Kwestin From Reader

Wanem taem nao olketa torowem Satan kam daon from heven?​—⁠Rev. 12:​1-9.

Nomata Bible buk Revelation no talem barava taem wea olketa torowem kam daon Satan, hem storyim samfala samting wea savve helpem iumi for savve long datfala taem. Firstfala samting nao hem taem Messiah Kingdom hem start for rul. Bihaen datwan, “war hem start long heven,” wea Satan hem lus and olketa torowem kam daon from heven.

Bible showimaot hao 1914 hem start bilong “end long taem wea God markem olketa for rul” and Kingdom hem start. * (Luke 21:24) Long wanem taem bihaen Kingdom hem start nao olketa torowem Satan kam daon?

Revelation 12:4 talem hao “dragon hem gohed for standap front long datfala woman wea redi for bornem pikinini, mekem taem hem bornem, dragon hia savve kaikaim pikinini bilong hem.” Diswan showimaot hao Satan hem lukaotem wei for stopem datfala Kingdom. Nomata Jehovah stopem Satan for no spoelem disfala Kingdom wea just start, Satan nating givap for spoelem. From datwan, “Michael and olketa angel bilong hem” olketa kwiktaem for aotem “datfala big snek and olketa angel bilong hem” from heven mekem olketa no spoelem datfala Kingdom. Luk olsem wei wea Satan lus and taem olketa torowem hem kam daon long earth, hem happen no longtaem bihaen Kingdom hem start long 1914.

Narafala samting for tingim nao hem taem wea olketa anointed Christian laef bak. Bible showimaot hao datwan hem happen no longtaem bihaen Kingdom hem start. * (Rev. 20:⁠6) From Bible no storyim hao olketa anointed brata bilong Christ faet witim hem long datfala war againstim datfala big snek and olketa angel bilong hem, luk olsem olketa brata bilong Christ start for laef bak long heven bihaen datfala war hem finis.

So Bible hem no talem barava taem wea olketa torowem daon Satan and olketa demon bilong hem from heven. Bat pruv hem stap hao datwan hem happen no longtaem bihaen Jesus Christ kamap King long heven long 1914.

[Olketa Footnote]