Ngaahi Fehuʻi mei he Kau Lautohí

Naʻe lī hifo fakakū ʻa Sētane mei hēvaní?—Fkh. 12:1-9.

Neongo ʻoku ʻikai ke ʻomai ʻe he tohi Fakahaá ia ʻa e taimi tonu naʻe lī hifo ai ʻa Sētané, ʻoku lave ia ai ki ha ngaahi meʻa hokohoko ʻe lava ke tokoniʻi ai kitautolu ke tau fakafuofuaʻi ʻa e taimi naʻe lī hifo ai ia mei hēvaní. Ko e ʻuluaki he ngaahi meʻa naʻe hokó ko hono fanauʻi ʻo e Puleʻanga Faka-Mīsaiá. Hoko atu ki aí, ko e “tau ʻi he langi,” naʻe iku atu ai ki hono ikunaʻi ʻo Sētane pea faai atu pē ʻo lī hifo ia mei hēvani.

ʻOku fakaʻilongaʻi mahino ʻe he ngaahi Konga Tohi Tapú ʻa e 1914 ko e taʻu ia naʻe ngata ai ʻa e “kuonga ʻo e Senitaile” pea fokotuʻu ai ʻa e Puleʻangá. * (Luke 21:24) ʻI he hili iá ko e hā hono fuoloa pea fakahoko ʻa e tau ʻi hēvaní, ʻo iku ki hono lī hifo ai ʻa Sētané?

“Pea tuʻu ʻa e Talakoni [Sētane] ʻi he ʻao ʻo e fefine naʻe ene ke fānau,” ko e lau ia ʻa e Fakahā 12:4, “koeʻuhi ke ne keina ʻene tama ʻoka faʻeleʻi.” ʻOku hā heni ʻa e loto ʻa Sētane ke toʻo vave atu ʻa e Puleʻanga foʻoú, ʻi he mōmeniti pē ʻo hono fokotuʻú ʻo ka malava. Neongo ʻa e kau mai ʻa Sihova ke taʻofi ʻa Sētane mei hono fakahoko ʻa ʻene taumuʻa fulikivanú, naʻe fakapapauʻi mo feinga taʻemālōlō ʻa Sētane ke fai ha maumau ki he Puleʻanga foʻou ne fokotuʻú. ʻI heʻene peheé, ʻoku ʻuhinga lelei ai ʻa e ʻikai toe tatali ʻa “Maikeli mo ʻene kau ʻangelo” ke lī hifo “ʻa e Talakoni mo ʻene kau ʻangelo” mei hēvani koeʻuhi ke ʻoua ʻe hoko ha maumau ki he Puleʻangá. ʻOku ʻuhinga lelei ʻaupito ke fakaʻosiʻaki ko hono ikunaʻí mo hono lī hifo ʻo Sētané naʻe hoko ia ʻi he hili pē hono fokotuʻu ʻa e Puleʻangá ʻi he 1914.

Ko e tafaʻaki ʻe taha ke fakakaukau ki ai ko e toetuʻu ʻa e kau Kalisitiane paní, ʻa ia—hangē ko ia ʻoku fakahaaʻi ʻe he Tohi Tapú—naʻe hoko ia hili pē ʻa e fokotuʻu ʻo e Puleʻangá. * (Fkh. 20:6) Koeʻuhi naʻe ʻikai ha fanga tokoua pani ʻo Kalaisi ʻoku lave ki ai naʻa nau kau mo Sīsū ʻi he tau mo e talākoní mo ʻene kau ʻāngeló, ko e tau ʻi hēvaní mo hono lī hifo ʻo Sētane mo ʻene kau tēmenioó naʻe ʻosi ia ʻi he taimi naʻe kamata ai e toetuʻu ʻa e fanga tokoua ʻo Kalaisí.

Ko ia ai, ʻoku ʻikai ke fakahaaʻi mai ʻe he Tohi Tapú ʻa e taimi tonu naʻe kapusi ai ʻa Sētane mo ʻene kau tēmenioó mei hēvaní. Kae kehe, ʻoku fakamoʻoniʻi ko e meʻa ko ení naʻe hoko ia ʻi he hili pē hono fakanofo tuʻi ʻo Sīsū Kalaisi ʻi hēvani ʻi he 1914.

[Fakamatala ʻi lalo]