Au Uianga a te Aronga Tatau

I naea a Satani i tiria mai ei mei te rangi?—Apo. 12:1-9.

Noatu e kare te puka Pipiria o Apokalupo i akakite tika mai i te tuatau i tiria mai ei a Satani mei te rangi, te taiku maira ra te reira i tetai au tupuanga te ka tauturu ia tatou i te akamanako e i naea aia i tiria mai ei mei te rangi. Ko te tupuanga mua koia oki, ko te akanoo anga i te Patireia o te Mesia. Aru mai i te reira, ko te “tamaki tei runga i te rangi,” tei taki atu ki to Satani autu kore anga e tona tiria mai anga mei te rangi.

Te akakite taka maira te au Tuatua Tapu e ko te mataiti 1914 ko te mataiti ia i ope ei “te au tuatau akatakaia no te au pa enua” e kua akanooia te Patireia. * (Luka 21:24, NW) I naea i muri ake ua i te reira i akamata ai te tamaki i runga i te rangi, i tiria mai ei a Satani ki vao?

Te akakite maira a Apokalupo 12:4 e: “Kua tu iora taua taae ra [ko Satani] ki mua i te aroaro o te vaine i vaitata i te anau ra, kia pou te tamaiti iaia kia anau ra.” Te akaari maira teia e te inangaro ra a Satani i te takore viviki i te Patireia ou, i te taime tikai i akanooia ai te reira. Noatu e kua akao mai a Iehova i te arai ia Satani i te akatupu i tana akakoroanga kino, kua aruaru tikai a Satani e kare i tapupu ana i tana tautaanga i te takino i te Patireia akanoo ouia. No reira kare a “Mikaela e tana au angela” i kaimoumou taime ana i te akaatea i “te taae e tana au angela” mei te rangi mai, kia kore te Patireia e takinoia. E mea tau i reira i te akamanako e ko te autuia anga e te tiria anga mai a Satani mei te rangi, kua tupu te reira i muri ua ake i te akanooia anga te Patireia i te mataiti 1914.

Ko tetai tumu kia akamanakoia koia oki, ko te akatuakaou anga o te au Kerititiano akatainuia​—mei ta te Tuatua Tapu akapapuanga—​kua akamata i muri ua ake i te akanooia anga te Patireia. * (Apo. 20:6) I te mea e kare tetai au taeake akatainuia o Karaiti i piri mai ana kia Iesu i roto i te tamakianga ma te taae e tona au angera, kua oti ke ana te tamaki i runga i te rangi e te tiria anga mai a Satani e tana au temoni ki vao, i te akamataanga te akatuakaou anga o te au taeake o Karaiti.

No reira, kare te Pipiria i akakite mai ana i te tuatau tikai i akaateaia ai a Satani e tana au temoni mei te rangi mai. Noatu rai, te papu ua ra e te aru vaitata maira teia tupuanga ki te akateronoia anga a Iesu Karaiti i runga i te rangi i te mataiti 1914.

[Au Tataanga Rikiriki i Raro]