesus raosem pipol wea salem and baem samting insaed long temple, hem showimaot hem man for duim stret samting evritaem! (Mark 11:15-17; John 2:13-16) Samting wea hem teachim and talem for kasem tingting bilong pipol hem wise winim toktok bilong “Solomon.” (Matt. 12:42) Jesus barava showimaot love tu bikos olsem Bible talem, hem “willing for dae for olketa fren bilong hem.”—John 15:13.
8 Son bilong God talem and duim evri samting barava olsem Jehovah, dastawe hem fit for sei: “Man wea lukim mi hem lukim Dadi tu.” (Readim John 14:9-11.) Taem iumi followim Christ, datwan showimaot iumi followim Jehovah tu.
Jesus Nao Messiah
9. Long wanem taem nao Jesus kamap Messiah? Wanem nao happen wea showimaot datwan?
9 Tingim samting wea happen long 29 C.E. taem Jesus hem 30 year and hem kam long John Baptaesa. “Stretawe bihaen Jesus hem go anda long wata and hem standap moa, skae hem open, and John lukim spirit bilong God wea olsem wanfala kurukuru kam daon long Jesus.” Long datfala taem Jesus kamap Christ, wea minim Messiah. Long datfala taem tu Jehovah showimaot Jesus hem Messiah taem hem sei: “Diswan nao Son bilong mi wea mi lovem and wea mi hapi long hem.” (Matt. 3:13-17) Dastawe iumi mas laek followim Christ!
10, 11. (a) Wanem nao samfala difren wei wea Bible iusim title “Christ”? (b) Why nao iumi mas followim Jesus Christ?
10 Bible savve iusim disfala title “Christ” long samfala difren wei taem hem story abaotem Jesus. Samfala nao Jesus Christ, Christ Jesus, and datfala Christ. Jesus nao first wan for talem datfala toktok “Jesus Christ.” Hem talem nem firstaem then title bihaen. Taem hem prea long Dadi bilong hem, hem sei: “For olketa kasem laef olowe, olketa mas lane abaotem iu, wea iu nomoa trufala God, and lane abaotem Jesus Christ, wea iu sendem kam.” (John 17:3) From Jesus talem nem bilong hem firstaem and title bihaen, olsem “Jesus Christ,” datwan showimaot God nao sendem hem kam and hem nao Messiah. Bat sapos title kam firstaem long nem, olsem “Christ Jesus,” datwan mekhae long important waka wea Jesus duim. (2 Cor. 4:5) Then sapos hem “datfala Christ,” datwan tu mekhae long important waka wea hem duim from hem nao Messiah.—Acts 5:42.
11 Nomata hao nao Bible iusim datfala title “Christ” taem hem story abaotem Jesus, hem mekhae long disfala important samting: Son bilong God kam long earth and talem pipol abaotem wanem God laekem olketa for duim. Bat hem no man nating nomoa or profet. Hem nao Messiah. Dastawe iumi mas followim hem.
Jesus Nomoa Man for Sevem Iumi
12. Wanem important toktok nao Jesus talem long Thomas?
12 No longtaem bifor Jesus dae, hem story long olketa faithful aposol abaotem nara important samting wea showimaot why iumi mas gohed followim Messiah. Jesus talem olketa hem bae go and redyim ples for olketa. So taem Thomas askem kwestin abaotem datwan, Jesus hem sei: “Mi nao road, mi nao truth, and mi nao laef. Mi nomoa road for man go long Dadi long heven.” (John 14:1-6) Jesus story long 11-fala faithful aposol taem hem talem datfala toktok. Nomata hem mekem promis for redyim ples for olketa long heven, samting wea hem talem givim hope tu for olketa man wea bae laef olowe long earth. (Rev. 7:9, 10; 21:1-4) Hao nao olsem?
13. Long wanem wei nao Jesus hem “road”?
13 Jesus Christ nao “road.” Hem nomoa savve helpem iumi for fren witim God. Dastawe taem iumi prea, iumi mas prea long nem bilong Jesus. Taem iumi duim olsem, Dadi bae givim iumi eni samting wea iumi askem wea fitim tingting bilong Hem. (John 15:16) Bat Jesus hem datfala “road” long nara wei tu. Sin nao mekem olketa man no fren witim God. (Isa. 59:2) Jesus “givim laef bilong hem, wea datwan hem price for sevem pipol.” (Matt. 20:28) From hem duim datwan, Bible hem sei: “Blood bilong Jesus . . . hem mekem iumi klin from evri sin.” (1 John 1:7) So Son bilong God hem mekem olketa man savve fren bak witim God. (Rom. 5:8-10) Taem iumi garem faith long Jesus and obeyim hem, datwan nao savve mekem iumi fren gud witim God.—John 3:36.
14. Long wanem wei nao Jesus hem “truth”?
14 Jesus nao hem “truth” bikos evritaem hem talem tru samting and followim datwan. Nara samting tu, evri profesi abaotem Messiah hem kamap tru long laef bilong hem. Aposol Paul hem sei: “Jesus nao mekem evri promis bilong God kamap tru.” (2 Cor. 1:20) Nomata Law bilong Moses hem olsem “piksa nomoa bilong olketa gudfala samting wea bae kam,” Christ Jesus nao mekem kamap tru. (Heb. 10:1; Col. 2:17) Jesus nao man wea evri profesi mekhae long hem, and evri profesi helpem iumi for minim important waka wea hem duim long plan bilong Jehovah. (Rev. 19:10) Sapos iumi laek kasem gud samting from wanem God planim for iumi, iumi mas followim Messiah.
15. Long wanem wei nao Jesus hem “laef”?
15 Jesus nao hem “laef” bikos hem baem olketa man witim blood bilong hem. God iusim “Christ Jesus, Lord bilong iumi” for mekem olketa man kasem laef olowe, wea datwan hem wanfala present. (Rom. 6:23) Jesus hem “laef” tu for olketa wea dae finis bikos hem nao man wea bae mekem olketa laef bak moa. (John 5:28, 29) From Jesus hem Hae Priest, tingim olketa gudfala samting tu wea hem bae duim taem hem rul for 1,000 year. Hem bae mekem olketa wea stap long earth for no garem sin and no dae!—Heb. 9:11, 12, 28.
16. Why nao iumi shud followim Jesus?
16 So ansa wea Jesus talem long Thomas hem important for iumi tu. Jesus nao road, truth, and laef. Hem nao man wea God sendem kam for sevem pipol. (John 3:17) And man mas prea long nem bilong hem mekem God savve herem hem. Bible hem sei: “Jesus nomoa savve sevem iumi, bikos no eni nem moa anda long heven savve sevem iumi.” (Acts 4:12) So nomata wanem kaen biliv nao iumi garem bifor, best samting for iumi duim nao hem for biliv long Jesus, followim hem, and letem hem leadim iumi for kasem laef.—John 20:31.
Iumi Mas Herem Samting wea Christ Talem
17. Why nao hem important for iumi herem samting wea Son bilong God talem?
17 Peter, John, and James lukim wanfala spesol vision. Long datfala taem olketa herem wanfala voice from heven hem sei: “Disfala man hem Son bilong mi wea mi chusim. Iufala mas herem samting wea hem talem.” (Luke 9:28, 29, 35) Hem important for iumi herem samting wea Messiah talem.—Readim Acts 3:22, 23.
18. Long wanem wei nao iumi herem samting wea Jesus Christ talem?
18 Iumi herem Jesus taem ‘iumi lukluk gud long hem and tingting strong long wei bilong hem.’ (Heb. 12:2, 3) Dastawe iumi mas “lisin gud moa long olketa toktok” wea iumi readim abaotem hem long Bible and long olketa buk wea “datfala wakaman wea faithful and wise” givim kam, and wanem iumi herem abaotem hem long olketa meeting tu. (Heb. 2:1; Matt. 24:45) From iumi sheepsheep bilong Jesus, hem gud for iumi barava laek herem wanem Jesus talem and followim hem.—John 10:27.
19. Wanem nao bae helpem iumi for gohed followim Christ?
19 Waswe, iumi savve gohed followim Christ nomata wanem kaen hard taem kasem iumi? Ia, iumi savve gohed followim Christ sapos iumi “gohed for followim gudfala toktok.” Iumi savve duim diswan taem iumi duim wanem iumi lanem and showimaot “faith and love wea Christ Jesus garem.”—2 Tim. 1:13.
Wanem Nao Iu Lanem?
• Taem iumi followim “Christ,” why nao datwan mekem iumi barava fren gud witim Jehovah?
• Taem iumi followim Jesus, why nao datwan hem olsem iumi followim Jehovah tu?
• Long wanem wei nao Jesus hem ‘road, truth, and laef’?
• Why nao iumi mas herem samting wea Messiah talem?
[Olketa Study Kwestin]
[Piksa long page 29]
Olketa teaching bilong Jesus showimaot nambawan tingting bilong Jehovah
[Piksa long page 30]
Iumi mas evritaem followim Messiah
[Piksa long page 32]
Jehovah sei: “Disfala man hem Son bilong mi . . . herem samting wea hem talem”