Aka revista liytʼirinakan jisktʼäwinakapa

¿Kunapachas Supayax alaxpachat jaquqanitäxäna? (Apo. 12:1-9.)

Kunapachas ukax pasäna ukxa Bibliax janiw siskiti, ukampis Apocalipsis libronxa, walja chimpunakatwa parli, uka chimpunakaw kunapachas jaquqanitäxäna uk sum amuytʼayistu. Kunapachatï Cristox Diosan Apnaqäwipan apnaqañ qalltkäna ukaw nayrïr chimpuxa. Uka Apnaqäwix uttʼayaskäna ukhaxa, “mä jachʼa nuwasiñaw alaxpachanxa utjäna”, ukanwa Supayax atipjata ukat aka Uraqiru jaquqanita uñjasïna.

Khä 1914 maranwa, Cristox Diosan Apnaqäwipan apnaqañ qalltawayi, ukharakiw ‘markanakar churat tiempox’ tukusiwayi, ukhamwa Bibliax qhanañchistu (Luc. 21:24). * Uka qhipatwa alaxpachan chʼaxwäwix qalltäna ukat Supayarus aka Uraqir jaquqasinirakïna, ukampis ¿uka urkamax qhawqha tiempos paspachäna?

Apocalipsis 12:4 jiskʼa tʼaqax akham siwa: “Aka [Supaya] dragonasti uka wawachasiri warmin nayräxaparuw saytʼasi, uka wawar ukspacha manqʼantañataki” sasa. Ukhamax Diosan Apnaqäwipa uttʼayaskäna ukjpachaw Supayax uka Apnaqäwir tukjañ munäna sasaw uka qillqatax qhanañchi. Ukampis Jehová Diosas uka Apnaqäwir jarkʼaqkchïnxa, Supayax qʼalpunwa tukjañ munäna. Ukhamax ‘Miguelampi angelanakapampix’ janiw ukhamak uñchʼukipkänti, jan ukasti uka Apnaqäwi jarkʼaqañ laykux ‘dragonampiru angelanakapampirux’ aka Uraqiruw alaxpachat jaquqanipxäna. Ukhamax 1914 maran Diosan Apnaqäwipax uttʼayasxäna uka qhipatwa Supayax atipjata ukat alaxpachat jaquqanita uñjasïna.

Maysa tuqitxa, uka Apnaqäwix uttʼayaskäna uka qhipatwa alaxpachar sarir cristianonakax jaktapxi, sasaw Biblian profecianakapax qhanpach amuytʼayistu (Apo. 20:6). * Ukampisa, ajllit cristianonakax Cristompi chikaw dragonampir saxranakapampiru jaquqanipxi sasax janiw Bibliax siskiti. Kunattix alaxpachar sarañatak jaktapkäna ukhaxa, chʼaxwäwix tukuyxpachänwa ukat Supayampi saxranakapampis alaxpachat jaquqanitäxapxpachänwa.

Ukhamaxa, kuna tiemponsa Supayampi saxranakapampix alaxpachat jaquqanit uñjasiwayapxi ukxa janiw Bibliax qhanañchkiti. Ukampis kunjamtï uñjawayktanxa, 1914 maransa ukax apasiwaykaspa ukhamwa uñachtʼayistu, kunattix uka maranwa Cristox Diosan Apnaqäwipan apnaqañ qalltawayi.

[Qhanañchäwinaka]