“Kiristtoosa” Kaalliyoy Aybissee?
“Kiristtoosa” Kaalliyoy Aybissee?
“Tana kaallana koyiya urai de7ikko, bana yeggi bayo; yaatidi ubba gallassi . . . tana kaallo.”—LUQAASA 9:23.
1, 2. Nuuni Kiristtoosa kaallana koshshidoy aybissakko qoppiyoogee bessiyaaba gididoy aybissee?
KOSHSHAY deˈiyo oorattatoonne yelagatoo, saˈan ayyo goynnanau shiiqida darotu giddon inttena beˈiyoogan Yihooway keehippe ufayttees! Geeshsha Maxaafaa intte ubbatoo xannaˈiyo wode, Kiristtaane shiiqotun ubbatoo beettiyo wodenne Xoossaa Qaalan deˈiya, atotettaa demissiya tumaa eran dichaa bessiyo wode: “Tana kaallana koyiya urai de7ikko, bana yeggi bayo; yaatidi ubba gallassi ba masqqaliyaa tookkidi, tana kaallo” yaagiya Yesuusa shoobiyaa wozanappe qoppana koshshees. (Luqaasa 9:23) Intte huuphiyaa yeggi bayiyoogeenne a kaalliyaageeta gidiyoogee intte koyidi oottana koshshiyaaba gidiyoogaa Yesuusi yootiis. Yaatiyo gishshau, nuuni “Kiristtoosa” kaallana koshshiyoy aybissakko loytti qoppiyoogee bessiyaaba.—Maatiyoosa 16:13-16.
2 Yesuus Kiristtoosa leemisuwaa kaalliiddi deˈiya nubaashin woygana danddayettii? Nuuni “kaseegaappe loittidi oottanaadan” zoree imettiis. (1 Tasalonqqe 4:1, 2) Tumu goynuwaa kaalliyoogaa mata wode doommidaageeta gidin woy daro layttau kaalliiddi takkidaageeta gidin, Kiristtoosa kaalliyoy aybissakko qoppiyoogee PHauloosa zoriyaa oosuwan peeshshanaunne nu galla galla deˈuwan kaseegaappe loyttidi A kaallanau maaddees. Nuuni Kiristtoosa kaallana koshshido ichashu gaasota ane beˈoos.
Yihoowaara Deˈiya Mata Dabbotaa Minttanau
3. Nuuni Yihoowa erana danddayiyo naaˈˈu ogeti awugeetee?
3 Kiitettida PHauloosi “Ariyosppaagoosa sinttan eqqidi,” Ateena asau haasayido wode: “[Xoossay] ba huuphen eti de7ana wodiyaanne sohuwaa kase zawayiis. ‘I hegaa oottidoogee eti oiqqi oiqqi xeellidi, bana koyiiddi, geelladan demmanddonaashsha giyoogaana; gidikkonne, Xoossai nuuppe ooyyoonne haaho gidenna’” yaagiis. (Oosuwaa 17:22, 26, 27) Nuuni Xoossaa koyanaunne a tumuppe eranau danddayoos. Leemisuwau, merettidabata akeekiyo wode, Xoossaa eeshshaanne a eraa xeelliyaagan darobaa tamaaroos. Merettidabata nashuwan wotti denttidi qoppiyoogan, Medhidaagaabaa darobaa tamaarana danddayoos. (Roome 1:20) Xaafettida ba Qaalan, Geeshsha Maxaafankka Yihooway babaa aahuwan qonccissiis. (2 Ximootiyoosa 3:16, 17) ‘I oottidobaa zaari zaari qoppiyoogeenne a wolqqaama oosota yereriyoogee’ nuuni Yihoowa loyttidi eranaadan maaddees.—Mazamure 77:12.
4. Kiristtoosa kaalliyoogee Yihoowaara mino dabbotaa medhanau nuna waatidi maaddana danddayii?
4 Yihoowaara mino dabbotaa medhiyo ubbaappe aadhiya loˈˈo ogee Kiristtoosa kaalliyoogaa. “Sa7ai merettanaappe kase” Yesuusau ba Aawaa matan deˈiya bonchuwaa qoppa! (Yohaannisa 17:5) “Xoossai medhdhidobau koiroi” a. (Ajjuutaa 3:14) I “merettidabaa ubbaappe aadhdhiya baira” gidiyoogaadan, zawi baynna wodiyau saluwan ba Aawaa, Yihoowaara deˈiis. Yesuusi asa gidanaappe kase, ba Aawaara deˈido wodiyaa coo aattibeenna. I Xoossaayyo mata dabbonne, Ubbabaa Danddayiyaagaara issippe ufayssan oottiyoogan, ooninne hegaadan siiqettana danddayenna hanotan mino dabbotaa medhiis. Yesuusi ba Aawau siyettiyaabaanne A waanna eeshshata akeekiyoogan I oottiyo ogiyaa xeelliyoogaa xalla gidennan, ba Aawaabaa tamaarido ubbabaa baxuuxi oyqqiisinne minttidi kaalliis. Hegaappe denddidaagan, ha azazettiya Naˈay ba Aawaa milatiis—hegaa gishshau, Geeshsha Maxaafay a “beettenna Xoossaa leemiso” yaagees. (Qolasiyaasa 1:15) Kiristtoosa matattidi kaalliyoogan, Yihoowaara mino dabbotaa medhana danddayoos.
Yihoowa Loyttidi Milatanau
5. Nuuni Yihoowa loyttidi milatanau aybi maaddii? Aybissi?
5 Nuuni ‘Xoossaa leemisuwan a milatidi merettido’ gishshau, nuuyyo Xoossaagaa mala eeshshata qonccissana danddayiyo abbee deˈees. (Doomettaabaa 1:26) Kiitettida PHauloosi Kiristtaaneta “Xoossai siiqiyo naatudan, a milatite” yaagidi zoriis. (Efisoona 5:1) Kiristtoosa kaalliyoogee saluwan deˈiya nu aawaa milatanaadan nuna maaddees. Hegee, Yesuusi Xoossaa qofaa, au siyettiyaabaanne a eeshshaa loytti qonccissidonne ooninne tamaarissana danddayiyoogaappe aaruwan Yihoowabaa tamaarissido gishshataassa. Saˈan deˈiyo wode, Yesuusi coo Yihoowa suntta xallaa erissibeenna. Hegaappe, he sunttay kalˈˈatiyoogee ay mala Xoossaakko qonccissiis. (Maatiyoosa 11:27 nabbaba.) Yesuusi ba yootidoban, oottidoban, tamaarissidobaaninne leemiso gididoban hegaa oottiis.
6. Yesuusi tamaarissidobay Yihoowabaa ay qonccissii?
6 Xoossay nuuppe koyiyoy aybakkonne i baassi goynniyaageeta waatidi xeelliyaakko, Yesuusi ba tamaarissidoban qonccissiis. (Maatiyoosa 22:36-40; Luqaasa 12:6, 7; 15:4-7) Leemisuwau, Yesuusi Tammu Azazotuppe, “SHaaramuxoppa” yaagiyaagaa yooti simmidi, issi asi he nagaraa oottanaappe kase ba wozanan qoppiyoobaa Xoossay waatidi xeelliyaakko qonccissiis. “Maccaaro xeellidi amottiya ubbai, ba wozana giddon he wode iira shaaramuxiis” yaagiis. (Kessaabaa 20:14; Maatiyoosa 5:27, 28) Parisaaweti issi Higgiyaa, “Ne shooruwaa siiqa; ne morkkiyaa morkka” yaagidi birshshiyoogaa yooti simmidi, Yesuusi: “Intte morkketa siiqite; . . . inttena waissiyaageetuyyookka Xoossaa woossite” yaagiyoogan Yihoowa qofaa erissiis. (Maatiyoosa 5:43, 44; Kessaabaa 23:4; Wogaabaa 19:18) Xoossaa qofaanne au siyettiyaabaa, qassi i nuuppe koyiyoobaa xeelliyaagan akeekaa demmiyoogee nuuni a loyttidi milatanaadan maaddees.
7, 8. Yesuusi oottido leemiso gidyaabaappe Yihoowabaa ay tamaariyoo?
7 Yesuusi leemiso gidiyaabaa oottiyoogaanikka ba Aawaa eeshshaa qonccissiis. Yesuusi, qaretaa koshshiyoogeetuyyo qarettidoogaa, metootidaageetuyyo azzanidoogaa, i erissiyo ashkkarati naata teqqido wode hanqqettidoogaa, Wonggeliyaa maxaafan nuuni nabbabiyo wode, a Aawaukka hegaa malabay siyettiyoogaa akeekokkonii? (Marqqoosa 1:40-42; 10:13, 14; Yohaannisa 11:32-35) Yesuusi oottidobay Xoossaa waanna eeshshata nuuni akeekanaadan waati maaddidaakko qoppa. Yesuusi oottido maalaalissiyaabati au deˈiya gita wolqqaa qonccissokkonaa? Gidikkokka, i he wolqqaa ba goˈˈau woykko harata qohanau goˈettibeenna. (Luqaasa 4:1-4) Yaaretiya zalˈˈanchata beeta maqidasiyaappe i yedettidoogee, suure pirddau i mishettiyoogaa loytti qonccissees! (Marqqoosa 11:15-17; Yohaannisa 2:13-16) A timirtteenne asaa wozanaa denttettiya i yootido aaro kehatettaa qaalay, aadhida eratettan i ‘Solomonappekka aadhdhiyoogaa’ bessees. (Maatiyoosa 12:42) Ba deˈuwaa haratuyyo aatti immiyoogan Yesuusi bessido siiqoy, Geeshsha Maxaafan ‘hegaappe aadhiya siiqoy ooyyookka baawa’ geetettidaagan loˈˈidi qoncciis.—Yohaannisa 15:13.
8 Xoossaa Naˈay yootidonne oottido ubbaban Yihoowa polo hanotan kalˈˈatido gishshau, “Tana be7ida urai Aawaakka be7iis” gaana danddayiis. (Yohaannisa 14:9-11 nabbaba.) Kiristtoosa kaalliyoogee Yihoowa kaalliyoogaara issi mala.
Yesuusi Yihooway Tiyidoogaa
9. Yesuusi Xoossay Tiyidoogaa gididoy awudee, ayba ogiyaanee?
9 Layttay 30 gidido Yesuusi, ofinttan 29 K.S., Xammaqiya Yohaannisakko yiido wode, aybi hanidaakko qoppa. “Yesuusi xammaqettidoogaappe guyyiyan, sohuwaara haattaappe kiyiis; saloi dooyettin, Xoossaa Ayyaanai haraphphedan yiishiininne ba bolli wodhdhishin be7iis.” He wode i Kiristtoosa woykko Mase gidiis. He wode, Yihooway ba huuphe Yesuusi Tiyettidaagaa gidiyoogaa: “Taani siiqiyo ta Na7ai, tana ufaissiyaagee hagaa” yaagidi erissiis. (Maatiyoosa 3:13-17) Hagee nuuni Kiristtoosa kaallanaadan oottiya ayba loˈˈo gaasoo!
10, 11. (a) Yesuusaara gayttidaagan Geeshsha Maxaafay “Kiristtoosa” giya boncho sunttaa ayba ogiyan goˈettii? (b) Nuuni Yesuus Kiristtoosa ubbatoo kaallana koshshiyoy aybissee?
10 “Kiristtoosa” giya boncho sunttaa Geeshsha Maxaafay Yesuusaara gayttidaagan dumma dumma ogiyan goˈettees; hegeekka Yesuus Kiristtoosa, Kiristtoos Yesuusanne Kiristtoosa. “Yesuus Kiristtoosa” giya xeessaa koyro Yesuusi bari huuphe goˈettiis. He qonccissuwan boncho sunttay sunttaappe kaallidi geliis. Ba Aawaakko woossido woosan: “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7o” yaagiis. (Yohaannisa 17:3) He xeessay, Xoossay kiittidoogaaninne i Tiyidoogaa bolli nu xeelaa wottanaadan oottees. “Kiristtoos Yesuusa” giyaagaadan, boncho sunttay sunttaappe kasetiyo wode, waanna qofay he uraa bollaana gidennan au deˈiya maataana gidiyoogaa qonccissees. (2 Qoronttoosa 4:5) “Kiristtoosa” giya boncho sunttay Mase gidiyoogan Yesuusau deˈiya maataa qonccissiyo hara oge.—Oosuwaa 5:42.
11 “Kiristtoosa” giya boncho sunttaa Yesuusa giya sunttaara ay ogiyan goˈettikkokka, he boncho sunttay kaallidi deˈiya keehippe koshshiya tumaa qonccissees: Xoossaa Naˈay asa gididi saˈaa yiidabanne ba Aawaa shenee erettanaadan oottidaba gidikkokka, i coo asa mala woy hananabaa yootiya hara asa mala gidenna; i Yihooway Tiyidoogaa. Ha Tiyettidaagaa nuuni ubbatoo kaallana bessees.
Atotettaa Demmiyo Ogee Yesuusa Xalla
12. Yesuusi hayqqanaappe guutta saatiyaa kasetidi, kiitettida Toomasayyo yootido keehippe koshshiyaabay aybee?
12 Masiyaa ubbatoo kaallanaadan oottiya hara gaasoy, Yesuusi hayqqanaappe guutta saatiyaa kasetidi, ammanettida ba kiitettidaageetuyyo yootido qaalan qoncciis. Yesuusi sohuwaa giigissanau biyoogaa yootidoogaara gayttidaagan, Toomaasi denttido oyshau Yesuusi zaaruwaa immiiddi: “Ogee, tumainne de7oi tana; ta baggaarappe attin, ooninne ta Aawaakko baanau danddayenna” yaagiis. (Yohaannisa 14:1-6) Yesuusi he wode hegaa yootidoy 11 ammanettida ba erissiyo ashkkaratussa. I etayyo sohoy saluwan deˈiyoogaa yootiis; shin a qaalay saˈan merinaa deˈuwaa demmanau hidootiyaageetussikka keehippe koshshiyaaba. (Ajjuutaa 7:9, 10; 21:1-4) Hegaadan giyoy aybissee?
13. Yesuusi ‘oge’ gidiyoy aybiinee?
13 Yesuus Kiristtoosi ‘oge.’ Hegee, nuuni a baggaara gidana xayikko, Xoossaakko shiiqana danddayennaagaa bessees. Hegee woosaarakka gayttidaba; Xoossaa sheniyaara moggiya ogiyan Yesuusa baggaara nuuni aybanne oychiyaaba gidikko, Aaway nuussi immanaagaa ammanettoos. (Yohaannisa 15:16) Gidikkokka, Yesuusi hara baggaarakka ‘oge.’ Nagaray asaa naati Xoossaappe haakkanaadan oottiis. (Isiyaasa 59:2) Yesuusi: ‘Daro asaa wozanau ba shemppuwaa imiis.’ (Maatiyoosa 20:28) Hegaappe denddidaagan, Geeshsha Maxaafay: “Yesuus Kiristtoosa suuttai nagara ubbaappe nuna ashshees” yaagees. (1 Yohaannisa 1:7) Naˈay hegaadan oottiyoogan, nuuni Xoossaara sigettiyo ogiyaa dooyiis. (Roome 5:8-10) Nuuni Xoossaara dabbotaa medhana danddayiyoy, Yesuusan ammaniyoogaananne ayyo azazettiyoogaana.—Yohaannisa 3:36.
14. Yesuusi ‘tuma’ gididoy ayba ogiyaanee?
14 Yesuusi ‘tuma’ geetettidoy, tumaabaa yootidonne tumaara moggidi deˈido gishsha xalla gidennan, Masiyaa xeelliyaagan xaafettida hiraaga ubbay—daro hiraagay—a bollan polettido gishshataassa. Kiitettida PHauloosi: “Xoossai immana giidobau ubbau eeno giidoogee Kiristtoosa baggaara polettana” yaagidi xaafiis. (2 Qoronttoosa 1:20) Muuse Higgiyan deˈiya, ‘yaana loˈˈobaa eeshoykka’ tumattidoy Kiristtoos Yesuusaana. (Ibraawe 10:1; Qolasiyaasa 2:17) Ubba hiraagati waannayidi yootiyoy Yesuusabaa; eti polettiiddi deˈiya Yihoowa halchuwan au deˈiya gita sohuwaa qonccissoosona. (Ajjuutaa 19:10) Xoossay nuuyyo halchidobay polettiyo wode goˈettanau, Masiyaa kaallana koshshees.
15. Yesuusi ‘deˈo’ gididoy ayba ogiyaanee?
15 Yesuusi ‘deˈo’ gididoy, asaa zariyaa ba suuttan wozido gishshataassanne Xoossay merinaa deˈuwaa immiyoy, “Kiristtoos Yesuusa baggaara” gidiyo gishshataassa. (Roome 6:23) Yesuusi hayqqidaageetussikka ‘deˈo.’ (Yohaannisa 5:28, 29) Hegaa bollikka, Qeese Ubbatu Halaqa gidiyoogaadan, ba SHaˈu Layttaa Haaruwan i ay oottanaakko qoppa. Saˈan deˈiya, baayyo haarettiyaageeta i nagaraappenne hayquwaappe merinau laˈa kessana!—Ibraawe 9:11, 12, 28.
16. Nuuni Yesuusa kaallanaadan oottiya gaasoy aybee?
16 Yaatiyo gishshau,Yesuusi Toomaasayyo zaarido zaaroy nuuyyo keehippe koshshiyaaba. Yesuusi oge, tumanne deˈo. Alamee a baggaara attanaadan Xoossay a saˈaa kiittiis. (Yohaannisa 3:17) A baggaara gidana xayikko ooninne Aawaakko yeenna. Geeshsha Maxaafay: “Asi atotettaa Yesuusa baggaara demmanaappe attin, hara o baggaaranne demmenna; nuuni a sunttan attanau bessees; aissi giikko, Xoossai saluwaappe garssan asassi immido hara suntti baawa” yaagidi qonccissees. (Oosuwaa 4:12) Hegaa gishshau, nuuni tamaaridobay ayba gidikkonne, Yesuusa ammaniyoogee, a kaalliyoogeenne hegaadan oottidi deˈo ogiyaa kaalliyoogee aadhida eratetta oge.—Yohaannisa 20:31.
Kiristtoosi Giyoobaa Siyanaadan Azazettida
17. Xoossaa Naˈay giyoobaa nuuni siyiyoogee keehippe koshshiyoy aybissee?
17 PHeexiroosi, Yohaannisinne Yaaqoobi maalaalissiya hanotan Yesuusi laamettishin beˈidosona. He wode, eti: “Hagee taani doorido ta Na7aa; i giyoogaa siyite” yaagiya saluwaappe yiida cenggurssaa siyidosona. (Luqaasa 9:28, 29, 35) Masee giyoobaa siyanaadan imettida azazuwaa nuuni azazettiyoogee xoqqu oottidi xeelliyooba.—Oosuwaa 3:22, 23 nabbaba.
18. Nuuni Yesuus Kiristtoosi giyoobaa siyana danddayiyoy ayba ogiyaanee?
18 Yesuusi giyoobaa siyiyoogee, ‘a tishshi oottidi xeelliyoogaanne a leemisuwaa loytti qoppiyoogaa’ gujjees. (Ibraawe 12:2, 3) Yaatiyo gishshau, nuuni abaa Geeshsha Maxaafaappenne ‘ammanettida wozannaama ashkkaray’ giigissiyo xuufiyaappe nabbabiyo wode, hegaadankka Kiristtaane shiiqotun abaa siyiyo wode “he yohuwaa mintti oiqqanau bessees.” (Ibraawe 2:1; Maatiyoosa 24:45) A dorssata gidiyoogaadan, Yesuusi giyoobaa siyanaunne a kaallanau amottiyaageeta gidoos.—Yohaannisa 10:27.
19. Aggennan Kiristtoosa kaallanau nuna aybi maaddii?
19 Metoy gakkishinkka aggennan Kiristtoosa kaallana danddayiyoo? Nuuni tamaarido, ‘Kiristtoos Yesuusan nuuyyo deˈiya ammanuwaanne siiquwaa’ oosuwan peeshshiyoogan ‘tumu qaalaa leemiso oottidi oyqqikko,’ ee, kaallana danddayoos.—2 Ximootiyoosa 1:13.
Ay Tamaaradii?
• “Kiristtoosa” Kaalliyoogee Yihoowaara deˈiya nu dabbotaa minttana danddayiyoy aybissee?
• Yesuusa kaalliyoogee Yihoowa kaalliyoogaara issi mala gididoy aybissee?
• Yesuusi ‘oge, tumanne deˈo’ gididoy ayba ogiyaanee?
• Yihooway Tiyidoogee giyoobaa nuuni siyana koshshiyoy aybissee?
[Oyshata]
[Sinttaa 28n deʼiya misiliyaa]
Yesuusa timirttee Yihoowassi deˈiya boncho qofaa qonccissiis
[Sinttaa 29n deʼiya misiliyaa]
Yihooway Tiyidoogaa nuuni ammanettidi kaallana bessees
[Sinttaa 31n deʼiya misiliyaa]
Yihooway: “Hagee . . . ta Na7aa; i giyoogaa siyite” yaagiis