Dipotšišo tše Tšwago go Babadi

Sathane o rakilwe neng legodimong?​—Kut. 12:1-9.

Gaešita le ge puku ya Kutollo e sa re botše nako e lebanyago yeo Sathane a rakilwego ka yona, e bolela ka lelokelelo la ditiragalo tšeo di ka re thušago go lekanya gore o rakilwe neng legodimong. Tiragalo ya pele lelokelelong leo ke go tswalwa ga Mmušo wa Mesia. Ka morago ga moo, ‘go ile gwa tsoga ntwa legodimong,’ e lego seo se dirilego gore Sathane a fenywe gomme mafelelong a rakwe legodimong.

Mangwalo a bontšha gabotse gore 1914 ke ngwaga woo ka ona “dinako tše di beilwego tša ditšhaba” di fedilego le woo Mmušo o theilwego ka ona. * (Luka 21:24) Ntwa e tsogile neng ka morago ga tiragalo yeo, e lego seo se feleleditšego ka gore Sathane a rakwe?

Kutollo 12:4 e re: “Drakone [Sathane] ya fela e eme pele ga mosadi yo a bego a tla tloga a belega, gore ge a belega, e je ngwana wa gagwe.” Se se bontšha gore Sathane o be a nyaka go fediša ka pela Mmušo wo o sa tšwago go thewa, gatee-tee ka morago ga ge o theilwe ge e ba go kgonega. Gaešita le ge go tsena ditaba gare ga Jehofa go ile gwa šitiša Sathane gore a se ke a phethagatša boikemišetšo bja gagwe bjo kgopo, Sathane o be a ikemišeditše e bile a sa kgaotše maikemišetšong a gagwe a go fediša Mmušo o sa tšwago go thewa. Go molaleng gore “Mikaele le barongwa ba gagwe” ba be ba tla gata mogato ka pela e le gore ba tloše “drakone le barongwa ba yona” legodimong e le gore ba se ke ba baka tshenyo Mmušong woo. Se se šišinya gore go fenywa le go rakwa ga Sathane go diregile ka pela ka morago ga go tswalwa ga Mmušo ka 1914.

Taba e nngwe e swanetšego go elwa hloko ke gore tsogo ya Bakriste ba tloditšwego e thomile kapejana ka morago ga go thewa ga Mmušo, go etša ge bohlatse bja Mangwalo bo bontšha. * (Kut. 20:6) Ka ge go se le o tee wa bana babo Jesu ba tloditšwego yoo go bolelwago ka yena a e-na le Jesu ge a e-lwa le drakone le barongwa ba yona, ntwa yeo e bego e le legodimong le go rakwa ga Sathane le batemona ba gagwe di swanetše go ba di be di phethilwe nakong ya ge tsogo ya bana babo Kriste e thoma.

Ka gona, Beibele ga e re botše nako e lebanyago yeo ka yona Sathane le batemona ba gagwe ba rakilwego legodimong. Lega go le bjalo, go molaleng gore tiragalo ye e diragetše ka pela ka morago ga go bewa ga Jesu Kriste sedulong sa bogoši legodimong ka 1914.

[Mengwalo ya tlase]