Kay Ano nga Sadang Sundon “an Kristo”?
Kay Ano nga Sadang Sundon “an Kristo”?
“Kon may usa, nga karuyag sumunod ha akon, magdumiri ha iya kalugaringon, . . . ngan [padayon nga] sumunod ha akon.”—LUK. 9:23.
1, 2. Kay ano nga importante nga usisahon naton kon kay ano nga sadang sundon “an Kristo”?
MALIPAYON gud hi Jehova nga makita kamo nga mga interesado ngan batan-on kaupod han iya damu nga magsiringba ha tuna! Samtang nagpapadayon kamo ha pag-aram han Biblia, pagtambong pirme ha mga katirok, ngan pag-uswag ha kahibaro han nagtatalwas-kinabuhi nga kamatuoran tikang ha Pulong han Dios, kinahanglan seryoso nga tagdon niyo inin imbitasyon ni Jesus: “Kon may usa, nga karuyag sumunod ha akon, magdumiri ha iya kalugaringon, . . . ngan [padayon nga] sumunod ha akon.” (Luk. 9:23) Hi Jesus nasiring nga an pagdumiri ha iyo kalugaringon ngan pagin sumurunod niya sadang niyo buhaton. Kon sugad, importante nga aton usisahon kon kay ano nga sadang sundon “an Kristo.”—Mat. 16:13-16.
2 Kumusta man kita nga naglalakat na uyon ha mga pitad ni Jesu-Kristo? Ginsasagdonan kita nga ‘padayon nga buhaton ito hin mas maopay.’ (1 Tes. 4:1, 2; NW) Bag-o man o maiha na nga ginkarawat naton an tinuod nga pagsingba, an pamalandong han mga hinungdan ha pagsunod kan Kristo mabulig ha aton nga iaplikar an sagdon ni Pablo ngan sundon pirme hi Jesus hin mas maopay. Aton usisahon an lima nga hinungdan kon kay ano nga sadang naton sundon an Kristo.
Basi Magin Mas Duok Kita kan Jehova
3. Ha ano nga duha nga paagi makikilala naton hi Jehova?
3 Han nagpapahayag hi apostol Pablo ha mga taga-Atenas samtang ‘natukdaw ha butnga han Areopago,’ hiya nagsiring: “Igintungod [han Dios] ha ira an pagkasunod-sunod han mga panahon, ngan an mga ginkatakipan han ira urukyan; basi hira mamiling han Dios, kay bangin la hira makahikap ha iya, ngan hiagian hiya nira; bisan kon hiya diri hirayo ha tagsa-tagsa ha aton.” (Buh. 17:22, 26, 27) Mabibilngan naton an Dios ngan makikilala gud hiya. Pananglitan, kon obserbahan naton an iya mga linarang ngan may pag-apresyar nga pamalandungon ito, damu an aton hibabaroan mahitungod han iya mga kalidad ngan abilidad sugad nga Maglalarang. (Roma 1:20) Iginpahayag liwat ni Jehova an mga detalye mahitungod han iya kalugaringon ha iya Pulong, an Biblia. (2 Tim. 3:16, 17) Kon mas ‘pamamalandungon naton an mga buhat’ ni Jehova ngan ‘panunumdumon an iya mga binuhatan,’ mas makikilala naton hiya.—Sal. 77:12.
4. Paonan-o nabulig ha aton an pagsunod kan Kristo basi magin mas duok kan Jehova?
4 Usa han maopay gud nga paagi basi mas magin duok kan Jehova amo an pagsunod kan Kristo. Hunahunaa la an kadungganan ni Jesus han kaupod hiya han iya Amay “han waray pa an kalibotan”! (Juan 17:5) Hiya “an tinikangan han mga binuhat han Dios.” (Pah. 3:14) Sugad nga an “siyahan . . . han ngatanan nga mga binuhat,” nakaupod niya hin hilawig hinduro nga panahon ha langit an iya Amay, hi Jehova. Antes hi Jesus nagin tawo, diri la kay kaupod-upod hiya han iya Amay, an Dios nga Makagarahum-ha-ngatanan, kondi duok gud hira ha usa kag usa, malipayon ha pagbuhat nga magkaupod, ngan waray iba nga nagkaada hin pinakaduok nga relasyon kay ha ira. Diri la kay nakita ni Jesus an mga paagi han iya Amay ha pagbuhat han mga butang, ngan naobserbahan an Iya mga pagbati ngan kalidad, kondi iya liwat ginpamalandong ngan ginbuhat an ngatanan nga iya hinbaroan mahitungod ha iya Amay. Sugad nga resulta, inin masinugtanon nga Anak nagin pariho gud ha iya Amay—salit gin-uunabi hiya ha Biblia sugad nga “an dagway han Dios nga diri sadang makita.” (Kol. 1:15) Pinaagi ha pagsunod hin maopay kan Kristo, magigin mas duok kita kan Jehova.
Basi Masubad hi Jehova hin Mas Maopay
5. Ano an mabulig ha aton nga masubad hi Jehova hin mas maopay, ngan kay ano?
5 ‘Ginhimo kita uyon ha ladawan ngan dagway han Dios,’ salit naipapakita naton an iya mga kalidad. (Gen. 1:26) Ginsagdonan ni apostol Pablo an mga Kristiano nga ‘magsubad ha Dios, sugad nga hinigugma nga mga anak.’ (Efe. 5:1) An pagsunod kan Kristo nabulig ha aton nga masubad an aton Amay ha langit. Tungod ito kay waray iba nga nakasubad han panhunahuna, pagbati, ngan personalidad han Dios, ngan nakakagtutdo ha aton hin maopay mahitungod kan Jehova kay ha kan Jesus. Han nakanhi hiya ha tuna, diri la kay iginsumat niya an ngaran ni Jehova. Kondi, iya liwat iginpakilala an Persona nga may-ada hito nga ngaran. (Basaha an Mateo 11:27.) Gintuman ini ni Jesus pinaagi han iya pulong ngan buhat, katutdoan ngan susbaranan.
6. Ano an iginpapahayag han katutdoan ni Jesus mahitungod kan Jehova?
6 Pinaagi han katutdoan ni Jesus, iya iginsaysay kon ano an ginkikinahanglan han Dios ha aton ngan kon ano an Iya pagtagad ha iya mga magsiringba. (Mat. 22:36-40; Luk. 12:6, 7; 15:4-7) Pananglitan, katapos kotaron an usa han Napulo nga Sugo—“diri ka makighilawas han diri mo asawa”—iginsaysay ni Jesus an panhunahuna han Dios may kalabotan ha motibo han usa antes niya buhaton ito. Hiya nagsiring: “An ngatanan nga nasiplat ha babaye ha pagkaipa ha iya makakapanlibog na ha iya dida ha iya kasingkasing.” (Eks. 20:14; Mat. 5:27, 28) Katapos unabihon ni Jesus an interpretasyon han mga Pariseo ha ginsiring han Balaud—“higugmaon mo an imo mga igkasi-tawo, ngan pagdumti an imo kaaway”—iya iginsaysay an panhunahuna ni Jehova, nasiring: “Higugmaon an iyo mga kaaway; mag-ampo kamo tungod han nagpapakaraot ha iyo.” (Mat. 5:43, 44; Eks. 23:4; Leb. 19:18) Kon masabtan naton an panhunahuna ngan pagbati han Dios ngan an iya ginkikinahanglan ha aton, mabubuligan kita hito nga masubad hiya hin mas maopay.
7, 8. Ano an aton mahibabaroan mahitungod kan Jehova pinaagi han susbaranan ni Jesus?
7 Pinaagi han susbaranan ni Jesus, iginpakita liwat niya kon ano an personalidad han iya Amay. Kon nababasa naton ha mga Ebanghelyo an pagpaid ni Jesus ha mga pobre, kalooy ha mga nag-aantos, ngan kasina ha iya mga disipulo nga nagsaway ha kabataan, diri ba naton nahahanduraw nga sugad liwat hito an inaabat han Amay? (Mar. 1:40-42; 10:13, 14; Juan 11:32-35) Hunahunaa kon paonan-o nabulig ha aton an mga buhat ni Jesus nga mahibaroan an nalabaw nga mga kalidad han Dios. Diri ba an mga milagro nga ginbuhat ni Kristo nagpapakita nga may-ada hiya daku nga gahum? Kondi, waray niya gamita ito para ha iya kalugaringon nga bentaha o ha pagdaot ha iba. (Luk. 4:1-4) Nakita gud an iya pagpabili ha hustisya han ginpaiwas niya ha templo an hakog nga mga parabaligya! (Mar. 11:15-17; Juan 2:13-16) An iya katutdoan ngan makaruruyag nga mga pulong nga nakapagios ha kasingkasing han mga tawo nagpapakita nga an iya kinaadman “durodaku pa kan Salomon.” (Mat. 12:42) Maopay gud an pagkahulagway han Biblia han gugma nga ipinakita ni Jesus pinaagi ha paghalad han iya kinabuhi para ha iba, nasiring, ‘waray tawo nga durodaku an gugma kay hini.’ Ano an masisiring naton mahitungod hito?—Juan 15:13.
8 An Anak hingpit gud nga nagrepresentar kan Jehova nga Dios ha ngatanan nga iya pulong ngan buhat salit hiya nakasiring: “An nakakita ha akon, nakakita man ha Amay.” (Basaha an Juan 14:9-11.) An pagsubad kan Kristo, pagsubad liwat kan Jehova.
Hi Jesus an Dinihogan ni Jehova
9. Kakan-o ngan paonan-o hi Jesus nagin Dinihogan han Dios?
9 Tagda an nahitabo ha katrakdag han 29 K.P. han an 30 anyos nga hi Jesus kinadto kan Juan nga Parabaptis. “Han kabaptisi na kan Jesus, ha gilayon hiya hinaw-as ha tubig, ngan kitaa, an mga langit nabuksan ha iya; ngan iya nakita an espiritu han Dios nga nalusad, sugad hin sarapati ngan kinada ha igbaw niya.” Hito nga takna, hiya nagin an Kristo, o Mesias. Dida hito, iginpahayag mismo ni Jehova nga hi Jesus amo an iya Dinihogan, nasiring: “Ini amo an akon hinigugma nga Anak, nga akon nalilipayan.” (Mat. 3:13-17) Maopay gud ini nga hinungdan kon kay ano nga sadang sundon naton an Kristo!
10, 11. (a) Ha ano nga mga paagi ginagamit an titulo nga “Kristo” para kan Jesus? (b) Kay ano nga kinahanglan sundon gud naton hi Jesu-Kristo?
10 Ha Biblia, an titulo nga “Kristo” ginagamit para kan Jesus ha iba-iba nga paagi sugad han Jesu-Kristo, Kristo Jesus, ngan an Kristo. Hi Jesus mismo an siyahan nga naggamit han termino nga “Jesu-Kristo”—an ngaran nga sinusundan han titulo. Ha pag-ampo ha iya Amay, hiya nagsiring: “Ini amo an kinabuhi nga waray kataposan, nga hira kumilala ha imo, nga amo la an matuod nga Dios, ngan hi Jesu-Kristo nga imo ginpakanhi.” (Juan 17:3) Ginpapabug-atan dinhi an usa nga ginsugo han Dios ngan nagin iya Dinihogan. Kon nauuna an titulo ha ngaran, sugad han “Kristo Jesus,” mas ginpapabug-atan hito an katungdanan ni Jesus. (2 Kor. 4:5) An paggamit han “an Kristo,” an titulo nga may-ada “an” ha unahan, usa pa nga paagi ha pagpabug-at han katungdanan ni Jesus sugad nga Mesias.—Buh. 5:42.
11 Anoman an paagi ha paggamit han titulo nga “Kristo” para kan Jesus, ginpapabug-atan hito inin importante nga kamatuoran: Bisan kon an Anak han Dios kinanhi ha tuna sugad nga tawo ngan nagpahayag han kaburut-on han iya Amay, diri la hiya maopay nga tawo o propeta, kondi hiya an nagin Dinihogan ni Jehova. Kinahanglan sundon gud naton ini nga Dinihogan.
Pinaagi La kan Jesus an Katalwasan
12. Ano an ginsiring kan Tomas nga importante liwat ha aton?
12 An usa pa nga importante nga hinungdan ha padayon nga pagsunod ha Mesias amo an ginsiring ni Jesus ha iya magtinumanon nga apostol han pipira na la ka oras antes hiya patayon. Han nagpakiana hi Tomas mahitungod han ginsiring ni Jesus nga malakat hiya ngan mag-aandam hin lugar para ha ira, hiya binaton: “Ako amo an dalan, ngan an kamatuoran, ngan an kinabuhi: waray bisan hin-o nga maabot ha Amay, kon diri maagi ha akon.” (Juan 14:1-6) Hito nga panahon, kaistorya ni Jesus an 11 nga magtinumanon nga apostol. Nagsaad hiya ha ira hin lugar ha langit, kondi ito nga iya ginsiring importante liwat para hadton naglalaom han kinabuhi nga waray kataposan ha tuna. (Pah. 7:9, 10; 21:1-4) Paonan-o?
13. Ano an karuyag sidngon nga hi Jesus amo “an dalan”?
13 Hi Jesu-Kristo amo “an dalan.” Karuyag sidngon, pinaagi la ha iya kita makakadaop ha Dios. Tinuod ini kay may kalabotan ha pag-ampo, makakasiguro la kita nga ihahatag ha aton han Amay an ngatanan nga aton ginhahangyo uyon ha Iya kaburut-on kon mag-aampo kita pinaagi kan Jesus. (Juan 15:16) Kondi, hi Jesus amo “an dalan” ha iba pa nga paagi. Tungod han sala, an katawohan nahibulag ha Dios. (Isa. 59:2) Iginhalad ni Jesus an “iya kinabuhi nga lukat han kadam-an.” (Mat. 20:28) Tungod hito, an Biblia nagsasaysay: “An dugo ni Jesus . . . naghuhugas ha aton tikang ha ngatanan nga sala.” (1 Juan 1:7) Hito nga paagi nagin posible an pakighiuli ha Dios. (Roma 5:8-10) Magkakaada kita hin maopay nga relasyon ha Dios kon tumoo ngan sumugot kita kan Jesus.—Juan 3:36.
14. Kay ano nga hi Jesus “an kamatuoran”?
14 Hi Jesus “an kamatuoran” diri la tungod kay nagyayakan hiya pirme han kamatuoran ngan nagkinabuhi uyon hito kondi tungod kay an ngatanan nga tagna nga iginsurat mahitungod han Mesias—damu gud hito—an natuman ha iya. ‘Bisan ano kadamu an mga saad han Dios, nagin Oo pinaagi ha iya,’ nagsurat hi Pablo. (2 Kor. 1:20) Bisan an “landong han mga mag-opay nga mga bagay nga tiarabot” nga kaupod han Mosaiko nga Balaud natuman kan Kristo Jesus. (Heb. 10:1; Kol. 2:17) Ha iya nakasentro an ngatanan nga tagna, ngan nabulig ito ha aton nga masabtan an iya importante nga responsabilidad ha pagtuman han katuyoan ni Jehova. (Pah. 19:10) Basi mapahimulsan an katumanan han katuyoan han Dios para ha aton, kinahanglan sundon naton an Mesias.
15. Kay ano nga hi Jesus “an kinabuhi”?
15 Hi Jesus “an kinabuhi” tungod kay ginlukat niya an katawohan pinaagi han iya dugo, ngan an kinabuhi nga waray kataposan usa nga regalo han Dios pinaagi “kan Kristo Jesus nga aton Ginoo.” (Roma 6:23) Hiya liwat “an kinabuhi” hadton nagkamatay na. (Juan 5:28, 29) Handurawa liwat an iya pagbubuhaton sugad nga Hitaas nga Saserdote ha iya Milenyo nga Pagmando. Iya gud tatalwason ha kadayonan tikang ha sala ngan kamatayon an iya mga sakop ha tuna!—Heb. 9:11, 12, 28.
16. Kay ano nga sadang naton sundon hi Jesus?
16 Salit, importante gud ha aton an baton ni Jesus kan Tomas. Hi Jesus amo an dalan ngan an kamatuoran ngan an kinabuhi. Hiya an ginsugo han Dios nganhi ha kalibotan basi matalwas an katawohan pinaagi ha iya. (Juan 3:17) Ngan waray bisan hin-o nga makakadaop ha Amay kon diri pinaagi ha iya. An Biblia matin-aw nga nasiring: “Ha bisan hin-o nga lain kan Kristo waray kaluwasan, kay waray iba nga ngaran ha ilarom han langit, nga ihinatag ha mga tawo, nga sadang ta kaluwasan.” (Buh. 4:12) Salit, anoman an aton gintotoohan hadto, maaramon gud nga tumoo ngan sumunod kan Jesus, kay hito nga paagi magigiyahan kita ngadto ha kinabuhi.—Juan 20:31.
Ginsusugo Kita nga Mamati kan Kristo
17. Kay ano nga importante nga mamati kita ha Anak han Dios?
17 Nakita nira Pedro, Juan, ngan Jakobo an urusahon nga bisyon. Hito nga takna, nakabati hira hin tingog tikang ha langit nga nasiring: ‘Ini an akon Anak nga pinili. Pamati kamo ha iya.’ (Luk. 9:28, 29, 35) Importante gud nga sugton naton an sugo nga mamati ha Mesias.—Basaha an Buhat 3:22, 23.
18. Paonan-o kita mamamati kan Jesu-Kristo?
18 An pagpamati kan Jesus nagpapasabot hin pagkita hin maopay ha iya, nga ‘ginpapamurubuot an iya mag-opay nga susbaranan.’ (Heb. 12:2, 3) Salit, maopay gud nga ‘hatagan naton hin labaw ha kasagaran nga pagtagad’ an aton ginbabasa mahitungod ha iya ha Biblia ngan ha mga publikasyon han “matinumanon ngan maaramon nga uripon,” sugad man han aton hinbabatian ha mga katirok. (Heb. 2:1, NW; Mat. 24:45, NW) Sugad nga mga karnero ni Jesus, magin disidido gud kita ha pagpamati ngan pagsunod ha iya.—Juan 10:27.
19. Ano an mabulig ha aton nga makapadayon ha pagsunod kan Kristo?
19 Makakapadayon gud ba kita ha pagsunod kan Kristo anoman an aton mga problema? Oo, kon aton sundon an “surubdan han mga putli nga mga pulong” pinaagi ha pag-aplikar han aton hinbabaroan ‘nga may pagtoo ngan paghigugma may kalabotan kan Kristo Jesus.’—2 Tim. 1:13.
Ano an Imo Hinbaroan?
• Kay ano nga an pagsunod ‘kan Kristo’ mas nagpapaduok ha aton kan Jehova?
• Kay ano nga an pagsubad kan Jesus, pagsubad liwat kan Jehova?
• Kay ano nga hi Jesus “an dalan, ngan an kamatuoran, ngan an kinabuhi”?
• Kay ano nga sadang kita mamati ha Dinihogan ni Jehova?
[Mga Pakiana]
[Retrato ha pahina 29]
Nakita ha katutdoan ni Jesus an hitaas nga kinaadman ni Jehova
[Retrato ha pahina 30]
Kinahanglan nga matinumanon nga sundon naton an Dinihogan ni Jehova
[Retrato ha pahina 32]
Hi Jehova nagpahayag: “Ini amo an akon Anak, . . . pamatii niyo hiya”