Aksi fu leisiman

O ten den trowe Satan komoto fu hemel?​—Openb. 12:1-9.

Aladi a Bijbel buku Openbaring no e taki krin o ten den trowe Satan komoto fu hemel, toku a e taki fu sani di ben pasa na a ten dati. Den sani dati kan yepi wi fu kon sabi o ten den trowe Satan komoto fu hemel. A fosi sani di ben pasa na taki a Mesias Kownukondre ben seti. Baka dati, „wan feti bigin na ini hemel”, Satan lasi a feti èn te fu kaba den trowe en komoto fu hemel.

Bijbel e sori krin taki na ini 1914 „a reti ten fu den trakondre sma” kon na wan kaba èn a Kownukondre seti (Luk. 21:24). * O langa baka dati a feti bigin na ini hemel, di den trowe Satan komoto fu drape?

Openbaring 12:4 e taki: „A bigi kaiman ben tan tanapu na fesi na uma di ben de fu meki a pikin, so taki te na uma ben o meki a pikin, a ben kan swari en.” Disi e sori taki Satan ben pruberi fu puru a nyun Kownukondre na pasi, leti baka di a seti. Ma Satan no ben man du den takru sani di a ben abi na prakseri, fu di Yehovah ben tapu en. Toku Satan ben de nomonomo fu puru a nyun Kownukondre na pasi. Fu dati ede, a de krin taki „Mikael nanga den engel fu en” no ben o draidrai fu feti nanga „a bigi kaiman nanga den engel fu en”, èn fu trowe den komoto fu hemel, so taki noti no pasa nanga a Kownukondre. Disi e sori taki Satan lasi a feti èn den trowe en kon na grontapu, syatu baka di a Kownukondre seti na ini 1914.

Meki wi poti prakseri na wan tra sani. Soleki fa Bijbel e sori, dan na opobaka fu den salfu Kresten, bigin syatu baka di a Kownukondre seti (Openb. 20:6). * Bijbel no e taki dati den salfu brada fu Yesus ben feti makandra nanga Yesus teige a bigi kaiman nanga den engel fu en. Fu dati ede, a musu de so taki a feti na ini hemel èn a trowe di den trowe Satan komoto fu drape, ben pasa kaba di den brada fu Krestes bigin kisi wan opobaka.

Sobun, Bijbel no e taki soifri o ten den trowe Satan nanga den ogri yeye fu en komoto fu hemel. Ma a de krin taki a sani disi pasa syatu baka di Yesus Krestes tron Kownu na hemel na ini 1914.

[Futuwortu]