¿Imanasqataq Cristota qatikunanchik?
¿Imanasqataq Cristota qatikunanchik?
“Pipas qatiwayta munaspaqa, amaña kikillanpaq kawsaspayá sapa punchaw ñakaristinpas qatiwachun.” (LUC. 9:23.)
1, 2. ¿Imanasqataq allin kanman Cristota qatikusqanchikmanta yuyaymanayqa?
¡MAYNATACHÁ Jehová Diosqa kusikun achka runakuna Bibliamanta yachayta qallariptinkuqa! Qampas chayta ruraspaykiqa Bibliatayá hinalla estudiay chaynataq huñunakuymanpas ama faltakuychu, chaynapim Diosmanta astawan yachanki. Tiempopa risqanman hinam Jesuspa kayna nisqanpi piensanayki: “Pipas qatiwayta munaspaqa, amaña kikillanpaq kawsaspayá sapa punchaw ñakaristinpas qatiwachun” (Luc. 9:23). Kaypi nisqanman hinaqa, Diosqa munanmi manaña kikillaykipaq kawsaspa Jesuspa qatiqnin kanaykita. ¿Imanasqam ancha allin chay rurayqa? Kay estudiopim chaymanta yachasunchik (Mat. 16:13-16).
2 ¿Imatam nichwan Jesusta unayña qatiqkunamanta? Bibliam niwanchik ‘aswan mastaraq chayta’ ruranapaq (1 Tes. 4:1, 2). Chayllaraq otaq unay wataña cheqap yachachikuyta reqsispanchikpas, yuyaymanananchikmi Jesusta imanasqa qatisqanchikpi, chaynapim Pablopa nisqanman hina “aswan mastaraq” rurasunchik. Cristota imanasqa hinalla qatikunamantam 5 razonkunata qawasunchik.
Jehová Dioswan amistadninchikmi aswan allin kanqa
3. ¿Imakunata ruraspam Diosta astawan reqsichwan?
3 Atenas llaqtata watukuspanmi ‘Areopago sutiyoq huñunakunankupa chawpinpi sayaykuspan’ Pablo kaynata nirqa: “[Diosmi] señalarqa haykapim otaq maypim [runakuna] yachanankupaqpas chaynapi llapchaykachakuq hina maskaspanku Diosta tarinankupaq. Payqa manam karupichu ñoqanchikmantaqa kachkan”, nispa (Hech. 17:22, 26, 27). Chaynaqa, Diosta maskaqkunaqa atinmankum reqsiyta. ¿Imaynata? Puntataqa rurasqankunata qawaspa, chaykunam yachachiwanchik imayna kasqanmanta hinaspa atiyninmantapas (Rom. 1:20). Chaynataq, Bibliatam qowarqanchik chaypim kikinmanta achkata willawanchik (2 Tim. 3:16, 17). Imayna kasqanmanta yachaspa hinaspa rurasqankunapi astawan yuyaymanaspaqa allintam reqsisunchik (Sal. 77:12).
4. ¿Imanasqataq Jehová Dioswan amistadninchik aswan allin kanqa Cristota qatikuptinchikqa?
4 Jesusta qatipakusqanchikpas yanapawasunmi Diosman astawan asuykunanchikpaq. Jesusqa Taytanwanmi karqa ‘manaraq kay Pacha kachkaptinqa’ (Juan 17:5). ‘Diospa tukuy unanchasqanmanta qallariyninmi’ (Apo. 3:14, NM). Jesusqa tukuy imatam rurarqa hanaq pachapi una-unay watakunata Taytanwan kawsaspanqa. Diospa kuyasqan allin amistadninmi karqa hinaspa kusisqam Taytanwan llamkarqa, paykunapa amistadnin hinaqa manam pipapas kanchu. Jesusqa Taytanpa rurasqankunata, imayna kasqanta hinaspa sumaq kayninkunatapas manam qawayllachu-qawarqa, aswanqa pay hina kananpaqmi kallpanchakurqa. Payqa Taytanmanmi rikchakurqa, chaymi Bibliaqa nin ‘mana rikuy atina Diospa rikchaynin’ kasqanta (Col. 1:15). Payta qatipakunapaq kallpanchakuptinchikqa Dioswan amistadninchikmi aswan allin kanqa.
Jehová Diospa imayna kasqantam allinta qawachisun
5. ¿Imataq yanapawasun Jehová Diosta astawan qatipakunapaq, hinaspa imanasqa?
5 Runakunaqa Diosman rikchakuqmi unanchasqa kanchik, chaymi atichwan Diospa sumaq kayninkuna qatipakuyta (Gen. 1:26). Pablom cristianokunata kallpancharqa Diospa kuyasqan churinkuna hina qatipakunankupaq (Efe. 5:1). Chayta ruranapaqqa Jesusta qatikuymi yanapawasun. ¿Imanasqa? Manam pipas pay hinaqa qatipakurqachu Taytanpa imayna kasqanta, sumaq kayninkunata hinaspa imayna piensasqantapas. Nitaq pipas pay hinaqa Diosmanta yachachirqachu. Jesusqa willakurqam Taytanpa sutinmanta hinaspa imayna kasqanmantapas (leey Mateo 11:27). Chaytaqa rurarqa rimaspan hinaspa ruraspanpas.
6. ¿Imatam Jehová Diosmanta qawachin Jesuspa yachachisqankuna?
6 Yachachisqanwanmi Jesusqa qawachirqa serviqninkunamanta Dios ima suyasqanta hinaspa ima sientesqantapas (Mat. 22:36-40; Luc. 12:6, 7; 15:4-7). Ejemplopaq, 10 Kamachikuykunamanta hukninmi nirqa: “Amam hukwanqa pierdekunkichu” nispa, chaymanta willaspanmi payqa rimarqa runa manaraq huchallikuchkaptin sonqonpi ima pasasqanmanta hinaspa Dios ima piensasqanmantapas. Nirqam: “Pipas warmita munapayaspan qawaqqa sonqonpim hukwan pierdekuy huchata rurarunña”, nispa (Exo. 20:14; Mat. 5:27, 28). Chaymantapas, Leypa nisqanta fariseokuna mana allin entiendesqankutam corregirqa. Paykunam nirqaku: “Kuyankim amistadnikita, enemigoykitañataqmi cheqninki”, nispa. Jesusmi ichaqa Taytanpa piensasqanmanta nirqa enemigonchikta kuyanapaq hinaspa ñakarichiwaqninchik runakunapaq mañakunatapas (Mat. 5:43, 44; Exo. 23:4; Lev. 19:18). Diospa munasqanta, piensasqanta hinaspa ñoqanchikmanta ima suyasqanta astawan yachaptinchikqa manam sasachu kanqa Diosta qatipakuyqa.
7, 8. ¿Imatam Jehová Diosmanta yachachiwanchik Jesuspa rurasqankuna?
7 Rurasqanwanmi Jesusqa qawachirqa Taytan imayna kasqanta. Jesusmanta willaq 4 librokunam yachachiwanchik necesitaqkunata hinaspa ñakariqkunata llakipayasqanmanta, chaynataq warmachakuna asuykunankuta apostolninkuna harkaptin piñakusqanmantapas. ¿Manachu kaykunamanta Bibliapi leespaqa entiendenchik Jehová Diospa imayna sientekusqanta? (Mar. 1:40-42; 10:13, 14; Juan 11:32-35.) Jesuspa rurasqankunam qawachiwanchik Diospa tawa sumaq kayninkunata. Atiyniyoq kasqantam qawachirqa milagrokunata ruraspan, chaytaqa manam servichikurqachu kikinpa munasqallanta maskananpaqqa otaq hukkunapa mana allinninpaqqa (Luc. 4:1-4). Chaynataq, allin ruray kuyasqantam qawachirqa kikillanpaq munaq rantikuqkunata templomanta qarqospan (Mar. 11:15-17; Juan 2:13-16). Salomonmantapas aswan yachayniyoqmi karqa, chaytam qawachin runakunapa sonqonman chayaqta yachachisqan hinaspa rimasqanpas (Mat. 12:42). ¿Imatam nichwan runata kuyaspan vidan qosqanmantaqa? Manam pipas pay hina “hatu-hatun kuyakuyniyoqqa” kanchu (Juan 15:13).
8 Jesusqa Taytantam allinta qatipakurqa rimaspanpas chaynataq ruraspanpas. Chaymi nirqa: “Ñoqata rikuqniyqa Taytatapas rikuykunñam”, nispa (leey Juan 14:9-11). Qawasqanchikman hinaqa, Cristota qatipakuspaqa Jehová Diostam qatipakuchkanchik.
Jesusqa Jehová Diospa Akllasqanmi
9. ¿Haykapim hinaspa imaynatam Jesusqa Diospa Akllasqan rikurirurqa?
9 Qawasunchikyá 29 watapi ima pasasqanmanta, Jesusmi 30 watanpi kachkaspa Bautizaq Juanman rirqa. Bibliam kaynata nin: “Jesusmi bautizarachikuspan yakumanta lloqsimurqa hinaptinmi hanaq pacha qonqayta kicharikuykuptin Jesus rikururqa Diospa Espiritunta paloma hina payman uraykamuchkaqta”, nispa. Chay tiempomantam Jesusqa Diospa Akllasqan rikurirurqa. Jehová Diospunim qawachirqa Jesus Akllasqa kasqanta kaynata nispan: “Paymi kuyasqay Churiy. Payraykum kusisqa kachkani” (Mat. 3:13-17). Kaymanta yachayqa, ¡kallpanchawanchikmi Jesusta qatikunapaq!
10, 11. a) ¿Ima sutikunawanmi Jesusta Bibliapi sutichan hinaspa imanasqa? b) ¿Imanasqataq Jesusta hinalla qatikunanchik?
10 Jesustam wakinpiqa Biblia kaynata sutichan: “Jesucristo”, “Cristo Jesus” hinaspa “Cristo” nispa. “Jesucristo” nispanqa qawachichkanmi Jesus pi kasqanta, paytam Taytan kachamurqa Akllasqa kananpaq. Jesusmi puntataqa chaynata sutichakurqa Taytanman kaynata nispan: “Chay wiñay kawsayniyoqqa kanku sapallan cheqap Dios kasqaykita reqsiqkunam hinaspa kachamusqayki Jesucristota reqsiqkunam” (Juan 17:3). “Cristo Jesus” nispanñataqmi qawachichkan Jesus ima rurayniyoq kasqanta (2 Tim 4:1). “Cristo” nispanñataq qawachin Diospa Akllasqan hina ima rurayniyoq kasqanta (2 Cor. 10:14).
11 Kay kimsa sutikunaqa kaytam qawachin: Jesusqa kay Pachapi runa hina kawsaspan hinaspa Diospa munayninmanta willakuspanpas, manam wakin runakuna hinachu karqa nitaq Diosmanta wakin willakuqkuna hinachu. Payqa Diospa Akllasqanmi. Chaymi qatikuytaqa mana saqenanchikchu.
Jesusllam salvacionman apaq ñanqa
12. ¿Imatam Jesus nirqa apostol Tomasta?
12 Imanasqapiwan Jesusta qatikunamantam tarinchik wañukunanpaq pisi tiempollaña kachkaptin Diosman sonqo apostolninkunawan rimasqanpi. Nirqam paykunapaq lugar allichamuq risqanmanta. Hinaptinmi Tomas tapurqa imamanta rimasqanta, chaymi Jesusqa kaynata nirqa: “Ñoqam kani ñan, cheqap kaqpas chaynataq kawsay qokuqpas. Taytaymanqa manam pipas chayanmanchu mana ñoqawanqa”, nispa (Juan 14:1-6). Kaynataqa nirqa hanaq pachaman riq 11 apostolninkunatam, chayna kaptinpas ancha allinmi kay Pachapi kawsakuy suyaqkunapaqpas (Apo. 7:9, 10; 21:1-4). ¿Imanasqataq chaynata ninchik?
13. ¿Imanasqataq ninchik Jesusqa ‘ñanmi’ nispa?
13 Jesusqa ‘ñanmi’, paynintakamallam runakunaqa Diosman asuykuchwan. Chaymi Diosta mañakuspaqa Jesuspa sutintakama mañakunanchik, chaynata ruraptillanchikmi Taytanqa uyariwasun munayninman hina mañakusqanchikta (Juan 15:16). Ichaqa manam chayraykullachu ninchik Jesusqa ‘ñanmi’ nispaqa. ¿Imanasqa? Runapa huchallikusqanmi Diosmanta runakunata karuncharurqa (Isa. 59:2). Chaymi Jesusqa ‘achka runakunapa rantinpi wañurqa’ (Mat. 20:28). Bibliapa nisqanman hinaqa paypa yawarninmi “llapallan huchanchikmanta mayllawanchik” (1 Juan 1:7). Chaynatam Jesusqa ñanta kicharqa Taytanwan allinyananchikpaq (Rom. 5:8-10). Paypi iñispa chaynataq kasukuspallam Dioswan allin amistadqa kachwan (Juan 3:36).
14. ¿Imanasqataq Jesusta ninchik ‘cheqap kaqmi’ nispa?
14 Jesusqa ‘cheqap kaqmi’, payqa cheqaptam haykapipas rimarqa hinaspa chayman hinam kawsakurqapas, chaynataq achka willakuykunam paypi cumplikurqa. Pablom kaynata nirqa: “Paypim cumplikun Diospa llapallan prometesqankunaqa”, nispa (2 Cor. 1:20). Chaymantapas, ‘Moisespa Leyninqa hamuq allin kaqkunapa llantuynin hinallam karqa’, ichaqa Jesus chayaramuptinmi cheqap kaqpi rikurirurqa (Heb. 10:1; Col. 2:17). Llapallan willakuykunam Jesusmanta riman hinaspam allinta qawachin Diospa munaynin rurakunanpaq ancha allin rurayniyoq kasqanta (Apo. 19:10). Diospa munaynin rurakusqanta qawanapaqqa Cristotam qatikunanchik.
15. ¿Imanasqataq ninchik Jesusqa ‘kawsay qokuqmi’ nispa?
15 Jesusqa ‘kawsay qokuqtaqmi’, payqa yawarninwanmi runakunata rantirqa. ‘Señorninchik Cristo Jesuswanmi’ Jehová Diosqa wiñay kawsayta qowasunchik (Rom. 6:23). Jesusqa ‘kawsay qoqmi’ kanqa wañukuqkunapaqpas (Juan 5:28, 29). Sacerdotekunapa Jefen kaspanmi Waranqa wata Kamachispan huchamantawan wañuymanta wiñaypaq salvawasunchik (Heb. 9:11, 12, 28).
16. ¿Imanasqataq Jesusta qatikunanchik?
16 Qawasqanchikman hinaqa, Tomaspa tapukusqanta Jesus kutichisqanqa ancha allinmi ñoqanchikpaqpas. Jesusqa ñanmi, cheqap kaqmi hinaspa kawsay qoqmi. Paytam Dios akllarqa kay Pachaman hamuspan runakunata salvananpaq (Juan 3:17). Payllantam Diosmanqa asuykuchwan. Bibliaqa ninmi: “Jesusmanta hukqa manam pipas salvanmanchu, kay pachapiqa manataqmi pipas kanchu runakunata salvaqqa aswanqa Jesusllam”, nispa (Hech. 4:12). Chaynaqa, ñawpaqpi imaynata Jesusmanta piensaspapas paypim iñinanchik hinaspa ejemplonta qatipakunanchik chaynapi wiñay kawsayta haypananchikpaq (Juan 20:31).
Kamachisqam kanchik Cristota kasukunapaq
17. ¿Imanasqataq Diospa Churinta uyarispa kasukuyqa ancha allin?
17 Pedro, Juan hinaspa Santiagom revelacionpi Jesusta qawarqaku. Paykunam uyarirqaku hanaq pachamanta kayna rimayta: “Paymi akllasqay Churiy, paytayá uyariychik” niqta (Luc. 9:28, 29, 35). Ancha allinmi Diospa Akllasqan Jesusta uyarispa kasukuyqa (leey Hechos 3:22, 23).
18. ¿Imatam rurasun Jesusta kasukuspaqa?
18 Jesusta kasukuyqa, ejemplonpi ‘yuyaymanaspa’ qatikuymi (Heb. 12:2, 3). Chaymi, paymanta Bibliapi hinaspa ‘allin yuyayniyoq confianza sirvientepa’ qowasqanchik qellqakunapi leesqanchikta chaynataq huñunakuykunapi uyarisqanchikta ‘hatun yuyaywan kasukuyqa’ ancha allin (Mat. 24:45; Heb. 2:1). Paypa ovejankunam kanchik, chaymi rimasqanta uyarispa qatikunanchik (Juan 10:27).
19. ¿Imam yanapawasun Jesusta hinalla qatipakunanchikpaq?
19 ¿Atisunchu Jesucristo qatipakuyta ima sasachakuykunaña kaptinpas? Atisunmi, iñiywan hinaspa kuyakuywan ‘cheqap yachachisqankunata’ kasukuspaqa (2 Tim. 1:13).
¿Imatam yacharunki?
• ¿Imanasqataq Dioswan amistadninchik aswan allin kanqa Cristota qatikuptinchikqa?
• ¿Imanasqataq ninchik Jesusta qatipakuspaqa Jehová Diostam qatipakunchik nispa?
• ¿Imanasqam ninchik Jesusqa ‘ñanmi, cheqap kaqmi chaynataq kawsay qoqmi’ nispa?
• ¿Imanasqataq uyarinanchik Jehová Diospa Akllasqanta?
[Kay yachachikuypa tapukuyninkuna]
[29 kaq paginapi dibujo]
Jesuspa yachachisqanmi qawachin Diospa mana tupachiy atina piensasqanta
[30 kaq paginapi dibujo]
Tukuy sonqonchikwan qatikusun Diospa Akllasqanta
[32 kaq paginapi dibujo]
Diosmi nin: “Paymi akllasqay Churiy, paytayá uyariychik”