Xiñee naquiiñeʼ chinándanu Cristu
Xiñee naquiiñeʼ chinándanu Cristu
«Tu gacalaʼdxi gaca xpinne la? gusiaanda laca laa [...] ne gueda nanda naa.» (LUC. 9:23)
1, 2. Xiñee nabé risaca nga guidúʼyanu xi razón nápanu para chinándanu Cristu.
¡NABÉ riecheʼ Jiobá ora guʼyaʼ cani nahuiiniʼ ne cani maʼ huaniisi guzulucaʼ gúnicaʼ ni nabe! Pa nácaluʼ tobi de ca binni ni cayuni zacá la? cadi gusaanaluʼ de gúʼndaluʼ Biblia ne cheluʼ ca guendaridagulisaa ca, purtiʼ zacá zánnaluʼ cani rusiidiʼ Biblia de Dios. Ora maʼ bíʼniluʼ ca nga zanda guiníʼ ique chaahuiluʼ ca diidxaʼ guníʼ Jesús riʼ: «Tu gacalaʼdxi gaca xpinne la? gusiaanda laca laa, ne cadi lica guiá xpida sínuque usaana ni lu naya irá dxi ne gueda nanda naa» (Luc. 9:23). Ca diidxaʼ ni maʼ bidúʼndanu ca rusiidicani laanu naquiiñeʼ gusiáʼndanu laca laanu ne gácanu xpinni Cristu. Xiñee risaca gúninu nga yaʼ. Lu tema riʼ zadúʼyanu xiñee (Mat. 16:13-16).
2 Yanna pa maʼ xadxí de zinándanu Cristu yaʼ. Jmaruʼ si naquiiñeʼ gúninu casi biʼniʼ Cristu (1 Tes. 4:1, 2). Neca maʼ xadxí de nácanu xpinni Cristu o nacubi bizulunu la? naquiiñeʼ guiníʼ íquenu xiñee zinándanu laabe. Purtiʼ ora gúninu zacá jmaruʼ si zusihuínninu zinándanu laabe lu guiráʼ ni gúninu, casi guníʼ Pablu que. Guidúʼyanu gaayuʼ razón.
Ziuʼnu jma gaxha de Dios
3. Xi chupa modo zanda gunibiaʼnu Dios.
3 Dxi guyé apóstol Pablu Atenas bizuhuaa galahuiʼ ti lugar láʼ Areópago ne guníʼ: «Gudixhe [Dios] pabiáʼ indaa cada raza ne paraa cueza caʼ. Gudixhe be irá binni ndaani guidxilayú para uyubi laabe casi ñaca zixubi ná ca dede idxela ca laabe, purti cadi zitu nuu be, sínuque gaxha doʼ nuu be de cada tobi de laanu» (Hech. 17:22, 26, 27). Zacá ni, cani cuyubi Dios zanda gunibiáʼ chaahuicabe laabe. Ximodo zanda gúnicabe nga yaʼ. Naquiiñeʼ gúʼyacabe guiráʼ ni bizaʼbe purtiʼ laacani nabé rusiidicani laanu ximodo laabe ne pabiáʼ poder nápabe (Rom. 1:20). Biblia laaca rusiidiʼ laanu stale cosa de Jiobá (2 Tim. 3:16, 17). Ora jma guiníʼ íquenu cani bizáʼ Jiobá ne guizaaláʼdxinu gánnanu ximodo laabe ne binni la? jma zunibiáʼ chaahuinu laabe (Sal. 77:12).
4. Xiñee jma zaca xhamígunu Jiobá pa chinándanu Cristu.
4 Pa chinándanu Cristu laaca zacaneni laanu chuʼnu jma gaxha de Jiobá. Purtiʼ Jesús maca guyuu ra nuu Bixhoze dede «dxi caʼru [cha] guidxilayú» ne nabé risaca dxiiñaʼ bíʼnibe ne laa (Juan 17:5). Ne «de laa [be] zeeda irá ni bizáʼ Dios» (Apo. 3:14). Guiráʼ ca millón de iza bibani primé Xiiñiʼ Dios, ni «maca nuu [...] ante cha irá xixé ni nuu» ca, bíʼnibe stale cosa. Laabe qué nixélebe cueʼ Jiobá ne nayecheʼ modo bíʼninebe laa dxiiñaʼ, ngue runi zanda guininu qué huayuuruʼ binni gaca xhamigu casi xhamígucabe. Jesús cadi biiyaʼ si xi guiráʼ biʼniʼ Bixhoze, xi runi sentir ne ca guenda stiʼ, sínuque laaca bíʼnibe guiráʼ ni bíʼyabe biʼniʼ. Pur ngue beeda gácabe casi Bixhózebe, nga runi Biblia na: «Qué randa riduʼya nu Dios, peru bisihuinni Xiiñi be tu naca be» (Col. 1:15). Rihuinni dxíchica zanda gaca xhamígunu Jiobá pa chinándanu ejemplu stiʼ Cristu.
Jma zusihuínninu nácanu casi Dios
5. Xi zacané laanu gácanu casi Jiobá, ne xiñee.
5 Dios bizáʼ binni casi laa, nga runi zanda gusihuínninu ca guenda ni nápabe (Gén. 1:26). Apóstol Pablu gudxi ca xpinni Cristu ca diidxaʼ riʼ: «Ma xiiñi Dios laatu ne nadxii laatu. Yanna laucaalaʼdxi gaca tu casi laa» (Efe. 5:1). Ne ni zacané laanu gácanu casi laabe nga chinándanu Cristu. Xiñee yaʼ. Purtiʼ guirútiruʼ huasihuinni xi runi sentir Dios, ca guenda stiʼ ne modo riníʼ ique casi bisihuínnibe cani. Ne guirútiruʼ tu huayanda huasiene ni dxandíʼ de Jiobá biaʼ modo bisiénebe ni. Jesús cadi bisiidiʼ si binni tu láʼ Bixhoze, sínuque laaca bisiidiʼ laacabe guiráʼ ca guenda nápabe (biindaʼ Mateo 11:27). Ne bisihuínnibe ni lu cani guniʼbe ne lu cani bíʼnibe.
6. Xi rizíʼdinu de Jiobá pur cani bisiidiʼ Jesús.
6 Lu guiráʼ ni bisiidiʼ Jesús bisihuinni xi racalaʼdxiʼ Dios guni ca xpinni ne xi runi sentirbe pur laacaʼ (Mat. 22:36-40; Luc. 12:6, 7; 15:4-7). Casi dxi guníʼ Jesús tobi de ca Chii Mandamientu ra na: «Cadi chúʼneluʼ ni cadi xheeluʼ» que, bisiénebe xi guiráʼ riníʼ ique ti hombre ante chuʼné ni cadi xheelaʼ, ne ximodo ruuyaʼ Dios ni caníʼ íquebe gúnibe ca. Jesús guníʼ: «Neca chuʼlaʼdxi si tuuxa ti gunaa ni cadi xheelaʼ, ne icá ique chuʼ né laabe la? ma bichee, neca qué ñuu né pe laabe» (Éxo. 20:14; Mat. 5:27, 28). Laabe laaca bisiénebe ti mandamientu zeeda lu Ley ni cadi jneza modo biene ca fariseu que. Laacabe nácabe naquiiñeʼ gannaxhiicabe ca binni xquidxisícabe ne gacananaláʼdxicabe ca xhenemígucabe. Peru Jesús bisiene laacabe xi riníʼ ique Bixhoze de ni caníʼcabe ca ne ca diidxaʼ riʼ: «Laganaxhii cani nanalaʼdxi laatu, ne lainíʼ né Dios pur [...] cani riladxi laatu» (Mat. 5:43, 44; Éxo. 23:4; Lev. 19:18). Pa jma guiénenu ximodo riníʼ ique Dios, xi runi sentir ne xi ribeza gúninu la? jma nagueenda zácanu casi laabe.
7, 8. Xi rusiidiʼ cani biʼniʼ Jesús laanu de Jiobá.
7 Ejemplu stiʼ Jesús rusiidiʼ laanu ximodo Bixhózebe. Ca Evangeliu ca rusiidicani laanu biá Jesús ca binni ni caquiiñeʼ tu gacané laacaʼ ne cani cadiʼdiʼ lu xiixa guendanagana, ne bidxiichinebe ca discípulo stibe ora gucaláʼdxicaʼ nucueezacaʼ caadxi xcuidihuiiniʼ ni nuu guidxiña laabe. Ñee cadi dxandíʼ zanda gánnanu xi runi sentir Jiobá ora guidúʼndanu cani biʼniʼ Jesús la? (Mar. 1:40-42; 10:13, 14; Juan 11:32-35.) Guiráʼ ni biʼniʼ Jesús rusihuínnicani tapa guenda ni jma rihuinni napa Dios. Casi ca milagru ni bíʼnibe que bisihuínnicani poder ni nápabe, ne qué niquiiñedibe poder ca para ñúnibe xiixa para laabe o para ñuninabe binni (Luc. 4:1-4). Ne dxi guládxibe cani rutoo ndaaniʼ yuʼduʼ que, bisihuínnibe rúnibe ni jneza (Mar. 11:15-17; Juan 2:13-16). Laabe gúcabe ti hombre jma nuu xpiaaniʼ que Salomón, zacá bihuínnini pur cani bisiidibe ne ca diidxaʼ ni biquiiñebe para yendabe dede ndaaniʼ ladxidóʼ binni (Mat. 12:42). Yanna, xi zanda guininu ora bisihuinni Jesús nadxii laanu dxi bidii xquendanabani pur laanu yaʼ. Ñee cadi dxandíʼ guirutiʼ tu huayannaxhii laanu «jma que biaʼ» gunnaxhii Jesús la? (Juan 15:13.)
8 Jnézapeʼ modo yenanda Jesús cani runi Bixhoze lu guirá ni guníʼ ne ni biʼniʼ. Ngue runi gunda guniʼbe ca diidxaʼ riʼ: «Ni ma biiya naa la? ma biiya Bixhozeʼ» (biindaʼ Juan 14:9-11). Casi maʼ bidúʼyanu ca, pa chinándanu Cristu zusihuínninu zinándanu Jiobá.
Jiobá nga gulí Jesús
9. Padxí gulí Jiobá Jesús, ne ximodo bíʼnibe ni.
9 Guidúʼyanu ni bizaaca lu iza 29, dxi maʼ napa Jesús 30 iza ne guyé ra nuu Juan ni Riguunisa que. Biblia na: «Casi biluxe uyuu nisa be, biree be de ndaani nisa que, ne mala bixale ibáʼ ne biiya be zeeda yete Espíritu Santu de ibáʼ, casi ti paloma, biaana dxí luguiá be». Óraque nga beeda gácabe Cristu, o Mesías. Ne ca diidxaʼ riʼ bisihuinni Jiobá laa gulí laabe: «Ndi nga Xiiñe ni nadxiee ne ni rusieche naa» (Mat. 3:13-17). ¡Nga runi jnézapeʼ nga chinándanu Cristu!
10, 11. 1) Ximodo riquiiñeʼ título «Cristu» ca lu Biblia. 2) Xiñee cadi naquiiñeʼ gusaananu de chinándanu Jesús.
10 Nuu biaje rieeteʼ Jesús ndaaniʼ Stiidxaʼ Dios casi «Jesucristu», «Cristu Jesús» ne «Cristu». Ora rieeteʼ título Cristu ca despué de lá Jesús casi Jesucristu la? cayeeteʼ tuu nga ni biseendaʼ Dios lu Guidxilayú riʼ ne tuu nga ni gulibe. Ne Jesús bizeeteʼ ni ora guniʼné Bixhoze: «Ne zacaa cabe enda nabani ca ra gunibiáʼ cabe lii ne ra gunibiáʼ cabe Jesucristu ni biseenda luʼ. Lii nga tobi lucha Dios ni dxandíʼ» (Juan 17:3). Yanna ora cayeeteʼ de puestu stiʼ Jesús la? ricá título «Cristu» ca ante de lá Jesús, cásixa ora rieeteʼ «Cristu Jesús» (Rom. 6:23). Ne ora ricá «Cristu» si la? laaca cayeeteʼ de puestu ni napa Jesús casi Mesías (Hech. 5:42).
11 Guionnaʼ modo ricá título «Cristu» ca cusiidicani laanu ti cosa ni nabé risaca: neca bibani Jesús lu Guidxilayú riʼ casi ti binni ne gúdxibe binni xii nga na Dios la? qué ñácadibe tutiica si binni ne qué ñácabe ti ni riguixhená si, purtiʼ Dios peʼ nga gulí laabe. Nga runi qué chuʼ dxi gusaananu de chinándanu laabe.
Jesús si nga neza ra zanda guilá binni
12. Xi diidxaʼ risaca gudxi Jesús apóstol Tomás.
12 Sti razón ni nabé risaca nápanu para chinándanu Cristu ca rihuínnini lu ca diidxaʼ ni gúdxibe ca apóstol stibe chupa chonna hora ante gátibe. Tobi de cosa ni gúdxibe ca discípulo stibe nga chiguni chaahuibe ti lugar para laacaʼ. Guníʼsibe nga gunabadiidxaʼ Tomás laabe xii ngue guniʼbe, de raqué bicábibe laa: «Naa nga neza ca, ne rusiide ni dxandíʼ ne rudiee enda nabani ni qué zaluxe. Iruti zie ra nuu Bixhoze pa cadi pur naa» (Juan 14:1-6). Neca ca once apóstol que nga gúdxibe laacaʼ zuni chaahuibe ti lugar para laacaʼ guibáʼ la? laaca risaca cani para cani chiguibani lu Guidxilayú riʼ sin qué chuʼ dxi gáticaʼ (Apo. 7:9, 10; 21:1-4). Xiñee caninu zacá yaʼ.
13. Ximodo nga beeda gaca Jesús «neza».
13 Jesucristu nga «neza», ne diidxaʼ riʼ riníʼ laasibe nga binni ni zanda guchiña laanu gaxha de Dios. Nga runi, nápanu xidé iquiiñenu lá Jesús ora guni orarnu, purtiʼ zacatiʼ nga zanda gudii Jiobá ni guinábanu laa pa riuuláʼdxibe ni canábanu ca (Juan 15:16, NM). Laaca nuu sti razón ni rusihuinni zeeda gaca Jesús «neza» para laanu. Xi laani ya. Cumu gulenenu donda la? bixheleʼ nga laanu de Dios (Isa. 59:2). Ngue runi, beeda gudii Jesús «xpida para ilá stale binni» (Mat. 20:28). Pur guendaguti stibe nga randa «[r]usiá rini sti[be] laanu de irá ni huachéʼ nu» (1 Juan 1:7). Zacá nga casi ñaca nuxheleʼ Xiiñiʼ Dios ti neza para chúʼnenu Dios tobi si (Rom. 5:8-10). Pa gápanu fe Jesús ne guzúʼbanu stiidxaʼ la? zanda chuʼnu galán ne Dios (Juan 3:36).
14. Xiñee rieeteʼ zeeda gaca Jesús «ni dxandíʼ».
14 Jesús laaca zeeda gaca «ni dxandíʼ», purtiʼ qué nusaanabe de niniʼbe ni dxandíʼ ne bíʼnibe cani guniʼbe. Peru laaca beeda gácabe «ni dxandíʼ», purtiʼ bíʼnibe ni na ca diidxaʼ riguixhená ra cayeeteʼ de Mesías que. Apóstol Pablu guníʼ zacá ni, nabe: «Sínuque laape be beda guni be irá ni ma bidii stiidxa Dios gacaʼ» (2 Cor. 1:20). Ne «irá ni galán ni ma gudixhe Dios» lu Ley ni gucuaa Moisés, «ni naca casi bandá» que, gúcacani dxi beeda Jesús (Heb. 10:1; Col. 2:17). Guiráʼ ca diidxaʼ riguixhená caníʼcani de dxiiñaʼ risaca ni nápabe lu cani maʼ gudixhe ique Dios guni (Apo. 19:10). Para guidúʼyanu gaca cani chiguni Dios la? naquiiñeʼ chinándanu Cristu.
15. Ximodo nga zeeda gaca Jesús «enda nabani».
15 Jesús laaca zeeda gaca «enda nabani» purtiʼ guziʼbe guiráʼ binni ne rini stibe. «Pur Cristu Jesús Señor stinu» nga zusigaʼdeʼ Dios laanu guendanabani ni qué zaluxe (Rom. 6:23). Jesús laaca zeeda gaca «enda nabani», purtiʼ zusibánibe cani maʼ guti (Juan 5:28, 29). Ne cumu nácabe Xaíque stiʼ cani ruzaaquiʼ guʼxhuʼ la? zanda cueebe pecadu ne guendaguti luguiáʼ ca xpínnibe tobi si tiru lu ti mil iza guni mandarbe (Heb. 9:11, 12, 28).
16. Xi razón nápanu para chinándanu Cristu.
16 Casi maʼ bidúʼyanu ca, ni bicabi Jesús Tomás ca laaca nabé risácani para laanu yanna. Jesús nga neza, ni dxandíʼ ne guendanabani. Ne laabe nga gulí Dios para gueedabe lu Guidxilayú ne gulabe laanu (Juan 3:17). Ne laasibe nga zanda guchíñabe laanu ra nuu Bixhózebe. Sicaríʼ cusiene Biblia ni: «Laasi be zanda ulá be laanu, purti iruti ru stobi ndaani guidxilayú ni huaguixhe Dios ulá binni, sínuque laasi be» (Hech. 4:12). Nga runi, neca gadxé nga cani biʼniʼ crenu dxiqué la? yanna ni jma neza nga guni crenu Jesús ne gúninu casi bíʼnibe, purtiʼ zacá nga zacaanu guendanabani (Juan 20:31).
Dios cayabi laanu gucaadiáganu Cristu
17. Xiñee nabé risaca nga gucaadiáganu Xiiñiʼ Dios.
17 Pedru, Juan ne Santiagu biiyacabe dxi bidxaa modo bihuinni Jesús lu dani que. Laacabe binadiágacabe ti ridxi de guibáʼ ni na: «Ndi nga Xiiñeʼ ni nadxieeʼ. Laucaa diaga laa» (Luc. 9:28, 29, 35). Nabé risaca nga gúninu ni na ca diidxaʼ ca ne gucaadiáganu ni gabi Mesías laanu (biindaʼ Hechos 3:22, 23).
18. Ximodo zusihuínninu cucaadiáganu Jesús.
18 Naquiiñeʼ guiduʼyaʼ chaahuinu guiráʼ ni biʼniʼ Jesús, zacá zusihuínninu cucaadiáganu laabe (Heb. 12:2, 3). Nga runi, «jma pe naquiiñe ulabi nu» cani ridúʼndanu lu Biblia ne ca libru ne revista ni rudii «mozo ni nuu xpiaani ne ni runi jneza» laanu, ne zaqueca guiráʼ ni rucaadiáganu de laabe lu ca guendaridagulisaa ca (Heb. 2:1; Mat. 24:45). Naquiiñeʼ gucaadiaga chaahuinu Jesús ne gúninu casi bíʼnibe purtiʼ laabe nga Pastor stinu (Juan 10:27).
19. Xi zacané laanu cadi gusaananu de chinándanu Jesús.
19 Ñee zanda chinándarunu Cristu neca tiidinu lu intiica guendanagana la? Zanda gúninu ni pa chinándanu ni bisiidiʼ Jesús laanu purtiʼ nga nga ni dxandíʼ, ne ni riníʼ ca diidxaʼ ca nga «cadi ixele[nu] de ni runi cre nu, nin usaa[na]nu de ganaxhii[nu] binni. Zanda ganaxhii saa nu purti nuu né nu Cristu Jesús tobi si» (2 Tim. 1:13).
Xi biziidiluʼ
• Xiñee ziuʼnu jma gaxha de Jiobá pa chinándanu Cristu.
• Xiñee zanda guininu zinándanu ejemplu stiʼ Jiobá ora chinándanu ejemplu stiʼ Jesús.
• Ximodo nga zeeda gaca Jesús «neza», «ni dxandíʼ» ne ni rudii «enda nabani».
• Xiñee naquiiñeʼ gucaadiáganu Jesús, ni gulí Jiobá que.
[Guendarinabadiidxaʼ stiʼ párrafo]
[Dibuju/foto ni zeeda lu yaza 29]
Cani bisiidiʼ Jesús ca rusihuínnicani pabiáʼ risaca cani riníʼ ique Jiobá
[Dibuju/foto ni zeeda lu yaza 30]
Cadi gusaananu de chinándanu Jesús, ni gulí Jiobá
[Dibuju/foto ni zeeda lu yaza 32]
Jiobá guníʼ: «Ndi nga Xiiñeʼ [...]. Laucaa diaga laa»