Nkonko ya babadi

Ndîba kayi diakipatabu Satana mu diulu?​—Buak. 12:1-9.

Nansha mudi mukanda wa Buakabuluibua kauyi uleja tshikondo tshijalame tshivuabu bipate Satana mu diulu, udi utela malu adi mua kuambuluisha bua kutshinka tshikondo tshivuabu bamuipatamu. Bualu bua kumpala ndijadikibua dia Bukalenge bua Masiya mu diulu. Pashishe, ‘mvita minene yakenzeka mu diulu,’ kutshimunabu Satana ne kumuipatamu.

Bible udi uleja patoke ne: mu 1914 ke muvua “tshikondo tshia bantu ba bisamba bia bende” tshishikile, ne ke muvua Bukalenge bua Nzambi butuadije kukokesha. * (Luka 21:24) Kuakapita matuku bungi kayi panyima pa bualu ebu bua mvita kuenzekayi mu diulu ne kuipatabu Satana mu diulu?

Buakabuluibua 12:4 udi wamba ne: Satana anyi ‘Dragon wakimana kumpala kua mukaji wakadi wamba kulela bua kudiaye muanende pamulelaye.’ Bualu ebu budi buleja ne: Satana uvua musue kubutula Bukalenge bupiabupia anu ku ntuadijilu kuabu. Nansha muvua Yehowa mumupangishe bua kukumbaja dijinga diende dibi edi, Satana uvua mudisuike ne muende muonso bua kubutula Bukalenge abu. Nunku bidi bimueneka ne: ‘Mikaele ne banjelu bende’ kabavua ne bua kujingakana bua kuipata ‘Dragon ne banjelu bende’ mu diulu bua kabenzedi Bukalenge bibi to. Bualu ebu budi buleja ne: bakatshimuna Satana mu diulu ne kumuipatabu mutantshi mukese panyima pa dijadikibua dia Bukalenge bua Nzambi mu 1914.

Bualu bukuabu budi mua kutuambuluisha ke dibishibua dia bena Kristo bela manyi. Bilondeshile Bible, dibishibua edi diakatuadija katupa kakese panyima pa dijadikibua dia Bukalenge bua Nzambi mu diulu. * (Buak. 20:6) Bu mudi Bible uleja ne: muena Kristo muela manyi nansha umue kavua ne Yezu pavuaye uluangana ne Dragon ne banjelu bende, mvita ayi ivua mienzeke ne bakavua bipate Satana ne bademon bende mu diulu kumpala kua dibishibua dia bana babu ne Kristo kutuadijadi.

Nunku, Bible kena uleja patoke tshikondo tshijalame tshivuabu bipate Satana ne bademon bende mu diulu to. Nansha nanku, bidi bimueneka ne: bualu ebu buakenzeka katupa kakese panyima pa dijadikibua dia Yezu Kristo mu Bukalenge mu diulu mu 1914.

[Mêyi adi kuinshi]