Fu san ede wi musu waka baka „a Krestes”?
Fu san ede wi musu waka baka „a Krestes”?
„Efu wan sma wani kon na mi baka, dan a no musu teri ensrefi moro, . . . èn meki a tan waka na mi baka.”—LUK. 9:23.
1, 2. Fu san ede a prenspari gi wi fu ondrosuku sortu reide wi abi fu waka baka „a Krestes”?
YEHOVAH musu fu firi prisiri te a e si nyun sma nanga yonguwan na mindri den ipi-ipi anbegiman fu en di e kon makandra leki gemeente na grontapu! A no de fu taki dati yu e tan studeri Bijbel, taki yu e go na den Kresten konmakandra doronomo, èn taki yu e kisi moro sabi fu den tru tori na ini Gado Wortu di kan frulusu libisma. Ma aladi yu e du den sani disi, yu musu poti seryusu prakseri na a kari disi di Yesus gi sma: „Efu wan sma wani kon na mi baka, dan a no musu teri ensrefi moro, ma meki a teki en pina-postu ibri dei baka èn meki a tan waka na mi baka” (Luk. 9:23). Yesus e taki dati yu no musu teri yusrefi moro, èn taki yu musu tron wan bakaman fu en. Dati meki a de prenspari taki wi e ondrosuku fu san ede wi musu waka baka „a Krestes”.—Mat. 16:13-16.
2 Fa a de nanga wi di e waka baka Yesus Krestes wan pisi ten kaba? Wi e kisi a rai fu „tan waka [na en baka] nanga moro faya” (1 Tes. 4:1, 2). Awansi wi bigin teki prati na a tru anbegi no so langa pasa, noso awansi wi e du dati furu yari kaba, toku a bun fu kon sabi fu san ede wi musu waka baka a Krestes. Dati sa yepi wi fu gi yesi na a rai di Paulus ben gi, èn wi sa waka na Krestes baka nanga moro faya na ini wi aladei libi. Meki wi go poti prakseri na feifi reide fu san ede wi musu waka baka a Krestes.
Wi sa kon moro krosibei na Yehovah
3. San na tu fasi fa wi kan kon sabi Yehovah?
3 Di na apostel Paulus ben e taki nanga den sma fu Ateine, dan a ben e „tanapu leti na mindri fu a presi pe sma ben e hori krutu na tapu na Areopagus”. A ben taigi den sma disi: „[Gado] bosroiti san na a reti ten taki sani musu pasa èn pe sma musu tan, so taki den kan suku Gado fayafaya èn feni en trutru, bika fu taki en leti, a no de fara fu nowan fu wi” (Tori. 17:22, 26, 27). Wi kan du muiti fu kon sabi Gado, èn wi kan kon sabi en trutru. Fu eksempre, te wi e denki dipi fu den sani di Gado meki, èn te wi de nanga tangi gi den sani dati, dan wi e kon sabi den fasi nanga a koni fu Gado moro bun (Rom. 1:20). Yehovah e yepi wi fu kon sabi en moro bun tu, èn a e du dati nanga yepi fu Bijbel, a Wortu fu en (2 Tim. 3:16, 17). O moro wi e ’denki dipi fu den wroko fu Yehovah’ èn o moro wi e ’poti prakseri na den sani di a e du’, o moro wi sa kon sabi En.—Ps. 77:12.
4. Te wi e waka baka a Krestes, dan fa dati kan yepi wi fu kon moro krosibei na Yehovah?
4 Wan heri moi fasi fa wi kan kon moro krosibei na Yehovah, na te wi e waka baka a Krestes. Prakseri a glori di Yesus ben abi di a ben de makandra nanga en Papa „bifo grontapu ben de”! (Yoh. 17:5) En na „a bigin fu den sani di Gado meki” (Openb. 3:14). Leki „a fosiwan fu ala sani di Gado meki”, a ben e libi wan bun langa pisi ten na hemel makandra nanga en Papa, Yehovah. Fosi Yesus ben kon na grontapu leki libisma, a no ben de makandra nanga en Papa nomo, e du noti. Nôno, ma doronomo a ben e prisiri fu wrokoko skinskin nanga na Almakti Gado. Noiti ete tu sma ben abi so wan bun matifasi nanga makandra, leki Yesus nanga Yehovah. Yesus ben e luku bun fa en Papa ben e du sani, èn a ben e si tu fa A ben e firi èn sortu fasi a abi. Ma Yesus no ben e du dati wawan. A ben e teki leri fu en Papa èn a ben e du soifri san a ben leri. Leki bakapisi fu dati, a Manpikin disi di ben e gi yesi, kon de neleki en Papa. A kon de so soifri leki en Papa taki Bijbel e kari en „a prenki fu a Gado di sma no man si” (Kol. 1:15). Te wi e du ala muiti fu waka baka a Krestes, dan wi sa kon moro krosibei na Yehovah.
Wi o man sori den fasi fu Yehovah moro bun
5. San o yepi wi fu sori den fasi fu Yehovah moro bun, èn fu san ede?
5 Gado meki wi ’leki wan prenki fu en, soleki fa a de’, èn fu dati ede wi man sori den fasi fu en (Gen. 1:26). Na apostel Paulus ben gi Kresten a rai fu „waka baka na eksempre fu Gado leki pikin di a lobi” (Ef. 5:1). Te wi e waka baka a Krestes, dan dati e yepi wi fu de leki wi hemel Tata. Dati e kon fu di Yesus na a wan-enkri sma di sori wi moro bun leki iniwan tra sma fa Gado e denki, fa a e firi, èn fa a de. Boiti dati, Yesus na a wan-enkri sma tu di yepi wi fu kon sabi Yehovah bun. Di Yesus ben de na grontapu, dan a ben meki a nen fu Yehovah bekènti. Ma dati no ben de ala san a ben du. A tyari kon na krin tu fa a Sma dati de. (Leisi Mateyus 11:27.) Yesus du disi nanga yepi fu den sani di a taki, den sani di a du, den sani di a leri sma, èn nanga yepi fu na eksempre fu en.
6. San den leri fu Yesus e tyari kon na krin fu Yehovah?
6 Den sani di Yesus ben e leri sma, meki wi kon frustan san Gado e aksi fu wi, èn fa a e denki fu den anbegiman fu en (Mat. 22:36-40; Luk. 12:6, 7; 15:4-7). Fu eksempre, baka di Yesus ben kari wan fu den Tin Komando, namku „no du sutadu”, dan a tyari kon na krin taki langa ten bifo wan man e du sutadu, dan Gado e bigin si kaba san de na ini na ati fu a man dati. Luku san Yesus e taki fu sori fa Gado feni a sani dati: „Iniwan sma di e tan luku wan uma fu kisi tranga lostu gi en, du sutadu nanga en kaba na ini en ati” (Ex. 20:14; Mat. 5:27, 28). Yesus ben sori tu taki den Fariseiman ben e frustan wan fu den komando na ini a Wèt na a fasi disi: „Yu musu lobi tra sma, ma yu musu teige yu feanti.” Ma baka di a taki dati, dan a tyari kon na krin fa Yehovah e denki. A taki: „Tan lobi un feanti èn tan begi gi den sma di e frufolgu unu” (Mat. 5:43, 44; Ex. 23:4; Lef. 19:18). Te wi e kon sabi fa Gado e denki, fa a e firi, èn san a e aksi fu wi, dan wi sa man sori den fasi fu en moro bun.
7, 8. San na eksempre fu Yesus e leri wi fu Yehovah?
7 Na eksempre fu Yesus yepi wi tu fu kon sabi fa en Papa de. Na ini den Evangelietori wi kan leisi taki Yesus ben e firi sari gi den sma di ben de na nowtu èn gi den wan di ben e pina. Wi kan leisi tu fa a ben mandi di den disipel fu en ben bari den yongu pikin. Te wi e leisi den sani disi, dan wi kan si krin taki en Papa ben e firi a srefi fasi, a no so? (Mark. 1:40-42; 10:13, 14; Yoh. 11:32-35) Prakseri fa den sani di Yesus du yepi wi fu kon sabi den moro prenspari fasi fu Gado. Den wondru di Krestes du ben sori krin sortu bigi krakti a ben abi, a no so? Ma noiti a gebroiki a krakti dati fu suku en eigi bun, noso fu du ogri nanga trawan (Luk. 4:1-4). Di sma ben e seri èn ben e bai sani na ini a tempel, dan a yagi den sma disi go na dorosei. A sani disi e sori krin tu taki a lobi retidu! (Mark. 11:15-17; Yoh. 2:13-16) Den sani di Yesus ben leri sma èn den moi sani di a ben e taki fu doro sma ati, e sori taki a ben koni „moro Salomo” (Mat. 12:42). San wi kan taki fu a lobi di Yesus ben sori di a gi en libi fu a bun fu trawan? Luku san Bijbel e taki na wan heri moi fasi fu a lobi dati: „Nowan sma abi moro lobi leki a sma di gi en libi.”—Yoh. 15:13.
8 Ala sani di a Manpikin ben taki èn ben du ben e sori krin fa Yehovah de. Dati meki a ben kan taki: „A sma di si mi, si a Tata tu.” (Leisi Yohanes 14:9-11.) Te wi e waka baka a Krestes, dan dati na a srefi leki te wi e waka baka Yehovah.
Yesus na a Salfuwan fu Yehovah
9. O ten Yesus tron a Salfuwan fu Gado, èn fa a tron dati?
9 Luku san ben pasa na a kabapisi fu a yari 29, di Yesus kon na Yohanes a Dopuman. Na a ten dati, Yesus ben abi 30 yari. Bijbel e taki: „Di Yesus dopu, dan wantewante a opo komoto fu a watra; ne hemel opo èn Yohanes si Gado en yeye e saka kon na Yesus tapu leki wan doifi.” Na a momenti dati a tron a Krestes, noso a Mesias. Èn na a srefi momenti dati, Yehovah srefi meki sma kon sabi taki Yesus na a Salfuwan fu en. Yehovah ben taki: „Disi na mi Manpikin, a lobiwan di mi feni bun” (Mat. 3:13-17). Dati na wan moi reide di wi abi fu tron bakaman fu a Krestes!
10, 11. (a) Na sortu fasi Bijbel e gebroiki a nen „Krestes” fu taki fu Yesus? (b) Fu san ede wi musu waka baka Yesus Krestes?
10 Bijbel e gebroiki a nen „Krestes” na difrenti fasi fu taki fu Yesus, èn dati na: Yesus Krestes, Krestes Yesus, nanga a Krestes. Yesus srefi ben de a fosi sma di gebroiki den wortu „Yesus Krestes”. Na ini na eksempre disi, a nen Krestes skrifi na baka a nen Yesus. Di Yesus ben e begi en Papa, dan a taki: „Efu sma wani kisi têgo libi, dan den musu tan leri sabi yu, a wan-enkri tru Gado, èn a sma di yu seni kon, Yesus Krestes” (Yoh. 17:3). Te Bijbel e gebroiki den tu nen na a fasi disi, dan dati e sori krin suma na a sma di Gado ben seni kon fu tron en Salfuwan. Te a nen Krestes skrifi na fesi a nen Yesus, fu eksempre „Krestes Yesus”, dan dati na fu poti moro prakseri na a frantwortu di Yesus abi (2 Kor. 4:5). Te Bijbel e gebroiki den wortu „a Krestes”, noso te a wortu ’a’ skrifi na fesi a wortu ’Krestes’, dan dati na wan tra fasi fa Bijbel e poti prakseri na a frantwortu di Yesus abi leki a Mesias.—Tori. 5:42.
11 Awansi fa Bijbel e gebroiki a nen „Krestes” fu taki fu Yesus, a nen disi e poti prakseri na a prenspari tru tori disi: Aladi a Manpikin fu Gado ben kon na grontapu leki wan libisma fu meki sma kon sabi a wani fu en Papa, toku a no ben de leki ala tra man. A no ben de soso wan profeiti tu. A ben kon na grontapu fu de a Salfuwan fu Yehovah. A de prenspari taki wi e waka baka a Salfuwan disi.
Wi kan kisi frulusu soso nanga yepi fu Yesus
12. Sortu prenspari sani Yesus ben taigi na apostel Tomas, syatu bifo a dede?
12 Den wortu di Yesus ben taigi den reti-ati apostel fu en syatu bifo a dede, e sori ete wan tumusi prenspari reide fu san ede wi musu tan waka baka a Mesias. Yesus ben taigi den apostel taki a ben o gowe fu sreka wan presi gi den, èn a sani dati meki taki Tomas poti wan aksi gi en. Yesus piki Tomas: „Mi na a pasi, a waarheid nanga a libi. Nowan sma kan kon na a Tata, efu mi no yepi en” (Yoh. 14:1-6). Yesus ben de makandra nanga den 11 reti-ati apostel fu en, di a taki a sani disi. A pramisi den wan presi na hemel, ma den wortu fu en prenspari tu gi den wan di e howpu fu kisi têgo libi na grontapu (Openb. 7:9, 10; 21:1-4). Fa so?
13. Fu san ede Yesus na „a pasi”?
13 Yesus Krestes na „a pasi”. Disi de so fu di wi kan kon krosibei na Gado soso nanga yepi fu en. A sani disi tru te a abi fu du nanga a begi di wi e begi Gado, bika na soso te wi e begi na ini a nen fu Yesus, wi kan abi a dyaranti taki a Tata sa gi wi san wi e aksi fu en, solanga den sani dati e kruderi nanga a wani fu En (Yoh. 15:16). Ma ete wan reide de fu san ede Yesus na „a pasi”. Fu di libisma abi sondu, meki den no abi wan bun matifasi moro nanga Gado (Yes. 59:2). Yesus gi „en sili leki wan lusu-paiman fu frulusu furu sma” (Mat. 20:28). Leki bakapisi fu dati, Bijbel e taki: „A brudu fu Yesus . . . e krin wi fu ala sondu” (1 Yoh. 1:7). Na so a Manpikin opo a pasi gi libisma fu meki en bun baka nanga Gado (Rom. 5:8-10). Na te wi e bribi na ini Yesus èn te wi e gi yesi na en, dan wi sa man abi wan bun matifasi nanga Gado.—Yoh. 3:36.
14. Fu san ede Yesus na „a waarheid”?
14 Yesus na „a waarheid”, fu di ala ten a ben e taki san tru, èn fu di a ben e libi tu na wan fasi di e kruderi nanga a tru bribi. Ma Yesus ben de „a waarheid” tu fu di ala profeititori di skrifi fu a Mesias, kon tru na ini en, èn dati na bun furu profeititori. Na apostel Paulus ben skrifi: „Awinsi o furu den pramisi fu Gado de, den tron Iya nanga yepi fu en” (2 Kor. 1:20). Srefi „wan skaduw fu den bun sani di musu kon ete”, soleki fa a Wèt di Gado ben gi Moses e sori, kon tru na ini Krestes Yesus (Hebr. 10:1; Kol. 2:17). Ala profeititori abi fu du nanga Yesus, èn den profeititori disi e sori sortu prenspari frantwortu a abi fu meki a wani fu Yehovah kon tru (Openb. 19:10). Efu wi wani kisi wini fu den sani di Gado o du gi wi, dan wi musu waka baka a Mesias.
15. Fu san ede Yesus na „a libi”?
15 Yesus na „a libi”, fu di a bai libisma nanga a brudu fu en, èn têgo libi na wan presenti di Gado e gi „nanga yepi fu Krestes Yesus wi Masra” (Rom. 6:23). Yesus na „a libi” tu gi den dedewan (Yoh. 5:28, 29). Boiti dati, prakseri san Yesus sa du leki Granpriester na a ten fu a Dusun Yari Tiri fu en. Iya, a sa gi libisma na grontapu têgo frulusu fu sondu nanga dede!—Hebr. 9:11, 12, 28.
16. Fu san ede wi musu waka baka Yesus?
16 Soleki fa wi si, dan a piki di Yesus gi Tomas, prenspari srefisrefi gi wi. Yesus na a pasi, a waarheid, nanga a libi. En na a sma di Gado seni kon fu frulusu grontapu (Yoh. 13:17). Èn nowan sma man go na a Tata efu Yesus no yepi en. Bijbel e taki krin: „Nowan tra sma kan gi wi frulusu, bika Gado no gi sma na grontapu nowan enkri tra nen di sa meki wi kisi frulusu” (Tori. 4:12). Dati meki awansi fa wi kweki, toku a de wan koni sani fu bribi na ini Yesus, èn fu waka na en baka so taki wi kan kisi libi.—Yoh. 20:31.
Wi e kisi a komando fu arki a Krestes
17. Fu san ede wi musu arki a Manpikin fu Gado?
17 Petrus, Yohanes, nanga Yakobus ben si wan tumusi aparti fisyun. Na a ten dati den yere wan sten di ben komoto fu hemel, èn a sten dati ben taki: „Disi na mi Manpikin, a wan di mi teki. Un arki en” (Luk. 9:28, 29, 35). A de tumusi prenspari taki wi e gi yesi na a komando di wi kisi fu arki a Mesias.—Leisi Tori fu den Apostel 3:22, 23.
18. San a wani taki fu arki Yesus Krestes?
18 Te wi e arki Yesus, dan dati wani taki dati wi e ’poti ala wi prakseri na a eksempre fu en’ (Hebr. 12:2, 3). Dati meki a bun te wi e „poti moro prakseri leki san wi gwenti na den sani” di wi e leisi fu en na ini Bijbel èn na ini den publikâsi fu „a getrow èn koni srafu”. Na dati wi musu du tu nanga den sani di wi e yere fu en na den Kresten konmakandra (Hebr. 2:1; Mat. 24:45). Fu di wi na skapu fu Yesus, meki wi musu de klariklari fu arki en èn fu waka na en baka.—Yoh. 10:27.
19. San o yepi wi fu tan waka baka a Krestes?
19 A tru taki wi man tan waka baka a Krestes, awansi san e miti wi? Iya, wi man du dati, efu wi e ’tan hori wisrefi na a eksempre di e sori wi den bun sani di wi leri’. Dati meki wi musu du san wi leri, aladi wi „e tan sori a bribi èn a lobi di de na ini Krestes Yesus”.—2 Tim. 1:13.
San yu leri?
• Fu san ede yu kan kon moro krosibei na Yehovah te yu e waka baka „a Krestes”?
• Te wi e waka baka Yesus, dan fu san ede dati na a srefi leki te wi e waka baka Yehovah?
• Fu san ede Yesus na „a pasi, a waarheid nanga a libi”?
• Fu san ede wi musu arki a Salfuwan fu Yehovah?
[Aksi fu a tori disi]
[Prenki na tapu bladzijde 29]
Den sani di Yesus leri wi e sori taki a fasi fa Yehovah e denki, bun omeni tron moro a fasi fa libisma e denki
[Prenki na tapu bladzijde 30]
Wi musu tan waka baka a Salfuwan fu Yehovah
[Prenki na tapu bladzijde 32]
Yehovah ben taki: „Disi na mi Manpikin . . . Un arki en”