“Panaon ya Agyesel”

“NO SAY pansalita et pilak, say ag-iyesel et balitok.” Ontan so ibabagay kadaanan a proverbio a kuan dan nanlapud saray bansa’d Bukig. Unong ed Brewer’s Dictionary of Phrase and Fable, say kapetekan na satan ed Hebreo et: “No say kantidad na salita et sakey siklo, say ag-iyesel et duara.” Tan oniay insulat nen makabat a Solomon ya ari ed Israel nensaman: “Nipaakar ed amin a bengatla wala so sakey a panaon, tan sakey a panaon nipaakar ed balang pegdat ed leksab na tawen . . . panaon ya agyesel, tan panaon a pansalita.”​—Ecl. 3:1, 7.

Balet, kapigan ta mas manepeg so ag-iyesel nen say pansalita? Diad Biblia et aminpigapigan asalambit tan atukoy iray salitan ‘pandeen’ tan ‘ag-iyesel.’ Diad konteksto na saratan a salita et napatnagan so manga taloran pamaakaran a ditan et matukoy so ag-iyesel. Pantongtongan tayo pa natan so nipaakar ed ag-iyesel bilang panangipatnag na respeto, pakanengnengay inka-alwar tan pakatebek, tan say kiwala’d mareen a pasen bilang tulong ed pandalepdep.

Pakapatnagay Respeto

Panangipatnag na respeto tan galang so ag-iyesel. Inkuan nen propeta Habacuc: “Say KATAWAN et walad dalem na masanton templo to. Mandeen komon ed arap to so balang sakey a too diad tapew na dalin.” (Hab. 2:20, Maung a Balita) Saray tuan managdayew et nepeg a “mareereen komon a manalagar ed panangilaban nen Jehova.” (Tag. 3:26) Oniay inkanta na salmista: “Mandeen ka’d arap [nen Jehova], tan mananos kan manalagar ed sikato; agka nagogonigon lapud saray totoon onaaligwas.”​—Sal. 37:7, Maung a Balita.

Nirayew kasi Jehova anggan anggapoy salita? Bueno, agta no maminsan et agtayo la makasel lapud pandindinayew ed karakpay palsa? Agta anggan diad panisip tayo labat ed satan a karakpan et nidadayew tayo lay Dios ed puso tayo? Ontan met, oniay inkuan nen David nipaakar ed saray palsa: “Sikato so idayew yo, sikayo katawenan na saray katawenan, tan sikayo danudanum a wadtan ed labas na saray katawenan. Idayew da so ngaran nen Jehova.”​—Sal. 148:4, 5.

 No si Jehova a mismo et makanepegay respeto, di ontan met ed saray ibabalikas to. Alimbawa, sanen ibabalikas na propeta na Dios a si Moises so panamatanir to ed nasyon na Israel, oniay imbilin to kaiba iray saserdote: “Mandeen kayo tan talineng yo . . . so boses nen Jehova a Dios [yo].” Anggan saray ugugaw et nepeg ya ondengel a maong sano mandaragup iray Israelita parad pambasay Ganggan na Dios. Inkuan nen Moises: “Pantitipon mo naani totoo, saray lalaki tan bibii, tan saray angkelag . . . pian narengel da tan natumbok da.”​—Deu. 27:9, 10; 31:11, 12.

Matukotukoy labat sirin a marespeton ondengel iray managdayew nen Jehova natan ed saray instruksion a naaawat da diad saray aral, asemblea, tan kombension! No ipapaliwawa so makana iran katuaan na Biblia ed plataporma, agta kaandiay respeto ed Salita na Dios tan ed organisasyon to no mantotongtong itayo anggan agmet kaukolan? Say panaoy sesyon et panaoy idengel tan ag-iyesel.

Anggan diad saray pantotongtong, say idengel a maong et pakapatnagay respeto. Singa bilang, inkuan na patriarkan si Job ed saray mangaakusa’d sikato: “Ibangat yo ak, et mandeen ak.” Mabulos a dinmengel, ya ag-inmese-esel si Job sanen nansalita ira. Insan nen mansalita met la, oniay kinerew to: “Mandeen kayo, paulyan yo ak a bukor pian makapansalita ak.”​—Job 6:24; 13:13.

Pakapatnagay Inka-alwar tan Pakatebek

Kuan na Biblia: “Say mamokpok ed saray bibil to sikato so makabat.” “Say too a makatalos [odino, walaay pakatebek] mandeen.” (Uli. 10:19; 11:12) Imanoen pa so alay abig ya impangipatnag nen Jesus ed inka-alwar tan pakatebek diad agto inyesel. Sanen atebek ton anggapo lanlamang so kanay iyebat to ed saramay mamubusol ed sikato, ‘agla inmesel.’ (Mat. 26:63) Diad saginonor, sanen uusayen nen Pilato, ‘agbalot inmebat’ si Jesus. Pinaulyan ton say agawaan to lan ngaran ed publiko so mansalita parad sikato.​—Mat. 27:11-14.

Maabig met no pokpokan tayoy bibil tayo, lalo la no apasyodot itayo. Inkuan na sakey a proverbio: “Say matantan a manpasnok baleg so pakatalos to, balet say maigagano ya espiritu paatageyen to so inkaatiw.” (Uli. 14:29) No diad sakey a makapasulag a situasyon et agtayo la nonotey ibaga tayo, ompan makapangibulos itayoy makapuy a salita, a nayarin pagbabawian tan pakakonsiensiaan tayo.

Nipapatnag tayoy inka-alwar no ap-apigeren tayoy panagsalita tayo diad arapan na mauges a totoo. Sano babalawen itayo diad pulongan, nayarin maabig no agtayo la oneesel. Sakey ni, no diad eskuelaan odino diad trabaho et walay mangilurey na mabanday o mansalitay binabastos, agta no maminsan et mas maabig no agtayo la oneesel pian ag-ompaway a miaabobon tayo? (Efe. 5:3) “Bembenan ko so sangik . . . leleg na bagel a wala ed arapan ko,” so kuan na salmista.​—Sal. 39:1.

 Say toon “makatalos,” et napanmatalkan ed saray bengatlan kompidensyal. (Uli. 11:12) Say sakey a tuan Kristiano et seguroen ton agto iratan ilalabir ed arum. Nagkalalo lan nepeg a manalwar iray elder ed sayan pamaakaran pian agnaekal so talek na saray membro na kongregasyon ed sikara.

No maminsan, say agpansalita et walay positibon epekto to. Say Ingles a managsulat nen koma-19 a siglo a si Sydney Smith et nansulat na onia nipaakar ed sakey a kabat to: “Bali-bali pitotongtong to ta amta to no kapigan so ag-iyesel.” Kanian, no mantotongtong so sankaaro, nepeg ya aliwa labat a saksakey so mansalita. Say toon maong ya ondengel et balibalin katongtong.

Oniay insimbawa nen Solomon: “Dia ed karaklan na saray salita ag-onkulang so pakalukso, balet say mamokpok ed saray bibil to sikato so makabat.” (Uli. 10:19) Sirin, no daiset so salita tayo, nayarin daiset met so pakalingo tayo. Diad tua, “nayarin ipasen a makabat tan walay pakatalos so toon makulangkulang no mandeen tan pepetan toy sangi to.” (Uli. 17:28, Maung a Balita) Kanian, ipikasi tayon naynay ed si Jehova a ‘mangipasen komon na bantay ed pinto na bibil tayo.’​—Sal. 141:3.

Tulong ed Panagdalepdep

Ibabaga na Kasulatan a say toon manbibilay ed kaptekan et ‘mandadalepdep ed ganggan na Dios ed agew tan labi.’ (Sal. 1:2) Kapigan ta so balibalin pandalepdep?

Si Isaac ya anak nen patriarkan Abraham et ‘pinmaway ed uma a nandalepdep nen ngarngarem la.’ (Gen. 24:63) Pinili toy panaon tan pasen a mareen pian mandalepdep. Si Arin David met so nandalepdep diad mareen lan oras ed labi. (Sal. 63:6) Anggan si Jesus a perpekto la et talagan impanaon toy pambukbukor tan pandalepdep, diad mareen iran pasen a singa diad kapalandeyan, desierto, tan diad pasen ya arawi’d totoo.​—Mat. 14:23; Luc. 4:42; 5:16.

Maabig ed sikatayo so iyakar ed mareen a pasen. Ditan et mas nausisa tayoy inkasikatayo, tan importante iya ed panamaaligwas na personalidad. Say mareen a pasen et makaparelaks tan ontulong ed ideey nonot. Say pandalepdep legan na mareen iran bekta et ontulong ed sikatayon bidbiren iray limitasyon tayo, magmaliw a mapaabeba, tan mas naapresya iray talagan importantin bengatla ed bilay.

Anggaman maabig so ag-iyesel, wala met so “panaon na pansalita.” (Ecl. 3:7) Saray tuan managdayew natan et makulikulin manpupulong na maong a balita na Panariay Dios “ed sankamundoan.” (Mat. 24:14) Diad idarakel da et mas ondarakel met so makakadngel ed magayagan pangibabalita ra. (Miq. 2:12) Komon ta sakey tayo ed saray maseseg a mangiyaabawag na maong balita na Panarian tan mangipapakabat na alay abig iran gawa na Dios. Legan tayon mibibiang ed sayan importantin kimey, komon ta napatnagan met ed kabibilay tayo, a bibidbiren tayon mas maabig so ag-iyesel no maminsan.

[Litrato ed pahina 3]

Legan na saray pantitipon tayo, nepeg itayon ondengel pian makaaral

[Litrato ed pahina 4]

Diad pulongan, nayarin maabig so aglabat la iyesel sano apansalitaan itayoy aliwa

[Litrato ed pahina 5]

Maabig so pandalepdep diad mareen a pasen