Ngbanga ti nyen ti mû peko ti “Christ”?
Ngbanga ti nyen ti mû peko ti “Christ”?
“Tongana mbeni zo aye ti ga na peko ti mbi, zia lo ke tere ti lo wani . . . na lo mû peko ti mbi lakue lakue.”—LUC 9:23.
1, 2. Ngbanga ti nyen a yeke kota ye ti gi ti hinga ndani so a yeke nzoni e mû peko ti “Christ”?
JÉHOVAH ayeke na ngia mingi ti bâ ala afini zo so ayeda na tâ tënë nga na ala amaseka na popo ti gbâ ti azo so ayeke bungbi na yâ ti acongrégation ti voro lo na ndo ti sese. Na ngoi so ala yeke ngbâ ti manda Bible, ti gue lakue na abungbi nga ti hinga ye mingi na ndo ti tâ tënë ti Bible so ayeke sö fini ti zo, a yeke nzoni ala gbu li ti ala nzoni na ndo ti tisango ndo ti Jésus so atene: “Tongana mbeni zo aye ti ga na peko ti mbi, zia lo ke tere ti lo wani na lo yô keke ti pasi ti lo lâ na lâ na lo mû peko ti mbi lakue lakue.” (Luc 9:23). Ge, Jésus aye ti tene so a yeke nzoni ala yeda ti ke tere ti ala wani na ti mû peko ti lo. Ni la, a yeke kota ye ti tene e gi ti hinga ngbanga ti nyen a yeke nzoni e mû peko ti “Christ”.—Mat. 16:13-16.
2 Ka ti ala so na popo ti e ayeke tambela tâ gi na peko ti gere ti Jésus Christ, a yeke tongana nyen? A wa e ti “ngbâ ti sara ni mingi ahon so.” (1 aThes. 4:1, 2). Atâa e ga wakua ti Jéhovah fini fini wala aninga awe, ti gbu li na ndo ti anda ti tënë so ndali ni a yeke nzoni e mû peko ti Christ ayeke mû maboko na e ti sara ye alingbi na wango ti Paul nga ti mû peko ti Christ mingi ahon ti kozo na yâ ti fini ti e ti lâ oko oko. Zia e bâ anda ti tënë oku so afa ngbanga ti nyen a yeke nzoni e yeda ti mû peko ti Christ.
Ti kpengba songo ti e na Jéhovah ahon ti kozo
3. Aye use wa amû maboko na e ti hinga Jéhovah?
3 Na ngoi so bazengele Paul “aluti na bê ti Aréopage” na lo yeke sara tënë na azo ti Athènes, lo tene: “[Nzapa azia] angoi so lo fa awe nga na akatikati ti ndo so azo alingbi ti lango dä, si ala gi Nzapa, même ala gi lo na tarango ndo na ala wara lo biani, atâa so, ti tâ tënë ni, lo yeke yongoro na e oko oko kue pëpe.” (Kus. 17:22, 26, 27). E lingbi ti gi Nzapa na ti hinga lo biani. Na tapande, aye so Nzapa asara afa na e aye mingi na ndo ti apendere sarango ye ti lo nga na akode ti lo. Tongana na singila na bê e gbu li ti e na ndo ti aye so Nzapa asara, a yeke sara si e hinga ye mingi na ndo ti Wasarango e (aRom. 1:20). Na yâ ti Bible, Jéhovah afa nga na e anzene nzene ye mingi na ndo ti lo (2 Tim. 3:16, 17). Tongana e mû ngoi mingi ti ‘gi bê ti e na kusala ti Lo kue’ nga e ‘bi bê ti e tënë ti ye so Lo sara’, a yeke mû maboko na e ti hinga Jéhovah ahon ti kozo.—Ps. 77:13.
4. Na lege wa mungo peko ti Christ ayeke sara si songo ti e na Jéhovah akpengba ahon ti kozo?
4 Mbeni tâ nzoni lege ti kpengba songo ti e na Jéhovah ahon ti kozo ayeke ti mû peko ti Christ. Tara ti gi ti gbu li na ndo ti gloire so Jésus ayeke lani na ni na tere ti Babâ ti lo “kozoni si dunia so abâ gigi.” (Jean 17:5). Lo yeke “tongo nda ti aye so Nzapa asara”. (Apoc. 3:14). Teti so Jésus ayeke “kozo ye na popo ti aye kue so Nzapa asara,” lo duti na tere ti Babâ ti lo Jéhovah na yayu teti angu mingi mingi. Kozoni si Jésus aga na sese, lo sara lani aye mingi ahon gi ti duti na tere ti Babâ ti lo. Lo na Babâ ti lo ayeke gi use use, lo yeke na ngia ti sara kua maboko na maboko na Lo ti Ngangu Ahon Kue, na mbeni zo ti duti na kpengba songo na Nzapa tongana ti Jésus ayeke dä pëpe. Jésus abâ lege so Babâ ti lo ayeke sara na aye, lo hinga aye so lo ye na aye so lo ke nga na asarango ye ti lo. Na ndo ni, Jésus abata aye so lo manda na ndo ti Babâ ti lo na lo sara ye alingbi na ni. Ye ti pekoni ayeke so Molenge ti mango yanga so asara ye tâ gi tongana ti Babâ ti lo, ni la Bible atene so lo yeke “image ti Nzapa so lê abâ pëpe”. (aCol. 1:15). Tongana e mû peko ti Christ nduru nduru, songo ti e na Jéhovah ayeke kpengba mingi ahon ti kozo.
Ti mû tapande ti Jéhovah nzoni ahon ti kozo
5. Nyen la ayeke mû maboko na e ti mû tapande ti Jéhovah nzoni ahon ti kozo? Ngbanga ti nyen?
5 A ‘sara e na image ti Nzapa mveni’, tongaso e lingbi ti fa na gigi asarango ye ti Nzapa (Gen. 1:26). Bazengele Paul awa aChrétien ti “ga azo so asara ye tongana ti Nzapa, teti ala yeke amolenge so lo ndoye ala mingi”. (aÉph. 5:1). Ti mû peko ti Christ ayeke mû maboko na e ti mû tapande ti Babâ ti e ti yayu. A yeke ndali ti so abibe ti Jésus, aye so lo ye na aye so lo ke nga na asarango ye ti lo ague tâ gi oko na ti Jéhovah ahon tanga ti azo kue. Nga, mbeni zo ti fa ye polele na ndo ti Jéhovah ahon ti Jésus ayeke dä pëpe. Na ngoi so Jésus ayeke na sese, lo fa na azo gi pëpe ti hinga iri ti Jéhovah. Lo fa na ala nga ti hinga Jéhovah, wa ti iri ni. (Diko Matthieu 11:27.) Jésus asara ni na lege ti atënë so lo tene, aye so lo sara, aye so lo fa nga na tapande ti lo.
6. Afango ye ti Jésus afa nyen na ndo ti Jéhovah?
6 Na lege ti aye so Jésus afa, lo fa ye so Nzapa aku na mbage ti e nga bibe so lo yeke na ni na mbage ti azo so ayeke voro lo (Mat. 22:36-40; Luc 12:6, 7; 15:4-7). Na tapande, na pekoni so Jésus atene peko ti mbeni oko ti aCommandement Bale-oko so atene: “A lingbi mo sara lango-sioni pëpe”, lo fa bango ndo ti Nzapa na ndo ti ye so asi na yâ ti bê ti mbeni koli ngoi mingi kozoni si lo sara ye ni. Lo tene: “Zo kue so angbâ ti bâ mbeni wali si lo sara nzara ti wali ni so, andâ lo gi lo na wali na yâ ti bê ti lo awe.” (Ex. 20:14; Mat. 5:27, 28). Jésus atene peko ti tënë ti aFarizien so atene ndia atene: “Mo ndoye mba ti mo na mo ke wato ti mo.” Na pekoni lo fa bibe ti Jéhovah, lo tene: “Ala ngbâ ti ndoye awato ti ala na ti sambela ndali ti azo so ayeke sara ye ti ngangu na ala.” (Mat. 5:43, 44; Ex. 23:4; Lév. 19:18). Tongana e hinga bibe ti Nzapa nzoni, aye so lo ye na aye so lo ke nga na aye so lo ku na mbage ti e, a yeke mû maboko na e ti mû tapande ti lo nzoni ahon ti kozo.
7, 8. Ye wa tapande ti Jésus afa na e na ndo ti Jéhovah?
7 Tapande ti Jésus amû nga lege na azo ti hinga Babâ ti lo nzoni. A-Évangile afa na e so Jésus abâ mawa ti awayere na azo so ayeke bâ pasi nga bê ti lo anzere pëpe tongana adisciple ti lo asuku na akete molenge. Tongana e diko aye so, a sara biani si e hinga atënë ti bê ti Babâ ni na lege ti Molenge ni (Marc 1:40-42; 10:13, 14; Jean 11:32-35). Gbu li ti bâ tongana nyen asarango ye ti Jésus amû lege na azo ti hinga asarango ye ti Nzapa so a hinga lo na ni mingi. Amiracle so Christ asara afa biani kota ngangu so lo yeke na ni. Ye oko, lo sara kua lâ oko pëpe na ngangu so ti wara ye so agbu bê ti lo wani wala ti gi ti sara sioni na azo (Luc 4:1-4). Lo tomba awadengo buze so aye nginza mingi na yâ ti temple, na ye so afa biani so lo ye sarango ye ti mbilimbili (Marc 11:15-17; Jean 2:13-16). Afango ye ti Jésus nga na apendere tënë so lo tene ti ndu bê ti azo afa so lo yeke “kota ahon Salomon” na lege ti ndara ti lo (Mat. 12:42). Ndoye so Jésus afa na lege so lo mû âme ti lo ndali ti azo afa nzoni mingi so “mbeni ndoye ti hon so ayeke dä pëpe.”—Jean 15:13.
8 Na yâ ti atënë kue so Molenge ni atene nga na aye kue so lo sara, lo sara ye kue tâ gi tongana ti Babâ ti lo Jéhovah; ni la lo lingbi lani ti tene: “Zo so abâ mbi abâ nga Babâ awe.” (Diko Jean 14:9-11.) Mungo peko ti Christ ayeke legeoko na mungo tapande ti Jéhovah.
Jésus ayeke Lo so Jéhovah asoro lo
9. Na ngoi wa nga tongana nyen Jésus aga Lo so Nzapa asoro lo?
9 Gbu li na ndo ti ye so asi na nze ti septembre wala octobre ti ngu 29, na ngoi so Jésus so ayeke na ngu 30 aga na mbage ti Jean Baptiste. “Tongana a batize Jésus awe, fade fade lo sigigi na gbe ti ngu ni. Na bâ, yayu azi na lo bâ yingo ti Nzapa so ayeke zu na ndo ti lo tongana mbeni kolokoto.” Na ngoi ni so, lo ga Christ wala Messie, na Jéhovah lo wani afa so Jésus ayeke Lo so lo soro lo na lege ti yingo vulu. Nzapa atene: “So ayeke Molenge ti mbi so mbi ndoye lo mingi, lo so bê ti mbi anzere na lo mingi.” (Mat. 3:13-17). So tâ nzoni nda ti tënë ti tene e yeda ti mû peko ti Christ!
10, 11. (a) Na alege wa a sara kusala na tënë “Christ” ti sara tënë ti Jésus? (b) Ngbanga ti nyen a lingbi e sara kue ti mû peko ti Jésus Christ?
10 Bible asara kusala na tënë “Christ” ti sara tënë ti Jésus na alege nde nde. Na tapande, a iri lo Jésus Christ, Christ Jésus nga na Christ. Jésus lo wani asara kusala ti kozo ni na tënë “Jésus Christ.” Na ngoi so lo yeke sambela Babâ ti lo, lo tene: “Ti wara fini ti lakue lakue, a lingbi ala manda ti hinga mo, mo so gi mo oko ayeke tâ Nzapa, nga ti hinga lo so mo tokua lo, Jésus Christ.” (Jean 17:3). Ge, tënë so agboto lê na ndo ti zo so Nzapa atokua lo na so aga Lo so Nzapa asoro lo na lege ti yingo vulu. Tongana tënë “Christ” aga kozoni na iri “Jésus”, tongana ti so e bâ na yâ ti iri “Christ Jésus”, a ye ti gboto lê na ndo ti zo ni pëpe me na ndo ti kamba ti kua ti lo (2 aCor. 4:5). Tënë “Christ” ayeke mbeni lege ti gboto lê na ndo ti kua so Jésus ayeke sara tongana Messie.—Kus. 5:42.
11 Atâa alege nde nde wa a sara kusala na tënë “Christ” ti sara tënë ti Jésus, kota tâ tënë ni ayeke so: atâa so Molenge ti Nzapa aga na ndo ti sese tongana zo na lo sara si azo ahinga ye so bê ti Babâ ti lo aye, lo yeke pëpe gi mbeni senge zo wala mbeni senge prophète; lo ga lani ti duti Lo so Jéhovah asoro lo na lege ti yingo vulu. A lingbi e sara kue ti mû peko ti Lo.
Jésus ayeke oko lege ti salut
12. Tënë wa so Jésus afa na bazengele Thomas ayeke kpengba tënë teti e laso?
12 Atënë so Jésus atene na abazengele ti lo so ayeke be-ta-zo angbonga kete kozoni si lo kui afa na e mbeni kpengba nda ti tënë ti ngbâ ti mû peko ti Messie. Ti kiri tënë na Thomas so ahunda tënë na ndo ti tënë so Jésus atene na ndo ti guengo ti lo ti leke ndo teti ala, Jésus atene: “Mbi yeke lege ni, tâ tënë na fini. Zo kue so aga na Babâ ayeke ga gi na lege ti mbi.” (Jean 14:1-6). Jésus ayeke sara tënë lani na abazengele ti lo 11 so ayeke be-ta-zo. Lo mû na ala zendo so lo yeke leke ndo teti ala na yayu; me tënë so ayeke nga mbeni kpengba tënë teti aChrétien so ayeke na beku ti wara fini ti lakue lakue na ndo ti sese (Apoc. 7:9, 10; 21:1-4). Na lege wa?
13. Na alege wa Jésus ayeke “lege ni”?
13 Jésus Christ ayeke “lege ni”. So ti tene, a yeke gi na lege ti lo oko si e lingbi ti ga nduru na Nzapa. Tënë so ayeke tâ tënë nga na ndo ti tënë ti sambela, ndali ti so a yeke gi na sambelango na iri ti Jésus oko si e hinga biani so Babâ ni ayeke mû ande na e ye kue so e hunda, tongana a gue oko na ye so bê ti lo aye (Jean 15:16). Ye oko, Jésus ayeke nga “lege ni” na mbeni lege nde. Siokpari akangbi popo ti azo na Nzapa (És. 59:2). Jésus amû “âme ti lo tongana ngere so a futa ti zi na azo mingi.” (Mat. 20:28). Bible afa ye ti pekoni, atene: “Mênë ti . . . Jésus asukula e na asiokpari kue awe.” (1 Jean 1:7). Tongaso, Molenge ni asara si lege azi na e ti kiri ti lë songo na Nzapa (aRom. 5:8-10). Tongana e ye ti duti na nzoni songo na Nzapa, a lingbi e mä na bê na Jésus nga e mä yanga ti lo.—Jean 3:36.
14. Na lege wa Jésus ayeke “tâ tënë”?
14 Jésus ayeke “tâ tënë” ndali ti so lo tene tâ tënë lakue nga lo sara ye alingbi na ni. Na ndo ni, aprophétie mingi mingi kue so a sû na ndo ti Messie aga tâ tënë na ndo ti lo. Bazengele Paul atene: “Atâa wungo ti azendo ti Nzapa ayeke oke, kue aga En na lege ti lo.” (2 aCor. 1:20). Même “gbede ti anzoni ye so ayeke ga,” so ayeke na yâ ti Ndia ti Moïse aga tâ ye na lege ti Jésus Christ (aHéb. 10:1; aCol. 2:17). Jésus ayeke oko zo so aprophétie kue asara tënë ti lo, na aprophétie so afa ye polele na ndo ti kota kusala ti lo na yâ ti ye so Jéhovah aleke ti sara (Apoc. 19:10). Tongana e ye ti bâ nzoni na yâ ti gango tâ tënë ti aye so Nzapa aleke ti sara ndali ti e, a lingbi e mû peko ti Messie ni.
15. Na lege wa Jésus ayeke “fini”?
15 Jésus ayeke “fini” ndali ti so lo vo azo na mênë ti lo so amû fini, nga fini ti lakue lakue ayeke matabisi so Nzapa amû “na lege ti Christ Jésus Seigneur ti e.” (aRom. 6:23). Jésus ayeke “fini” nga teti azo so akui awe (Jean 5:28, 29). Na ndo ni, gbu li na ndo ti ye so lo yeke sara ande tongana Kota Prêtre na ngoi ti Komandema ti lo ti Ngu Saki Oko. Lo yeke zi ande azo ti lo so ayeke na ndo ti sese teti lakue lakue na yâ ti siokpari na kui!—aHéb. 9:11, 12, 28.
16. Nda ti tënë wa apusu e ti mû peko ti Jésus?
16 Tongaso, kiringo tënë ti Jésus na Thomas ayeke kota ye mingi ndali ti e. Jésus ayeke lege ni, tâ tënë na fini. Lo yeke zo so Nzapa atokua lo na yâ ti dunia so ti tene na lege ti lo Nzapa asö dunia ni (Jean 3:17). Nga, zo kue so aga na Babâ ayeke ga gi na lege ti lo. Bible atene polele: “Salut ayeke na mbeni zo nde pëpe, teti mbeni iri nde ayeke pëpe na gbe ti yayu so a mû ni na azo, so gi na lege ni si e lingbi ti wara salut.” (Kus. 4:12). Ni la, atâa ye wa e mä na bê dä kozo, a yeke na lege ti ndara ti tene e mä na bê na Jésus, e mû peko ti lo na tongaso lo gue na e na fini.—Jean 20:31.
A hunda na e ti mä Christ
17. Ngbanga ti nyen a yeke kota ye ti tene e mä yanga ti Molenge ti Nzapa?
17 Pierre, Jean na Jacques ayeke lani dä tongana tere ti Jésus agbian. Na ngoi ni so, ala mä mbeni go so asara tënë na yayu, atene: “So ayeke Molenge ti mbi, lo so mbi soro lo. Ala mä lo.” (Luc 9:28, 29, 35). A yeke kota ye ti tene e yeda na yanga so a mû na e ti mä Messie ni.—Diko Kusala 3:22, 23.
18. Tongana nyen e lingbi ti mä Jésus Christ?
18 Ti mä Jésus aye ti tene ti zia ‘lê ti e gi na ndo ti lo na ti bâ lo mbilimbili’. (aHéb. 12:2, 3). Ni la, a yeke nzoni e “dengi mê nzoni ahon ti kozo na aye” so e diko na ndo ti lo na yâ ti Bible nga na ambeti so “ngbâa be-ta-zo so ayeke sara ye na ndara” ayeke sigigi na ni nga na aye so e yeke mä na ndo ti lo na ngoi ti abungbi (aHéb. 2:1; Mat. 24:45). Teti so e yeke angasangbaga ti Jésus, zia e duti nduru ti mä lo nga ti mû peko ti lo.—Jean 10:27.
19. Ye wa ayeke mû maboko na e ti mû peko ti Christ lakue?
19 E lingbi biani ti mû peko ti Christ lakue, atâa akpale so e yeke wara? En, e lingbi ti sara ni; kota ye ni ayeke ti “ngbâ ti bata anzoni tënë so a zia ni tongana tapande” na lege so e yeke sara ye alingbi na ye so e manda “na mabe nga na ndoye so ague oko na Christ Jésus.”—2 Tim. 1:13.
Mo manda nyen?
• Ngbanga ti nyen mungo peko ti “Christ” ayeke sara si songo ti e na Jéhovah akpengba ahon ti kozo?
• Ngbanga ti nyen mungo tapande ti Jésus ayeke legeoko na mungo tapande ti Jéhovah?
• Na lege wa Jésus ayeke “lege ni, tâ tënë na fini”?
• Ngbanga ti nyen ti mä Lo so Jéhovah asoro lo na lege ti yingo vulu?
[Ahundango tënë ti manda na ye]
[Foto na lembeti 28]
A hinga bibe ti Jéhovah so ayeke kota mingi na lege ti afango ye ti Jésus
[Foto na lembeti 29]
Na bê kue, a lingbi e mû peko ti Lo so Jéhovah asoro lo na lege ti yingo vulu
[Foto na lembeti 31]
Jéhovah atene: ‘So ayeke Molenge ti mbi. Ala mä lo’