He Koʼē ʼe Tonu Ke Tou Mulimuli Iā “Kilisito”?
He Koʼē ʼe Tonu Ke Tou Mulimuli Iā “Kilisito”?
“Kapau ʼe fia muli mai he tahi iā te au, ke fakafisi ia kiā ia totonu . . . pea ke muli tuʼumaʼu [mai] iā te au.”—LUKA 9:23.
1, 2. He koʼē ʼe maʼuhiga kiā tātou ke tou vakaʼi pe koʼē ʼe tonu ke tou mulimuli iā “Kilisito”?
ʼE FIAFIA lahi Sehova ʼi tana sio ifo kiā koutou ʼaē ʼe foʼofoʼou mai ki te kōkelekāsio pea mo koutou ʼu tūpulaga ʼi te lotolotoiga ʼo te fakatahi ʼo tana kau ʼatolasio tokolahi! ʼI takotou haga ako ia te Tohi-Tapu, mo kau ki te ʼu fono Fakakilisitiano, pea mo tuputupu ʼi te ʼatamai mālama ʼaē ʼe tuʼu ʼi te Folafola ʼa te ʼAtua ʼo ʼuhiga mo te ʼu moʼoni ʼaē ʼe haofaki te ʼu maʼuli, ʼe tonu ke kotou fakakaukauʼi lelei ki te fakaafe ʼaenī neʼe fai e Sesu: “Kapau ʼe fia muli mai he tahi iā te au, ke fakafisi ia kiā ia totonu pea ke ina toʼo tona pou fakamamahi ʼi te ʼaho fuli pē, pea ke muli tuʼumaʼu [mai] iā te au.” (Luka 9:23) ʼE ʼui e Sesu, ko takotou fakafisi kiā koutou totonu pea mo liliu ko hana tisipulo ʼe ko he meʼa ʼe tonu ke kotou loto kiai. Koia, ʼe maʼuhiga kiā tātou ke tou vakaʼi pe koʼē ʼe tonu ke tou mulimuli iā “Kilisito.”—Mat. 16:13-16.
2 Kae ʼe feafeaʼi kiā nātou ʼaē kua haʼele nei ʼi te ʼu tapugā vaʼe ʼo Sesu Kilisito? ʼE fakalotomālohiʼi tātou ke tou “haga fai te meʼa ʼaia ʼo laka age.” (1 Tes. 4:1, 2) Tatau aipē peʼe tou foʼofoʼou ʼi te tauhi moʼoni peʼe kua tou fualoa ai, kae kā tou fakakaukauʼi ia te ʼu tupuʼaga ʼaē ke tou mulimuli ai iā Kilisito, pea ʼe tokoni mai anai ke tou muliʼi ia te fakalotomālohi ʼa Paulo, pea ʼaki te temi, ke lelei age tatatou mulimuli ʼaē iā Sesu. Tou vakaʼi age muʼa ia tupuʼaga e nima ʼaē ʼe tonu ai ke tou fia mulimuli iā Kilisito.
Ke Tou ʼIloʼi Lelei Age Ia Sehova
3. Koteā te ʼu faʼahi e lua ʼe feala ai ke tou ʼiloʼi ia Sehova?
3 ʼI tana palalau ki te hahaʼi ʼo Ateni ʼi tana “tuʼu ʼi te lotomālie ʼo te ʼAleopasi,” neʼe ʼui fēnei e te ʼapositolo ko Paulo: “[Ko te ʼAtua] neʼe ina fakatuʼutuʼu maʼa nātou te ʼu temi kua fakakatofa pea mo fakatuʼu te ʼu tuʼakoi ʼo te nofoʼaga ʼo te tagata, kapau ʼe natou kumi fakataufā ia ia pea mo natou maʼu moʼoni ia ia, heʼe ʼi tona fakahagatonu ʼe mole mamaʼo ia iā tātou takitokotahi.” (Gāue 17:22, 26, 27) ʼE feala hatatou kumi ia te ʼAtua pea mo tou ʼiloʼi moʼoni ia ia. Ohagē lā, ko te ʼu meʼa ʼaē neʼe ina fakatupu ʼe ʼiloga lahi ai ia te ʼu kalitātē ʼo te ʼAtua pea mo te ʼu gāue ʼaē ʼe ina lava fai. Ko he metitāsio ʼaki he loto fakafetaʼi ki te ʼu gāue ʼaē neʼe ina fai, ʼe feala ai ke tou ako lahi ʼo ʼuhiga mo te Tupuʼaga. (Loma 1:20) Neʼe toe fakahā e Sehova ʼi tana Folafola, te Tohi-Tapu ia he tahi age ʼu faʼahi ʼo ʼuhiga mo ia totonu. (2 Tim. 3:16, 17) Kapau ʼe lahi tatatou ‘metitāsioʼi tana ʼu gāue’ pea mo ‘tou tokagaʼi tana aga,’ pea ʼe tou ʼiloʼi lelei age anai ia Sehova.—Pes. 77:12.
4. ʼE lava tokoni feafeaʼi mai kiā tātou tatatou mulimuli iā Kilisito ke tou ʼiloʼi lelei age ia Sehova?
4 Ko he faʼahi lelei ke lahi age tatatou ʼiloʼi ʼaē ia Sehova, ʼe ko tata mulimuli ʼaē iā Kilisito. Kotou fakakaukauʼi age ia te kolōlia ʼaē neʼe maʼu e Sesu ʼi tana nofo mo tana Tamai “ ʼi muʼa ʼo te fakatupu ʼo te mālamanei”! (Soa. 17:5) ʼE ko ia “te kamataʼaga ʼo te ʼu fakatupu ʼa te ʼAtua.” (Fakh. 3:14) ʼUhi ko ia “te ʼuluaki tupu ʼo te ʼu meʼa fuli ʼaē neʼe fakatupu,” neʼe maʼuli fualoa ʼaupitō ʼi selō mo tana Tamai, ia Sehova. ʼI tana maʼuli ʼaia ʼi selō, neʼe mole gata ʼaki pē ʼi te nofo fakatahi ʼaē ʼa Sesu mo tana Tamai, kae neʼe ko te kaumeʼa lelei ia ʼo te ʼAtua, ʼo kaugā gāue fiafia mo te Māfimāfi, ʼo tuputupu ai hanā toe feʼofaniʼaki ʼe lahi ʼaupitō. Neʼe mole mamata pē Sesu ki te faʼahiga fai ʼaē e tana Tamai ia tana ʼu gāue, ʼo ina tokagaʼi ia te ʼu meʼa ʼaē neʼe ʼi tona loto pea mo tona ʼu kalitātē, kae neʼe ina maʼu kātoa pea mo fakaʼaogaʼi ia meʼa fuli ʼaē neʼe ina ako ʼo ʼuhiga mo tana Tamai. Koia, ko te ʼAlo fia fakalogo ʼaia neʼe liliu ohagē pē ko tana Tamai—koia ʼaē ʼe ʼui ai ʼi te Tohi-Tapu ʼo ʼuhiga mo ia, ko “te pāki ʼo te ʼAtua fakapulipuli.” (Kol. 1:15) ʼAki tatatou mulimuli fakalelei kiā Kilisito, ʼe feala ai ke tou ʼiloʼi lelei age ia Sehova.
Ke Lelei Age Tatatou Faʼifaʼitakiʼi Ia Sehova
5. Koteā ʼaē kā tokoni mai anai ke lelei age tatatou faʼifaʼitakiʼi ia Sehova, pea koteā tona tupuʼaga?
5 Neʼe faʼu tātou ki ‘te pāki ʼo te ʼAtua, ke tou hoko kiā te ia,’ koia ʼe feala ai ke tou maʼu ia te ʼu kalitātē ʼo te ʼAtua. (Sen. 1:26) Neʼe fakalotomālohiʼi e te ʼapositolo ko Paulo ia te kau Kilisitiano ke natou “liliu ko he kau faʼifaʼitaki ʼo te ʼAtua, ohagē ko he fānau ʼofaina.” (Efe. 5:1) Ko tatatou mulimuli ʼaē iā Kilisito, ʼe tokoni mai ke tou faʼifaʼitakiʼi tatatou Tamai ʼaē ʼe ʼi selō. ʼE moʼoni te faʼahi ʼaia, koteʼuhi ʼe mole he tahi age neʼe ina fakahā lelei te manatu ʼa te ʼAtua, te ʼu meʼa ʼaē ʼe ina logoʼi, pea mo tona ʼulugaaga, gata pē kiā Sesu. Pea neʼe mole he tahi age iā Sesu neʼe feala ke ina akoʼi lelei mai ia Sehova kiā tātou. ʼI tana maʼuli ʼaē ʼi te kele, neʼe mole gata pē ki te huafa ʼaē ʼo Sehova neʼe fakahā e Sesu. Neʼe ina toe fakahā peʼe feafeaʼi te ʼulugaaga ʼo te ʼAtua ʼaia. (Lau ia Mateo 11:27.) Neʼe fai e Sesu ia te faʼahi ʼaia, ʼaē neʼe hā ʼi tana ʼu palalau pea mo tana ʼu gāue, mo tana ʼu faiakonaki pea mo tana faʼifaʼitaki.
6. Koteā ʼaē ʼe fakahā e te ʼu akonaki ʼa Sesu ʼo ʼuhiga mo Sehova?
6 ʼAki tana ʼu akonaki, neʼe fakahā e Sesu pe koteā ʼaē ʼe fakamaʼua mai e te ʼAtua kiā tātou pea mo tana ʼu manatu ʼo ʼuhiga mo tana kau ʼatolasio. (Mat. 22:36-40; Luka 12:6, 7; 15:4-7) Ohagē lā, ʼi tana ʼosi talanoa ki te fakatotonu ʼaenī ʼe kau ki te ʼu Fakatotonu e Hogofulu: “ ʼAua naʼa ke tono,” neʼe fakamahino e Sesu ia te manatu ʼa te ʼAtua ʼo ʼuhiga mo te meʼa ʼaē ʼe fualoa tona kamata tuputupu ʼi te loto ʼo te tagata ʼi muʼa ʼo hana fai ia te aga ʼaia. Neʼe ina ʼui fēnei: “Ko ʼaē ʼe ina haga sioʼi he fafine ʼo tupu ai hana holi ki ai, ʼe kua tono ia mo ia ʼi tona loto.” (Eke. 20:14; Mat. 5:27, 28) ʼI tana ʼosi talanoa ki te fakamahino fefeka ʼa te kau Faliseo ʼo ʼuhiga te folafola ʼaenī ʼo te Lao: “ ʼE tonu ke ke ʼofa ki tou kāiga kae ke fehiʼa ki tou fili,” neʼe fakahā e Sesu ia te manatu ʼa Sehova, ʼo ina ʼui fēnei: “Ke kotou haga ʼoʼofa ki ʼokotou fili pea mo hūfaki ia nātou ʼe natou fakatagaʼi koutou.” (Mat. 5:43, 44; Eke. 23:4; Lev. 19:18) Ko tatatou mahino ʼaē ki te ʼu manatu ʼa te ʼAtua pea mo te ʼu meʼa ʼaē ʼe ina fakamaʼua mai kiā tātou, ʼe tokoni mai anai ke tou faʼifaʼitakiʼi lelei age ia ia.
7, 8. ʼAki te faʼifaʼitaki ʼa Sesu, koteā ʼaē ʼe tou ako ʼo ʼuhiga mo Sehova?
7 ʼAki tana faʼifaʼitaki, neʼe toe fakahā e Sesu te ʼulugaaga ʼo tana Tamai. Kā tou lau ʼi te ʼu Evaselio ia te manavaʼofa ʼo Sesu ki te hahaʼi ʼaē neʼe maʼuli faigataʼaʼia, mo tana lotomahino kiā nātou ʼaē neʼe mamahi, mo tana ʼita ʼaē ki tana ʼu tisipulo ʼi tanatou munaʼi ia te ʼu tamaliki, ʼe tou mahino ai ʼe toe fēia pē mo te ʼulugaaga ʼo tana Tamai. (Mko. 1:40-42; 10:13, 14; Soa. 11:32-35) Kotou fakakaukauʼi age muʼa ia tatatou mahino lelei age ki te ʼu kalitātē tāfito ʼo te ʼAtua ʼaki te ʼu gāue ʼaē neʼe fai e Sesu. Ko te ʼu milakulo ʼaē neʼe fai e Kilisito, ʼe mole fakahā ai koa ia te toe mālohi ʼaupitō ʼaē ʼe ina maʼu? Kae neʼe mole he temi neʼe ina fakaʼaogaʼi ai te mālohi ʼaia maʼa ia totonu peʼe moʼo fai he meʼa e kovi ki ʼihi atu. (Luka 4:1-4) ʼI tana haga ʼaē ʼo kapu ia te hahaʼi faifakatau mānumānu mai te fale lotu, ʼe ko he fakahā lelei ʼaia ʼo tana faitotonu! (Mko. 11:15-17; Soa. 2:13-16) Ko tana ʼu akonaki pea mo tana ʼu lea mālie ʼaē neʼe ina fakaʼaogaʼi ke malave ki te loto ʼo te hahaʼi, ʼe hā ai ko tona poto neʼe “lahi age iā Salomone.” (Mat. 12:42) ʼE fakamatala ʼi hona ʼaluʼaga matalelei ʼi te Tohi-Tapu ia te ʼofa ʼaē neʼe fakahā e Sesu ʼi tana momoli ia tona nefesi maʼa te hahaʼi, ʼo ʼui fēnei: “ ʼE mole he tahi ʼe ina maʼu he ʼofa ʼe lahi age ʼi te [taʼi ʼofa ʼaia].”—Soa. 15:13.
8 Ko te ʼAlo ʼo te ʼAtua, ʼaki tana ʼu palalau pea mo tana ʼu gāue fuli neʼe ina fakafofoga lelei te ʼAtua ia Sehova, ʼo feala ai ke ina ʼui fēnei: “Ko ʼaē kua sio kiā te au, kua toe sio foki ki te Tamai.” (Lau ia Soane 14:9-11.) Ko tatatou faʼifaʼitakiʼi ia Kilisito ʼe hagē pē ko hatatou faʼifaʼitakiʼi ia Sehova.
Ko Sesu Ko Te Fakanofo ʼa Sehova
9. Ko te temi fea ʼaē neʼe liliu ai Sesu ko te Fakanofo ʼa te ʼAtua, pea neʼe hoko feafeaʼi te faʼahi ʼaia?
9 Tou vakaʼi age muʼa te meʼa ʼaē neʼe hoko ʼi te fasigā taʼu fakatō lau ʼo te taʼu 29 ʼo totatou temi, ʼi te taʼu 30 ʼo Sesu neʼe ʼalu kiā Soane Patita. “ ʼI tona ʼosi papitemaʼi, neʼe hake ake aipē ia Sesu mai te vai; pea koʼenī ia te lagi neʼe ava age, pea neʼe sio ia ki te laumālie ʼo te ʼAtua ʼe hifo age kiā te ia ohagē he lupe.” ʼI te temi ʼaia, neʼe liliu ai ko Kilisito, peʼe ko te Mēsia. ʼI te temi ʼaia, neʼe fakahā e Sehova totonu ko Sesu neʼe ko tana Fakanofo, ʼo ina ʼui fēnei: “Ko ia nei ko toku ʼAlo, ia te ʼofaina, ʼaenī kua au fiafia ʼaupitō iā te ia.” (Mat. 3:13-17) ʼE ko he tupuʼaga lelei ʼaia kiā tātou ke tou fia mulimuli iā Kilisito!
10, 11. (a) ʼE fakaʼaogaʼi feafeaʼi kiā Sesu ia te higoa fakatuʼulaga ʼaē ko “Kilisito”? (b) He koʼē ʼe ko he maʼua kiā tātou ke tou mulimuli iā Sesu Kilisito?
10 ʼI te Tohi-Tapu, ko te higoa fakatuʼulaga ʼaē ko “Kilisito,” ʼe fakaʼaogaʼi kiā Sesu ʼi hona ʼu ʼaluʼaga kehekehe ohagē lā ko Sesu Kilisito, ko Kilisito Sesu, pea mo Kilisito. Neʼe ʼuluaki fakaʼaogaʼi e Sesu totonu ia te higoa “Sesu Kilisito”—ʼuluaki ko te higoa ko Sesu pea fakapipiki atu kiai te higoa fakatuʼulaga ko Kilisito. ʼI tana faikole ki tana Tamai, neʼe ina ʼui fēnei: “Ko te fakaʼuhiga ʼaenī ʼo te maʼuli heʼegata, ke natou ako ke natou ʼiloʼi ia koe, te ʼAtua moʼoni e tahi, pea mo ia ʼaē neʼe ke fekauʼi mai, ia Sesu Kilisito.” (Soa. 17:3) ʼE mahino mai ai, ʼe fakamaʼuhigaʼi ia ia ʼaē neʼe fekauʼi mai e te ʼAtua pea neʼe liliu ko tana Fakanofo. Kā tohi fēnei: “Kilisito Sesu,” ʼe ʼuluaki tohi ia te higoa fakatuʼulaga ʼi muʼa ʼo te higoa, pea ʼe ko tona tuʼulaga ʼaē ʼe fakamaʼuhigaʼi. (2 Ko. 4:5) Ko te higoa fakatuʼulaga ko “Kilisito,” kapau ʼe mole fakapipiki kiai te huafa ko Sesu, pea ʼe ko tona tuʼulaga Mēsia ʼaē ʼe fakamaʼuhigaʼi.—Gāue 5:42.
11 Tatau aipē peʼe koteā te faʼahiga fakaʼaogaʼi ʼo te higoa fakatuʼulaga ʼaē ko “Kilisito” kiā Sesu, kae ʼe fakahā lelei ai te faʼahi maʼuhiga ʼaenī: Logolā neʼe haʼu ia te ʼAlo ʼo te ʼAtua ki te kele ʼo liliu ko he tagata pea mo ina fakahā ia te finegalo ʼo tana Tamai, neʼe mole hagē ia ko te tagata fuli pē peʼe ko he polofetā pē ia; neʼe ko te Fakanofo ʼa Sehova. Koia lā ʼaē ʼe maʼua ai kiā tātou, ke tou mulimuli ʼi te Fakanofo ʼaia ʼa te ʼAtua.
ʼE Feala Ke Tou Maʼu Te Haofaki ʼAki Pē Ia Sesu
12. Koteā te ʼu palalau maʼuhiga neʼe fai e Sesu ki te ʼapositolo ko Tomasi ʼe toe ʼaoga kiā tātou?
12 Ko te tahi tupuʼaga maʼuhiga ke tou haga mulimuli ʼi te Mēsia, ʼe hā ʼi te ʼu palalau ʼaē neʼe fai e Sesu ki tana ʼu ʼapositolo agatonu, ʼi muʼa pē ʼo tana mate. Moʼo tali ki te fehuʼi ʼa Tomasi ʼo ʼuhiga mo te ʼui ʼaē ʼa Sesu ʼe ʼalu pea mo ina teuteuʼi ia he nofoʼaga maʼa nātou, neʼe ʼui fēnei e Sesu: “Ko au ko te ala pea mo te moʼoni pea mo te maʼuli. ʼE mole he tahi ʼe haʼu ki te Tamai ʼi tuʼa atu iā te au.” (Soa. 14:1-6) Neʼe palalau Sesu ʼi te temi ʼaia ki tana ʼu ʼapositolo agatonu e toko 11. Neʼe ina fakapapau age kiā nātou he nofoʼaga ʼi selō, kae ʼe toe maʼuhiga foki ia tana ʼu palalau ʼaia kiā nātou ʼaē ʼe ko tonatou ʼamanaki ko te maʼuli heʼegata ʼi te kele. (Fakh. 7:9, 10; 21:1-4) ʼO feafeaʼi?
13. Koteā te fakaʼuhiga ʼo te ʼui ʼaē ko Sesu ʼe ko “te ala”?
13 Ko Sesu Kilisito ʼe ko “te ala.” Ko tona fakaʼuhiga, ʼe feala hatatou fakaovi ki te ʼAtua ʼaki pē ia ia tokotahi. ʼE moʼoni te faʼahi ʼaia ʼo ʼuhiga mo te faikole, heʼe tou tui papau ʼaki pē te huafa ʼo Sesu, ʼe foaki mai anai e te Tamai ia te ʼu meʼa ʼaē ʼe tou kole age pea mo ʼalutahi mo Tona finegalo. (Soa. 15:16) Kae ʼe ʼi ai te tahi fakaʼuhiga ʼo te ʼui ʼaē ko Sesu ʼe ko “te ala.” Kua mamaʼo ia te mālamanei mai te ʼAtua ʼuhi ko te agahala. (Isa. 59:2) Neʼe foaki e Sesu ia “tona nefesi moʼo totogi ʼaki ʼo te tokolahi.” (Mat. 20:28) Koia ʼe fakamahino fēnei ʼi te Tohi-Tapu: “Ko te taʼataʼa ʼo Sesu . . . ʼe ina fakamaʼa tātou mai te agahala fuli pē.” (1 Soa. 1:7) Neʼe tofa ai e te ʼAlo ia te fealagia ʼaē ke tou fakatokatoka mo te ʼAtua. (Loma 5:8-10) Kapau ʼe tou tui kiā Sesu pea mo tou fakalogo kiā te ia, ʼe feala ai ke tou felōgoi lelei mo te ʼAtua.—Soa. 3:36.
14. He koʼē ko Sesu ʼe ko “te moʼoni”?
14 Ko Sesu ʼe ko “te moʼoni,” ʼe mole gata pē ʼi tana tala tuʼumaʼu ia te moʼoni pea mo ina maʼuliʼi, kae ʼuhi ʼaē he neʼe ina toe fakahoko ia te ʼu lea fakapolofetā fuli ʼaē neʼe tohi ʼo ʼuhiga mo te Mēsia. Neʼe tohi fēnei e te ʼapositolo ko Paulo: “Tatau aipē peʼe lahi te ʼu fakapapau ʼa te ʼAtua, kae kua liliu ia [ʼo moʼoni] ʼaki ia ia.” (2 Ko. 1:20) Mo te Lao ʼa Moisese ʼaē neʼe ina ‘fakaʼata te ʼu meʼa lelei ʼaē kā hoko mai’ kua liliu ia ʼo moʼoni iā Kilisito Sesu. (Hep. 10:1; Kol. 2:17) Neʼe talanoa tāfito te ʼu lea fakapolofetā fuli kiā Sesu, pea ʼe tou mahino ai ki tana ʼu gāue maʼuhiga ʼaē moʼo fakahoko te fakatuʼutuʼu ʼa Sehova. (Fakh. 19:10) Ke tou maʼu ia te ʼu tapuakina mai te fakahoko ʼo te ʼu fakatuʼutuʼu ʼa te ʼAtua ʼo ʼuhiga mo tātou, ʼe tonu ke tou mulimuli ʼi te Mēsia.
15. Koteā te fakaʼuhiga ʼo te ʼui ʼaē ko Sesu ʼe ko “te maʼuli”?
15 Ko Sesu ʼe ko “te maʼuli” he neʼe ina totogi ia te mālamanei ʼaki tona taʼataʼa, pea ko te maʼuli heʼegata ʼe ko he meʼa ʼofa ʼe foaki e te ʼAtua “ ʼaki ia Kilisito Sesu totatou ʼAliki.” (Loma 6:23) Pea ko Sesu ʼe ko “te maʼuli” maʼa nātou ʼaē kua mamate. (Soa. 5:28, 29) Tahi ʼaē meʼa, kotou fakakaukauʼi age muʼa, pe koteā ʼaē kā ina fai anai ʼi tona ʼuhiga Pelepitelō Lahi lolotoga tana ʼAfio Iā Taʼu e Afe. ʼEī, ʼe ina foaki anai ki tana hahaʼi fakalogo ʼaē kā māʼuʼuli ʼi te kele, ia te ʼāteaina heʼegata mai te agahala mo te mate!—Hep. 9:11, 12, 28.
16. Koteā te tupuʼaga ʼaē ke tou mulimuli iā Sesu?
16 Koia ko te tali ʼa Sesu kiā Tomasi, ʼe ʼi ai tona ʼuhiga lahi kiā tātou. Ko Sesu ʼe ko te ala, mo te moʼoni pea mo te maʼuli. Ko Ia ʼaē neʼe fekauʼi mai e te ʼAtua ki te mālamanei moʼo haofaki ia te mālamanei. (Soa. 3:17) Pea kapau ʼe fia fakaovi he tahi ki te Tamai, ʼe tonu ke fakalaka iā te ia. ʼE ʼui lelei fēnei ʼi te Tohi-Tapu: “ ʼE mole ʼi ai he fakamaʼuli ʼi he tahi atu, heʼe mole ʼi te lalo lagi he tahi higoa neʼe tuku ki te hahaʼi, ʼe tonu ke tou māʼuʼuli ai.” (Gāue 4:12) Koia, logolā ia te ʼu akonaki ʼaē neʼe tou tui kiai ʼi muʼa atu, kae ʼe ko he agapoto hatatou tui kiā Sesu, mo muli iā te ia, ʼo ina taki ai tātou ki te maʼuli.—Soa. 20:31.
ʼE Fakatotonu Mai Ke Tou Fakalogo Kiā Kilisito
17. He koʼē ʼe maʼuhiga kiā tātou ke tou fakalogo ki te ʼAlo ʼo te ʼAtua?
17 Neʼe hā kiā Petelo, mo Soane pea mo Sake ia te meʼa fakaofoofo. ʼI te temi ʼaia, neʼe natou logo ki te leʼo mai te lagi ʼe ina ʼui fēnei: “Ko ia nei ʼe ko toku ʼAlo, ia ia ʼaē neʼe fili. Ke kotou fakalogo kiā te ia.” (Luka 9:28, 29, 35) ʼE maʼuhiga ke tou mulimuli ki te fakatotonu ʼaē ke tou fakalogo ki te Mēsia.—Lau ia Gāue 3:22, 23.
18. ʼE tou lava fakalogo feafeaʼi kiā Sesu Kilisito?
18 Ko te fakalogo kiā Sesu ʼe ko hatatou ‘sioʼi tuʼumaʼu ia ia, mo tou tokagaʼi fakalelei tana faʼifaʼitaki.’ (Hep. 12:2, 3) Koia ʼe lelei ke “makehe tatatou tokagaʼi te ʼu meʼa” ʼaē ʼe tou lau ʼo ʼuhiga mo ia ʼi te Tohi-Tapu pea ʼi te ʼu tohi ʼa “te tagata kaugana agatonu mo poto,” pea mo te ʼu akonaki ʼaē ʼe tou logo ʼi te ʼu fono Fakakilisitiano ʼo ʼuhiga mo ia. (Hep. 2:1; Mat. 24:45) Ko tātou ko tana ʼu ovi, koia ʼe tou fia fakalogo kiā Sesu pea mo mulimuli iā te ia.—Soa. 10:27.
19. Koteā ʼaē kā tokoni mai anai ke tou mulimuli tuʼumaʼu pē iā Kilisito?
19 ʼE tou lava mulimuli tuʼumaʼu pē koa iā Kilisito logolā te ʼu faigataʼaʼia? ʼEī, ʼe tou lava ia te faʼahi ʼaia mo kapau ʼe tou “haga taupau maʼu te faʼifaʼitakiʼaga ʼo te ʼu folafola ʼo te maʼuli,” ʼo tou maʼuliʼi te ʼu akonaki ʼaē neʼe tou ako “ ʼaki te tui pea mo te ʼofa ʼaē ʼo ʼuhiga mo Kilisito Sesu.”—2 Tim. 1:13.
Koteā ʼAē Neʼe Kotou Ako?
• He koʼē ko tatatou mulimuli ʼaē iā “Kilisito” ʼe feala ai hatatou ʼiloʼi lelei age ia Sehova?
• He koʼē ko tatatou faʼifaʼitakiʼi ia Sesu ʼe hagē pē ko hatatou faʼifaʼitakiʼi ia Sehova?
• Koteā te fakaʼuhiga ʼo te ʼui ʼaē ko Sesu ʼe ko “te ala pea mo te moʼoni pea mo te maʼuli”?
• He koʼē ʼe tonu ke tou fakalogo ki te Fakanofo ʼa Sehova?
[ʼU fehuʼi ʼo te ako]
[Paki ʼo te pasina 29]
Neʼe fakahā lelei e te ʼu akonaki ʼa Sesu ia te manatu māʼoluga ʼa Sehova
[Paki ʼo te pasina 30]
ʼE tonu ke tou mulimuli agatonu ʼi te Fakanofo ʼa Sehova
[Paki ʼo te pasina 32]
Neʼe ʼui fēnei e Sehova: “Ko ia nei ʼe ko toku ʼAlo . . . ke kotou fakalogo kiā te ia”