მკითხველთა შეკითხვები

როდის იქნა გადმოგდებული სატანა ზეციდან? (გამოცხ. 12:1—9)

ბიბლიის წიგნ „გამოცხადებაში“ არ არის მოხსენიებული სატანის ზეციდან გადმოგდების ზუსტი დრო, თუმცა აღწერილია მოვლენები, რომლებიც გვეხმარება, გავიგოთ, დაახლოებით როდის მოხდა ეს. ამ მოვლენათა შორის ერთ-ერთია მესიის სამეფოს დამყარება. ამის შემდეგ „გამოცხადება“ მოიხსენიებს ‘ზეცაში დაწყებულ ომს’, რასაც სატანის დამარცხება და მისი ზეციდან გადმოგდება მოსდევს.

ბიბლიიდან ნათლად ჩანს, რომ „უცხოტომელთათვის დანიშნული დროები“ 1914 წელს დასრულდა და ღვთის სამეფო დამყარდა (ლუკ. 21:24). * რამდენად მალე დაიწყო ამის შემდეგ ზეცაში ომი, რასაც ზეციდან სატანის გადმოგდება მოჰყვა?

„დრაკონი [სატანა] იდგა მშობიარე ქალის წინ, რათა, როცა იმშობიარებდა, შთაენთქა მისი ბავშვი“, — ვკითხულობთ გამოცხადების 12:4-ში. აქედან ჩანს, რომ სატანას სურდა ახლად დამყარებული სამეფოს დაუყოვნებლივ განადგურება, თუმცა იეჰოვამ შეაჩერა სატანა და მან ვერ განახორციელა თავისი ბოროტი განზრახვა. სატანა ყოველ ღონეს ხმარობდა, რომ ძირი გამოეთხარა ახლად დამყარებული სამეფოსთვის. ამიტომ, ‘მიქაელმა და მისმა ანგელოზებმა’ დაუყოვნებლივ იმოქმედეს და „დრაკონი და მისი ანგელოზები“ ზეციდან გადმოყარეს, რათა აღარ ევნოთ ღვთის სამეფოსთვის. აქედან გამომდინარე, ლოგიკურია დავასკვნათ, რომ სატანის დამარცხება და მისი ზეციდან გადმოგდება 1914 წელს, ზეციერი სამეფოს დამყარებიდან მალევე მოხდა.

გასათვალისწინებელია კიდევ ერთი ფაქტორი — ცხებული ქრისტიანების აღდგომა, რომელიც, როგორც ბიბლიიდან ვიგებთ, ზეციერი სამეფოს დამყარების შემდეგ დაიწყო (გამოცხ. 20:6). * „გამოცხადებაში“ ქრისტეს არც ერთ ცხებულ ძმაზე არ არის ნათქვამი, რომ ისინი თან ახლდნენ იესოს დრაკონისა და მისი ანგელოზების წინააღმდეგ გამართულ ბრძოლაში, ამიტომ ზეცაში ომი და სატანისა და მისი დემონების დედამიწაზე გადმოგდება მანამდე მოხდა, სანამ ქრისტეს ძმების აღდგომა დაიწყებოდა.

ამრიგად, ბიბლია არ ასახელებს სატანისა და მისი დემონების ზეციდან დედამიწაზე გადმოგდების ზუსტ დროს, მაგრამ ზემოაღნიშნულის თანახმად, ნათელია, რომ ეს მოვლენა 1914 წელს ზეცაში იესო ქრისტეს გამეფებიდან მალევე მოხდა.

[სქოლიოები]